Pe Iwek Gin Mo Owir Tammi ki i Tic pi Jehovah

1-2. I yo ma nining ma gin mo ma pire tek twero doko gin ma wiro tamwa?

GO KONG ni itye ka dwoyo mutoka ci ngat mo ogoni cim. Itwero bedo ki tam ni ngat meno gwok mito kony ma megi cutcut ento ingeyo maber ni, i cawa meno myero iket cwinyi ka dwoyo mutoka. Wan bene i kare-ni, watye ki jami mapol ma timme i kwowa ma mitte ni wamok tamwa i kom gin ma pire tek loyo me atima i cawa moni.

² Wan ducu watye ki jami ma pigi tego mapol me atima. Dok wangeyo ni jami ma pigi tego loyo ma myero watim obedo jami ma kubbe ki worowa pi Jehovah.a (Mat. 6:33) Dong jo pa Jehovah gitye calo ludwo mutoka ma gigwokke adada, dok gitute me niang gin ma twero wiro tamgi woko ki i tic pi Jehovah.—Car. 4:25; Mat. 6:22.

3. Gin ango ma wabinyamo i pwony man dok meno bikonyowa nining?

³ Pe wamito ni gin mo keken owir tamwa ki i keto tic pi Jehovah mukwongo i kwowa. Kadi bed kit meno, wan ducu wakemme ki jami ma twero wiro tamwa. (Luka 21:​34-36) Dong me konyowa me medde ki keto tic pi Jehovah mukwongo, wabinyamo (1) jami mogo ma twero wiro tamwa, (2) gin ma Yecu otimo me lweny ki jami ma onongo twero wiro tamme, ki dong (3) kit ma watwero lweny kwede ki jami ma wiro tamwa i kare-ni.

JAMI MA TWERO WIRO TAMWA KI I TIC PI JEHOVAH

4-6. Jami macalo mene ma twero wiro tamwa woko ki i tic pi Jehovah?

⁴ Wan ducu watye ki jami ma pigi tego i kwowa ma mito cawawa. Me labolle, twero bedo ni watye ki peko me yotkom nyo jami mogo ma myero watim pi jo gangwa nyo pi wan kekenwa. Ngene kene ni, jami magi pigi tek dok gimito cawawa. Ento tika gitwero wiro tamwa woko ki i tic pi Jehovah ki cwinywa ducu? Meno twero timme ka kare ducu waketo tamwa i kom jami magi dok wacwalo cawa malac iye ma miyo pe wanongo cawa nyo kero me timo jami mukene.

⁵ Medo i kom meno, dano mapol i kinwa gikwo i kabedo ma opong ki tim gero, can lim ki dong two gemo. (2 Tem. 3:1) Ka watye ka kato ki i pekki magi, par twero nurowa adada ma miyo waketo tamwa i kom jami magi kare ducu.

⁶ Twero bedo ni wangeyo jo mogo ma gukato ki i pekki macalo magi ma oloko kwogi adada. Dong twero niange ka jo ma kit meno gitye ki par matek. Jehovah pe ocweyo wan dano me bedo ka deno can nyo me bedo ki par teretere. Jo mogo giwinyo calo kwogi dong pe biyubbe matwal! Macalo adwogine, gicwalo cawa malac ka namo nyo ka galowang wek giwil wigi woko ki i kom pekkigi. Gin ango ma twero konyowa ka wan bene wacako winyo kit meno? Kadi wa Yecu bene onongo tye ki jami mapol ma twero wiro tamme. Kong dong wanenu jami ma en otimo me medde ki keto tic pi Jehovah mukwongo.

GIN MA YECU OTIMO ME KETO TIC PI JEHOVAH MUKWONGO

7. Gin ango ma onongo twero wiro tam pa Yecu ki i tic pi Jehovah?

⁷ Onongo tye jami mapol ma twero wiro tam pa Yecu woko, calo yenyo yo me kwo kacel ki tim me wibye. I kare pa Yecu, jo mapol onongo gubedo lucan dok komgi lit. (Mat. 14:14; Mar. 14:7) Medo i kom meno, Luroma kacel ki Lujudaya mukene onongo giweko kwo bedo tek adada pi dano. I kare ma dano guneno ni Yecu tye ki teko me timo tango, onongo gimito kette me bedo kabaka. (Jon 6:​14, 15) Dok bene, Catan otemo bito Yecu kun wacce ni ebikete macalo laloc lobo. Yecu onongo twero cako tamo ni bibedo gin maber adada ka en aye eloyo lobo-ni. (Mat. 4:​8, 9) Dok lakwena Petero, ma onongo tye larem Yecu macok, ocuko cwinye me yero kwo mayot kun wacce ni: “Bed ki kica i komi kekeni, Rwot.”—Mat. 16:​21, 22.

