Rọ Unwene Ogbegbe Inyi Okọt Okaan̄ Ntap-Me-Mun̄

1. (a) Keke ore usini oruru eji ekikaan̄ inan̄a me lek ikakaan̄ ntap-me-mun̄? (b) Keke ke eji ebekween̄ me ibot usem yi?

IRE obeek uriaak itumu inyi Jioba ibe ke omosa otutuuk ugwem kwun̄ iriaak ọmọ, mè inikaan̄ ntap-me-mun̄ ni? Ire orọ ikeya, isibi ibe ke obeek Jioba ibe itele ijo kwun̄ inyi owu mè itele ibe okoriaak ọmọ kubọk ge me lek ebi ikitọbọ ebum inyi ọmọ. (1 Pita 3:21) Sa me ikakaan̄ ntap-me-mun̄, owu okana ata akpat ukot isa inyi ebi ijija mè ebi ayaya ikup me ntitiin̄ kinyi. Isasa lek kwun̄ inyi Jioba ichubọk ire ata ntumu-mfieek! Usini mgbọ, okakaan̄ ntap-me-mun̄, ire, owu oma Jioba mè iweek irọrọ nkeek kan̄. Owu oriọọn̄ si ibe ke ire oweek ibe Jioba itele ijo kwun̄ inyi owu mè ire si ogwu unene kwun̄ ke igbe ibe okaan̄ ntap-me-mun̄. (Ikwaan̄ 2:​38-40) Usini mgbọ, mokọt iyọt owu me lek irọrọ ntumu-mfieek yi. Keke obokọt itap ubọk inyi owu ni? Me ibot usem yi, eji mekpa (1) mkpọ orọrọ usini ene kpekakaan̄ ntap-me-mun̄, (2) mkpọ orọrọ ikupbe ufiak ibe okokeek ibe ke ota ukot yi okigbet, mè (3) ubọk obosa ikaan̄ oruru inan̄a me lek ikakaan̄ ntap-me-mun̄ me okafiatge mgbọ.

MKPỌ ORỌRỌ USINI ENE KPEKAKAAN̄ NTAP-ME-MUN̄

2. Eke orọ usini ene kpekakaan̄ ntap-me-mun̄?

² Usini ene ekitet ntap-me-mun̄ kiban̄ ikaan̄ bak lek ukpook. Ikerere ibe ke ema mima Jioba, ema ekikaan̄ ukpook ibe ke ema kpebekọt isun̄ ikan kan̄. Ire okikaan̄ mbet ukpook yi, gwu nkeek kom me lek ere Baibul echi oborọ mè ochieek onye ibe ke Jioba ikakido inu echi okpokọtbe irọ me ubọk kwun̄. Iriọọn̄ ibe ke okaso ikup, ọmọ orọ, gaalek inu iweekbe ire inu onwọnwọn ichit echi obokọt irọ inyi ọmọ. (Itọn̄ 103:​13, 14; Kọl 3:23) Ire okitet ukpook ibe ke metutuku owu osikaan̄ ntap-me-mun̄, beek Jioba ibe irọ mè ejit kwun̄ inye kubọk ogwu okwa ge ogwu ogege ibe: ‘Eyi Jioba okukup melek n̄a, ǹkabatet ukpook. Ìre keke ke ogwu ebilene obokọt irọ emi?’​​—Itọn̄ 118:6.

