Itwero Doko Larem Lubanga Nining?

1, 2. Angagi ma gubedo lurem Jehovah?

ANGA ma imito ni obed laremi? Myero obed ngat mo ma in imaro. En nongo obedo ngat ma wiwu rwatte kwede, dano ma lakica dok tye ki kit mabeco ma imaro.

² Lubanga Jehovah oyero dano mogo me bedo lureme. Me labolle, Abraim obedo larem Jehovah. (Icaya 41:8; Yakobo 2:23) Jehovah bene onongo maro Daudi. En owacci Daudi obedo laco ma ‘oyomo cwinye.’ (Tic pa Lukwena 13:22) Dok Jehovah onongo ‘maro’ lanebi Daniel “matek tutwal.”​—Daniel 9:23.

3. Ngo mumiyo Abraim, Daudi, ki Daniel gudoko lurem Jehovah?

³ Abraim, Daudi, ki Daniel gudoko lurem Jehovah nining? Jehovah owaco ki Abraim ni: “Ityeko woro doga.” (Acakki 22:18) Jehovah doko larem jo ma gimwol dok giwinyo doge. Kadi wa rok kulu gudoko lureme. Jehovah otito bot rok me Icrael ni: “Myero wuwiny lokka, wek abed Lubangawu, dok wek wun wubed jona.” (Jeremia 7:23) Pi meno, in bene myero iwiny dog Jehovah ka imito doko lareme.

JEHOVAH GWOKO LUREME

4, 5. Jehovah gwoko lureme nining?

⁴ Baibul tito ni Jehovah tye ka yenyo yo “me nyuto tekke bot jo ma gibedo ki lengic i kome.” (2 Tekwaro 16:9) I Jabuli 32:8, Jehovah ocikke bot lureme ni: “Abipwonyi dok abicimmi yo ma myero ilubi; abimiyi ryeko dok abineni.”

⁵ Lakwor mo matek adada pe mito ni wabed lurem Lubanga. Ento Jehovah mito gwokowa. (Kwan Jabuli 55:22.) Wan macalo lurem Jehovah watiyo pire ki cwinywa ducu. Wagwoko genewa bote kadi wa i kare ma kwo tek. Dok watye ki gen acel ma laco jabuli obedo kwede. En ocoyo lok i kom Jehovah ni: “Pe gibidira woko cen, pien en tye yo tung cinga ma lacuc.” (Jabuli 16:8; 63:8) Catan temme nining me gengowa ki bedo lurem Lubanga?

CATAN OKELO KOKO I KOM DANO

6. Koko ango ma Catan okelo i kom dano?

⁶ I Dul me 11 wapwonyo ni Catan okelo pyem i kom Jehovah kun kok i kome ni en lagoba dok tero dano i yo marac pien pe omiyo kare bot Adam ki Kawa me moko tamgi pigi kengi i kom gin maber ki gin marac. Buk pa Yubu bene pwonyowa ni Catan moro koko i kom jo ma gimito bedo lurem Lubanga. Catan okelo lok ni gitiyo pi Lubanga pi rwot ineka keken, ento pe ni pien gimare. Catan bene owaco ni eromo miyo ngat mo keken kwero Lubanga woko. Kong wanenu gin ma watwero pwonyo ki bot Yubu ki dok kit ma Jehovah ogwoke kwede.

7, 8. (a) Yubu obedo anga? (b) Ngo ma Catan oloko i kom Yubu?

⁷ Yubu obedo anga? En onongo dano ma kite ber ma okwo mwaki 3,600 angec. Jehovah owaco ni i kare meno, onongo pe tye dano mo macalo Yubu i lobo. En onongo tye ki woro matut pi Lubanga dok dag tim marac. (Yubu 1:8) Ada, Yubu obedo larem Jehovah macok.

⁸ Catan okelo pyem ni Yubu tiyo pi Lubanga pi jami mabeco ma en nongo ki bot Lubanga keken. Catan owaco bot Jehovah ni: “Pe in aye irumo kome ki cel, ki ode, ki gin ducu ma en tye kwede, tungi ki tungi? In imiyo gum i kom tic me cinge, limme bene omedde i lobo. Ento tugi keto cingi cut koni, igud gin ducu ma en tye kwede, ci en yeti ki i nyimi.”​—Yubu 1:10, 11.

9. Jehovah omiyo twero bot Catan me timo ngo?

⁹ Catan okok i kom Yubu ni en tiyo bot Jehovah pi jami ma en nongo ki bot Lubanga keken. Catan bene opyem ni eromo miyo Yubu giko tic pi Jehovah woko. Jehovah pe oye lok pa Catan, ento En gire omiyo twero bot Catan me temo ka Yubu obedo larem Jehovah pien en maro Lubanga.