8. Yecu olwenyo nining ki jami ma onongo twero wiro tamme ki i tic pi Jehovah?

⁸ Gin ango ma okonyo Yecu me medde ki keto tic pi Jehovah bedo mukwongo i kwone? Tye jami adek ma okonye. Me acel, en olubo tam pa Jehovah. (Jon 8:28; 14:9) Me aryo, en olungo wiye i tic me tito kwena ki pwonyo dano. (Mat. 9:35) Ki me adek, en oniang maber gin ma pire tek loyo i kwo. (Jon 4:34) En okwero atematema pa Catan lajwac dok oniang ni tam pa Petero onongo pe obedo gin ma Jehovah mito pire. (Mat. 4:10; 16:23) Yecu pe oye ni gin ma dano gitamo, giwaco nyo gitimo owir tamme ki i cobo miti pa Jehovah. I kare-ni, jami ma twero wiro tamwa ki i tic pi Jehovah twero bedo pat adada ki jami ma Yecu owok ki iye. Ento timo jami adek magi ma Yecu otimo-ni twero konyowa me keto tic pi Jehovah bedo mukwongo i kwowa.

KIT MA WATWERO LWENY KWEDE KI JAMI MA WIRO TAMWA

9. Gin ango ma romo konyi me ‘niang gin ma Jehovah mito ni iti?’ (Jo Epeco 5:17)

⁹ Pwonnye me tam calo Jehovah. Timo meno twero konyi me ‘niang gin ma Jehovah mito ni iti.’ (Kwan Jo Epeco 5:17.) Itwero niang gin ma yomo cwiny Jehovah ka ikwano dok ilwodo Lokke. Kadi bed Baibul pe loko atir atir i kom gin ma itye ka kato ki iye, pud itwero niang gin ma Jehovah mito ni itim. Man twerre nining? Man twero timme ka ikwano Baibul i yo matut wek iniang maber gin ma Jehovah tamo i kom jami mogo. Dok bene, myero ibed atera me keto i tic gin ma ipwonyo.

10. Watwero pwonnye me tam kit ma Jehovah tamo kwede nining?

¹⁰ Watwero pwonyo kit ma Jehovah tamo kwede ka wakwano Baibul kun walwodo kit ma en konyo kwede dano i yo me mar. (Jer. 45:5) Ka wawoto ki kwano lok moni ki i Baibul watwero pennye ki lapeny calo: ‘Lok man pwonya gin ango i kom Jehovah? Gin ango ma mitte ni atim alokaloka iye wek atam calo Jehovah?’ Wangeyo ni tam pa Jehovah tye lamal loyo tamwa. (Ic. 55:9) Pi meno, bedo ber ka walego bote me konyowa niang kit me timo mitine. (Jab. 143:10) Dok bene, walego bote me konyowa wek watam kit ma en tamo kwede.—1 Jon 5:14.

11. Ngo ma Jehovah mito piwa?

¹¹ Jehovah mito ni wabed atera pi agikki piny. Meno aye tyen lok mumiyo en pe mito ni gin mo keken owir tamwa. (Mat. 24:44) En bene pe mito ni par onurwa woko. (Mat. 6:​31, 32) Pi meno, en miniwa tam maber wek wange gin me atima ka wacako bedo ki par i kom yotkomwa, ticwa, nyo jo me odiwa. Dong ka walego Jehovah pi ryeko kacel ki teko me lweny ki pekkiwa, en bigamo legawa.—Jab. 55:22; Car. 3:​5-7.

