Tic me Pwony Konyo me Diyo Cwinywa
1 Lok pa Lubanga cuko cwinywa me ‘diyo cwinywa i pyem ngwec ma tye i nyimwa ni.’ (Ibru 12:1) Kit macalo langwec omyero odii cwinye me tyeko ngwec me pyem maber, wan bene omyero wadi cwinywa wek wanong mot me kwo ma pe tum. (Ibru 10:36) Yo ango ma tic me pwony pa Lakricitayo twero konyo me diyo cwinywa nio wa i agikki?—Mat. 24:13.
2 Wajing Matek i Yo me Cwiny: Tito pi gen mamwonya me kwo i lobo manyen me kit ma atir ma Baibul ociko pire miyo wabedo ki gen ma pe tur. (1 Tec. 5:8) Cito i tic me pwony kare ducu miyowa kare me tito pi niye ma watyeko pwonyo ki i Baibul bot dano. Watye ki kare me cung pi niye, dok ki tungcel bene meno konyowa me gwoko niyewa nio wa i agikki.
3 Me wek wapwony jo mukene wek guniang maber, omyero wan ki komwa kong waniang lok me ada ma tye i Baibul maber. Omyero wakwed tyen lok mogo ki i bukke mapat pat ka wabed ka lwodone i wiwa. Tuttewa me timo jami magi bimedo ngec ma watye kwede kun jingo niyewa dok dongowa i yo me cwiny. (Car. 2:3-5) Pi meno ka wakonyo jo mukene nongo wan kikomwa bene watye ka doko matek.—1 Tem. 4:15, 16.
4 Tiyo tic me pwony ki mit kom obedo but ‘jami lweny ma Lubanga miyo’ ma pire tek ma wamito me lweny i kom Larac ki jogi-ne. (Ep. 6:10-13, 15) Ka waketo cwinywa i tic me pwony kare ducu, ci bikonyowa me ciko wangwa i jami me cwiny dok bene weko lobo pa Catan pe balo wiwa woko. (Kol. 3:2) Pwonyo dano me lubo yo pa Jehovah konyo me poyo wiwa me gwoko kitwa wek obedo maleng.—1 Pet. 2:12.
5 Lubanga Miyo Teko: Tiyo i tic me tito kwena maber pwonyowa me keto genwa ducu i kom Jehovah. (2 Kor. 4:1, 7) Man pud dong obedo gin maber atika ya! Bedo ka Keto gen man konyowa me cobo ticwa me pwony ki me lweny ki pekki ma bino i komwa. (Pil. 4:11-13) Ki lok ada, jenge i kom Jehovah obedo yo acel ma konyo tutwal me diyo cwiny. (Jab. 55:22) Tito pi kwena maber konyowa me diyo cwinywa i yo mapol.