Dong ‘Dironi me Pwonyo’ Jo Mukene ki Lok pa Lubanga

1. Diro mene ma mitte ni wadong, dok pingo? (2 Temceo 2:24) (Nen bene cal.)

YECU owaco bot lulub kore ni: “Wucilok jo me rok ducu gudok jo ma luba . . . , wupwonygi me lubo jami ducu ma acikowu kwede.” (Mat. 28:​19, 20) Cik man nyuto ka maleng ni Lukricitayo ducu myero gubed lupwonye. Tye lok ada ni, Jehovah ywayo jo ma gimito ngeyo en dok lumalaika bene gikonyowa me nongo jo meno. (Tic 13:48; Jon 6:44; Yabo 14:6) Kadi bed kit meno, pud mitte ni wabed ki diro me pwonyo jo mukene lok i kom Jehovah. Nen kong labol pa Paulo ki Barnaba. Baibul tito ni i kare ma gubedo ka tito kwena i kacokke pa Lujudaya ma tye i Ikonio, ‘kit ma guloko kwede omiyo lwak dano mapol guye Rwot, Lujudaya wa ki jo Grik bene.’ (Tic 14:1) Labongo akalakala mo, Paulo gin ki Barnaba onongo gudoko ‘lupwonye ma ludiro.’ (Kwan 2 Temceo 2:24.) Mitte ni Lukricitayo ducu bene gubed ki diro me pwonyo jo mukene.

2. Pingo Lukricitayo mukene giwinyo calo pe gitwero dongo dirogi me pwony?

² Jo mogo giwinyo calo pe gitwero bedo lupwonye mabeco pien rwom kwangi tye lapiny nyo ginongo ni tek me pwonyo jo mukene. Co mogo ma kiloko i komgi i Baibul bene guwinyo kit meno. (Nia 4:10; Jer. 1:6) Jo mukene giwinyo calo pe gitye ki diro me pwony pien pe ginongo adwogi maber ki i tic me pwony. Ngene kene ni, pe dano ducu ma warwatte kwedgi nyo watito kwena botgi gibedo ki miti. Dok adwogi ma wanongo pe jenge i kom dirowa me pwony keken. Dong kadi bed dano gujolo kwena maber, nongo Jehovah ki lumalaika aye gukonyowa me nongo dano magi. Kadi bed kit meno, pud mitte ni watute matek me tito lok me kwena maber i yo maber loyo. Me konyowa, pwony man binyamo yo adek ma watwero doko kwede lupwonye ma ludiro.

NYUT NI IPARO PI DANO

3. Pingo onongo jo mapol ginongo ni winyo lok pa Yecu mit?

³ Baibul waco ni Yecu onongo “ngeyo gin ma tye i cwiny dano.” (Jon 2:25) En onongo ngeyo kit ma dano tamo kwede ki pingo gitamo kit meno. Yecu obedo ki kare me gudo cwiny jo ma en obedo ka pwonyogi pien onongo niang gin ma dano gimito kikome. En onongo ngeyo ni dano gimito tira kacel ki kwe cwiny. Lupwonye dini me kare meno onongo guketo cik mapol ma jenge i tam pa dano ma weko kwo bedo tek ki dano. (Mat. 9:36; 23:4) Pi meno, Yecu okonyo dano ki pwonyogi jami ma oweko kwogi odoko yot. Watwero neno meno ki i Pwonye me Wi Got. Dano gunongo mit pa winyo lok pa Yecu pien en onongo loko i kom jami ma pigi tego botgi.

4. Watwero nyutone nining ni waparo pi dano? (Nen bene cal.)

⁴ Watwero nyuto ni waparo pi dano ma warwatte kwedgi ka watute me niang par ma gitye kwede. Jami maraco mapol tye ka timme i lobo pa Catan-ni. Dong jo ducu ma watito kwena botgi gitye ki peko mo ma keligi par. Ka wiwa opo i kom lok meno, ci bibedo yot botwa me konyogi. Me labolle, oromo bedo ni wawinyo pi gin mo mutimme i kabedowa ma gwok nyo tye ka kelo lworo bot dano. Twero bedo ni lunyodo mogo gitye ki par ni gin mo marac twero timme i kom lutinogi ki i gang kwan. Nyo bene twero bedo ni nongo tic tek adada i kabedowu. Tem goyo i wii kit ma kwo tek kwede bot jo ma pe gitye ki gen mamwonya ma Baibul miyo.—2 Tem. 3:1; Ic. 65:​13, 14.

