Ike Owa Ke Obosa Ikijeen̄ Itọn̄ me lek Ngwugwa Mkpenwene?

1-2. Keke ke ngwugwa mkpenwene obobieen̄ eji ibe ekerọ, bak lek keke? (Ebi Kọrint Eyi Òso Iba 5:​14, 15) (Kpọ si ogugo.)

IRE ENE ge inyan̄a owu isibi me irak uwu ogbugbugbọ ikeme owu, obokimumun̄ ogwu onyanyan̄a owu ya? Ikerere ibe ke ene ya inyan̄a ebi ofifi ife si, kpolọlọ omojeen̄ itọn̄ me lek inu ya irọbe inyi owu, mè ijeen̄ si ibe ke okpowuuk inu ya irọbe.

² Ike eji ekween̄be me ibot usem oraraka, eji kpebekọt inyan̄a lek kiji isibi me emen ufialek eyi ijo inu eji ebọkọbe me irot okisa ijet eji. Ire, Jioba mokọt inyan̄a eji isibi. Iria Gwun̄ kan̄ ibe inikwu inyi eji ufuna eji ekọt ekaan̄ (1) ntele-nnyi, (2) ikpọchieen̄ ibe ke eji meso ikup me mgbọ okup me isi, mè (3) ata mgbaan̄je melek Jioba. Bak lek ngwugwa mkpenwene, eji mikaan̄ ikpọchieen̄ iluluk ugwem ikakaan̄ge itata me emen Paradais. Me atikọ, ngwugwa mkpenwene ikijeen̄ ima Jisọs okaan̄be me lek ebilene, ima eyi ikaan̄be karake karake sabum mgbọ inube me inyọn̄ ijọn̄ yi. (Urọk 8:​30, 31) Ogwu otuchieen̄ Pọọlu ige ibe ke “eji ekiluk ugwem igọọk me lek imumechieen̄ Karais okaan̄be me lek kiji.” (Fuk Ebi Kọrint Eyi Òso Iba 5:​14, 15.) Eyi isibi ibe ke eji ebekijejeen̄ itọn̄ me lek ima Jisọs ojeen̄be eji, eji mekijeen̄ si ibe ke eji kpewuuk ata inu irọbe inyi eji.

3. Keke orọ inu eji ge ge ekirọ isasa ijeen̄ itọn̄ me lek ngwugwa mkpenwene okup esese?

³ Ike owa ke obosa ikijeen̄ ibe ke onwọọn̄ ngwugwa mkpenwene? Ufọọk-otu kwun̄ mokọt ikup esese me lek eyi ofifi ene. Kubọk inu njeen̄, mọnọ-nu ibe ke ene ita ebi iluk me esese esese ama ebekọp uran̄ isi ere yaage. Ere ema ge ge ebenebe ije kiban̄ ikup esese, oniin̄ ema egọọkbe ikup esese si, ire, me ota kan̄, mire ere yaage ema ekaan̄be me ejit isisi. Kubọk ebi ene ita chi ijeje me esese oniin̄, eji ge ge mekọt ikijeen̄ itọn̄ me lek ngwugwa mkpenwene me esese esese oniin̄, iboyaka imaan̄ me lek ubọk mgbaan̄je kwun̄ melek Jioba okupbe me mgbọ keyi. Ike eji ekaan̄ inu yi me nkeek, kè eji ekpa mkpọ ofolek urum ife ita: (1) Ebi kpekaan̄ ntap-me-mun̄ (2) ebi eyi Karais ikakaan̄ ntap-me-mun̄, mè (3) ebi inanan̄a me ntitiin̄.

EBI KPEKAKAAN̄ NTAP-ME-MUN̄

4. Ike owa ke Jioba okimun̄ ebi kpekakaan̄ ntap-me-mun̄?

⁴ Ire okikween̄ Baibul, ire, okakaan̄ ntap-me-mun̄, keek-nu inu yi: Ubọk osabe ikibọkọ atikọ itap ikijeen̄ ibe ke Jioba iweek ibe ore ogwu unene kan̄, okitap ubọk inyi owu okọt orọ ikeya si. (Jọn 6:44) ‘Jioba ikiwọwọlọ ejit ene ikpọ.’ Eyi isibi ibe ke ọmọ okimun̄ efuuk okitap isasa ikween̄ mkpọ ofolek kan̄. Okimun̄ si unwene echi okebirọ inyi okọt okoluk ogọọk onineen̄ kan̄. (Urọk 17:3; 27:11) Ata mgbaan̄je okaan̄be melek Jioba me chereyi ifet bak me lek ngwugwa mkpenwene. (Rom 5:​10, 11) Mun̄ ibe ke okawuuk atikọ yi.

