Kuc Bibedo Tye i Wi Lobo Ducu

Dano ducu gimito bedo i lobo ma tye ki kuc. Pi mwaki alip mapol, luloc lobo gutemme me juko lweny ki dong me kelo kuc. I kare mukene, tutegi kelo kuc pi tutunu. Ento ki cwercwiny, i nge kare mo, dano dok gicako lweny. Tika twere me bedo ki kuc i wi lobo ducu? Eyo! Me neno kit ma man twero timme kwede, tam i kom gin ma Yecu bitimone ki dong gin ma en opwonyo.

Gin ma Yecu bitimone

Baibul tito gin ma Yecu bitimone cokcok-ki me kelo kuc i wi lobo ducu.

• “Nyinge [Yecu] gibicako ni . . . Laloc ma kelo kuc. Dong medde me locce ki kuc ma bia iye ka gikke bibedo pe.” (Icaya 9:6, 7) Macalo Laloc me Ker pa Lubanga, Yecu bikelo kuc ma rii pi naka i wi lobo ducu.

• ‘En bilaro lucan ma gikok bote pi kony kacel ki jo ma gipe ki ngat mo ma konyogi.’ (Jabuli 72:12-14) Yecu bitic ki twerone me kelo ngolo kop atir. Macalo adwogine, lweny, tim gero, ki deno can dong bibedo pe.

• “Rok mo pe bitingo pala lucwan i kom rok wadigi, pe dong gibimedde ki pwonyo lweny.” (Icaya 2:4) I te loc pa Yecu, dano ducu gibipwonyo kit me bedo ki kuc me kaka pwonyo lweny.

Me pwonyo kit ma Yecu bikelo kwede kuc i wi lobo ducu ki kit ma itwero bedo kwede i lobo meno, nen vidio macek ma wiye tye ni Ker pa Lubanga Obedo Gin Ango?

Gin ma Yecu opwonyo

Kadi wa i kare-ni, pwony pa Yecu tye ka konyo dano milion mapol me bedo ki kuc. I Pwonye me Wi Got, Yecu otito kit ma dano gitwero bedo kwede ki kuc ki luwotgi. Nen kong labol mogo.

• “Jo ma gikelo kuc gitye ki yomcwiny.” (Matayo 5:9) Yecu ocuko cwiny lulub kore pe me gwokke ki kukukuku keken, ento bene me kelo kuc ka ce orweny woko.

• “Mukwongo kong iyub wat i kin in ki omeru. Ka dong i ngeye, idwog ityer motti.” (Matayo 5:23, 24) Yecu ocuko cwiny lulub kore me cobo peko ma tye i kingi oyotoyot. En opwonyo ni omyero wabed ki kuc ki jo mukene ka wamito bedo ki wat maber ki Lubanga.

• “Wuwek ngolo kop i kom jo mukene, wek Lubanga pe ongol kop i komwu.” (Matayo 7:1) Yecu ocikowa ni pe wangol kop i kom jo mukene labongo kica nyo pe wadi jo mukene me timo jami ma wan kikomwa pe watimo. Tim ma kit magi twero kelo telle. Yecu opwonyo lulub kore ni, me kaka keto cwinygi i kom goro pa luwotgi, omyero ‘gumedde ki timigi kica.’—Luka 6:37.

Dano mapol i twok lobo ducu gitye ka keto pwony pa Yecu i tic. Kadi wa i kabedo ma tim gero nyo lweny tye madwong, gitye ka pwonyo kit me cobo kukukuku labongo kiniga, me timo kica, ki dong me nyuto mar ka jo mukene giterogi i yo marac.

Me neno kit ma pwony pa Yecu okonyo kwede jo mukene me nongo kuc, kwan pwony ma wiye tye ni “Kit me Bedo ki Kuc Kadi Bed Lweny Tye.”