Batija Nyuto Gin Ango dok Pingo Pire Tek?

1. Gin ango ma nyuto ni batija pire tek adada?

CWINYWA bedo yom adada ka ngat mo onongo batija! Lukricitayo mukwongo bene gubedo ki yomcwiny adada i kare ma guneno dano mapol ka ginongo batija i nino me Pentekote mwaka 33 K.M. I nino meno, lakwena Petero omiyo pwony ma tito pingo pire tek me nongo batija. (Tic 2:​38, 40, 41) Lacen, lakwena Paulo bene ocoyo ni “lok mukwongo i kom Kricito” kwako nongo “pwonnye i kom lok magi: kit batija mapatpat.” (Ibru 6:​1, 2) Dong batija tye i kin pwony ma pigi tego me Baibul ma wapwonyo dok mitte ni waniang iye maber. Pingo?

2. Pingo pire tek me niang maber pwony me Baibul ma loko i kom batija?

² Ka ngat mo mito gero ot matek, bimitte ni en oket te gutine matek bene. I yo acel-lu, ka ngat mo mito bedo ki niye matek, ci bimitte ni en oniang maber lok me Baibul ma niyene cung iye. Dong ka pud peya inongo batija nyo kadi bed dong inongo batija mwaki mapol angec, pud mitte ni inge pingo batija pire tek. I pwony man, wabigamo lapeny magi: Tyen lok me batija obedo ngo? Batija omyero kitim nining? Ki dok, pingo omyero wanong batija i nying Won, ki Wod, ki dong cwiny maleng?

BATIJA NYUTO GIN ANGO DOK PINGO PIRE TEK?

3. Gin ango ma batijani nyuto bot lwak?

³ Nongo batija nyuto bot lwak ni, me (1) iye lok ada madok i kom Lubanga Jehovah gin ki Yecu Kricito, (2) ingut i kom balli, (3) itimo alokaloka i yo me kwoni wek iti pi Jehovah, (4) iye ni Yecu aye obedo yo ma Lubanga tiyo kwede me larowa, ki dong (5) ityeko tito ki Lubanga i lega miti ma itye kwede me tic Pire kacel ki dulle. Ka dong ityeko dyere dok inongo batija, nongo dong icako wot i yo ma teri i kwo ma pe tum.

4. Tyen lokke ngo ka kiluto ngat moni i pii? (Nen bene cal.)

⁴ I kare me nongo batija, kiluto ngat moni i pii, ka dong en katti woko.a I kare mukene, kiporo meno ki to, yik ki dong cer. (Por ki Jo Kolocai 2:12.) Pingo lapor man ber adada? Ka kiluti i pii, inyuto ni dong ityeko weko yo me kwoni macon woko. Ka dong ikatti ki i pii, icako kwo manyen ma nongo jenge i tiyo miti pa Lubanga.

5. Tuteni me nongo batija rwatte nining ki tic ma Nua otimo me yubo yeya? (1 Petero 3:​18-21)

⁵ Kwan 1 Petero 3:​18-21. Watwero poro tuteni me bedo ma ipore me nongo batija ki tic ma Nua otimo me yubo yeya. Ka pud icako pwonyo lok i kom Jehovah acaka, iromo bedo ki lworo ni jami ma mitte ni itim wek ibed ma ipore me nongo batija pol adada. Timo jami magi twero nen calo tek adada kit ma obedo tek kwede bot Nua i kare ma kiwacce ni oyub yeya. Tika bimitte ni itim jami magi ducu? Ada, bimitte. Pingo watwero wacone kit meno? Tam kong i kom Nua. Lubanga owaco ki Nua kit ma yeya meno omyero obed kwede dok onongo mitte ni Nua olub tira ducu kore ki kore wek olar kwogi ki i Pii Aluka. Dong Nua obedo ki kero me yubo yeya pien en obedo lawiny, onyuto niye i kom Jehovah, dok pi meno Jehovah okonye. Calo Nua, in bene itwero timo jami ‘ducu kit macalo Lubanga ociko’ kwede.—Acak. 6:22.

6. I yo ma nining ma batija twero lari kwede?

⁶ I tyeng me 21, lakwena Petero ocoyo ni batija tye ka “larowu.” Ento man pe tyen lokke ni kibitimmi kica nyo ibinongo larre tekki dong inongo batija. Gityer pa Yecu keken aye twero weko kitimmi kica. (1 Jon 1:7) Ento, nongo batija pud obedo gin ma pire tek pien Jehovah ocikowa ni wanong batija. Dok ka wanongo batija, nongo watye ka ‘lega bot Lubanga wek wadok jo ma cwinygi leng.’ Man biyomo cwiny Jehovah dok weko en timo botwa kica pi gityer pa Yecu. Dong kit macalo Jehovah timo meno-ni, batija tye ka larowa, ma meno tyen lokke ni batija weko twerre botwa me kwo pi naka.

