SUKKUN-SUKKUN NI AKKA NA POSO

Songon dia do Molo Marsirang Natua-tuakku?

Sada masalah na massai maol diadopi akka na poso, i ma tikki marsirang natua-tua ni nasida. Molo marsirang natua-tuam, songon dia do ho mangadopi arsak ni roham?

Artikel on lao mangulas

Tolu hal na porlu pasidingonmu

1. Manalahon dirimu sandiri

“Hea do didok omak tu au, dung tubu pe au asa adong masalah ni omak dohot bapak. Jadi, didok rohakku au do na mambahen omakku dohot bapakku marsirang.”—Si Diana.

Ingot ma: Dang alani ho natua-tuam gabe marsirang. Masa pe i alani masalah ni nasida na dua do. Jadi dang ho na mambahen masalah ni nasida i, alani i dang boi ho pasaehon masalah i. Ikkon nasida na dua do na martanggung jawab lao pasaehon masalah di perkawinan ni nasida.

“Ganup do halak martanggung jawab tu na diulahon ibana.”—Galatia 6:5.

2. Gabe dendam

“Muruk hian do au tikki selingkuh bapakku. Gabe maol ma au porsea muse tu ibana.”—Si Rianna.

Ingot ma: Sasittongna wajar do molo muruk jala mandele ho ala marsirang natua-tuam. Alai molo torus ho muruk, gabe ho do na rugi. Boi do targanggu kesehatanmu secara fisik dohot mental. Jadi molo dendam hita, songon na manginum racun ma hita alai berharap hita halak na asing na hona dampakna.a

“Unang ma muruk ho jala unang tarrimas.”—Psalmen 37:8.

3. Dang porsea molo perkawinan boi martahan jala parohon las ni roha

“Mabiar do au songon bapakku. Mabiar do au molo annon dung menikah jala adong gellengku, gabe huulahon hasalaan na sarupa, i ma marsirang songon na diulahon natua-tuaku.”—Si Jessica.

Ingot ma: Nang pe natua-tuam dang marhasil mampartahatton perkawinan ni nasida, dang berarti ho pe dang marhasil di perkawinanmu haduan. Sasittongna boi do ho marsiajar sian hasalaan ni natua-tuam. Uppamana, gabe boi ma diboto ho akka sifat aha na dihalomohon roham sian calon pasanganmu. Ho pe boi do muse marsiajar sifat-sifat na denggan na mambahen ho gabe sahalak suami manang istri na marbisuk.

“Ganup ma halak mamparrohahon ulaonna be.”—Galatia 6:4.

Sahalak bawa na poso na mamakke gipsum di patna, hundul di sofa sambil mamakke laptopna. — Tikki marsirang natua-tuam, songon proses penyembuhan patah tulang ma i. Di mulana boi do tahilala haccit, alai lam leleng lam denggan ma i

Tolu hal na boi diulahon ho

1. Paboa ma aha na di roham. Halak na sai marpikkiran negatif di rohana jotjot do gabe mangulahon hasomalan na manegai dirina sandiri, songon manginum minuman beralkohol manang mamakke narkoba. Alani i unang ma sippan arsak ni roham. Alai, coba ma ulahon on:

Paboa ma tu natua-tuam. Molo natua-tuam berupaya mambahen ho marpihak tu sada sian nasida, denggan ma patorang jala jujur ma paboa molo hatorangan i manegai pikkiranmu. Molo hira na maol ho patorangkon i langsung, boi ma dibahen ho surat tu nasida.

Paboa ma tu sahabatmu. Godang do manfaatna molo adong sahabatta na olo manangihon hita. Bibel mandok, “Sai dipatudu ale-ale do holong ni roha jala songon haha anggi do i tikki masa sitaonon.”—Poda 17:17.

Paboa ma tu Sitoppa ho. Debata Jahowa “Sitangihon tangiang”, sai rade do Ibana manangihon ho. (Psalmen 65:2) Bibel mandok, boi do ‘pasahatonmu sude holso ni roham tu Ibana, ai diparrohahon do ho’.—1 Petrus 5:7.

Tu ise do unlomo roham makkatai, tu omak manang tu bapak?
Ise do sahabatmu (na saumuran manang na uttua) na boi mangurupi ho?
Aha do masalah na lao sitangiakkononmu secara spesifik?

2. Bahen ma penyesuaian

Dung marsirang natua-tuam, ikkon bahenonmu do ra penyesuaian di jabu, di sikkola, di parhepengonmu, jala boi do gabe margatti donganmu. Alani i, boi do ho gabe stres jala toppu muba ngolum. Aha do na boi mangurupi ho? Pikkirhon ma songon dia ho boi menyesuaihon diri tu situasim na baru.

Dung marsirang natua-tuam, aha ma perubahan na umbalga na ikkon bahenonmu?
Akka aha ma na boi diulahon ho lao menyesuaihon diri tu perubahan i?

“Nungnga marsiajar au asa toktong marlas ni roha songon dia pe parngoluokku.”—Pilippi 4:11.

3. Ingot ma adong do sifatmu na denggan

Sipata ala marsirang natua-tuam, boi do gabe lam godang arsak ni roham. Alai, boi do i muse mangurupi ho mangida akka sifat na denggan na adong di dirim. Asing ni i, boi do i muse mangurupi ho padenggatton akka sifat na denggan na asing. Si Jeremy naung marsirang natua-tuana tikki marumur 13 taon ibana mandok, “Ikkon gabe halak na martanggung jawab do au ala marsirang natua-tuakku. Ala au do siakkangan, ikkon lam godang ma tikkikku mangurupi omak suang songon i anggikku.”

Sahalak borua na poso mangurupi adekna makkarejohon PR tikki omakna paradehon sipanganon di dapur. — Ala marsirang natua-tuam, boi do i mambahen ho gabe halak na lam martanggung jawab di jabu

Aha do sifat na denggan na baru disadari ho adong di dirim dung marsirang natua-tuam?
Akka sifat aha dope na naeng diupayahon ho?

“Ai sian Debata do sude Surat na Badia i jala dilehon marhite panogu-noguon ni tondi parbadia. Marguna do i . . . padenggatton pangalaho.”—2 Timoteus 3:16.

a Lao mamboto lam godang informasi, ida ma artikel “Songon Dia do asa Unang Mura-Mura Au Muruk?”