Ket Yub me Nongo Batija

1. (a) Adwogi maber ango ma bino ka wanongo batija? (b) Gin ango ma wabinyamo i pwony man?

TIKA dong ilego bot Jehovah me titte miti ma itye kwede me tic pire pi kwoni ducu ci lacen inongo batija? Ka tye kit meno, ci nongo ipenyo Jehovah me timmi kica pi balli wek oye ni iti pire macalo Lacadenne. (1 Pet. 3:21) Dok bene ka inongo batija, nongo iweko lanen maber pi jo ma peya gunongo batija. Miyo kwoni bot Jehovah aye pud dong obedo tam maber loyo ma imoko! Dok ka pud peya inongo batija, pe tyen lokke ni pe imaro Jehovah dok pe imito yomo cwinye. Labongo akalakala mo, imaro Jehovah dok imito timo mitine. Ingeyo ni wek Jehovah otimmi kica pi balli dok ibed ki wat macok kwede, mitte ni inong batija. (Tic 2:​38-40) Kadi bed kit meno, pud twero bedo gin matek boti me moko tammi me nongo batija. Gin ango ma twero konyi? I pwony man, wabinyamo (1) pingo jo mukene gigalle ki nongo batija, (2) pingo pire tek me poyo wiwa ni agikki me lobo pa Catan-ni dong cok, ki dong (3) adwogi maber ma ibinongo ka itimo alokaloka ma mitte ci inongo batija labongo galle.

PINGO JO MUKENE GIGALLE KI NONGO BATIJA?

2. Pingo jo mukene gigalle ki nongo batija?

² Jo mukene gigalle ki nongo batija pi lworo ma gitye kwede. Me labolle, kadi bed gimito tic pi Jehovah, gilworo ni pe gibiyomo cwinye. Ka meno aye kit ma iwinyo kwede, ci kwany kare me kwano wang ginacoya mogo ma twero konyi me ngeyo ni Jehovah niang ni itye ki roc dok cwinye bedo yom ka itye ka tute me timo gin mo keken ma itwero me tic pire. (Jab. 103:​13, 14; Kol. 3:23) Ka itye ki lworo ni jo mukene gibiteri marac i nge nongo batija, ci leg Jehovah wek okonyi me winyo kit ma laco jabuli owinyo kwede i kare ma owaco ni: “[Jehovah] tye kweda, pe abilworo gin mo. Dano kono twero timo gin ango bota?”—Jab. 118:6.

3. Gin ango mukene ma twero gengo ngat moni ki nongo batija? (Nen bene cal ma tye i)

³ Jo mukene bene gigalle ki nongo batija pien gitamo ni gipe ki ngec muromo i kom Jehovah kacel ki pwony me Baibul. Ento tika mitte ni inge pwony ducu me Baibul wek ibed ma ipore me nongo batija? Pe tye kit meno. Tam kong i kom lapor mo ma kiloko iye i Baibul. I dyewor mo acel, Jehovah oweko oyengyeng mo magwar otimme wek kigony Paulo gin ki Cira ki i buc, ci gin gunongo kare me tito kwena maber madok i kom Yecu bot lagwok mabuc kacel ki jo gange. Nen calo lagwok mabuc man kacel ki jo gange guniang ni Lubanga aye otimo tango man wek kigony Paulo gin ki Cira ki i buc. Medo i kom meno, gin bene gupwonyo jami mogo ma pigi tego madok i kom Jehovah gin ki Yecu. Macalo adwogine, gin ma gupwonyo i dyewor meno otugo cwinygi me nongo ‘batija labongo galle.’ (Tic 16:​25-33) Ka dong ingeyo Jehovah, imare ki cwinyi ducu, iniang pwony ma pigi tego me Baibul, ingut i kom balli, dok imito bedo lawiny bot Jehovah, ci nongo itye atera me nongo batija.—Mar. 12:30.

