Tim Gero Pe Obedo Yo Maber me Cobo Peko

Dano mapol i kare-ni gitamo ni tim gero aye obedo yo maber me cobo pekki nyo yoko wic. Ento man pe obedo gin ma Yecu Kricito opwonyo nyo otimo. Tam kong i kom jami mogo ma en owaco dok otimo.

Gin ma Yecu owaco

I pwonye me wi got, Yecu owaco ni kiniga ki tim gero pe obedo yo maber me cobo telle. Nen kong labol mogo.

• “Jami ducu ma wumito ni dano gutim botwu, wun bene myero wutim botgi.” (Matayo 7:12; Luka 6:31) Pwony man ma ngene adada-ni,a cuko cwinywa me tero jo mukene kit ma wan bene wamito ni kiterwa kwede. Kit macalo pe tye ngat mo ma mito ni kitere i yo me gero, wan bene omyero watute me tero dano weng i yo me woro dok ki kica kadi bed tamwa pe rwatte ki meggi

• “Ka ngat mo odongo lemi tung lacuc, lokke lemi tung lacam bene.” (Matayo 5:38, 39; Luka 6:29) Yecu onongo pe tye ka wacci omyero wawek obed yot bot dano me terowa i yo marac. Me ka meno, en onongo tye ka tiro tam ma pe tye kakare ma lutela dini mogo onongo nen calo gipwonyo, ni porre me culo kwor. En onongo tye ka waco ki lulub kore ni pe gucul kwor ento gudok iye ki mwolo ka ngat mo ocwero cwinygi.b

• “Wumedde ki maro lumonewu.” (Matayo 5:43, 44; Luka 6:27) Yecu opwonyo ni omyero wabed lukica bot jo ma gidagwa nyo giterowa marac. En onongo pe tye ka wacci wacwak jami maraco ma gitimo.c Ento, ka wanyuto cwiny me kica bot jo ma gidagwa, ci waromo kweyo kinigagi dok bene waromo konyogi me nyuto cwiny me kica botwa.

Gin ma Yecu otimo dok bitimone

Yecu opwonyo ni tim gero pe obedo yo maber me cobo peko, dok man onen ka maleng i yo me kwone. I dyewor ma kimako iye Yecu, lalub kore mo acel otiyo ki gero me gwoko Yecu, ento Yecu owaco ni: “Dwok pala lucwanni i akurane, pien jo ducu ma gitiyo ki pala lucwan, kibinekogi bene ki pala lucwan.” (Matayo 26:52) Yecu onyuto mar bot lumonene kun timo kica bot jo ma gutere marac, dok bene olego pigi!—Luka 23:33, 34; 1 Petero 2:23.

Baibul ocikke ni Yecu—macalo Laloc ma Kelo Kuc—cokcok-ki bigiko tim gero ducu. (Icaya 9:6, 7) Me nongo ngec matut madok i kom anyim mamwonya man, kwan pwony ma wiye tye ni “Kit ma Lweny ki Tim Gero Bigik Kwede.”