Kisa Atikọ Rọ Mkpọ Mgbọ Geelek

1. Keke ke eji eberọ inyi eji ekọt ere ge me lek ebi ototun̄ ukan̄ Jioba?

EJI esimun̄ ogwu Jioba ogbo kiji, ge me lek adasi idodo eji ekido ire, “ike owa ke osa ikween̄ atikọ?” Usini ene ekifọọk idodo ya sa me itutumu ibe ke “ekpukpo ema isibi me emen atikọ.” Ire, usini ene ekibe “ikafiin̄ nkween̄be atikọ Baibul.” Eji ekifọọk me oniin̄ okup ikeyi bak lek, atikọ okup me Baibul ikaan̄ mgbaan̄ me lek otutuuk ubọk iluk ugwem kiji. Bak lek keke ni? Mije eji miriọọn̄ ibe ke eji mekọt ikup me emen ototun̄ ukan̄ Jioba gaalek ire eji ejeen̄ ibe ke eji mima atikọ mè ikiluk igọọk. Eyi igọbọ ikekisa atikọ irọ mkpọ me usem mè irọrọ kiji.—Itọn̄ 15:​1-3.

2. (a) Ike owa ke ebi ene ekimun̄ Jisọs? (b) Kpasi mgbaan̄ ke atikọ Jisọs ojeen̄be okaan̄ me lek ebi ene?

² Otutuuk inu Jisọs otumube ire atikọ. Ebi ichacha ọmọ miriọọn̄ ibe ke ikisa atikọ irọ mkpọ ikerere ibe ke kpekima mkpọ ikitumu inyi ema. (Mat 22:16) Ofolek atikọ ijeen̄be, Jisọs ibe: “Ǹnu inenitap ochicha me etete gwun̄ enerieen̄ mè ogwu ute, mè etete gwun̄ enenwaan̄ mè ogwu uga, mè etete nwa gwun̄ mè uga-olom.” (Mat 10:35) Jisọs ikaweek ibe ebi ene ekup ekeme atikọ ọmọ mè ebi udun̄ kan̄ ekilook, ire, iriọọn̄ ibe ke inu oborọrọ ire eya. (Mat 23:37) Jisọs iriọọn̄ ibe ke ikare otutuuk ene ebema atikọ Baibul.—2 Tes 2:​9-11.

3. Keke ke eji ebekpa me ibot usem yi?

³ Kubọk Jisọs, eji ekisa ikekitumu atikọ mgbọ geelek ikerere ibe ke ebi ene kpema eji. Eji mikilook etip mè ikijeen̄ atikọ Baibul si ikerere ibe ke mkpọ eji ekitumu mokọt ikinaan̄ ebi ene ejit. Ire eyi isibi ibe ke eji kpebekigbala chieen̄ me lek ubọk mè mgbọ eji ekitumu usem ni? Ikare ikeya! Me emen ibot usem yi, eji medasi ikaan̄ ufọọk-otu inyi okpan okpan idodo yi obe: Owa ke eji ebekọt iweek atikọ imun̄? Eji menenikaan̄ ufọọk-otu inyi idodo obe: Keke orọ, ike owa mè kpa mgbọ ke eji ebekitumu atikọ Baibul inyi ebi ene? Ufọọk-otu idodo chi motap ubọk inyi eji ekelook ata etip ejaan̄ mè ekesa atikọ erọ mkpọ, eyi osibi ibe ke eji mekisa ifuk-ibot irọ mkpọ me mgbọ otatat.

OWA KE EJI EBEKỌT IWEEK ATIKỌ IMUN̄?

4. Keke orọ eji ebekọt itumu ibe ke Jioba okaan̄ atikọ?

⁴ Jioba ore ogwukaan̄ atikọ. Inu geelek itumube ire atikọ. Kubọk inu njeen̄, usem itumube ofolek inu otatat mè eyi olọlọ ire atikọ. (Itọn̄ 19:9; 119:​142, 151) Inu geelek itumube ofolek mgbọ okup me isi ikirọrọ iso. (Asaya 55:​10, 11) Ikakilọ irọrọ use kan̄ iso. (Ifuk 23:19) Me atikọ, Jioba ikpobokọt ikan̄ ataak! (Iburu 6:18) Eya orọ egwenbe ọmọ “Awaji ogwu atikọ.”—Itọn̄ 31:5.