4. Tyen lok mukene ango ma twero weko jo mogo gigalle ki nongo batija? (Nen bene cal.)

⁴ Jo mogo gibedo ki miti me timo alokaloka i kwogi wek giyom cwiny Lubanga dok ginong batija ento gitamo ni timo meno obedo gin matek adada. Pire tek gire me tam i kom kit ma tam ma ibimoko bigudo kwede kwoni. (Luka 14:​27-30) Ento jo mukene giketo cwinygi tutwal i kom jami ma mitte ni gijal wek giti pi Lubanga. Man aye gin mutimme i kom laminwa mo ma nyinge Sandra.a I kare ma en onongo pud tidi, en opwonyo gin ma omyero etim me yomo cwiny Jehovah, ento pe oketo i tic jami ma opwonyo. Lacen ma en odoko dit, ocako kwano Baibul odoco. En owaco ni: “Onongo angeyo maber adada gin ma myero atim, ento onongo bene amaro kit ma akwo kwede kadi bed kwona onongo pe yomo cwiny Jehovah. Onongo bene angeyo ni bibedo tek adada me loko kit ma akwo kwede.” Jo mogo gibedo ki lworo ni pe gibikwo kit ma Jehovah mito kwede i nge nongo batija. Gibedo bene ki lworo ni i nge nongo batija, gitwero timo bal madit ma miyo kikwanyogi woko ki i kacokke. Dong gin ango ma itwero timone ka itye ki lworo ma kit meno?

5. Gin ango ma omyero waket cwinywa iye ka wanongo ni tek me moko tam me nongo batija? (Matayo 13:​44-46)

⁵ Ka wamito wilo gin mo, watamo i kom wel cente ma mitte ni wacul pi gin meno ento bene watamo i kom kit ma gin meno pire tek kwede botwa. Pol kare pe wagalle ki wilo gin ma konyowa kadi bed welle tek adada. I yo acel-lu, ka itye ka moko tam me nongo batija, pe ilung tammi i kom kit ma timo alokaloka ma mitte twero bedo tek kwede. Me ka meno, tam i kom adwogi mabeco ma ibinongo pien nongo dong itye ki wat maber ki Jehovah. Yecu otiyo ki lapor aryo me pwonyowa lok man. (Kwan Matayo 13:​44-46.) I lapor acel acel, laco mo pe ogalle ki cato jamine ducu wek ewil gin mo me wel ma enongo. In bene inongo gin mo me wel adada i kare ma ipwonyo lok ada. Dong ka pud inongo ni tek me timo alokaloka wek inong batija, ci tam matut i kom lapor pa Yecu. Itwero pennye kekeni ni: ‘Tika ada an aye ni lok me kwena maber me Ker pa Lubanga obedo gin ma pire tek? Tika ada atero watta ki Jehovah, gen me kwo pi naka i lobo ki dong omege ki lumege ma i but lobo ducu calo gin ma pire tek?’ Lagammi pi lapeny magi twero konyi me niang gin ma mitte ni itim wek imok tammi me nongo batija.

6. Gin ango ma twero konyi me keto i tic gin ma itye ka pwonyone?

⁶ I lapor pa Yecu i kom laco kodi, en otito ni jo mogo ma kibitito kwena botgi pe gibiye keto i tic gin ma guwinyo nyo gupwonyo. Kadi bed kit meno, Yecu bene onyuto ni jo mukene gibiwinyo ‘ki cwiny maber’ ci gijolo lok me kwena maber me Ker pa Lubanga. (Luka 8:​5-15) Dong ka itye ki lworo pien itamo ni pe ibitwero keto i tic jami ma ipwonyogi, pe iil cingi woko. Ki kony pa Jehovah, itwero ‘cako dongo cwiny manyen.’ Leg Jehovah kare ducu wek okonyi me maro gin ma itye ka pwonyone ki dong me ketone i tic.—Ejek. 18:31; 36:26.

7-8. Gin ango ma twero gengo jo mogo matino ki nongo batija? (Nen bene cal.)

⁷ Jo matino mogo ma gimaro Jehovah pe gitimo alokaloka ma mitte me nongo batija pi tam ma a ki bot jo mukene. Me labolle, lupwonye mukene ki i gang kwan giweko lutino gitamo ni yo me kwo ma Jehovah pe cwako aye ber loyo. Ento ka itero iti ka winyo tam ma kit meno, ci twero kelo adwogi marac adada i kwoni. (Jab. 1:​1, 2; Car. 7:​1-5) Dong itwero gwokke ki i kom peko man ka ilubo lanen pa laco jabuli ma owaco ki Jehovah ni: “Dong atye ki niang maber muromo, akato lupwonnya woko ducu, pien abedo ka lwodo lok i kom lok me cadenni kare ki kare.”—Jab. 119:99.