GIN ANGO MA TIMME I KARE ME BATIJA?

7. Batija myero kitim nining?

⁷ Baibul tittiwa ni i kare me batija, myero kilut kom ngat moni ducu i pii, ento pe tittiwa jami mukene ma myero kitim. Kadi bed kit meno, Ginacoya konyowa me ngeyo gin mupore me atima i kare me batija. Me labolle, cik ma igi lac me Baibul konyo jo ma gibinongo batija me ngeyo kit me rukke dok konyo jo ma gitye ka neno batija me timo jami i yo ma opore. (1 Kor. 14:40; 1 Tem. 2:9) Pol kare, laelda aye ma luto dano i pii, ento pe omyero water laelda meno calo ngat ma rwomme lamal. (1 Kor. 1:​14, 15) Medo i kom meno, kadi bed dano ma gitye ka neno batija man gipol nyo ginok, pire pe tek.—Tic 8:36.

8. Lapeny mene ma kipenyo ki jo ma gibinongo batija, dok pingo? (Tic pa Lukwena 2:​38-42) (Nen bene cal.)

⁸ Baibul nyuto ni omyero ‘watuc pi niyewa ki dogwa, wek Lubanga olarwa.’ (Rom. 10:​9, 10; nen jami akwana me nwtsty-E pi “ka ituco ki dogi.”) Watuco pi niyewa ki dogwa pe ka watye ka tito kwena keken, ento bene i nino ma wanongo iye batija! Pi tyen lok meno, jo ma gibinongo batija kipenyogi ki lapeny aryo. Lapeny me acel waco ni: “Tika dong ityeko ngut i balli, idyere bot Jehovah, dok iye yo ma en tiyo kwede me larowa kun wok ki i Yecu Kricito?” Lapeny man loko tutwalle i kom gin ma ngat moni dong otimo wek ebed ma epore me nongo batija. Petero owaco lok macal ki man i nino me Pentekote i kare ma en ocuko cwiny dano me ngut i kom balgi wek gunong batija. Lapeny me aryo waco ni: “In mono ingeyo ni batijani nyuto ni in Lacaden pa Jehovah dok ni itye i dul pa Jehovah?” Lapeny man loko tutwalle i kom gin ma ngat moni bitimone i nge nongo batija: En cikke me lubo tira ma dul pa Jehovah miyo ki me tic kacel ki omege ki lumege. Man rom aroma ki gin ma jo ma gunongo batija i nino me Pentekote gutimo i nge nongo batija. (Kwan Tic pa Lukwena 2:​38-42.) Jo ma gugamo lapeny aryo magi ducu ni eyo nongo dong gupore me nongo batija.

9. Jami mene ma myero jo ducu ma gimito yomo cwiny Lubanga gutim?

⁹ Twero bedo ni ma peya icako pwonyo lok ada, onongo pe itye ka kwo kwo macilo dok pe itimo bal mo madit. Nyo bene twero bedo ni lunywali gubedo Lucaden pa Jehovah dok gukonyi me dongo mar pi Jehovah. Tika nongo pud mitte ni ingut i kom balli dok inong batija wek iyom cwiny Lubanga? Ada, bimitte. Wan ducu kinywalowa ki bal dok pi tyen lok meno, pe watwero bedo lurem Lubanga. (Jab. 51:5) Ento ka ngecwa i kom Jehovah omedde, wamoko tamwa me timo mitine ento pe mitiwa. Wangut i kom bal mo keken ma watimo ci wajuko timo jami ma pe yomo cwiny Jehovah dok wacako kwo i yo ma yomo cwiny Wonwa me polo. I nge meno dong watwero nongo batija.—Tic 3:19.

10. Gin ango ma myero itim ka onongo yam inongo batija i dini mukene?

¹⁰ Ka onongo yam kong inongo batija i dini mukene, pud bimitte ni inong batija me doko Lacaden pa Jehovah. Pingo? Pien i kare ca onongo pe ingeyo lok ada madok i kom Jehovah gin ki Yecu. Dok kadi bed ni onongo idyere bot Lubanga i lega, ento dyere meno onongo pe jenge i kom ngec ma atir. I kare ma lakwena Paulo orwatte ki co mogo i Epeco ma yam gunongo batija labongo niang lok ada madok i kom Yecu, en oketo yub wek co magi gunong batija odoco.b (Tic 19:​1-5) I kare-ni bene, Jehovah cwako batija pa ngat moni keken ka ngat meno oniang maber gin ma Jehovah mito ki bote.

