Atwero Yero Lanen Maber me Aluba Nining?

“I kare ma akemme ki peko i gang kwan, gin ma okonya aye tam i kom ngat mo ma aworo ma okato ki i peko ma rom ki mega-ni. Ci atute me lubo lanen pa ngat meno. Bedo ki lanen maber me aluba oweko obedo yot bota me kato ki i kwo matek.”—Haley.

Lanen me aluba twero konyi me gwokke ki i peko ki dong me cobo yub ma iketo. Ento, gin ma pire tek aye ni omyero iyer lanen maber me aluba.

• Pingo omyero iyer ki diro?

• Kit me yerone

• Gin ma luwoti giwaco

Pingo omyero iyer ki diro?

• Lanen me aluba ma iyero bigudo kit ma ikwo kwede.

  Baibul waco bot Lukricitayo ni gunong pwony ki bot jo ma gitye lanen maber, kun wacci: “Wutam pi kwogi ki gin maber ma oa iye, ka dong wulub niyegi.”—Jo Ibru 13:7.

  Tam: Kit macalo jo ma iyero me bedo lanen me aluba twero gudo kwoni i yo maber nyo marac, pire tek ni iyer jo ma gitye ki kit mabeco, ento pe mere jo ma gingene tutwal nyo jo ma gubedo yalwakki.

  “Anongo pwony mapol ki bot Lakricitayo lawota mo ma nyinge Adam—ki i kite kacel ki ticce. Tye me ur ni wiya pud twero po i kom jami mogo ma en owaco dok otimo. En pe ngeyo kit ma lanenne ogudo kwede kwona.”—Colin.

• Jo ma iyero macalo lanen me aluba bigudo kit ma iwinyo dok itamo kwede.

  Baibul waco ni: “Pe wuwek gibwolwu: ‘Bedo ki jo maraco balo kit mabeco.’”—1 Jo Korint 15:33.

  Tam: Yer ngat ma tye ki kit mabeco, ento pe mere ngat ma nen mwonya keken. Ka pe, ci cwinyi bitur adada.

  “Ka kare ducu ibedo ka porre kekeni ki jo muywek ci ibiwinyo calo piri pe tek dok ilik adada. Man twero weko iketo cwinyi mukato kare woko i kom kit ma inen kwede.”—Tamara.

  Tam i kom lapeny man: Adwogi marac ango ma itwero nongo pi yero jo muywek ki lutuko ma gingene me bedo lanen me aluba?

• Lanen me aluba ma iyero twero gudo ka ce ibicobo yubbi nyo pe.

  Baibul waco ni: “Ngat ma bedo kacel ki jo maryek pwonnye doko ryek bene.”—Carolok 13:20.

  Tam: Yer lanen me aluba ma tye ki kit mabeco ma imito dongone. Ka iwoto ki nenogi, ci iromo pwonyo jami mogo ma myero itim me cobo yubbi.

  “Me kaka waco ni ‘Amito bedo ngat ma cobo ticce ducu maber,’ iromo wacci, ‘Amito bedo ngat ma cobo ticce ducu maber calo Jane. En kare ducu gwoko cawa dok tero tic ma kimine calo gin ma pire tek.’”—Miriam.

  Pen lok: Ka iyero lanen maber me aluba, ci in bene itwero bedo ngat maber.

Kit me yerone

Itwero tic ki yo acel i kin yo aryo magi me yero lanen me aluba.

1. Itwero yero kit mo ma imito dongone ci inongo ngat mo ma iworo ma tye ki kit meno.

2. Itwero yero ngat mo ma iworo ci iyero kit mo ma en tye kwede ma in bene imito dongone.

Karatac ma tye ki tic me atima ma kiyubo kacel ki pwony man twero konyi me timo meno.

Jo ma iyero macalo lanen me aluba twero bedo:

• Luwoti. “An amito bedo calo larema ma wapoko kwede pyer ngwen. Kadi bed en tye ki tic mapol, en pud tye atera me nyuto ni eparo pi jo mukene. En tidi loya, ento aneno ni en tye ki kit mabeco ma an ape kwede, dok meno weko amito lubo lanenne.”—Miriam.

• Ludito. Magi twero bedo lunyodoni nyo luye luwoti. “Labongo akalakala mo, lunyodona aryo ducu gubedo lanen maber bota. Gitye ki kit mabeco adada. Kadi bed gitye ki goro ma aneno, ento bene aneno ni pud gitye lugen. Ka ao i mwakagi, amito ni bene kiwac gin acel-li i koma.”—Annette.

• Jo ma kicoyo lok komgi i Baibul. “Ayero jo mogo ma kicoyo lok komgi i Baibul ma atwero lubo lanengi—Jo mogo calo Temceo, Ruth, Yubu, Petero ki latin anyaka ma Laicrael-li. Ayero ngat acel acel pi tyen lok mapatpat. Ka akwano i yo matut lok i kom jo ma kicoyo pigi i Baibul, ci acako nenogi calo jo ma gukwo ada. Amaro kwano lok i komgi ki i buk me Lub Lanengi me Niye kacel ki ‘Role Model Index’ ma nonge i buk me Questions Young People Ask—Answers That Work.”—Melinda.

Tam: Pe mitte ni iyer ngat acel keken me bedo lanen me aluba. Lakwena Paulo owaco bot Lukricitayo luwote ni: “Wan dong watyeko nyuto botwu lanen ma myero wulubi; wucik wangwu me neno jo ma lubo lanen meno.”—Jo Pilipi 3:17.

Tika onongo ingeyo? Jo mukene bene gitwero lubo lanen-ni! Baibul waco ni: “Bed lanen maber bot jo muye, i lokki, i kiti, i mar, i niye, ki i bedo maleng labongo gin marac mo i komi.”—1 Temceo 4:12.

“Kadi bed mitte ni imedde ki yubo kiti, pud itwero konyo jo mukene me dongo. Pe ingeyo anga ma tye ka neni dok pe ingeyo kit ma lokki twero gudo kwede kwo pa jo mukene.”—Kiana.