5. Ike owa ke ebi kpekakaan̄ ntap-me-mun̄ ebesa igọọk nteme okup me ikpa Ebi Filipai 3:16?

⁵ Ire okikween̄ Baibul, ire, okakaan̄ ntap-me-mun̄, ike owa ke obokọt isa ijeen̄ itọn̄ me lek ngwugwa mkpenwene? Omokọt irọ eyi ire ogọọk nteme ogwu otuchieen̄ Pọọlu onyibe ebi Filipai, itumu inyi ema ibe: “Inu òkukup me uyọt ìre, mè eji ekeluk ugwem egọọk me lek atikọ ya eyi eji ewuukbe lek ikaan̄.” (Filip 3:16) Igọọk me lek nteme yi, kachieek ibe ene mè iyaka ire inu geege isan̄a owu me oniin̄ okisa ene isi lek ugwem.—Mat 7:14; Luk 9:62.

6. Keke ke ebi kpekakaan̄ ntap-me-mun̄ ebekọt irọ ire ikiyọt ema me lek irọrọ unwene me ugwem kiban̄? (Ikan Òso Mgbọ Iba 30:​11-14) (Kpọ si ogugo.)

⁶ Ire ikaan̄ ijejeen̄ Baibul geege eyi okiyọt owu me lek ichechieek ni? Ire ire ikeya, keke ke obokọt irọ? Kween̄ mkpọ ofolek ijejeen̄ ya gbaalek, mè beek Jioba ibe itap ubọk inyi owu ogobo otet ojaan̄. (Itọn̄ 86:11) Ire okagobo ijejeen̄ ya itet si, kasisaak lek kwun̄, kpọkpọ kweek nye kikween̄ Baibul. Ike okikween̄ mkpọ inyi isi, omokọt inigobo ijejeen̄ ya itet ijaan̄. Ire ikaan̄ inu Awaji ikamage eyi okiyọt owu me lek itetele ni? Inu Jioba okido eji me ubọk ikamalek iyọt irọrọ. Owu mokọt ikiluk igọọk onineen̄ Awaji. (Fuk Ikan Òso Mgbọ Iba 30:​11-14.) Jioba ichieek use ibe ke ọmọ motap ubọk inyi owu. (Asaya 41:​10, 13; 1 Kọr 10:13) Eya orọ, kawọ lek. Kpan̄asi obokito chieen̄ me lek rumurumun̄ okichichini, kito chieen̄ me lek ata mkpọ echi Jioba okirọ inyi owu, ogakge inyinyi ngwugwa mkpenwene. Ike ima kwun̄ me lek Jioba okebimin, owu mokimun̄ ibe ke “ikan Awaji ìkayọt isusun̄.”—Jọn Eyi Adasi 5:3.a

7. Keke ke nsabọn ebi ekikpukpo isibi me emen atikọ ebekigwu nkeek ikom me lek?

⁷ Nsabọn ebi ekikpukpo isibi me emen atikọ ire ebi ikikween̄ Baibul si. Me atikọ, ema echubọk ire okpan okpan ife ebi nga mè nte kiban̄ ekigọọk ikween̄ Baibul. Baibul itumu ibe: “Ìtaba lek ìriaak me lek Awaji, ke Awaji si môtaba lek iriaak me lek kinyi.” (Jemis 4:8; Mfufuk Eyi Adasi 28:9) Osikitap efuuk ikirọ mkpọ obokitaba owu iriaak me lek Jioba, omo si mokitaba lek iriaak me lek kwun̄. Jioba ikakpọkpọ ikimun̄ owu kubọk ge me lek urum ebi ene. Ikerere ibe ke ekikpukpo owu isibi me emen atikọ, iweek ibe orọ mkpọ inyi okọt otaba lek oriaak me lek kan̄. Keke ke Jioba orọ inyi okọt okaan̄ ata mgbaan̄je melek kan̄? Kawuuk ibe ke ire ngwugwa mkpenwene orọ inyi ifet, eya orọ, kakpọ chieen̄ isiki me lek uche eyi osibi esese yi. (Rom 5:​1, 2) Sabum obosi orirọ isasa ikeek mkpa kè Jisọs eyi acha keyi, sa mè gwu nkeek kom me lek mkpọ mkpa kè Jisọs osibi inyi owu, ubọk oweekbe iluluk ugwem kwun̄, mè inu oboto me isi mè irọ itet isasa ijeen̄ Jioba ibe ke onwọọn̄ ngwugwa mkpenwene.b

