SUKKUN-SUKKUN NI AKKA NA POSO

Boasa Jotjot Diorai Natua-tuakku Au?

Ditogihon akka donganmu ma ho marmeam-meam di malam minggu annon. Mangido ijin ma ho tu natua-tuam, alai alus ni nasida, “Dang boi”. Pasti dang tarsonggot be ho mambege alus ni nasida i alana sai songon i do torus nasida.

Artikel on lao mangulas

Boasa natua-tuakku dang hea mangalehon ijin?

Hea do ra dihilala ho tikki mangido ijin ho tu natua-tuam, dang hea nasida mangalehon ijin. Olo do ra, dihilala ho dang lomo roha ni nasida molo ho marsonang-sonang.

Songon i ma na dihilala sahalak remaja na margoar si Marie tikki parjolo sahali ibana mar-HP. Didok ibana, “Godang hian do dibahen bapakku aturan tu au. Misalna, taringot aplikasi aha na boi hudownload, akka ise na boi hutelepon manang hu-chat, manang sappe jam piga au boi makkatai tu halak i. Hape, dang hea donganku dilean aturan sisongon i tu nasida!”

Pikkirhon ma: Memang na so lomo do roha ni bapakna molo si Marie mangulahon akka na mambahen las rohana? Manang, aha do mungkin na dihabiari bapakna?

Mobil na mardalan di dalan. Di sapping ni dalan i adong tanda batas ni kecepatan “50.” Spidometer ni mobil patuduhon kecepatan 50. — Batas ni kecepatan di dalan boi do membatasi kebebasanmu, alai gabe selamat do ho alani i. Songon i ma aturan na dibahen natua-tuam, boi do i melindungi ho

Coba ma ulahon on: Bayakkon ma molo ho gabe natua-tua jala adong gellengmu na remaja na baru mar-HP. Aha ma biasana na mambahen ho khawatir? Akka aturan aha ma na boi dibahen ho lao melindungi ibana? Tikki didok gellengmu, ‘Na so lomo do roha ni Bapak dohot Omak las rohakku?’ aha ma dokkononmu?

“Sai didok bapakku do, ‘Coba ma bayakkon molo ho gabe natua-tua.’ Dung huulahon i, boi ma huattusi manfaatna mangihutton aturan ni Bapakku jala boasa dibahen ibana songon i. Jadi molo adong gellengku haduan, lomo do tong rohakku molo diihutton ibana aturan songon na dibahen bapakku.”—Si Tanya.

Songon dia do asa dapottu ijin sian natua-tuakku?

Sahalak dakdanak mardandi huhut melipat tanganna, jala adong timus kaluar sian pinggolna.

Unang ulahon on: Mardandi, muruk-muruk, manang mangalo.

“Dang adong lapatanna molo muruk-muruk. Gariada, gabe loja do ho dohot natua-tuam. Molo sai mangalo do ho, gabe dianggap natua-tuam do ho dang dewasa dope jala dang boi dilehon unggodang kebebasan.”—Si Richard.

Coba ma ulahon on: Tetap ma tenang ho. Coba bayakkon aha na dipikkiri natua-tuam. Dibahen pe aturan i, ala na so porsea do natua-tuam tu ho? Manang alani tempat dohot akka dongan na lao dijuppangi ho do umbahen na ragu nasida? Denggan ma hatai tu natua-tuam asa diattusi ho alasanna boasa dibahen nasida aturan i.

“Sasittongna dibahen pe akka aturan asa denggan do ngolutta. Dang na so lomo roha ni natua-tuakku molo marlas ni roha au. Gariada lomo do roha ni nasida asa unang hona jea au, alai menikmati kegiatan na mambahen las rohakku.”—Si Ivy.

Bibel mandok: “Dang boi dirajai halak na oto dirina tikki muruk, alai anggo halak na marbisuk, hohom do jala boi dirajai dirina.”—Poda 29:11.

Sahalak remaja borua mar-chatting jala mambukka media sosial di tonga ni borngin.

Unang ulahon on: Marbuni-buni mangalanggar aturan.

“Marbuni-buni do au mangalanggar aturan ni bapakku taringot mar-HP. Tikki borngin huchat ma akka donganku. Hudownload do muse aplikasi na diorai bapakku. Alai di pudian ni ari tarboto ma i tu bapakku. Gabe maol ma porsea bapak tu au, jala lam ketat ma muse aturan dibahen ibana. Jadi unang ma tamulai mangalanggar aturan.”—Si Marie.

Coba ma ulahon on: Patudu ma tu natua-tuam na rade do ho mangihutton aturan ni nasida jala boi dihaporseai.

“Ikkon sabar do hita. Sipata, dang pittor diuba natua-tuatta aturan ni nasida. Alai molo sai rade hita mangihutton aturan na dibahen nasida, boi do gabe lam godang dilehon kebebasan tu hita.”—Si Melinda.

Bibel mandok: “Oloi hamu ma natua-tuamuna.”—Kolosse 3:20.

Sahalak remaja bawa mangido ijin. Di sappingna adong gelembung na marisi gambar ni tolu donganna.

Unang ulahon on: Unang ma paksa natua-tuam asa mangalehon ijin, marhite paboahon tu nasida aha na diulahon akka donganmu.

“Dang boi lam denggan situasi molo sai torus dipaksa ho natua-tuam. Boi do i mambahen gabe lam maol ho mandapot aha na dihalomohon roham.”—Si Natalie.

Coba ma ulahon on: Pakke ma lembar kegiatan “Kamu Mau Ubah Peraturan di Rumah?” lao mangurupi ho makkatai tu natua-tuam taringot aturan na di jabu.

“Pasti lomo do roha ni sude natua-tua asa denggan gellengna mambahen keputusan. Jadi tikki hupaboa pandapottu tu natua-tuakku, berupaya do mangalehon alasan na masuk akkal sian apala holan mamikkiri perasaanku sandiri. Biasana, gabe lam mura do au mandapot ijin.”—Si Joseph.

Bibel mandok: “Pasangap ma omakmu dohot bapakmu.”—Epesus 6:2.