⁸ Nen calo kadi wa lunyodo mogo ma gubedo Lucaden bene giweko bedo tek bot lutinogi me moko tamgi me nongo batija. Lunyodo magi giketo tamgi tutwal i kom rwom me kwan ma lutinogi myero gunong ki dog tic ma myero gubed kwede. Nyo bene wigi twero wil woko me cuko cwiny lutinogi me keto yub ma twero konyogi me nyikke cok bot Jehovah. Tika itamo ni lunyodoni gitwero konyi me keto yub me nongo batija? Ka tye kit meno, ci bed agonya me lok kwedgi. Kadi bed pud itidi, itwero bedo ki wat macok ki Jehovah.—Car. 20:11.

9. Gin ango ma twero weko ngat moni galle ki nongo batija?

⁹ Jo mogo ma gitye atera me nongo batija gitwero galle pien gimito nongo batija i nino acel ki ngat moni. Me labolle, gitwero bedo ki miti me nongo batija i nino marom ki laremgi mo macok nyo ngat mo me ganggi. Pe obedo gin marac me nongo batija i nino acel ki ngat mo ma imaro. Ento tika meno aye myero obed tyen lok ma galli ki nongo batija? Wii myero opo ni, dyereni bot Jehovah obedo cikke ma in kikome aye icikke bote dok pe kwako ngat mukene. Dong batijani pe myero ojenge i kom gin ma jo mukene gitimo.—Rom. 14:12.

WII PE OWIL NI AGIKKI DONG COK

10. Pingo jo mukene gigalle ki timo alokaloka ma mitte me nongo batija?

¹⁰ Medo i kom tyen lok mapatpat ma kinyamogi-ni, jo mukene gigalle ki nongo batija pien gitamo ni agikki piny pud bor ata. Ento tika tam meno nyuto ryeko? Yecu ociko lupwonnyene ni: “Wubed ma wuyubbe pien Wod pa dano bibino i cawa ma wun pe wutamo.”—Luka 12:40.

11. Ka ngecwa i kom Jehovah woto ki dongo, meno tugo cwinywa me timo gin ango, dok pingo? (Jabuli 119:60)

¹¹ Mar ma watye kwede pi Jehovah aye myero otug cwinywa me dyero kwowa bote ki dong nongo batija. Ka wamedde ki pwonyo lok i kom Jehovah, ci wabineno kit ma en marowa kwede ki kit ma cikke tye pi ber bedowa. (Kwan Jabuli 119:60.) Lapwonnye Yakobo otito tyen lok mukene ma pire tek mumiyo walubo cik pa Jehovah labongo galle: Pe tye ngat mo keken ma ngeyo gin ma bitimme diki. Dong omyero watute me timo “gin ma atir” nino ducu, ma meno aye gin ma Jehovah mito ni watim.—Yak. 4:​13-17.

12. Pwony ango ma wanongo ki i lapor pa Yecu i kom poto olok?

¹² Tam kong i kom lapor pa Yecu i kom lutic ma i poto olok. En otito ni jo mogo i kin lutic magi gutiyo pi cawa acel keken ento pud gunongo cul marom ki jo ma gucako tic odiko. Ento pingo jo ma gutiyo pi cawa acel keken pe gucako tic odiko? Gin gugamo ni: “Pien ngat mo pe olwongowa ka tic.” Lutic magi onongo komgi pe wac. Onongo gitwero tic cakke odiko wa otyeno ka onongo ngat mo olwongogi con. Dong i kare ma kilwongogi, gin gucako tic cutcut. (Mat. 20:​1-16) I kare-ni bene, Yecu olwongowa me bedo lulub kore kun waribbe i tic me tito kwena me Ker-ri. Omyero wajol lwongo meno cutcut.

13. Pwony ango ma wanongo ki i gin mutimme i kom dako pa Lot?

¹³ Jo mogo gigalle ki timo alokaloka i kwogi me yomo cwiny Jehovah pien gitamo ni gibibedo ki kare me timo alokaloka magi ma nongo agikki dong cok adada. Ento ka ibedo ka galle, ci ibinongo ni timo alokaloka magi bidoko tek medde ameda. Yecu onongo ngeyo man maber dok ociko lupwonnyene ni: ‘Wupo i kom dako pa Lot.’ (Luka 17:​31-35) Dako pa Lot onongo ngeyo ni ma pe orii, Jehovah bijwero Codom ki Gomora woko, ento en onongo pe tye atera me jalo jamine. (Acak. 19:​23-26) Gin mutimme i kom dako pa Lot poyo wiwa ni Jehovah oweko kare manok keken bot dano me timo alokaloka me tic pire. Dong ka kare meno otum, Jehovah biloro doggola meno matwal.—Luka 13:​24, 25.

