Awobi mo ma tye ka neno dano ma tye ka donyo i Ot me Ker

LAPENY PA JO MATINO

Pingo Omyero Icit i Cokke i Ot me Ker?

Lucaden pa Jehovah gibedo ki cokke kiryo i cabit ki cabit i ot me worogi ma kilwongo ni Ot me Ker. Ngo ma timme kunnu, dok itwero nongo adwogi maber nining ka icito iye?

Ngo ma timme i Ot me Ker?

Ot me Ker obedo ka ma wanongo iye pwonye madok i kom Baibul. Cokke ma bedo kunnu twero konyi me:

pwonyo lok ada i kom Lubanga.
niang tyen lok muweko jami mogo tye ka timme i kare-ni.
doko dano maber.
nongo lurem mabeco.

Tika onongo ingeyo? Ka ma Lucaden pa Jehovah gicokke iye kilwongo ni Ot me Ker pien kinyamo iye lok i kom Ker pa Lubanga kare ducu.—Matayo 6:9, 10; 24:14; Luka 4:43.

Pingo myero icit i cokke?

Ngec ma ibinongo bikonyi. Cik ma igi lac me Baibul ma kinyamo i cokke pa Lucaden pa Jehovah bikonyi me ‘nongo ryeko.’ (Carolok 4:5) Man nyuto ni Baibul twero konyi me moko tam maber. Twero konyi bene me nongo lagam pi lapeny ma pigi tego i kwo, calo:

Magi aye wi lok me pwony mogo ma kimiyo i cokkewa me tum cabit:

Pingo Myero Baibul Aye Odor Kwoni?
Ka Kwene ma Itwero Nongo Iye Kony ka Itye ki Par?
Gin Ango ma Ker pa Lubanga Tye ka Timone Piwa i Kare-ni.

“Latin kwan lawota mo obino i cokkewa. En obedo kacel ki jo me otwa ci wanywako bukwa kacel kwede. Lacen en owaco ni lagam pa jo me kacokke ogudo cwinye adada. En bene owacci i kanicagi pe gitye ki buk akwana calo wan.”—Brenda.

Tika onongo ingeyo? Kabedo tye me nono i Ot me Ker, dok pe tye kit ajog mo.

Ibinongo cukocwiny. Baibul waco ni tyen lok me acel ma oweko Lukricitayo myero gucokke kacel aye wek ‘gucuk cwiny luwotgi.’ (Jo Ibru 10:24, 25) Bedo kacel ki lurem mabeco ma giketo pi miti pa Lubanga ki pa luwotgi mukwongo me ka meggi keliwa yomcwiny adada i lobo man ma dano giparo pigi kengi-ni.

“I nge tic matek i dyeceng lung, twero bedo ni kicwero cwinya dok aol adada, ento jo me kacokke i Ot me Ker giweko awinyo maber kare ducu. Ka atye ka dok gang i nge cokke, abedo ki yomcwiny dok nongo atye atera me tic i nino mukene.”—Elisa.

Tika onongo ingeyo? Lucaden pa Jehovah gitye ki kacokke makato 120,000 i twok lobo lung, dok kacokke magi nonge i kabedo 60,000 mapatpat. Kigero bene Odi me Ker ma romo 1,500 mwaka ki mwaka pi wel dano ma tye ka medde.a

Gin ma Luwoti Giwaco

“I kare ma atye i cukul cinia, abedo ka cito ki latin kwan lawota mo i cokkewa mogo ci en obedo ki ur me neno lutino kwan me Baibul ma mwakagi patpat ma onongo gitye ka nongo pwonnye kacel. Cokcok-ki ladit ticce obino i cokkewa dok obedo ki ur me neno kit ma watiyo kwede ki Baibul kare ducu. Neno kit ma en obedo kwede ki pwoc pi cokkewa oweko an bene adongo pwoc pi cokke!”—Jessica.

“Anongo ni cokke obedo yo maber adada me juko par ma atye kwede nino ducu. Wapwonyo kit me bedo ki yengo i kwo, kit me bedo dano maber, ki mukene mapol. Kare ducu aa ki i Ot me Ker ma anongo cukocwiny, dok cwinya opye mot.”—Timothy.

“Laco mo ma alwongo i cokke owaco i nge cokke ni: ‘Onongo abino mere wek anyuttiwu ni diniwu pe tye ada. Ento dok aniang ni dinina aye pe tye ada!’ Cwiny me lirem ma Lucaden pa Jehovah gunyuto ogudo cwinye adada. En owaco ni: ‘Kadi bed ni pud arwatte kwedwu pi tyen mukwongo, ento wutera calo dong wabedo kacel pi mwaki mapol!’”—Jacob.

“Tye kare mogo ma atamo ni, ‘Abidok gang cutcut ka cokke otum.’ Ento i cawa me cokke, kodi tam meno rweny woko. I nge cokke, acako lok ki jo mukene, dok wiya wil woko pingo abedo ka tam kit meno. Ka onongo pe pi cokkewa onongo pe atwero bedo ki lurem mabeco calo kit ma atye kwede i kare-ni.”—Madison.

a Me nongo ka ma cokkewa bedo iye cit i kabedowa me intanet, yeny ka ma kicoyo ni “Cokke pa Lucaden pa Jehovah” ci idi “Nong Kabedo Macok Kwedi.”