“I NYING WON KI WOD KI CWINY MALENG”

11. Tyen lokke ngo me nongo batija “i nying Won ki Wod ki cwiny maleng”? (Matayo 28:​18-20)

¹¹ Yecu omiyo cik ni omyero kibatija jo ma gimito doko lulub kore “i nying Won ki Wod ki cwiny maleng.” (Kwan Matayo 28:​18-20.) Man tyen lokke ngo? I Baibul, nyig lok man ni “nying” pol kare kitiyo kwede me nyuto kit ngat moni. Kitwero bene tic kwede me nyuto tic nyo twero ma ngat moni tye kwede. Dong ka watimo gin mo “i nying” ngat mo nyo gin moni, meno poyo wiwa i kom twero ma nying meno tye kwede. (Por ki Matayo 10:41; nen jami akwana me nwtsty-E pi “pien obedo lanebi.”) Pi meno, ka inongo batija i nying Jehovah gin ki Yecu, nongo tyen lokke ni ingeyo ni gin gitye ki twero kacel ki teko me tittiwa gin me atima. Dok ka wanongo batija i nying cwiny maleng, nongo tyen lokke ni walubo tirane. Kong dong wanyamu matut kit ma watwero timo kwede meno.

12. Tyen lokke ngo me nongo batija i nying Won? (Niyabo 4:11) (Nen bene cal.)

¹² I nying Won. Man tyen lokke ni wamoko ka maleng ni Jehovah aye Wonwa me polo ma ominiwa kwo. Dok waye ni en aye Lubanga Won Twer Ducu, ma ocweyo jami ducu. (Kwan Niyabo 4:11.) Wangeyo ni en winyo legawa, dok watiyo ki nyinge ka watye ka lega ki dok ka watye ka tito ki jo mukene lok i kome. (Jab. 65:2) Ento tye dok gin mukene ma mitte ni watim makato nongo batija i nying Won. Jo ma gubedo ka winyo lok pa Petero i nino me Pentekote, onongo dong gingeyo lok i kom Jehovah, ento onongo mitte ni guniang ni Jehovah aye miyo kwo ma pe tum kun wok ki i Yecu Kricito.—Rom. 5:8.

13. Tyen lokke ngo me nongo batija i nying Wod? (Nen bene cal.)

¹³ I nying Wod. Man tyen lokke ni wamoko ka maleng ni Yecu aye obedo Wod pa Lubanga acel keken. Yecu keken aye “yo” ma miyo watwero bedo ki wat maber ki Jehovah. (Jon 14:6) Yecu aye bene obedo Lalarwa, ma oto piwa wek wabed ki kwo ma pe tum. Meno aye gin ma tugo cwinywa me lubo lanene nino ducu, cakke i nino ma wanongo iye batija. (1 Jon 2:6) Dong calo Yecu, pe waweko gin mo keken gengowa me tito kwena maber ki mit kom bot jo mukene. (Luka 4:43) Dok wabedo atera me ciro aunauna pien walubo lanen pa Yecu dok watiyo pi Lubanga ki gen. (2 Tem. 3:12) Waworo Yecu pien ‘en aye lawi kacokke,’ dok walubo tira pa jo ma en ocimogi me doro ki gwoko lulub kore.—Ep. 4:​8, 11, 12; 5:23.

14. (a) Tyen lokke ngo me nongo batija i nying cwiny maleng? (Nen bene cal.) (b) Batija mukene ango ma jo ma kiwirogi ginongo? (Nen bok ma wiye tye ni “Batija Mukene ma Jo ma Kiwirogi Ginongo.”)

¹⁴ I nying cwiny maleng. Man tyen lokke ni waye lok ada madok i kom cwiny maleng, ni pe obedo dano nyo ni Lubanga tye adek i kom acel, ento obedo teko ma Lubanga tiyo kwede. Waye ni Jehovah otiyo ki cwiny maleng me konyo lunebi me ngeyo lok me atita ki me konyo luco Baibul me coyo Lokke. (2 Pet. 1:​20, 21) Dok wagwokke ki timo bal madongo, pien bal ma kit meno pe gengo cwiny pa Lubanga ki o botwa keken ento wa i kacokke bene.—Ep. 4:30.

15. Gin ango ma omyero wamok tamwa me timone?

¹⁵ Ka ibedo ngat ma dong onongo batija, medde ki poyo wii keken i kom tyen lok mumiyo batijani pire tek dok imedde ki gwoko kwong ma ikwongo bot Jehovah i kare me dyereni kacel ki batija.c Ento ka pud peya inongo batija kono? Tika tye gin mo ma tye ka gengi? Pwony ma lubo man binyamo gin ma itwero timone wek ibed ma ipore me nongo batija.