3. Keke si obokọt igban usini ene ibe ekakaan̄ ntap-me-mun̄? (Kpọ si ogugo okup me ikpa yi.)

³ Usini ene mima Jioba, ire, kpekaan̄ ntap-me-mun̄ mije, ema ekikeek ibe ke ema kperiọọn̄ Jioba mè ijejeen̄ kan̄ okup me Baibul ijaan̄. Ire, ire ikup ufiak ibe ene iriọọn̄ otutuuk inu okup me Baibul sabum mokaan̄be ntap-me-mun̄ ni? Kè eji ekpọ-nu inu njeen̄ ge me Baibul. Mgbọ uwu mkpọn ere Pọọlu mè Sailas ekupbe osisikbe isan̄a, ema milook ogwu enerieen̄ okisi ikwaan̄ me uwu mkpọn ya mè ebi uwu kan̄ ata etip. Kpolọlọ, ogwu enerieen̄ ya mè ebi uwu kan̄ mira igobo itet ibe ke ire Awaji orọ inu ukechieen̄ ya isasa inyan̄a Pọọlu mè Sailas. Isọkọ me lek si, ema mikween̄ usini ijejeen̄ okukup ufiak ofolek Jioba mè Jisọs. Eya ibieen̄ ema ibe ekaan̄ ntap-me-mun̄ me ekafiatge mgbọ. (Ikwaan̄ 16:​25-33) Ire oriọọn̄ Jioba mè ima ọmọ me otutuuk ejit kwun̄ ni? Ire okween̄ okpan okpan atikọ Baibul, igwu ikom me emen ijo kwun̄ mè itumu ifieek ikukup inye ikiluk igọọk onineen̄ Jioba ni? Ire ufọọk-otu kwun̄ isa inyi idodo chi ire iin̄, isibi ibe ke obem lek ikakaan̄ ntap-me-mun̄.​​—Mak 12:30.

4. Kpasi ofifi inu okigban usini ene ibe ekakaan̄ ntap-me-mun̄? (Kpọ si ogugo.)

⁴ Usini ene miweek irọrọ unwene ogbegbe me ugwem kiban̄ inyi ekọt erọ inu Awaji oweekbe mè ekaan̄ ntap-me-mun̄, ire, ema ekikeek ibe ke irọrọ ikeya moyọt enenen. Me atikọ, ogwu okakaan̄ iriọọn̄-inu ikiriọọn̄ ubọk ikeek inu ijaan̄ sabum onorọ ntumu-mfieek. (Luk 14:​27-30) Candace ikween̄ inu okineme Jioba echi ogbegbe ibe ọmọ ikirọ me mgbọ irebe sọntitiik gwun̄, ire, ikatap inu ikween̄be cha me ikwaan̄. Mgbọ acha ojebe me lek kan̄, ikpọkpọk ibene ikikween̄ Baibul. Candace itumu ibe: ‘Nriọọn̄ inu ogbegbe ibe nkerọ nnyi Jioba, ire, nkitet ikaan̄ bak lek nkinwọọn̄ inu nkirọ. Nriọọn̄ ibe ke moyọt inwenwene ugwem n̄a.’ Ebi ofifi ife ekitet ukpook ibe ke ema kpebekọt ikirọ inu Jioba oweekbe esikaan̄ ntap-me-mun̄. Ema ekikeek ibe ke ema merọ ijo inu omimin esikaan̄ ntap-me-mun̄ eyi oborọ ibe esan̄a ema me ntitiin̄. Ire inu chi okitet owu ikaan̄ ibe okakaan̄ ntap-me-mun̄, keke ke obokọt irọ ni?