5. I yo ma nining ma onongo Yecu pat kwede ki lupwonye dini ma i karegi? (Matayo 11:​28-30)

⁵ Yecu onongo maro dano, dok onongo gitwero neno meno ki i kit ma en terogi kwede. Yecu onongo pat adada ki lupwonye dini me kare meno. Lupwonye dini magi onongo gubedo luwaka dok giuno jo mukene! (Mat. 23:13; Jon 7:49) Ento Yecu onongo tero dano ki woro dok ki kica. En onongo ‘lakica dok mwol bene ki i cwinye,’ dok meno okonye me bedo lapwony maber. (Kwan Matayo 11:​28-30.) Wan bene omyero water jo ma watito kwena botgi ki woro dok ki kica.

6. Watwero nyuto kica ki woro nining bot jo ma gikwero kwenawa nyo gidagwa?

⁶ Jo mogo pe gimito winyo kwenawa dok jo mukene gidagwa. Omyero wadok iye nining? Yecu opwonyowa ni pe omyero water jo ma gidagwa marac. Ento en owacciwa ni “wutim ber bot jo ma dagwu,” “wulam gum i kom jo ma cenowu,” ki bene “wuleg pi jo ma nywarowu.” (Luka 6:​27, 28) Bibedo yot botwa me nyuto kica bot jo ma giterowa marac ka wiwa opo ni tye tyen lok mo mumiyo ngat meno pe ye winyo lokwa. Tye ada gire ni, jo mogo gidagwa. Ento jo mukene giromo kwero lok kwedwa pien gitye ki peko mo i pacogi nyo gitye ka paro pi gin mukene. Twero bedo ni wao i pacogi i cawa ma onongo pe gitye ka winyo maber. I kare ducu, mitte ni ‘lok ma waloko myero obed lok mamit ma kado oromo maber, wek omi wange kit ma myero wadok kwede i peny pa ngat acel acel.’ (Kol. 4:6) Ka waparo pi dano dok waniang ni gitye ki peko i kwogi, ci wabitute me yenyo pwony mo ma twero konyogi.

WEK PWONYI OJENGE I LOK PA LUBANGA

7. Yecu otiyo ki gin ango me pwonyo dano? (Jon 7:​14-16)

⁷ Yecu pe opwonyo dano ki tamme. En opwonyo dano ki Lok pa Lubanga dok onyutigi kit ma lok meno twero konyogi kwede. Dok en bene opwonyogi i yo ma niang iye yot ma weko wigi twero po i kom pwony ma gunongo. Baibul tittiwa ni Yecu opwonyogi “macalo won twero, pe macalo lupwony-cik.” Man oweko “dano guuro” pwony pa Yecu adada. (Mar. 1:22; nen jami akwana me nwsty-E pi “pe macalo lupwony-cik.”) Lupwony cik me kare meno onongo gipwonyo dano ki lok pa lutela dini ma guywek adada. Ento Yecu opwonyo dano ki Lok pa Lubanga. Kadi bed Yecu onongo kong okwo i polo kacel ki Lubanga, ento en pe oywayo tam pa dano i kome ki tittigi jami ducu ma onongo ngeyo nyo oweko dano guwinyo ni ngecgi pe. Me ka meno, en otiyo ki Lok pa Lubanga me pwonyogi gin ma Lubanga mito ki botgi. (Kwan Jon 7:​14-16.) Yecu oweko lanen maber bot lulub kore ducu i kom kit me pwonyo dano.

8. Lakwena Petero olubo lanen pa Yecu nining?

⁸ Lupwonnye pa Yecu gulubo lanene. Gin gupwonyo dano ki Lok pa Lubanga. Me labolle, Petero otiyo ki Lok pa Lubanga i kare ma en oloko ki lwak i nino me Pentekote mwaka 33 K.M. Petero onongo pe okwano i cukul ma gingene adada i kare meno. Ento en otiyo ki ginacoya mapol me tito kit ma Yecu ocobo kwede lok ma lunebi gutito yam con. (Tic 2:​14-37) Gin ango mutimme i kare ma Petero otyeko lokke? “Jo muye lok ma en owaco botgi gibatijagi, ci gumedde i nino meno jo ma romo alip adek.”—Tic 2:41.

