Kit me Konyo Wadiwa ma Pe Gubedo Lucaden

1-2. Gin ango ma twero bedo ni oweko pe watye ki wat maber ki wadiwa ma pe gubedo Lucaden?

YECU owaco bot laco mo ma onongo mito doko lalub kore ni: “Dok paco bot lutuwu, icitit gin madit ma Rwot [Jehovah] otimo i komi.” (Mar. 5:19) Yecu owacce kit meno pien onongo ngeyo ni pol pa dano gibedo ki miti me tito bot wadigi jami mabeco ma otimme i kwogi.

² Tika wii po kit ma cwinyi obedo yom kwede tyen mukwongo ma kitito boti lok me kwena maber-ri? Nen calo ibedo ki miti madit me titone bot wadinia ducu! Ento twero bedo ni wadini pe gudok iye maber. Nyo twero bedo ni pe iloko ki diro i kare ma itemo tito kwena bot wadini dok meno ocwero cwinygi matek. Ka tye kit meno, ci pwony man bikonyi me ngeyo gin ma myero itim wek imedde ki bedo lagen bot Jehovah kun bene igwoko wat maber ki wadini.

3. Gin ango ma wabinyamo i pwony man?

³ I pwony man, wabineno jami angwen ma watwero timone me bedo ki wat maber ki wadiwa. (1) Wabineno kit ma kica twero tugo kwede cwinywa me nyutigi mar kun wadiyo cwinywa i komgi kadi bed gipe ki miti i kom lok ada. (2) Gin ma watwero timone ka wadiwa guwaco lok nyo gutimo jami ma cwero cwinywa. (3) Kit ma watwero konyo kwede wadiwa ka wadiyo cwinywa dok wabedo ki gen ni i nino mo gitwero tic pi Jehovah. (4) Wabineno bene kit ma watwero nyuto kwede bot wadiwa ni wamarogi.

WEK KICA OTUG CWINYI ME KONYO WADINI

4. Yecu otero jo ma onongo gipe ki miti i kom kwenane nining?

⁴ Yecu pe oilo cinge woko i kom jo ma pe gunyuto miti i kom kwenane. En owaco ni etye calo lapur ma otemo tic ki yo mapatpat wek yat oduru ma i potone onyak nyinge. (Luka 13:​6-9) I kare ma Yecu omiyo lapor meno, en onongo dong otute pi mwaki makato adek me konyo Lujudaya luwote wek gudong niye i kome dok gudok lulub kore. Pingo en obedo ka tute me konyogi? Kica onongo mako Yecu i kom dano dok man oweko en odiyo cwinye i komgi.

5. Pingo kica omako Yecu i kom Lujudaya luwote?

⁵ Kica onongo mako Yecu i kom Lujudaya luwote pien lupwonye dinigi pe gukonyogi me ngeyo lok ada madok i kom Jehovah. Yecu oneno kit ma jo magi onongo gitye kwede calo “romi ma gipe ki lakwat.” (Mar. 6:34) Ma dong kare me to pa Yecu onyiko cok, en okok ki pig wange i kare ma oneno boma me Jerucalem pien en onongo ngeyo ni pol pa dano ma gibedo i boma meno gibito woko pien pe gitye ki niye i kom Jehovah ki Yecu. (Luka 19:​41-44) I yo acel-lu, ka kica makowa i kom wadiwa, ci mitiwa me konyogi bene bidongo.

6. Pingo mitte ni wadi cwinywa i kom wadiwa ma pe gubedo Lucaden? (Jo Galatia 6:9)

⁶ Kwan Jo Galatia 6:9. Kadi bed wadiwa pe gimito pwonyo lok i kom Jehovah i kare-ni, pud mitte ni wadi cwinywa i komgi dok wamedde kiterogi ki kica. Wangeyo ni tero kare wek ngat moni owek niyene macon dok odong niye i kom Jehovah. Twero bedo ni i kare mukato, in bene ‘ibedo i lobo man labongo gen mo, Lubangani bene onongo pe.’ (Ep. 2:12) Ento ngat mo odiyo cwinye i komi dok okonyi me lokke ki me ngeyo Jehovah. Tika meno pe tugo cwinyi me konyo wadini ka twerre?