5. Ire eji ekitet ikakaan̄ ntap-me-mun̄ ikaan̄, keke ke eji ebekikeek mkpọ ofolek? (Matiyu 13:​44-46)

⁵ Eji esibelep mkpọ, eji kpekikpọ gaalek otu ewe inu ya, eji ekikpọ si oruru ibokaan̄ inyi eji. Owuwa mgbọ, eji ekilep inu onyenye otu ewe bak me lek oruru eji ebekaan̄ inan̄a me lek. Ikeya si, eji esikikeek mkpọ ofolek ntap-me-mun̄, eji ekakpọkpọ ikikeek unwene eji eberọ mè mkpọ iboweek eji me ubọk, eji ekekeek si oruru eji ebekaan̄ ire eji ikaan̄ ata mgbaan̄je melek Jioba. Jisọs ito urọk iba isasa ijeen̄ ufiak irebe irọrọ ikeyi. (Fuk Matiyu 13:​44-46.) Me urọk cha ge ge, ogwu enerieen̄ ge inyam otutuuk inu ikaan̄be inyi ikọt ilep inu unye otu ewe ge imun̄be. Owu si oweek inu unye otu ewe ge imun̄​​—atikọ ofolek Ama Ubọọn̄. Ire okitet ikaan̄ irọrọ unwene ogbegbe inyi okọt okaan̄ ntap-me-mun̄, gwu nkeek kom me lek urọk iba chi. Do lek kwun̄ ibe: ‘Ire nchieek ijaan̄ ibe ke ata etip Ama Ubọọn̄ ichubọk inye otu ewe ni? Ire mmọnọ mgbaan̄je n̄a melek Jioba, ikpọchieen̄ inyibe emi mè ebi bọn Nte n̄a ibene ni?’ Ufọọk-otu kwun̄ isa inyi idodo chi mokọt itap ubọk inyi owu oriọọn̄ inu oborọ inyi okọt otumu ofieek ikakaan̄ ntap-me-mun̄.

6. Keke obotap ubọk inyi eji ekọt eketap inu eji ekikween̄ me ikwaan̄?

⁶ Me urọk ogwu owop mfut, Jisọs ikpa usini mkpọ obokọt igban ene ibe ikakaan̄ nje-nnyi-isi me irek emen ekwukwu. Ire, Jisọs ijeen̄ si ibe ke usini ene menọ ata etip “mè ibọkọ itap me ata ejit” mè isa irọ mkpọ me ugwem kiban̄. (Luk 8:​5-15) Ire okikaan̄ sasaak bak me lek okariọọn̄ mè ire ikaan̄ mgbọ obochubọk iweek irọrọ inu okikween̄, kawọ lek. Jioba mokọt itap ubọk inyi owu okaan̄ ulọk isisiki ibot inyi ọmọ. Beek Jioba ibe itap ubọk inyi owu oma atikọ okikween̄ mè osa orọ inu me ugwem kwun̄.​​—Ijik 18:31; 36:26.

7-8. Keke okitet usini ebi ijija ikaan̄ ibe ekakaan̄ ntap-me-mun̄? (Kpọ si ogugo.)

⁷ Usini ebi ijija imama Jioba kpekọt irọ inu ogbegbe inyi ema ekọt ekaan̄ ntap-me-mun̄ bak me lek inu ebi ofifi ife ekitumu mè ikirọ. Kubọk inu njeen̄, usini ebi ijejeen̄ mekọt ikiteme nsabọn uwu ikpa ibe ebọkọ etap mè echieek me lek usini eru ubọk geelek ibe ke Jioba icha eru cha. Ire, mbet lek nteme cha mokọt isan̄a unan isibi. (Itọn̄ 1:​1, 2; Urọk 7:​1-5) Omokọt ifala ufe yi ire ogọọk akpat ukot ogwu okwa ogwu otutumu inyi Jioba ibe: “Ikakaan̄ ikọ ata-ikọ kwun̄ me ekiket mgbọ geelek, îrọ inyi ǹkengobo inu ǹtet ǹgak otutuuk ebi ìkijeen̄ emi inu.”​​—Itọn̄ 119:99.

⁸ Usini mgbọ, me ekariọọn̄ge, ebi uga mè ute irere ebi Ata-Ikọ Jioba ekigọọk irọ inyi nsabọn kiban̄ ekakaan̄ ntap-me-mun̄. Inu okup ema me ufiak ire ere bọn kiban̄ ebesi uwu ikpa ire mè mbet lek ikwaan̄ ebekaan̄. Mè iyaka ire, mokọt ire ibe ke ema kpetap efuuk me owot bọn kiban̄ ibe eto usini inu echi obotap ubọk inyi ema etaba lek eriaak me lek Jioba me isi. Ire okeek ibe ke nga kwun̄ mè nte kwun̄ mekọt itap ubọk inyi owu inyi okọt okoje onyi isi me irek emen ekwukwu ni? Ire ikeya, katet ikaan̄ igọgọọk ema ikpa usem. Riọọn̄ ibe ke acha kwun̄ ikpokọt igban owu ibe okakaan̄ ata mgbaan̄je melek Jioba.​​—Urọk 20:11.

