Bok Me Lapeny

◼ Mono mitte ni latit kwena ma lamego obo wiye ka tye ka kwan ki latin kwan i nyim doggolane kacel ki latit kwena ma omego?

Ka latit kwena ma lamego kwano ki ngat moni kare ducu, ce omego mo tye kwede i kwan meno, myero lamego-ni obo wiye. (1 Kor. 11:3-10) Watchtower me Julai 15, 2002, pot karatac 27, tittiwa ni: “Man obedo yub me pwony ma dong kimoko con, ma lapwony me Baibul pa ngat meno aye doro. Pi meno, kwan me Baibul meno nongo odoko but kacokke. Ka lamego ma kibatija odoro kwan meno i nyim omego ma kibatija, lamego-ni myero obo wiye.” I yo acel-lu ka omego-ni obedo latit kwena ma peya kibatija, lamego-ni pud myero obo wiye. Man kwako kwan ducu, kadi ki i gangi, i nyim doggola, nyo yub mo keken ma kimoko me kwano Baibul.

Ki tungcel, ka kwan i nyim doggola pud peya omoko maber, ci pe mitte ni lamego-ni obo wiye ka tye ki latit kwena ma omego, kadi bed ni obino ka lim ki miti me nyuto kit me cako kwano Baibul, nyo obino ka medde ki nyamo lok ma gucako wiati. Kit ma kwan i nyim doggola cwalo kare me moko maber, dok mito ni kong kidok cen ka lim tyen mapol, lutit kwena myero guti ki niangogi kacel ki ryeko ka gimito moko awene mupore me boyo wic.