14. Pingo pire tek me keto cwinyi i kom kit ma lok pa lunebi me Baibul tye ka cobbe kwede?

¹⁴ Gin ma tye ka timme i lobo i kare-ni nyuto ni lok pa lunebi me Baibul tye ka cobbe kakare. Kadi bed jami mogo ma Baibul otitogi pe tye ka timme i kabedowu, ento ka ineno gitimme i kabedo mukene, meno myero otug cwinyi me timo alokaloka ma mitte wek inong batija labongo galle. Nen kong gin ma lakwena Petero owaco bot Lukricitayo mogo me cencwari me acel. En ocuko cwinygi ni omyero ‘gubed ma wanggi twolo’ pien “agikki me jami ducu dong cok.” (1 Pet. 4:7) I tyeng man, nen calo “agikki” ma en oloko pire-ni obedo kare ma onongo kibijwero kwede Jerucalem kacel ki ot pa Lubanga. Lukricitayo ma Petero ocoyo lok man botgi-ni onongo gibedo ka mabor ki Jerucalem, pi meno jwero boma man onongo pe bigudogi atir atir. (1 Pet. 1:1) Ento, ka onongo guneno kit ma lok pa lanebi man ocobbe kwede, meno onongo bijingo gengi ni cikke pa Jehovah mukene-ni ducu bicobbe kakare. Kit meno bene, pire tek ni iket cwinyi i kom kit ma lok pa lunebi tye ka cobbe kwede. Dong ka ineno kit ma agikki piny tye ka nyiko kwede cok, man bitugo cwinyi me timo alokaloka ma mitte me nongo batija.

15. Watwero yubbe nining pi nino pa Jehovah? (2 Petero 3:​10-13)

¹⁵ I waragane me aryo, Petero otito kit ma watwero yubbe kwede pi nino pa Jehovah, ma meno aye agikki me kare man. I kare ma Petero ocoyo lok man bot Lukricitayo me cencwari me acel, nino pa Jehovah onongo pud bor adada. Kadi bed kit meno, Petero owaccigi ni “wuket cwinywu iye wek ninone oo oyotoyot.” (Kwan 2 Petero 3:​10-13.) Watwero keto cwinywa i nino pa Jehovah ka kare ducu wabedo ma wangeyo ni nino meno dong cok o. Dok watute matek me bedo atera pi nino meno ‘ka walubo kit kwo maleng ki me woro Lubanga.’ Yomo cwiny Jehovah adada ka oneno ikwo ma lubbe ki mitine! Dong cwinye bibedo yom makato ka idyero kwoni bote ci inongo batija.

PE IGALLE KI NONGO BATIJA

16. Kare mene maber loyo me nongo batija? (2 Jo Korint 6:​1, 2) (Nen bene cal.)

¹⁶ Kare maber loyo me nongo batija obedo kare-ni. (Kwan 2 Jo Korint 6:​1, 2.) Laetiopia ma Pilipo orwatte kwede-ni oniang maber ni omyero enong batija labongo galle. I kare ma kitito bote lok me kwena maber ci en oneno pii mo ma kitwero batija en iye, en pe kong otamo ni: ‘Pud myero amedde ki nongo ngec mukene i kom kwena maber-ri. Wabinongo pii mukene anyim.’ Me ka meno, en openyo Pilipo ni: ‘Gin ango ma genga nongo batija?’ (Tic 8:​26, 27, 35-39) Man pud dong obedo lanen maber ya! I ngeye ma kibatija Laetiopia-ni, en “owoto wotte ki yomcwiny.”

17. Jehovah bikonyi nining?

¹⁷ Ka pud itye ka galle ki nongo batija, bed ki gen ni Jehovah mito konyi me doko lareme macok. (Rom. 2:4) Jehovah bikonyi ka itye ki lworo, ka itamo ni tic pire bibedo tek tutwal, nyo ka jo mukene pe gitye ki cwak i kom yub ma itye kwede me nongo batija. Ka dong inongo batija, ibibedo ki yomcwiny madwong ma bino pi tic pi Jehovah dok ibinongo ni “gin mukato angec” dong pire pe tek boti. (Pil. 3:​8, 13) Dong itwero keto cwinyi i kom “gin ma tye anyim,” ma meno aye cobbe pa cikke pa Jehovah bot jo ma gudyere bote dok gunongo batija.—Tic 3:19.