9. Keke orọ usini ene kpekakaan̄ ntap-me-mun̄?

⁹ Usini ene miweek ikakaan̄ ntap-me-mun̄, ire, kperọrọ ikeya bak me lek ukeme okinan̄a me ubọk ebi otu ogbo kiban̄. Mè iyaka ire, mekọt ikitet ikaan̄ mije, ikaan̄ ogwu ema ekikup ikpọ ibe igọọk ema ikaan̄ ntap-me-mun̄ usen yaage. Kubọk inu njeen̄, ema mekọt ikikpọ chieen̄ igbagbaan̄ ikaan̄ ntap-me-mun̄ melek ogwu uwu kiban̄ ge mè iyaka ire ogwu unene kiban̄ ge. Me atikọ, ikalọ ibe ogọọk ebi ima kwun̄ okaan̄ ntap-me-mun̄ me usen yaage. Ire, ire igbe ibe otet ntap-me-mun̄ kwun̄ okaan̄ bak lek okikup ikpọ ema ni? Kawuuk ibe ke ire owu gaalek ochieek Awaji use ibe ke omosa otutuuk ugwem kwun̄ irọ nkeek kan̄, ikare owu melek ofifi ene egbaan̄ ichieek use ya. Kachieek ibe ofifi ene itọ inyi owu mè ire omokaan̄ ntap-me-mun̄ sa okpokaan̄.​​—Rom 14:12.

KEKE ORỌ OBOKIKEEK IBE KE OTA UKOT YI IGBET?

10. Keke ore ofifi inu orọrọ usini ene ekitet ntap-me-mun̄ kiban̄ ikaan̄?

¹⁰ Isọkọ me lek si, usini ene kperọ unwene ogbegbe ibe erọ inyi ekọt ekaan̄ ntap-me-mun̄ mije, ema ekikeek ibe ke ota ukot keyi ikagbet-nu. Ire, ire nkeek ya itat ni? Jisọs iteme ebi udun̄ kan̄ ibe: “Ìkup me mbem-lek, mije, Gwun̄ Ebilene ìbonu me ike mgbọ enyi ekakpọkpọge chieen̄.”​​—Luk 12:40.

11. Igọọk me lek inu okup me ikpa Okwa Itọn̄ 119:​60, ike eji ekikween̄ mkpọ ofolek Jioba igbaalek, ike owa ke ikan kan̄ okikup eji me lek?

¹¹ Eji ebesa lek kiji inyi Jioba mè ikaan̄ ntap-me-mun̄ bak me lek eji emabe Jioba mè iweek isisiki ibot inyi ọmọ. Ike eji ekiriọọn̄ Jioba igbaalek, ikeya ke eji ebekima ikan kan̄ mè ikigwat lek isun̄ ikan cha. (Fuk Okwa Itọn̄ 119:60.) Ogwu udun̄ kè Karais, Jemis ikpa ofifi inu orọrọ igbebe ibe eji ekegwat lek esiki ibot enyi Jioba: Kpunu ene geege orọriọọn̄ inu oborọ me iyakwut. Ọmọ orọ, eji ekesa usen geelek ekerọ “ata inu ògbegbe irọrọ,” orere, ekerọ inu Jioba oweekbe ibe eji erọ.​​—Jemis 4:​13-17.