GIN MA ITWERO TIMO KA WADINI GUWACO NYO GUTIMO GIN MA CWERO CWINYI

7. Gin ango ma twero bedo ni ogengo omegi Yecu me ye ni en aye Meciya?

⁷ Omegi Yecu nen calo guwinyo pi tango ma en otimogi i Galilaya. (Luka 4:​14, 22-24) Ento i acakkine, gin pe guye ni en obedo Meciya. (Jon 7:5) Pingo? Baibul pe otitiwa. Ento Baibul tittiwa tyen lok ma omiyo Lujudaya mogo gukwero lubo Yecu. Jo mogo i kingi onongo gitye ki lworo ni kibiketo aunauna i komgi ka giye Yecu. (Jon 9:​18-22) Jo mogo onongo gungeyo Yecu cakke i tinone dok onongo pe gitwero ye ni Yecu obedo Meciya. (Mar. 6:​1-4) Twero bedo ni omegi Yecu bene onongo gitye ki tam meno. Tika twero bedo ni wadini bene pe gimito winyo kwenawa pien gilworo aunauna nyo pien in aye itye ka tito kwena botgi?

8. Pingo wadiwa gitwero waco nyo timo gin ma pe nyuto kica i komwa?

⁸ Tem niang tyen lok mumiyo giwaco nyo gitimo jami ma pe nyuto kica. Oromo bedo ni omegi Yecu gubedo i kin wadine ma guwaco ni “en opo woko.” (Mar. 3:21) Gin ango ma twero bedo ni oweko omegi Yecu guwaco lok ma kit meno ma pe nyuto kica? Lok ma nonge i cura meno nyuto ni Yecu obedo ki tic mapol adada me tito kwena kacel ki cango dano ma oweko pe onongo kadiwa cawa me cam. (Mar. 3:20) Gwok nyo omegi Yecu gutamo ni en lagingi adada ma omiyo en bedo ka tito kwena cawa ducu ma pe dong nongo cawa me cam. Wadiwa bene guromo tamo ni wabedo lugingi mukato kare woko ka odok i lok me diniwa. Ka meno aye kit ma giwinyo kwede, ci lokwa ki jami ma watimo twero konyogi me loko tamgi.

9. Gin ango ma twero konyo wadiwa me loko tamgi i kom Lucaden pa Jehovah? (1 Petero 3:​1, 2) (Nen bene cal.)

⁹ Wek kit ma ikwo kwede onyut ni pe ibedo lagingi. Ka waloko ki wadiwa maber dok waterogi ki kica, ci watwero konyogi me loko tamgi i kom Lucaden pa Jehovah. (Kwan 1 Petero 3:​1, 2.) Me labolle, ket kong ni cwar laminwa moni pe obedo Lacaden. Laco meno twero bedo kickic nyo cwinye twero cwer ka dakone ocito ka tito kwena nyo ocito i cokke. Kit macalo laminwa-ni pe mito ni cware owiny kit meno, en twero keto alokaloka i kom yubbe me tic pi Jehovah wek oter kare muromo kacel ki cware. Me labolle, laminwa-ni twero cito i tic me pwony ka cware tye i dog tic nyo pe gang. Ka dako tye atera me timo alokaloka ma kit meno me yomo cwiny cware, ci meno twero konyo cware me loko tamme i kom Lucaden.

10. Watwero lubo lanen pa Yecu nining ka jo mukene guloko marac i komwa?

¹⁰ Ka wadini guloko marac i komi, pe mitte ni ibed ka gamo lokgi kare ducu. I kare ma dano gukok i kom Yecu ni en laworo dok lamero, en pe okeco nyo otute me nyuto ni lokgi pe tye kakare. Ento me ka meno, en onongo mito ni dano gunen ticce ci gumok pigi kengi ka jami maraco ma guwinyo i kome tye ada. (Mat. 11:19) En bene onyuto i kit ma en kwo kwede ni pe ebedo lagingi dok cwinye yom. (Por ki Jon 2:​2, 6-10.) Wan bene ka dano guloko marac i komwa, pe mitte ni wadok i lokgi kare ducu. Me ka meno, watwero nyuto ki i ticwa ni pe wabedo lugingi dok cwinywa yom. Ka wadiwa guneno meno, ci twero konyogi me niang ni jami maraco ma guwinyo i komwa pe tye kakare.