9. Pingo pire tek ni wajenge i Lok pa Lubanga ka watye ka pwonyo dano?

⁹ Baibul keken aye tye ki teko me loko kwo pa dano wek guyom cwiny Lubanga. (Ibru 4:12) Pi meno, omyero wati ki Baibul ka watye ka pwonyo dano. Omyero ‘watit lok pa Lubanga’ ento pe tamwa. (2 Tem. 2:24) Carolok 2:6 waco ni: “[Jehovah] aye ma miyo ryeko; ngec ki niang bene gia bote.” Dong ka watiyo ki Baibul me pwonyo dano, bedo calo waweko Jehovah aye loko kwedgi. (Mal. 2:7) Wamito ni dano gunge ni tam ma Baibul miyo ber loyo tam mo keken ma dano twero miyone. Lok ma i Baibul a ki bot Lacwecwa, dok konyowa me kwo i yo ma yomo cwinye ki dong me bedo ma cwinywa yom.—2 Tem. 3:​16, 17.

10. Gin ango ma watwero timone wek latin kwanwa oniang ni gin ma en tye ka pwonyone a ki i Baibul?

¹⁰ Ka itye ka yubbe me kwan ki latin kwanni me Baibul, tam i kom wang ginacoya mene ma ibinyutte wek onen gin ma Baibul pwonyo. Kadi bed watiyo ki cal kacel ki vidio me pwonyo lutino kwanwa, ento omyero kare ducu wawek guket tamgi i kom gin ma Baibul waco. Pi meno, i cawa me kwanwu, kwan wang Baibul ma bikonyo latin kwanni me niang lok ma pire tek me pwony meno. I nge meno, konye me tam i kom gin ma en twero pwonyone ki i tyeng meno. Dok kadi bed itye ka tic ki cal kacel ki vidio, kony latin kwanni me neno pwony me Baibul ma en myero onong ki i jami anena magi. Man pe te lokke ni omyero ilok madwong nyo ikwan wang ginacoya ducu ma tye i pwony moni. Ento ka ikwano wang Baibul moni, mi kare muromo bot latin kwan me tam iye wek oniang maber. Dok i kare mukene, twero mitte ni wunwo kwano tyeng meno odoco. Ka watimo kit man, nongo pe watye ka pwonyo latin kwanwa gin ma buk, cal nyo vidio waco, ento gin ma Baibul waco.—1 Kor. 2:13.

11-12. (a) Watwero diyo cwinywa i kom lutino kwanwa nining? (Tic pa Lukwena 17:​1-4) (Nen bene cal.) (b) Gin ango ma mitte ni jo mukene gunge madok i kom Baibul, dok watwero konyogi nining?

¹¹ I cawa mukene, latin kwanni romo nongo ni tek me ye nyo niang pwony moni. Ka tye kit meno, ci medde ki pwonye “lok pa Lubanga . . . kun idiyo cwinyi.” (2 Tem. 2:24) Pe dano ducu dongo marom i yo me cwiny. Tye pwony mogo mayot piwa me niang, ento jo mukene gimito kare me niang iye. Wii myero opo ni Lujudaya ma i Tecalonika pe guniang pwony pa Paulo cutcut. Pi meno, en obedo ka dok botgi tyen mapol me gonyo botgi tyen lok me Ginacoya. I agikkine, jo mogo i kingi guniang pwonye maber.—Kwan Tic pa Lukwena 17:​1-4.

¹² Yo mukene ma itwero diyo kwede cwinyi i kom latin kwanni aye ki penye lapeny ki dong mine kare me miyo lagam. Cik iti me winyo lagamme maber wek iniang tamme. I nge meno, wukwan wang ginacoya mogo ma twero konye me niang tam pa Lubanga i kom lok meno. Medo i kom meno, tye jo mogo ma peya guneno Baibul dok pe gingeyo gin ma tye iye. Twero bedo me kony me nyutte Baibul ma kome ento pe ma i cim. I nge meno, iromo nyuto bote kit ma Baibul konyowa kwede i kwowa me nino ducu kun ikwano wang Baibul acel nyo aryo ma kiryeyogi i te wi lok me “Ryeko pi Kwo me Nino Ducu” ma nonge i buk me Bed ki Kwo Maber Nakanaka!, me nyutte kit ma Baibul konyowa kwede me bedo ki kwo me yomcwiny. Dong ka ikonyo lutino kwanni me neno kit ma Baibul pire tek kwede, ci gibiketo i tic gin ma gupwonyo kun gibedo ki miti me pwonyo jami mukene mapol.