EBI IKAKAAN̄ NTAP-ME-MUN̄

8. Ike owa ke ebi eyi Karais ikakaan̄ ntap-me-mun̄ esa ijeen̄ ichechieek kiban̄ me lek ngwugwa mkpenwene?

⁸ Ire owu ire ogwu eyi Karais okakaan̄ ntap-me-mun̄, owu ora ijeen̄ ichechieek kwun̄ me lek ngwugwa mkpenwene me esese esese oniin̄. Kubọk inu njeen̄, owu orọ unwene me ugwem kwun̄ ufuna okọt ore ogwu unene Jioba mè oluk ogọọk onineen̄ kan̄. Owu osiki ibot inyi ikan kè Jisọs sa me ikekilook ebi ene ata etip mè ikekijeen̄ ema atikọ ofolek Jioba mè Jisọs. Owu osa lek kwun̄ inyi Jioba mè ikaan̄ ntap-me-mun̄. Bak lek okitọbọ ebum inyi Jioba, ora ichichini ukeme si. (2 Tim 3:12) Ire, okpọkpọk ikup inye ikigbe utoon̄-ejit inyi Jioba. Eyi ikijeen̄ ibe ke owu oma Jioba mè ima si ngwugwa mkpenwene eyi iriabe Gwun̄ kan̄ ibe inigwa me ibot kiji.—Iburu 12:​2, 3.

9. Kpasi ufe ke ebi eyi Karais ikakaan̄ ntap-me-mun̄ ebegbala chieen̄ inyi ekarọn̄ inin̄?

⁹ Kubọk ebi eyi Karais ikakaan̄ ntap-me-mun̄, igbe ibe eji etaba iman̄ me lek ufe ge. Ike mgbọ okije, eji mekọt ibene ikiwuuk ijejeen̄ itọn̄ me lek ngwugwa mkpenwene egwe geelek. Ike owa ke eyi obokọt irọ ni? Keek-nu mkpọ orọrọ ebi eyi Karais me Efesọs me adasi ukot. Jisọs itọn̄ ema bak lek ukarajit ema ekaan̄be. Ire, itumu si inyi ema ibe: “Enyi kpeyaka ima emi kubọk adasi mgbọ ya.” (Ichi 2:​3, 4) Ike usem Jisọs ojeen̄be, ogwu eyi Karais mokọt ikitọbọ ebum inyi Jioba, ire, ikakisa otutuuk ejit kan̄ irọ ikeya. Mokọt ikiriaak uriaak, ikisi nkween̄mkpọ ntitiin̄, mè ikigọọk isibi uko, ire, ikpọkpọk ikirọ inu chi bak lek irọ ema iraka lek. Ikayaka ire ima okibieen̄ ọmọ ibe ikirọ inu chi. Keke ke obokọt irọ ire omun̄ ibe ke okayaka ima Jioba ike omabe ọmọ me adasi mgbọ?

10. Ike owa ke obokọt isa igọọk nteme Pọọlu onyibe Timọti? (1 Timoti 4:​13, 15)

¹⁰ Ogwu otuchieen̄ Pọọlu iteme Timọti ibe igwuun̄ chieen̄ mè itap lek ijaan̄ me lek ntọbọ-ebum kan̄ isa inyi Jioba. (Fuk Timọti Eyi Adasi 4:​13, 15.) Igọọk me lek nteme yi, sa mè kikeek esese esese oniin̄ obokọt ikisa me uyok uyok ejit ikitọbọ ebum inyi Jioba. (Rom 12:11) Kubọk inu njeen̄, omokọt ikisan̄a mgbọ isibi igbaalek eyi owuukbe lek ikisan̄a isibi inyi okọt okoneen̄ lek ojaan̄ oban nkween̄mkpọ ntitiin̄. Ire okirọ ikeya, omoriọọn̄ ubọk ikigban̄ utọn̄ me nkween̄mkpọ ntitiin̄. Omokọt iweek ere owu gaalek obokup ikikween̄ mkpọ eyi agaga inyi okọt okogwu nkeek okom me lek inu okebikween̄. Ike obokup inye ikitap iye me lek ukan̄ inyi ikilomo, ikeya si ke obokup inye ikirọ inu chi inyi okojeen̄ itọn̄ me lek ngwugwa mkpenwene mè ofifi ofifi inu echi Jioba okirọ inyi eji. Isọkọ me lek si, nde inen mè inen sabum Orirọ Isasa Ikeek Mkpa kè Jisọs, omokọt igwu nkeek ikom me lek otutuuk ata mkpọ okebinwọọn̄ bak lek orebe ogwu Ata-Ikọ Jioba. Kpunu cheche ibe ke eyi motap ubọk irọ inyi okup onye okojeen̄ itọn̄ me lek ngwugwa mkpenwene eyi orọrọ ibe okọt okaan̄ ata mgbaan̄je melek Jioba.