MEDDE KI DIYO CWINYI KUN IBEDO KI GEN

11. Yecu otero omegine nining kadi bed pe guye i kome?

¹¹ Baibul nyuto ni Yecu omedde ki diyo cwinye i kom omegine. Me labolle, gin bene onongo gitye i Kana i kare ma Yecu otimo tangone mukwongo. (Jon 2:​11, 12) Ento kadi bed guneno tango ma en otimo, pud pe guye ni en Meciya. Kadi bed kit meno, Yecu pe ojuko paro pi omegine pien ni pe gimito doko lulub kore. Baibul waco ni i nge mwaki adek ma Yecu otimo kwede ki tangone mukwongo i Kana, en obedo ka lok ki kica bot omegine.—Jon 7:​5-8.

12. Gin ango ma romo konyowa me medde ki bedo ki gen ni wadiwa mogo tamgi bilokke ci gibitic pi Jehovah?

¹² Dong wapwonyo lok mapol i kom kica pa Jehovah. Meno twero konyowa me bedo ki gen ni wadiwa gitwero moko tamgi me tic pi Jehovah. Ka dong kityeko jwero dini goba woko, ci wigi twero po ni onongo yam watitigi pi gin meno.b (Yabo 17:16) Gin bene giromo moko tamgi me cako woro Jehovah kacel kwedwa ka twon can madit atika-ni ocakke. Dok ka wadiwa gitye ka kato ki i kwo matek i kare-ni, wabitute matek me konyogi. Ka guniang ni wamarogi ci gitwero bedo ki miti me pwonyo lok me Baibul.

NYUT BOT WADINI NI IMAROGI

13. Gin ango ma myero wagwokke kwede kadi bed watye ka tic matek pi Jehovah?

¹³ Kadi bed watye ka tic matek pi Jehovah, pe myero wawek wadiwa gutam ni pe watye ki cawa pigi nyo ni pe dong wamarogi. (Mat. 7:12) Watwero nyutone nining ni waparo pi wadiwa? Nen kong jami mogo ma watwero timogi.

14-15. I yo ma nining ma watwero nyuto kwede ni wamaro wadiwa me pe gubedo Lucaden? Mi labol.

¹⁴ Kubbe kwedgi kare ducu dok inyut botgi ni imarogi. Wanyuto ni wamaro wadiwa ka waweko gingeyo gin ma tye ka timme i kwowa. Me labolle, itwero cwalo botgi mecej kacel ki cal mogo ma imakogi i kare ma icito ka limo piny nyo ibedo ka namo ki luwoti. Itwero minigi mic mo matidi nyo coyo botgi waraga. Timo jami magi twero nyuto botgi ni iparo pigi dok weko wat i kinwu bedo maber. Ka watute me timo gin ducu ma watwero me nyuto kica bot wadiwa, wakonyogi me niang ni wamarogi.

¹⁵ Tam kong i kom lanen pa laminwa mo ma nyinge Anna ma bedo i lobo Armenia. Jo ganggi gimaro namo kacel, tutwalle i kare me kwero nino nywal pa ngat mo i kingi nyo i nino madongo. I kare ma Anna odoko Lacaden pa Jehovah, wadine gucako bedo ki par ni wat i kingi biballe woko pi niyene manyen-ni. Gin bene gubedo ki par ni ka Anna odoko Lacaden, ci kwone bibedo tek adada. Anna otito gin ma etimo me bedo ki wat maber ki wadine. En owaco ni: “Ka alimo wadina, atittigi gin ma tye ka timme i kwona ki jami mogo ma abedo ka timogi. Alwongogi bene i pacona wek gurwatte ki lurema mogo. Macalo adwogine, pol pa wadina gingeyo lurema dok gibedo agonya me lok kwedgi. Pol pa wadina guwaco ni gineno ni cwinya yom dok pe dong gitye ki par kit macon.”

