LAPENY PA JO MATINO
Pingo Omyero Alegi?
Ma lubbe ki kwed mo ma kitimo, kinongo ni pacen 80 pa bulu ma i lobo Amerika gilego, ento nucu pa jo magi keken aye gilego nino ducu. Labongo akalakala mo, jo mukene i kingi gipennye kekengi ni: ‘Tika lega obedo mere gin mo ma dano gitimo wek giwiny maber, nyo kece konyo makato?’
Lega obedo gin ango?
Lega obedo lok atir atir ki Lacwe jami ducu. Tam iye kong! Jehovah rwomme tye lamal loyo dano i yo ducu, ento “en pe tye cen ka mabor ki bot ngat acel acel i kinwa.” (Tic pa Lukwena 17:27) Ki lok ada, Baibul cuko cwinywa ni: “Wunyik cok bot Lubanga, ci en bene binyiko cok botwu.”—Yakobo 4:8.
Itwero nyikke cok bot Lubanga nining?
Yo acel aye me lega—meno aye kit ma iloko kwede ki Lubanga.
Yo mukene aye me kwano Baibul—meno aye kit ma Lubanga “loko” kwede ki in.
Lok i yo ma kuman kun ilego dok ikwano Baibul bikonyi me dongo lirem macok ki Lubanga.
“Lok ki Jehovah—ma obedo Ngat ma Malo Twal—obedo i kin mot ma pigi tego loyo ma dano gitwero bedo kwede.”—Jeremy.
“Tito kit ma awinyo kwede kikome bot Jehovah i lega, weko awinyo ni atye cok kwede.”—Miranda.
Tika Lubanga tye ka winyone?
Kadi bed iye i kom Lubanga—dok ilego bote—ento pud itwero nongo ni tek me ye ni en winyo legani. Kadi bed kumeno, Baibul lwongo Jehovah ni ‘Lawiny lega.’ (Jabuli 65:2) Baibul bene cuko cwinywa ni “Wuket parwu ducu i kome.” Pingo? “Pien en tamo piwu.”—1 Petero 5:7.
Tam iye kong: Tika ikwanyo kare me lok ki luremi macok kare ki kare? Itwero timo gin acel-li ki Lubanga. Leg bote kare ducu, kun itiyo ki nyinge, Jehovah. (Jabuli 86:5-7; 88:9) Ki lok ada, Baibul cuko cwinyi me lega ma ‘pe ikeng.’—1 Jo Tecalonika 5:17.
“Lega obedo lok i kin an ki Wora me polo, dok atitte lok ducu ma tye i cwinya.”—Moises.
“Ka atye ka lok ki Jehovah atito bote jami ducu kore ki kore, kit ma atimo kwede ka atye ka lok ki mamana nyo larema macok adada.”—Karen.
Gin ango ma atwero lega pire?
Baibul waco ni: “I lok ducu wumi Lubanga onge gin ma wumito i lega ki i bako dogwu kacel ki miyo pwoc bene.”—Jo Pilipi 4:6.
Tika meno nyuto ni porre me lega pi peko ma itye ka kato ki iye? Eyo! Ki lok ada, Baibul waco ni: “Kel pekoni ducu bot Rwot, ci en bikonyi.”—Jabuli 55:22.
Ngene kene ni, ka itye ka lega bot Lubanga, pe dong myero ilok i kom pekoni keken. Anyaka mo ma nyinge Chantelle owaco ni “Lirem i kin an ki Jehovah pe bibedo macok tutwal ka apenye mere pi kony keken kare ducu. Atamo ni omyero kong acak ki pwone dok atit jami mapol ma atye ki pwoc pire.”
Tam iye kong: Jami ango ma itye ki pwoc pire i kwoni? Tika itwero tam i kom jami adek ma itwero pwoyo iye Jehovah i nino ma tin?
“Kadi wa gin mo matidi calo neno ature maleng, twero tugo cwinywa me pwoyo Jehovah i lega.”—Anita.
“Tam i kom cwec mo ma yomo cwinyi nyo wang ginacoya mo ma gudo cwinyi adada, ci ipwo Jehovah pire.”—Brian.