Kwano Baibul ki Lutino Kwan i Yo ma Weko Gidongo
Bute me 10: Pwonyo Lutino Kwanwa i Tic me Pwony i Ot-ki-Ot
1 Ka dong luelda gunongo ni latin kwan me Baibul oporre me bedo latit kwena ma peya kibatija, ci en twero cako donyo i tic me tito kwena maber-ri kacel ki kacokke. (Nen buk me Organized to Do Jehovah’s Will, p. 79-81.) Watwero konyo latin kwanwa me cako pwony i ot ki ot nining?
2 Wuyubbe Kacel: Yubo pwony i yo maber atika obedo gin ma pire tek tutwal. Nyut ki latin kwan ka ma en twero nongo iye tam ma kimiyo me nyuto bukkewa ki i Ticwa me Ker ki i buk me Reasoning, ci ikonnye wek en oyer kit me cako lok acel ma yot dok ma rwatte ki kwo me wang ticwu. Cuk cwinye me bedo ka tic ki Baibul en i ninone me cako pwony-nyi cut.—2 Tem. 4:2.
3 Bedo ka poro kit me pwony konyo ngat ma pud ocako tito kwena acaka-ni matek tutwal. Ka latin kwan tye ka poro kit me nyuto buk, tit bote kit ma myero en oti kwede ki ryeko me gamo lapeny mogo ma dano gimaro penyone i wang ticwu. (Kol. 4:6) Niange ni pe dong tye ni Lukricitayo omyero gunge lagam me lapeny ducu ma ngat moni oromo penyone. Pol kare ber me waco bot ngat meno ni kong owek ikwed tyen lapeny moni-ni ka dong ibidwogo ka gamone.—Car. 15:28.
4 Wotu Kacel ka Pwony: Tyen me acel ma latin kwanni cako tic me pwony i ot-ki-ot, wek en onen kit ma in icako kwede pwony kun nongo itimo kit ma nongo wun wuyubo kwede-ni. Ka dong imi kare bote bene me loko gin mo. I kare mukene, wek en okwan lok ma tye i ginacoya ci olok i iye keken ci otum. Omyero itam i kom kit dano ango ma en obedo ki kero ango ma latin kwan-ni tye kwede. (Pil. 4:5) Bed ka pwoye i kare ducu ma nongo imedde kwede ki miye pwony i kit yo mapat pat me timo tic me pwony.
5 Pire tek me konyo latit kwena manyen me keto yub me cito i tic me pwony kare ducu, ka twere i cabit ki cabit. (Pil. 3:16) Ket yub mo ma miniwu kare me tic kacel wun wukwede, dok icuk cwinye me bedo ka tic kacel ki jo mukene bene. Bedo kacel kwedgi ki lubo lanengi biweko en dongo ngecce dok bene en nongo yomcwiny i timo tic me pwony i ot ki ot.