5. Keke oro ikayọt iweweek “Awaji ogwu atikọ” imun̄? Kpa wele-nu. (Ikwaan̄ 17:27)

⁵ Me ekakpọge chieen̄ me lek mkpọ usini ene ekitumu, ikayọt iweweek Jioba, “Awaji ogwu atikọ” imun̄. Inu nrom okukup ikana eji ikijeen̄ ibe ke Awaji omaan̄ me atikọ. (Rom 1:20) Me mgbọ ikitumu usem inyi ebi Giris isisi uga ikpa ikup me Atens, Pọọlu itumu ibe ke Awaji iweek ibe eji eweek ọmọ, ke eji mêweek ọmọ imun̄ ire eji irọ ikeya, bak lek ikajọn̄ọge ere me lek kiji ge ge. (Fuk Ikwaan̄ 17:27.) Me atikọ, Jioba ikitaba ebi isisiki lek ikiweek atikọ inu me lek kan̄.—Jọn 6:44.

6. Keke ore usini atikọ okup me Baibul, keke orọ ikibele owu ejit ibe ke oriọọn̄ atikọ chi?

⁶ Oniin̄ ge eji ebekọt iweek Jioba imun̄ ire sa me ikekikween̄ Baibul. Awaji inyi ebi igege Baibul ekwukwu mbuban kan̄. (2 Pita 1:​20, 21) Eya orọ, otutuuk inu okup me emen Baibul ire atikọ, mè ire si mkpọ eji ebetoon̄ ejit me lek. Kubọk inu njeen̄, eji mekọt itoon̄ ejit me lek mkpọ itumube ofolek ubọk inyọn̄ ijọn̄ mè ugwem osa ibene. (Ibeb 1:​1, 26) Eji mekọt ichieek me lek mkpọ itumube ofolek mkpọ orọrọ otutuuk kiji erebe ebi ijo mè inu orọrọ eji ekibọkọ ukwook mè ikikwaan̄. (Rom 5:12; 6:23) Eji mekọt ichieek ijaan̄ me lek inu Baibul otumube ibe ke Jioba mosa Jisọs inen̄e otutuuk inu Setan “ogwu ataak” ofiatbe isun̄. (Jọn 8:44; Rom 16:20) Eji mekọt iyaka lek imaan̄ me lek use Baibul ochieekbe ibe ke Jisọs mojijaka ebi mkpikpak, ijomo ebi ikwakwaan̄, irọ ibe inyọn̄ ijọn̄ yi ikana paradais, mè itap ubọk inyi eji ekana ebi isoso ikup. (Jọn 11:​25, 26; 1 Jọn 3:8) Kpọ-nu irek ilile Jioba onyibe eji! Ijeen̄ eji atikọ, mè inyi eji si irek ijejeen̄ ebi ofifi ife atikọ.—Mat 28:​19, 20.

KEKE ORỌ EJI EKITUMU ATIKỌ?

7-8. Ire nkeek eji esabe itumu atikọ ikup ufiak ni? Nyi inu njeen̄ ge. (Mak 3:​11, 12) (Kpọ si ogugo.)