CATAN OTEMO YUBU

10. Catan otemo Yubu nining, dok Yubu odok iye nining?

¹⁰ Mukwongo, Catan okwalo nyo oneko lee pa Yubu ducu. I nge meno, Catan oneko pol pa lutic pa Yubu. Yubu orwenyo jamine ducu. Me agikkine, Catan oneko lutino apar pa Yubu i yamo magwar. Ento Yubu omedde ki bedo lagen bot Jehovah. “I kom lok man ducu, Yubu pe obalo, pe owaco ni Lubanga otimo rac.”​—Yubu 1:12-19, 22.

11. (a) Ngo mukene ma Catan otimo i kom Yubu? (b) Yubu odok iye nining?

¹¹ Catan pe ogik kenyo. En opyem ki Lubanga kun wacci: ‘Gud cogone ki ringo kome, ci en biyeti ki i nyimi.’ Pi meno, Catan obolo two malit atika i kom Yubu. (Yubu 2:5, 7) Ento, Yubu pe oturo genene i kom Jehovah. En owacci: “Nio wang ma ato, ento pud abiwacci cwinya leng!”​—Yubu 27:5.

12. Yubu onyuto nining ni Catan obedo lagoba?

¹² Yubu onongo pe ngeyo gin mo keken i kom pyem pa Catan-ni nyo pingo etye ka deno can malit kumeno. En otamo ni Jehovah aye tye ka kelo peko i kome. (Yubu 6:4; 16:11-14) Kadi bed kumeno, Yubu omedde ki gwoko genene i kom Jehovah. Man onyuto ka maleng ni Yubu pe tiyo pi Lubanga pi rwot ineka. En obedo larem Lubanga pien marre. Koko pa Catan-ni weng obedo lok goba!

13. Ngo ma otimme pien Yubu obedo lagen bot Lubanga?

¹³ Kadi bed Yubu onongo pe ngeyo gin ma tye ka timme i polo, en obedo lagen bot Lubanga dok onyuto ni Catan cwinye col. Jehovah omiyo mot bot Yubu pi bedo lareme ma lagen.​—Yubu 42:12-17.

KOKO MA CATAN OKELO I KOMI

14, 15. Koko ango ma Catan omoro i kom co ki mon ducu?

¹⁴ Itwero nongo pwony ma pigi tego ki i gin mutimme i kom Yubu. I kare-ni, Catan kok i komwa ni watiyo pi Jehovah pi gin maber ma wanongo ki Bote. I Yubu 2:4, Catan owacci: ‘Gin ducu ma dano tye kwede en bimiyo pi kwone.’ Pi meno, Catan pe omoro adot i kom Yubu keken, ento bene i kom co ki mon ducu ni gitamo pigi kengi. Mwaki miya mapol i nge to pa Yubu, Catan onongo pud tye ka yeto Jehovah ki doto luticce. Me labolle, i Carolok 27:11, wakwano ni: “Latinna, bed ryek, wek iyom cwinya, wek anong lagam ma myero adok iye i lok ki ngat ma yeta.”

¹⁵ Itwero nyuto ni Catan obedo lagoba, kun iyero me winyo dog Jehovah dok ibedo lareme ma lagen. Kadi bed ni mitte ni itim alokaloka madongo i kwoni wek idok larem Lubanga, man obedo tam ma pud dong ber loyo ma itwero mokone! Man obedo lok ma pire tek adada. Catan omoro koko ni in pe ibibedo lagen bot Lubanga ka itye ki peko. En temo bwolowa wek watur genewa bot Lubanga. I yo ango?

16. (a) Diro ango ma Catan tiyo kwede me juko dano ki tic pi Jehovah? (b) Larac-ci twero juki ki tic pi Jehovah nining?

¹⁶ Catan tiyo ki yo mapat pat me gengowa ki bedo lurem Lubanga. En lwenyo i komwa “macalo labwor ma kok, kun yenyo dano me amwoda.” (1 Petero 5:8) Pe ibed ki ur ka luremi, jo me odi, nyo jo mukene gitemo gengi ki kwano Baibul nyo timo gin matir. Itwero winyo calo kitye ka lweny i komi.a (Jon 15:19, 20) Catan bene “lokke nen macalo lamalaika ma menyo piny.” Pi meno, en twero tic ki diro me bwolowa wek wakwer winyo Jehovah. (2 Jo Korint 11:14) Yo mukene ma Catan temo jukowa ki tic pi Jehovah aye ni, en miyo wabedo ki tam ni pe wapore me tic pi Lubanga.​—Carolok 24:10.