11-12. Ire eji kpeyaka ikaan̄ uyok uyok ejit me mgbidim mgbọ, ire isibi ibe ke eji kpeyaka ikaan̄ ekwukwu Awaji ni? Kpa wele-nu. (Kpọ si ogugo.)

¹¹ Ire okayaka ikikaan̄ uyok uyok ejit me lek ata ntọbọ-ebum ike okaan̄be me adasi mgbọ, kachieek ibe efuuk ita owu me owot, kakana igwook si ibe ke okayaka ikaan̄ ekwukwu Awaji. Ogwu otuchieen̄ Pọọlu itumu inyi ebi Kọrint ibe ke usini mgbọ, ọmọ ikilook ata etip bak lek irebe ikwaan̄ ogbegbe ibe ọmọ irọ ikare kubọk inan̄a me ejit kan̄. (1 Kọr 9:17) Usem Pọọlu isibi keke?

¹² Kubọk otutuuk ebilene ekasoge, Pọọlu ikakikaan̄ ulọk ilolook ata etip usini mgbọ. Ire, itumu ifieek ikukup inye me ikwaan̄ kan̄ mè ekakpọge chieen̄ me lek ubọk mkpọ osa ikup ọmọ me lek. Owu mokọt ikaan̄ mbet lek ntumu-mfieek ya si. Tumu fieek irọrọ inu otatat ikerere ibe ke okachubọk ikaan̄ ulọk irọrọ ikeya. Kibeek Jioba ibe itap ubọk inyi owu okaan̄ unye mè ulọk isasa irọ inu otatat. (Filip 2:13) Kweek nye kirọ inu obokitaba owu iriaak me lek Jioba. Osikirọ ikeya, omokọt ikaan̄ utoon̄-ejit ibe ke omoyaka ima Jioba mè ikaan̄ si uyok uyok ejit kubọk adasi mgbọ.

13. Ike owa ke eji ebesa ikitọ lek kiji ikpọ mè ire eji “òwa me emen ichechieek”?

¹³ Igọọk me lek mkpọ okup me ikpa Ebi Kọrint Eyi Òso Iba 13:​5, eji ekewọlọ lek kiji ekpọ inan̄a me mgbọ ire mgbọ. Ere ya ibe: “Ìwọlọ ugwem kinyi, mè ìtọ lek kinyi ìkpọ, mè ìre enyi òwa me emen ichechieek.” Usini mgbọ, eji mekọt ido lek kiji usini idodo kubok: ‘Ire nkito inu emen ekwukwu kubọk okpan okpan inu me ugwem n̄a ni?’ (Mat 6:33) ‘Ire mbet inwọọn̄-lek nkigobo inyi lek n̄a ikijeen̄ ibe ke ncha ijo inu ni?’ (Itọn̄ 97:10) ‘Ire nkekibieen̄ esuuk mè mgbaan̄-mbọp okup me etete ebi eyi Karais inye ni?’ (Efes 4:​2, 3) Orirọ isasa ikeek mkpa kè Jisọs ire orirọ okitap ubọk inyi eji ekeek edọk inyinyi ngwugwa mkpenwene eyi Jioba onyibe eji. Orirọ yi si okinyi eji irek isasa iwọlọ lek kiji ikpọ mè ire eji ekiluk ugwem kiji inyi Karais me atikọ sa ire eji ekiluk inyi lek kiji.c

EBI INANAN̄A ME NTITIIN̄

14. Keke obokọt irọ mè usini ebi eyi Karais enan̄a me ntitiin̄?

¹⁴ Usini ebi eyi Karais kpeyaka ikinu nkween̄mkpọ ntitiin̄ ikerere ibe ke ema miwuuk lek ikinu me mgbọ oraraka. Keke orọ ni? Usini ene mikaan̄ sasaak ofolek “ubọk iluk ugwem.” (Luk 21:34) Usini ene mikaan̄ ntọbọ-ukot mije usem gwun̄ ute ge otumube mè iyaka ire mkpọ orọbe. (Jemis 3:2) Usini ene si mirọ ijo inu omimin, ire, kpeweek ntap-ubọk ogbegbe. Me ekakpọge chieen̄ me lek inu orọrọ onan̄abe me ntitiin̄, keke ke oborọ ni? Ire keke ke inyinyi ngwugwa mkpenwene obobieen̄ owu ibe orọ ni?

