Cidenyabaara magannaw ka baara ye mun ye?

Bibulu bɛ kuma krecɛn kulu fila kan ni olu ye cɛw ye, jɔyɔrɔw bɛ minnu bolo jɛkulu kɔnɔ — “lakɔlɔsibagaw” ani “cidenyabaara magannaw”. (Filipekaw 1:1) A ka ca a fɛ, jɛkulu kelen kelen bɛɛ kɔnɔ i bɛ nin mɔgɔ ninnu caman sɔrɔ yen. Cidenyabaara magannaw bɛ mun kɛ an ye?

U bɛ maakɔrɔw dɛmɛ. U kɛra denmisenin lamɔgɔw ye walima mɔgɔkɔrɔbaw ye, cidenyabaara magannaw gɛrɛlen bɛ Jehova la, dannamaw don, sɛbɛkɛlaw don. Jɛkulu kɔɲɛ nafamaw minnu bɛ senna, u bɛ u mago don olu la, o bɛ se ka kɛ jɛkulu minɛnw kan ani jɛkulu labɛn cogo kan. O bɛ kɛ sababu ye maakɔrɔw bɛ u sinsin u ka jɔyɔrɔ baaraw kan ni o ye mɔgɔw kalanni ani sagagɛnna baara ye.

U labilalen bɛ jɛkulu ye. Cidenyabaara magannaw de bilalen bɛ mɔgɔw kunbɛnni na lajɛw waati la. Dɔw bɛ u mago don fɔlikɛ minɛnw la, dɔw bɛ u janto jɛkulu waari ɲanabo cogo la walima ka gafew ani ka waajulikɛyɔrɔw di jɛkulu mɔgɔw ma. U bɛ u sen don fana Masaya So saniyali la. Krecɛn minnu si kɔrɔbayalen don, maakɔrɔw b’a ɲini u fɛ, u ka olu dɛmɛ. U ka jɔyɔrɔ mana kɛ fɛn o fɛn ye u b’a bɔ u yɛrɛ la ka o kɛ, o kama bɛɛ bɛ u bonya.—1 Timote 3:13.

U bɛ misali ɲuman di. Cidenyabaara magannaw bɛ sugandi ka o baara kɛ ka d’a kan krecɛnya jogow bɛ u la. Lajɛw la, u ka jɛmukanw bɛ an ka dannaya kɔgɔ. Waajuli kɛyɔrɔ la, u ka cɛsiri bɛ dusu don an kɔnɔ. U bɛ baara min kɛ ni maakɔrɔw ye, o b’a to nisɔndiya ni kelenya bɛ kɛ. (Efesekaw 4:16) Laɲinita min bɛ u kɛ maakɔrɔw ye ni u ye o dafa, u bɛ kɛ o ye a mɛ o mɛ.

• Jogo jumɛnw ka kan ka kɛ cidenyabaara magannaw la?

• U bɛ mun kɛ walasa jɛkulu ka taa ɲɛ koɲuman?