12. Keke ke eji ebekọt ikween̄ inan̄a me lek urọk ebi ikwaan̄ uko gerep?

¹² Keek-nu inu ofolek urọk ebi ikwaan̄ uko gerep eyi Jisọs okpabe mkpọ ofolek. Jisọs ijeen̄ ibe ke usini ene mesi ikwaan̄ mbubak mgbọ ge gaalek, ke mekpe ema ikpoko ikike melek ebi isisi ikwaan̄ ibene me ewelegwe ire ikakwun̄. Ire, keke orọ ebi isisi ikwaan̄ mbubak mgbọ ge gaalek kpegọọk ibene ikwaan̄ ya me ata mgbọ? Ema etumu ibe: “Kpunu ene geege ògwegwen eji me ikwaan̄ ma!” Ema michubọk iweek isisi ikwaan̄, ire, kpunu ogwu onyinyi ema ikwaan̄. Mgbọ yaage egwenbe ema ibe enesi ikwaan̄, ema esisi ikwaan̄ ya me ekafiatge mgbọ. (Mat 20:​1-16) Me chereyi, Jisọs ikigwen eji ibe enekana ebi udun̄ kan̄ mè egọọk ekelook ata etip. Eji ekafiat mgbọ irọrọ inu Jisọs obe mè eji erọ.

13. Keke ke eji ebekọt ikween̄ inan̄a me lek nwa kè Lọt?

¹³ Usini ene ekitet ikaan̄ irọrọ unwene ogbegbe inyi ekọt etọbọ ebum enyi Jioba mije, ema ekikeek ibe ke ema mekọt irọ unwene cha sabum nkana-ngwook ukot keyi. Ire, ike okitet ikaan̄, ikeya ke ibokiyọt owu me lek irọrọ unwene echi okukup ufiak ibe orọ inyi okọt otọbọ ebum onyi Jioba. Jisọs iriọọn̄ atikọ yi ijaan̄ mè itaba ebi udun̄ kan̄ ubọk me utọn̄ ibe: “Ìkeek inu òrọrọ nwa kè Lọt.” (Luk 17:​31-35) Nwa kè Lọt iriọọn̄ ijaan̄ lek ibe ke mgbọ Jioba obofiat Sodọm mè Gomora okigbet, ire, ikabem lek itetele inu nkaan̄ kan̄. (Ibeb 19:​23-26) Inu orọrọ ọmọ ikikeek eji ibe ke mgbọ ebi ene ekaan̄be irọrọ unwene ogbegbe inyi ekọt eriaak Jioba ikayaka iwa. Mgbọ Jioba okaan̄be me ejit isire, ebi ene kpebeyaka ikaan̄ irek irọrọ unwene geege.​​—Luk 13:​24, 25.

14. Ike owa ke nrọ-nso nriran Baibul ofolek ota mgbọ obosa ikaan̄ mgbaan̄ me lek kwun̄?

¹⁴ Inu okibọkọ irek usen geelek me inyọn̄ yi ikijeen̄ ibe ke inu Baibul otumube ofolek ota ukot keyi okirọ iso. Ikerere ibe ke usini nriran Baibul ikakibọkọ irek me ere olukbe, igbe ibe orọ unwene ogbegbe mè okaan̄ ntap-me-mun̄ me okafiatge mgbọ mije, inu cha okirọ me ofifi ofifi ere. Keek-nu inu ogwu ikwaan̄ Pita otumube inyi usini ebi eyi Karais. Pita itumu inyi ema ibe: “Ìgwọk chieen̄,” mije, “mgburudun̄ inu geelek îgbet.” (1 Pita 4:7) “Mgburudun̄” ya mokọt ire mgburudun̄ ukot ebi Ju. Ebi Pita ogebe inu chi inyi miluk ijọn̄ọ ere me lek Jeruselem, kpebekup me ama Jeruselem mgbọ ebefiat ama ya si. (1 Pita 1:1) Ire, ema esimun̄ ike nriran ya orọbe iso, ema metoon̄ ejit me lek Jioba ibe ke ọmọ mokọt irọ si otutuuk ofifi ofifi use ichieekbe iso. Ikeya si, ikup ufiak ibe otaba iman̄ me lek nriran echi okirọ iso me chereyi. Osimun̄ ibe ke nkana-ngwook ukot yi ichubọk igbet enenen, eya mobieen̄ owu ibe orọ inu ogbegbe inyi okọt okaan̄ ntap-me-mun̄.