⁷ Ike eji ewuukbe lek ikpa, ire eji eweek irere ge me lek ebi ototun̄ ukan̄ Jioba, eji ebekitutumu atikọ. Ire, inyi Awaji ibele ejit, eji merọ igak itutumu atikọ. Inu orọrọ eji ekisa atikọ irọ mkpọ si ikup ufiak inyi Jioba. Kpọ-nu inu obọbọkọ irek me mgbọ Jisọs okupbe me inyọn̄ ijọn̄ yi. (Fuk Mak 3:​11, 12.) Ike Jisọs okilook ata etip me agba okwaan̄ Galili, ogbogbo ebi ene etititiin̄ ikana ọmọ. Usini me lek ife chi ire ebi ebi ijo ekwukwu ekupbe me emen, ema erọrọn̄ me isi kan̄ mè itaan̄ ukpo ikitumu inyi ọmọ ibe: “Owu ore Gwun̄ Awaji.” Keke orọ ebi ijo ekwukwu cha etumube atikọ ofolek Jisọs? Mokọt ire ibe nkeek ebi ijo ekwukwu cha ire mè ebi ikigban̄ ema etoon̄ ejit me lek kiban̄, mè ema esa me ikeya si erọ ibe ebi ife cha ekayaka itọbọ ebum inyi Jioba. Mkpọ ebi ijo ekwukwu cha etumu ire atikọ, ire, ema esa nkeek nnwọn kiban̄ gaalek itumu. Ema kpekọt ifiaan̄ Jisọs, nkeek kiban̄ si ikaneme ọmọ. Eya orọ, Jisọs onyinyi ida ibe me ebi ijo ekwukwu cha ekayaka ilook etip ofolek kan̄.

⁸ Keke ke eji ebekọt ikween̄ inan̄a me lek mfufuk yi? Inu orọrọ eji ekitumu atikọ ikup ufiak inyi Jioba. Ikup ufiak enenen ibe eji ekejeen̄ ebi ofifi ife atikọ ofolek Jioba bak lek ima eji ekaan̄be me lek kan̄. Eya orọ, ire ebi ene itọn̄ eji me lek etip eji ekilook, mogbe ibe eji esa itọn̄ ya ejet Jioba!—Mat 5:16; sa tọt me lek Ikwaan̄ 14:​12-15.

9. Keke ke eji ebejit ikekirọ, bak lek keke?

⁹ Kpọ si ofifi irek ogbegbe ibe eji ejit isasa itọn̄ ijet lek kiji. Mọnọ-nu ibe ke gwun̄ ute ge okakaan̄ akpan ikwaan̄ mè iyaka ire irek ikwaan̄ me ntitiin̄ ikpa inyi eji etip ge okukup nlelet mè igbe si ibe esun̄ me nlelet, eji enenisa etip ya ikikpa ikana inyi ebi ofifi ife. Ire ebi ikigban̄ eji iniweek iriọọn̄ ibe ke etip ya ire atikọ, mokọt irọ ibe ema ekekeek ibe ke eji miriọọn̄ owuwa etip okukup me nlelet. Eyi si mokọt irọ ibe ema ekekeek ibe ke eji ire ebi ikukup ufiak enenen, ire, inu yi ikpoboneme Awaji. (Urọk 11:13) Bak lek keke ni? Bak lek, eji kpekaan̄ unen ikpakpa isibi etip ya ikerere ibe ke ire atikọ ke eji etumu, nkeek eji esabe ikpa etip ya si ilọ.

UBỌK EBESA IKITUMU ATIKỌ

10. Ike owa ke obosa ikpa mkpọ “ida ònwọnwọn” osibi? (Ebi Kọlọsi 4:6)

¹⁰ Fuk Ebi Kọlọsi 4:6. Ogwu otuchieen̄ Pọọlu ikeek ebi eyi Karais ikiluk me Kọlọsi ibe ke igbe ibe ema ekesa “ida ònwọnwọn” etumu ikọ mgbọ geelek. Keke ke eyi osibi? Usem Giris esabe irọ mkpọ me ere yi isibi ibe ke usem eji ekitumu more eyi obokisibi ebi ikigban̄ eji oruru mè ire eyi esabe me ata ejit ikitumu.

11-12. Keke orọ eji ebekisa me ugbalachieen̄ ikijeen̄ atikọ? Nyi inu ntọt-me-lek. (Kpọ si ogugo.)