WEK GUKET TAMGI I KOM JEHOVAH

13. Ka watye ka pwony, anga ma omyero wawek dano guket tamgi i kome? Mi labol.

¹³ Mitiwa tye me konyo jo ma winyo lokwa me ngeyo Jehovah ki dok me nyikke cok kwede. (Yak. 4:8) Ka ngat mo mito konyo lawote me neno gin mo i dyewor, en pe diyo toc ci loko dog toc i kome kekene. Ento en caro toc i kom gin ma mito ni lawote onen. I yo acel-lu, ka watye ka pwonyo ngat mo ki lok me Baibul, omyero pe waywa tamme i komwa. Me ka meno, omyero wawek ngat meno oket tamme i kom Jehovah.

14. Watwero konyo latin kwanwa nining me keto tamme i kom Jehovah?

¹⁴ Ka itye ka kwan ki latin kwanni, konye wek odong marre pi Jehovah ci bitugo mitine me yomo cwiny Lubanga. (Car. 27:11) Pe itye ka pwonyo latin kwanni mere me weko gin marac ki timo gin matir wek odok Lacaden pa Jehovah. Ento imito ni en otim alokaloka i kwone me yomo cwiny Jehovah. Kadi bed kit meno, twero bedo tek ki lutino kwan mukene me juko timo jami ma Jehovah dag. Ka tye kit meno, ci iromo konye me niang tam pa Jehovah ki penye lapeny calo: “Pingo Jehovah dag tim man? Pingo Jehovah mito ni ijuk timone kadi bed yomo cwinyi? Cik man nyuto nining ni Jehovah mari?” Ka ikonyo latin kwanni me tam matek i kom Jehovah kacel ki kite mapatpat, ibikonye me niang kit ma Jehovah marre kwede matek. Man bikonyo latin kwanni bene me maro Jehovah ki me bedo ki miti me yomo cwinye.

MEDDE KI DONGO DIRONI ME PWONY

15. Gin ango ma watwero timone me dongo dirowa me pwony?

¹⁵ Waromo lega bot Jehovah wek okonyowa me neno gin ma myero watim me dongo dirowa me pwony. (1 Jon 5:14) I nge lega, myero watim gin mo ma Jehovah twero goyo laane iye. Dong mitte ni waket cwinywa adada ka watye i cokke pien meno aye ka ma Jehovah pwonyowa iye me doko lupwonye mucwiny. I nge meno, watwero keto i tic gin ma wapwonyo. Iromo wot kacel ki omego nyo lamego mo ma ngeyo pwony maber ka itye ka cito ka kwan ki latin kwanni. Lacen, iromo penye wek otitti ka ma itwero timo alokaloka iye. Wii bene myero opo ni, kadi bed ni ingeyo pwony moni maber, ento latin kwanni pud pe ngeyo. Tem goyo i wii kit ma latin kwanni twero winyo kwede i kom pwony ma wutye ka nyamone. I cawa me kwanwu, konye me neno adwogi maber ma pwony meno bikelo bote kacel ki jami mabeco ma Jehovah ociko pire i anyim. Ka itimo kit meno, ci ibikonye me doko larem Jehovah ki me bedo ki yomcwiny.—Jab. 1:​1-3.

16. Adwogi maber ango ma wabinongo ka wamedde ki dongo dirowa me pwony?

¹⁶ Pwonyo jo mukene ki lok i kom Jehovah obedo gin ma keliwa yomcwiny madit adada i kare-ni. Dok i lobo manyen, wabibedo ki jo mapol ma bimitte ni wapwonygi. Dong, omyero wamedde wunu ki nyuto ni waparo pi dano ma giwinyo lokwa, wawek pwonywa ojenge i Lok pa Lubanga, dok wakonygi wek guket tamgi i kom Jehovah ka wamedde ki tito kwena maber-ri. Ka watimo meno, ci wabidongo dirowa me pwony.