15. Ike owa ke Jioba okisa ijeen̄ ibe ke ọmọ ikaan̄ ulọk me lek arọọn̄ kan̄ ijeje ilọ oniin̄? (Ijikien 34:​11, 12, 16)

¹⁵ Gwu nkeek kom me lek ubọk Jioba okimun̄ ebi ikakaan̄ ntọbọ-ukot. Ikakijit ema, kpan̄asi ikeya, ikiweweek arọọn̄ kan̄ ijeje ilọ oniin̄, ikinyi ema inorie, mè ikitap ubọk inyi ema egwu ekom enu me lek kan̄. (Fuk Ijikien 34:​11, 12, 16.) Ire Jioba okirọ inu yaage inyi owu ni? Iin̄! Eyi okifuk ibot usem yi, ikijeen̄ ibe ke ochubọk iweek irọrọ inu otatat. Jioba imumun̄ ata mkpọ me emen kwun̄ mgbọ ijeen̄be owu atikọ mè irọ inyi okana ge me lek ebi eyi kan̄, ire bak lek ata mkpọ chi si ke iweek ibe ogwu okom onu me ntitiin̄ kan̄.

16. Keke obokọt itap ubọk inyi arọọn̄ ojeje ilọ oniin̄ ibe igwu ikom inu me lek Jioba? (Kpọ si ogugo.)

¹⁶ Broshọ Return to Jehovah itumu usem ukarajit yi obe: ‘Riọọn̄ ibe ke Jioba owa melek kwun̄ eyi okisa igwugwu ikom inu me lek kan̄. Motap ubọk inyi owu okọt otim ogak sasaak mè ubọnọ-lek. Morọ si inyi okaan̄ ojot ojot esuuk eyi utọn̄ọ nkeek okinyi ene. Eyi mobieen̄ owu ibe okpọk obene okogọọk bọn ute okotọbọ ebum onyi Jioba.’ Riọọn̄ si ibe ke ikilọlọk ebi ugane ntitiin̄ itatap ubọk inyi owu. Ema ire “ere ilet-lek me isi efet, mè ere irak-ibot me irak egwijo.” (Asaya 32:2) Isasa ijeen̄ unwọọn̄ kwun̄ me lek ngwugwa mkpenwene, do lek kwun̄ ibe, ‘keke ke mbarọ me mgbọ keyi isasa inen̄e irek n̄a melek Jioba isun̄?’ (Asaya 1:18; Pita Eyi Adasi 2:25) Kubọk inu njeen̄, ire omokọt isi nkween̄mkpọ ntitiin̄ ni? Ire omokọt isi lek ogwu ugane ntitiin̄ ge mè iweek ntap-ubọk eyi emen ekwukwu, eyi obokọt isibi ibe ke megọọk owu ikween̄ mkpọ ni? Omokọt ichieek ijaan̄ ibe ke Jioba mogbana efuuk okitap me ijejeen̄ itọn̄ me lek ngwugwa mkpenwene eyi isabe Gwun̄ kan̄ inyi.

KEKE KE OBORỌ?

17-18. Ike owa ke eji ebekọt isa mgbọ kiji irọ mkpọ ijaan̄ sabum usen orirọ isasa ikeek mkpa kè Jisọs eyi acha keyi?

¹⁷ Jisọs itumu ibe ke esan̄a ngwugwa mkpenwene isibi “inyi ene geelek òchechieek me lek Gwun̄ ya ikachep, ire, ikaan̄ ugwem ikakaan̄ge itata.” (Jọn 3:16) Ngwugwa mkpenwene ire oniin̄ Jioba okisa ifaka eji isibi me ubọk ijo inu mè mkpa. Eji ge ge ekalọ ikekijeen̄ ibe ke eji mima ngwugwa mkpenwene. (Rom 3:​23, 24; 2 Kọr 6:1) Sọntiik usen osisik sabum Orirọ Isasa Ikeek Mkpa kè Jisọs monyi eji irek isasa igwu nkeek ikom me lek ima Jioba mè Jisọs ejeen̄be, ima yi si mobieen̄ eji inye ibe eji ekejeen̄ ibe ke eji minwọọn̄ uche yi.

¹⁸ Ire keke ke ngwugwa mkpenwene obobieen̄ owu ibe okorọ? Ufọọk-otu kwun̄ mokọt ikup esese me lek eyi ofifi ene. Ire, omokọt ichieek ijaan̄ ibe ke Jioba mogbana efuuk okitap irere ge me lek efie efie ebi ikitọbọ ebum inyi ọmọ, ebi kpekiluk “ugwem ìnyi lek kiban̄, ire, ekiluk inyi ọmọ ogwu òkwukwu mije kiban̄.”—2 Kọr 5:15.