12. Gin ango ma bikonyowa me medde ki bedo ki yomcwiny kadi bed jami maraco tye ka timme i wi lobo? (Matayo 5:3)

¹² Lung wii i tic pi Jehovah. Wan ducu watye ki par pi jami maraco ma tye ka timme i wi lobo-ni, ento pe watye ki kero me jukogi. Dong, wek pe waket tamwa i kom jami ma pe watwero jukone, myero walung wiwa i timo jami me cwiny. Ka wamedde ki timo jami ducu ma watwero me bedo ki wat macok ki Jehovah, ci wabibedo ki yomcwiny pien meno aye gin ma en ocweyowa ni watim. (Kwan Matayo 5:3.) Watimo meno ki kwano Baibul kacel ki tute matek me tic pi Jehovah i yo mo keken ma watwero. Timo meno yomo cwiny Jehovah dok obedo yo me ryeko me tic ki cawawa.—Car. 23:15.

13. Watwero tic ki cawawa i yo maber loyo nining?

¹³ Macalo Lukricitayo, dong wamoko tamwa me ‘tic ki cawawa i yo maber.’ (Ep. 5:​15, 16; nen jami akwana me nwsty-E pi “kare ma tye myero iti kwede i yo maber.”) Tyeng magi pe tye ka lok mere i kom kit ma watiyo kwede ki cawawa me cobo ticwa me nino ducu. Me ka meno, cuko cwinywa me tic ki cawa ma watye kwede i yo maber ma peya agikki me lobo-ni obino. Watwero tic ki cawawa i yo maber loyo nining? Ka wacwalo cawa malac ka winyo, neno, nyo kwano lok angeya i kom jami maraco ma tye ka timme i lobo-ni, man twero turo cwinywa dok weko warwenyo kero ma myero wati kwede me woro Jehovah. Bedo ber loyo ka pe watero kare malac ka kwano, winyo, nyo neno lok angeya! I yo ma kit meno, wabibedo ki cawa kacel ki kero muromo me tic pi Jehovah. Wangeyo bene ni pire tek me tam i kom kit ma watwero medo kwede ticwa pi Jehovah, me labolle, ki dok cen ka limo jo ma gunyuto miti i kom kwenawa. Waniang ni obedo gin ma pire tek adada me tic ki kare mo keken ma wanongo me konyo dano wek ‘gunge lok me ada dok gunong larre.’—1 Tem. 2:4.

14. Lungo wiwa i tic pi Jehovah konyowa nining? (Nen bene cal.)

¹⁴ Ka walungo wiwa i tic pi Jehovah, man biweko wiwa bedo ka po pingo jami maraco tye ka timme i wi lobo. Pe wabibedo ki par mukato kare woko ka waneno tim gero, can lim, nyo two gemo tye ka timme pien wangeyo ni Baibul otito woko con ni jami magi bitimme. Jehovah bigiko pekki magi ducu ci bikelo Paradic i lobo. Ka wawoto ki kuro kare meno, wangeyo ni Jehovah bikonyowa me ciro pekki magi, dok meno konyowa me bedo ma wiwa opye mot.—Jab. 16:8; 112:​1, 6-8.

15. Ma lubbe ki 1 Petero 4:​7, gin ango ma omyero watim, dok pingo?

¹⁵ Niang maber gin ma pire tek loyo i kwo. Jo mapol i kare-ni, giketo cwinygi tutwalle i kom nongo yomcwiny dok pe gitye ki tam mo keken ni agikki me lobo man dong cok adada. Pe obedo gin marac me nongo yomcwiny ento wek pe wabed ka tam calo jo me lobo-ni, myero ‘wagwok kitwa’ [nyo “wabed ki wic ma kwiri”, NWT.] (Kwan 1 Petero 4:7.) Man bikonyowa pe me cwalo cawa malac tutwal i yenyo yomcwiny, ento me moko tam me ryeko. Ka watiyo ki cawawa i yo maber, ci wanyuto ni waparo pi kit ma Jehovah tamo kwede dok ni waniang jami ma pigi tego loyo i kwo.—2 Tem. 1:7.

16. Gin ango ma pire obedo tek loyo bot Yecu i kare ma en dong cok to?

¹⁶ I kare ducu, Yecu wiye opo i kom gin ma pire tek loyo i kwone. Kadi wa i kare ma onongo en cok to, en onongo ngeyo ni gin ma pire tek loyo aye medde ki bedo lagen bot Jehovah kacel ki tiyo mitine. Meno aye gin mumiyo en obedo ka lega matek adada. Ento lukwenane pe gubedo ka lega. Me ka meno, gin “gunino woko pi cwercwiny.”—Luka 22:​39-46; Jon 19:30.