LUB CIK PA JEHOVAH

17. Pingo wawinyo dog Jehovah?

¹⁷ Ka wawinyo dog Jehovah, ci nongo watye ka nyuto ni Catan obedo lagoba. Gin ango ma bikonyowa me bedo luwiny? Baibul waco ni: ‘Mar Jehovah Lubangani ki cwinyi ducu, ki kwoni ducu, ki tekki ducu.’ (Nwoyo Cik 6:5) Wawinyo dog Jehovah pien wamare. Ka marwa pi Jehovah woto ki dongo, ci wabibedo ki miti me timo jami ducu ma en mito ni watim. Lakwena Jon ocoyo ni: “Maro Lubanga en aye gwoko cikke. Dok cikke pe nurowa.”​—1 Jon 5:3.

18, 19. (a) Jami macalo mene ma Jehovah waco ni giraco? (b) Wangeyo nining ni Jehovah pe tye ka penyowa me timo gin ma kato kerowa woko?

¹⁸ Ento jami macalo mene ma Jehovah waco ni giraco? Labol mogo tye i bok ma wiye tye ni “Dag Jami ma Jehovah Dagi.” Ka pud ineno anena, iromo tamone ni tim mogo ma kiryeyogi-ni pe girac tutwal. Ento ka ikwano ginacoya ma kiketogi kun ilwodo lok iye, ci ibiniang ryeko ma tye i lubo cik pa Jehovah. Iromo bene bedo ki tam ni myero ilok kwoni. Kadi bed ni man twero bedo gin matek, ka itimo ci ibinongo yomcwiny ki kuc ma bino pi bedo larem Lubanga ma lagen. (Icaya 48:17, 18) Wangeyo nining ni twere me timo alokaloka magi?

¹⁹ Jehovah pe penyowa ni watim gin mo keken ma timone kato kerowa woko. (Nwoyo Cik 30:11-14) Macalo larem me ada, en ngeyowa maber loyo wan kikomwa. En ngeyo tekowa ki gorowa. (Jabuli 103:14) Lakwena Paulo ocuko cwinywa ni: “Lubanga genne, pe biye ni gibitwu matek makato ma wuromo cirone, ento i kare ma Catan tye ka bitowu, Lubanga bimiyowu yo ma myero wubwot kwede, wek wubed ki twero me ciro.” (1 Jo Korint 10:13) Watwero bedo ki gen ni Jehovah biminiwa teko me timo gin matir kare ducu. En bimini “tek madwong” ma twero konyi me ciro peko.​—2 Jo Korint 4:7.

PWONYE ME MARO GIN MA LUBANGA MARO

20. Kit macalo mene ma omyero ilubi, dok pingo?

²⁰ Ka wamito bedo lurem Jehovah, omyero wajuk timo jami ma Jehovah waco ni giraco, ento bene omyero watim makato meno. (Jo Roma 12:9) Lurem Lubanga gimaro jami ma en maro. Kiloko i komgi i Jabuli 15:1-5. (Kwan.) Lurem Jehovah giporo kite dok ginyuto “mar, yomcwiny, kuc, diyo cwiny, kica, ber, gen, mwolo, gwokke ken.”​—Jo Galatia 5:22, 23.

21. Itwero pwonye nining me nyuto kit ma Lubanga maro?

²¹ Itwero pwonye nining me nyuto kit ma mwonya magi? Omyero ipwony gin ma Jehovah maro ki kwano Baibul kare ki kare. (Icaya 30:20, 21) Ka itimo meno, marri pi Jehovah bidongo, dok ka marri pire woto ki dongo, ci ibibedo ki miti me lubo cikke.

22. Adwogi ango ma ibinongo ka iwinyo dog Jehovah?

²² Alokaloka ma myero itim i kwoni kiromo porone ki lunyo bongo macon kun iruko bongo manyen. Baibul wacci myero ‘iwek kwoni macon’ dok iruk ‘kit pa dano manyen.’ (Jo Kolocai 3:9, 10) Kadi bed loko kwowa ki dok lubo cik pa Jehovah pe obedo gin mayot, ka watimo jami magi, en ocikke ni ebimiyowa “mot madit.” (Jabuli 19:11) Ada, yer me winyo dog Jehovah, ci ibinyuto ni Catan obedo lagoba. Ti pi Jehovah, pe ni pien ibinongo mot i anyim, ento pi mar ma itye kwede pire. Man bimiyo idoko larem Lubanga kikome!