¹¹ Igbe ibe eji esa nteme Pọọlu etap me ikwaan̄ me mgbọ eji ekijeen̄ ebi ene atikọ Baibul. Baibul isa atikọ itọt me lek oge akọn̄ isi iba, eyi obokọt ichim itibi iraka inin̄ emen ene isi ifieek ekwukwu isan̄a me lek ibot ejit. Eyi orere, mokọt ijeen̄ eji inu eji echubọk ire mè nkeek okup eji me emen. (Iburu 4:12) Ire, ire eji kpesa Baibul irọ mkpọ ijaan̄, eji mekọt irọ ibe ebi ene ekenaan̄ ejit mè iyaka ire eji mekọt ikigọọk ebi ene igbini usem. Ike owa ke eyi obokọt irọ ni?

¹² Kpọ-nu inu yi: Me ikwaan̄ uko kiji, eji michichini ogwu enerieen̄ ge okakaan̄ ulọk, okiriaak mkpọmfaka, mè ikinwọọn̄ si orirọ usen iman mè nnan̄a-nkeke me mkpa kè Jisọs melek ebi ototun̄ ukan̄ kan̄. Eji mekọt ijeen̄ ọmọ me emen Baibul ubọk ikajeen̄ge iriọọn̄-inu ikekibeek uriaak inyi mkpọmfaka, mkpọ ikakaan̄ge ugwem me emen mè ijeen̄ ọmọ si ibe ke orirọ usen iman mè nnan̄a-nkeke me mkpa kè Jisọs ire orirọ ikatatge me chieen̄ Awaji. (Asaya 44:​14-20; 2 Kọr 6:​14-17) Ire eji etumu inyi ogwu enerieen̄ ya inu chi me adasi usem eji egọọk ọmọ ikpa, more atikọ ke eji ekitumu inyi ọmọ, ire, ikpobojeen̄ ibe ke eji mekisa usem Awaji irọ mkpọ ijaan̄.

13. Ike owa ke eji ebekisa ata otu itumu ikọ?

¹³ Pọọlu itumu si ibe mè eji ekesa ata otu eyi òkibele ebi ene ejit etumu usem. Inu itumube ikasibi ibe ke eji ebekinwenwene mè iyaka ire ikilet atikọ. Kpan̄asi ikeya, ikiteme eji ibe ekesa ata otu eyi okup kubọk uchi etapbe okem okem me lek inorie esa ekekpa atikọ enyi ebi ene, inyi usem kiji ikitaan̄ ijaan̄ me utọn̄ ebi ikigban̄. (Jobu 12:11) Eyi mokọt iyọt irọrọ. Eji mekọt ikikeek ibe ke inorie ototop eji me otu motop si me otu ebi ofifi ife. Ubọk yaage si, eji mekọt ikikeek ibe ke ubọk eji ekisa itumu usem ikitaan̄ ijaan̄ me utọn̄ ebi ofifi ife. Ire, ikare ikeya ke ikup. Kubọk inu njeen̄, bak lek orọmijọn̄ kiban̄, usini ene ekikpa nkeek kiban̄ isibi me oniin̄ okup gban̄ gban̄ gban̄ me utọn̄ ene, ikerere me mgbọ ekitumu usem inyi ebi irere ugane kiban̄. Ire, ebi ikaan̄ ofifi orọmijọn̄ mekọt ikimun̄ ubọk ikpa usem yi kubọk inu ikajeen̄ge ulibi. Pọọlu ibe mè eji eriọọn̄ ubọk eji ebekisa “ifọọk ene geelek ikọ.” Eyi isibi ibe ke eji ebekinwenwene usem kiji ikpọ me lek orọmijọn̄ ogwu eji ekitumu usem inyi ufuna usem kiji ikitaan̄ itop me utọn̄ ogwu okigban̄ eji, ikare me utọn̄ kiji gaalek.

KPA MGBỌ KE EJI EBEKITUMU ATIKỌ?

