I ka nisɔndiya sɔrɔ i ka baara senuman na
1 “U ɲagalitɔ” seginna. Yesu ka kalanden 70 seginna waati min na ka bɔ u ka wajuliba taama na, u ye ɲɛfɔli kɛ Yesu ye. U tun bɛ cogo min na o tuma na, Bibulu maana b’o fɔ. U ye nisɔndiya sɔrɔ Ala sago kɛli la. (Luka 10:17) Mun bɛ se k’i dɛmɛ k’o nisɔndiya sugu sɔrɔ baara senuman na?
2 Hakili ɲuman: Ala ye bonya di i ma ka mɔgɔw ladɔnniya Jehowa kuntilennaba la. I ka wajuli fɛ, i bɛ se ka mɔgɔw hɔrɔnya ka bɔ diɲɛ ka kɛwale juguw la, ani diinɛ nkalonmaw na. Ka ɲɛnamaya kɛ diɲɛ dɔ kɔnɔ, bɛnbaliyako tɛ min na i n’a fɔ a b’an da la cogo min na bi, i bɛ se k’o jigiya di mɔgɔw ma. N’i ye tiɲɛ siw dan mɔgɔ sɔnnenw dusukunw na, Jehowa bɛ nisɔndiya cogo min na o ko la, i ka miiri o la. N’i bɛ t’a fɛ n’i dusukun bɛɛ ye i ka cidenyabaara la, i ka hakili ɲuman sɔrɔ ka Ala deli walasa a ka hakili senu ka nisɔndiya yiriwa i la.
3 Degelicogo ɲuman: Yesu ye o kalanden 70 ɲɛminɛ ni degelicogo min ye, o bɛ iko an ka sisan Baara ka Lajɛw. A y’u dege walasa u ka se k’u ka cidenyabaara kɛ ka ɲɛ. (Luka 10:1-16) Bi, Baara ka Lajɛw b’i dege nin fɛnw kɛcogow la: ka kuma mɔgɔw fɛ, ka baro daminɛ u fɛ, ka sokɔnɔ Bibulu kalanw daminɛ, ani k’u ɲɛminɛ. N’i b’i timinandiya, n’i b’i ka wajuli kɛcogow ɲɛ ka t’a fɛ, o bɛna kɛ sababu ye i k’a ye k’i tun tɛ se yɔrɔ minnu na, k’i bɛ se olu la sisan, wa dɔ bɛna bɔ i ka siga la. O la sa, i bɛna da i yɛrɛ la, i ka nisɔndiya fana bɛna bonya.
4 Miiri sini ma: Yesu ye nisɔndiya sɔrɔ a ka baara senuman na hali k’a sɔrɔ a tun bɛ ka tɔɔrɔw muɲu. Mun na? Bawo a y’a hakili bɛɛ sin dubaw ni bonyaw ma minnu tun b’a ɲɛ. (Heb. 12:2) I bɛ se k’o ɲɔgɔn fana kɛ n’i y’i hakili ni dusukun sin Jehowa tɔgɔ ani dubaw ma, duba minnu bɛna na diɲɛ kura kɔnɔ. O bɛna dɔ fara i ka nisɔndiya n’i kuntilenna kan cidenyabaara la.
5 An bɛ se ka bonyaba min sɔrɔ bi, o ye ka baara kɛ Jehowa ye. O la sa, an ka se k’a fɔ ko: “K’i sago kɛ, o ka di ne ye haali.”—Zab. 40:9