15. Ike owa ke eji ebesa ikibem lek inyi inunu eyi usen Jioba? (Pita Eyi Òso Iba 3:​10-13)

¹⁵ Me òso ikpa iba eyi Pita ogebe ijet ebi eyi Karais me adasi ukot, ikpa ubọk eji ebesa ibem lek inyi “usen Awaji,” orere, nkana-ngwook ukot keyi. Ubọk geelek ibe ke momọnọ mgbọ sabum usen Jioba ore, Pita itumu inyi ebi eyi Karais me adasi ukot ibe esun̄ inunu usen ya eriaak me ejit kiban̄. (Fuk Pita Eyi Òso Iba 3:​10-13.) Eji mekọt isun̄ inunu usen ya iriaak me ejit kiji sa me ikekibem lek inyi usen ya mè ikiluk “ugwem eyi òkukup me mbuban, mè ikinyi Awaji umin.” Keek-nu ubọk Jioba obokibele ejit ire ike ikimun̄ ubọk owu okiluk ‘ugwem eyi okinyi ọmọ umin’! Ire osa lek kwun̄ inyi ọmọ mè ikaan̄ ntap-me-mun̄, mgbọ ya ke ibobele ejit ichit.

ORURU OBOKAAN̄ IRE OKAAN̄ NTAP-ME-MUN̄ ME OKAFIATGE MGBỌ

16. Mgbọ owa onwọn ichit irọrọ inu ogbegbe ibe orọ inyi okọt okaan̄ ntap-me-mun̄? (Ebi Kọrint Eyi Òso Iba 6:​1, 2) (Kpọ si ogugo.)

¹⁶ Mgbọ keyi onwọn ichit irọrọ inu ogbegbe ibe orọ inyi okọt okaan̄ ntap-me-mun̄. (Fuk Ebi Kọrint Eyi Òso Iba 6:​1, 2.) Ogwu enerieen̄ Etiopia ogwu Filip ochichinibe imun̄ ibe ke ikup ufiak ibe ọmọ ikaan̄ ntap-me-mun̄ me ikafiatge mgbọ. Mgbọ yaage inọbe ata etip mè imun̄ ere ibokọt ikaan̄ ntap-me-mun̄, ikabene ikitumu ibe: ‘Madasi ikween̄ ata etip yi igbaalek. Ofifi mun̄ mokup me oniin̄ yi si.’ Kpan̄asi ikeya, idodo Filip ibe: ‘Ìre keke obogban ibe owu okatap emi me mun̄ mgbọ keyi?’ (Ikwaan̄ 8:​26, 27, 35-39) Ichubọk ire ata akpat ukot ke ijeen̄! Mgbọ ogwu enerieen̄ ya okaan̄be ntap-me-mun̄ isan̄a, “ikekinwọọn̄ unwọọn̄, mè ikpọk ibene ije kan̄ ikije ifo ido kiban̄.”

17. Ike owa ke Jioba obosa itap ubọk inyi owu?

¹⁷ Ire okitet ntap-me-mun̄ kwun̄ ikaan̄, riọọn̄ ibe ke Jioba iweek itatap ubọk inyi owu okọt ore ata unene kan̄. (Rom 2:4) Jioba mokọt itap ubọk inyi owu otim ogak ukpook, sasaak mè iyaka ire ofifi ofifi inu geelek inyi okọt okaan̄ ntap-me-mun̄. Osikaan̄ ntap-me-mun̄, omokaan̄ ata unwọọn̄ inan̄a me lek irọrọ inu Jioba oweekbe, “otutuuk inu” otelebe ikpoyaka ikup me lek kwun̄ kubọk inu geege si. (Filip 3:​8, 13) Mgbọ ya si, omonenigwuun̄ chieen̄ “me lek inu echi òkup me isi,” orere, otutuuk use geelek Jioba ochieekbe ebi isasa ugwem kiban̄ inyi ọmọ irọrọ nkeek kan̄ mè ikaan̄ ntap-me-mun̄.​​—Ikwaan̄ 3:19.