14. Me mgbọ Jisọs okupbe me inyọn̄ ijọn̄ yi, ire ijeen̄ ebi udun̄ kan̄ otutuuk inu iriọọn̄be ni? Kpa wele-nu.

¹⁴ Jisọs ikisa ida ònwọnwọn itumu ikọ inyi ebi udun̄ kan̄ mgbọ geelek, isa si ata ejit ijeen̄ ema owuwa inu. (Mak 6:34) Ire, owuwa mkpọ omaan̄ si echi ema ebekween̄ igbaalek. Jisọs ikajeen̄ ema otutuuk inu iriọọn̄be mgbọ yaage. Iriọọn̄ ere iriọọn̄-inu kiban̄ oyakabe, igobo itet si ibe ke mgbọ ema ebekween̄ usini atikọ ikarere. Eya orọ itumube ibe: ‘Enyi kpebekọt igobo otutuuk inu itet me mgbọ keyi.’ (Jọn 16:12) Keke ke eyi okijeen̄ eji?

15. Ire itat ibe eji ejeen̄ ebi eji ekigọọk ikween̄ Baibul otutuuk inu eji eriọọn̄be me mgbọ ge ni? Kpa wele-nu. (Urọk 25:11) (Kpọ si ogugo.)

¹⁵ Kubọk Jisọs, eji kpejeen̄ ebi ene otutuuk inu eji eriọọn̄be me mgbọ yaage bak lek ibe ke eji miriọọn̄ atikọ Baibul. Igbe ibe eji ekekeek mkpọ ofolek irek ebi ene. Keek-nu mkpọ ofolek ogwu enerieen̄ ya ogwu okinwọọn̄ orirọ usen iman mè ijojomo kè Jisọs melek ebi ototun̄ ukan̄ kan̄. Eji miriọọn̄ ibe ke orirọ chi ikakineme Jioba, kpan̄asi ikeya, ikimin ataak awaji. Ire, mọnọ-nu ibe ke obene ikigọọk ogwu enerieen̄ ya ikween̄ Baibul nde ge mè iyaka ire nde iba sabum usen orirọ usen iman kè Jisọs. Ire ojeen̄ ogwu enerieen̄ ya mkpọ Baibul otumube ofolek orọmijọn̄ chi, mè ikikeek ibe ke ikpoboyaka ikirie ijọk chi mgbọ yaage, ire mojeen̄ ibe ke osa ida ònwọnwọn irọ mkpọ melek ene ya ni? Me atikọ, usini ebi eji ekigọọk ikween̄ Baibul mekọt igwat lek isa mkpọ ema ekikween̄ ikirọ mkpọ me ugwem kiban̄. Ire, usini kiban̄ meweek ujọn̄ọ mgbọ isasa irọ unwene me nkeek mè irọrọ kiban̄. Eji mekọt itap ubọk inyi ebi eji ekigọọk ikween̄ Baibul ibe ekekaan̄ nje-nnyi-isi ire eji ikitumu inyi ema mkpọ ogbegbe ibe ema eriọọn̄ me mgbọ otatat, orere, me mgbọ ema ebekọt igobo itet.—Fuk Urọk 25:11.

16. Ike owa ke eji ebesa ikitap ubọk inyi ebi eji ekigọọk ikween̄ Baibul inyi ekọt ekeluk “ugwem me emen atikọ” ni?

¹⁶ Ikakaan̄ inu owawa echi okirọ ibe eji ekebele ejit kubọk itatap ubọk inyi ebi ene ekween̄ atikọ ofolek Jioba. Eji mekọt itap ubọk inyi ema ekup enye ekeluk “ugwem me emen atikọ” sa me ikekirọ inu chi: Kweek nye kire ata akpat ukot nyi ema. (3 Jọn 3, 4) Kiluk ugwem me oniin̄ okijeen̄ ibe ke ochieek me lek use echi okup me Baibul. Kisa me ata nkeek kitumu atikọ. Sa ida onwọnwọn kijeen̄ atikọ Baibul, mè kitumu ata usem me mgbọ otatat. Ebi ene esitọn̄ owu, sa nkeek kiban̄ fo lek Jioba. Ike okirọ ikeya, okijeen̄ ibe ke okitọbọ ebum inyi Jioba, Awaji ogwu atikọ.