17. Pingo jo mapol gitiyo ki kabedo me nywako lok i Intanet, dok man twero gudogi nining? (Nen bene cal.)

¹⁷ Calo lukwena pa Yecu, wan bene watye ka kwo i kare ma kwo tek dok man miyo wabedo ma waol dok ma cwinywa otur. Jami ma tye ka timme i kare man me agikki-ni miyo wabedo ki par mapol. Jo mapol i kare-ni gitero cawa malac i kabedo me nywako lok i Intanet wek giwil wigi i kom pekkigi. Me labolle, gitiyo ki Intanet me cwalo cal bot luremgi ki lupacogi ki dong me nywako kwedgi gin ma tye ka timme i kwogi. Dok gitiyo kwede me neno vidio mapol ata nyo tuko tuko me vidio. Ento tye jami manyen mapol me anena ki me akwana ma miyo jo magi gitero cawa malac kacel ki kero madwong nino ducu ka tic ki kabedo magi. Me konyowa wek wabed ki neno mupore i kom kabedo me nywako lok i Intanet, ber adada ka wapennye kekenwa ni, ‘Tika jami ma aneno nyo atimogi i kabedo me nywako lok miyo awinyo maber, nyo mono tye ka wiro tamma woko ki i kom gin ma pire tek loyo?’

18. Ryeko twero konyowa nining me yero jami ma wagalo ki wangwa?

¹⁸ Obedo gin maber me galo wangwa i cawa mukene. Ento pire tek adada ni wayer ki ryeko jami ma waneno nyo tuko me vidio ma watuko i TV nyo i Intanet. Pol kare ka watyeko neno vidio acel, vidio mukene dok pye, ma man twero ywayo tamwa me bedo ka neno vidio mapol. Vidio magi i cawa mukene nongo ginyuto tim gero nyo tim macilo. Meno aye gin mumiyo ominwa mo ma bedo i lobo Acia opoto i peko. En ocako ki neno vidio mogo macego cego ki i Intanet. Ci en omedde ki neno vidio mukene ma obedo ka pye i wang cimme dok i nge kare mo en ocako neno vidio macilo. I agikkine, en ocako neno cal ma tugo miti me buto. Ki pwoc madit, en onongo kony ki bot luelda kacel ki lureme macok mumiyo en ojuko tim man woko. En orucu app mogo woko ki i cimme dok odwoko piny cawa ma cwalo me tic ki cimme. Gin mutimme i kom omego-ni pwonyowa ni pire tek adada me moko tam me ryeko ka odok i kom jami ma wagalo ki wangwa.

19. Gin ango ma twero timme ka walungo wiwa tutwal ka yweyo wiwa?

¹⁹ Mitte bene ni wamok tam me ryeko ka odok i kom kare ma wakwanyo me yweyo wiwa. Wan ducu wamito yweyo mo ki i dog ticwa pien konyo me gwoko yotkomwa. Ento ka waketo cwinywa tutwal i kom yweyo wic, meno twero kwanyo cawawa woko ki i timo jami ma pigi tego. (Pil. 1:10) Mitte ni wan ducu wamok piwa kenwa gin ma watimo ki dong cawa ma wacwalo ka timone. Ka itye ka moko tam, pennye kekeni ni: ‘Tika cawa ma acwalo i yweyo wic nyuto ni amoko tam me ryeko? Tika aketo gin ma pire tek loyo bedo mukwongo i kwona? Tika atye ma ayubbe pi “agikki me jami ducu”?’—1 Pet. 4:7.

20. Adwogi maber ango ma wanongo ka pe waye ni gin mo keken owir tamwa ki i tic pi Jehovah?

²⁰ Wanongo adwogi maber ka pe waye gin mo keken gengowa ki timo gin ma pire tek loyo, ma en aye ticwa pi Jehovah. (Ic. 48:17) Ki kony pa Jehovah, wabibedo ki kero me kanyo pekkiwa. Pe wabibedo ki par mukato kare woko pi jami ma tye ka timme i wi lobo-ni. Dok wabigwokke ki cwalo cawa malac tutwal ka yweyo wiwa. Dong wamoku tamwa me tam calo Jehovah, me lungo wiwa i tic pi Jehovah, ki dong me niang maber gin ma pire tek loyo i kwo. Timo meno bikonyowa me keto Jehovah bedo mukwongo i kwowa i kare-ni ki dong me mako “kwo ma en aye kwo kikome.”—1 Tem. 6:19.