16. Yecu onyuto nining ni eparo pi ominne Yakobo? (Nen lok ma tye i tere piny.)

¹⁶ Nyutigi ni pigi tek boti. I nge cer pa Yecu, en onyuto ni eparo pi ominne Yakobo ki nyutte bote. (1 Kor. 15:7) Yakobo nen calo cwinye obedo yom adada i kare ma oniang ni Yecu pud paro pire. Man aye nen calo kare ma Yakobo omoko ada ni Yecu obedo Meciya. I nge rwattegi meno, twero bedo ni Yakobo okonyo wadigi mukene me niang ni Yecu aye Meciya.c—Tic 1:14.

17. Watwero keto pwony ma nonge i Jo Roma 12:15 i tic nining? (Nen bene cal.)

¹⁷ Kwan Jo Roma 12:15. Ka wanyuto ni waparo pi wadiwa i kare me yomcwiny ki dong i kare me peko bene, man bikonyogi me loko kit ma ginenowa kwede.d Me labolle, ka watti mo onywal, itwero nyutte ni cwinyi yom kun imine mic mo. Ki bene ka watti orwenyo danone me amara i to, itwero kweyo cwinye ki lokki nyo ki mine kony mukene. Dok wiwa pe myero owil me goyo botgi cim, cwalo botgi mecej nyo limogi kare ducu, tutwalle ka gitye ka kato ki i kwo matek.

18. Watwero lubo lanen pa Anderiya nining?

¹⁸ Wek gurwatte ki omege ki lumege. I kare ma Anderiya oniang ni Yecu aye obedo Meciya, en ocito olwongo ominne Petero wek obin orwatte ki Yecu. (Jon 1:​40-42) Tika wan bene waromo timo gin ma kit meno? Me labolle, tika watwero lwongo watwa mo me bino i cokke nyo me bino ka cam kacel ki luremwa? Ka watwa mo orwatte ki Lucaden mukene, en bineno ni Lucaden bene girom ki jo mukene-ni, gubedo jo ma lukica dok kitgi beco.

19. Omyero water wadiwa nining kadi bed pe giniang maber i kom niyewa? (1 Petero 3:15)

¹⁹ Kwan 1 Petero 3:15. Twero bedo ni wadiwa pe giniang maber tyen lok mumiyo wakwero timo jami mogo, ento pol kare wigi bipo i kom kica kacel ki mar ma wanyutigi. Kadi bed pe dong waribbe kwedgi i kwero nino madito nyo kwer me tekwaro, cwinygi twero bedo yom ka watute me cwalo cawa mo kwedgi. Me labolle, watwero limogi, nywako cam kacel kwedgi, ki bene minigi mic i kare mogo.

MEDDE KI BEDO KI GEN NI WADINI GIBITIC PI JEHOVAH

20. Pingo lanen pa Yakobo tye me cuko cwiny botwa?

²⁰ Yakobo pe odoko lalub kor Yecu i kare ma Yecu onongo tye i lobo. Ento lacen en odoko lalub kor Yecu dok Yakobo nen calo onongo pwony mapol ki i jami ma Yecu opwonyo i kare ma tye i lobo. (Gal. 1:​18, 19; 2:9). Me labolle, Yakobo ocoyo waraga bot Lukricitayo ma tito jami mogo ma Yecu opwonyo i Pwonye me Wi Got.e

21. Pingo pe omyero wail cingwa woko i kom wadiwa ma pe gubedo Lucaden?

²¹ Kadi bed watute matek me nyuto ni waparo pi wadiwa, pud giromo lok marac i komwa nyo bene gikwero pwonyo lok i kom Jehovah woko. Pingo omyero pe wail cingwa i komgi? Pien wan walubo lanen pa Jehovah, Lubangawa ma lakica kacel ki Wode Yecu Kricito. (Luka 6:​33, 36) Dok ka wamedde ki nyuto mar bot wadiwa, ci meno twero weko giloko kit ma giwinyo kwede i komwa. Wigi bene twero po i kom jami mapol ma wawaco botgi i kom Jehovah kacel ki cikkene. Ka wamedde ki tute me konyo wadiwa, man twero weko gimoko tamgi me tic pi Jehovah kacel kwedwa dok meno bikeliwa yomcwiny madwong adada!