Pingo Wamito Ginkok?

1-2. Pingo wamito ngat mo me larowa? (Jo Roma 7:​22-24) (Nen bene cal.)

GO KONG ni ot mo opoto woko ma laco mo tye i iye. Laco man omoko i kin matafali me ot meno ma opoto-ni. En pud tye kwo, ento pe twero a woko ki ka ma omoko iye-ni wang ma ngat mo obino okonye. Gin ma dong en twero timo keken aye me dange pi kony ki gen ni ngat mo romo bino ka larre.

² Wan ducu watye calo laco meno. I yo ma nining? I kare ma Adam ojemo i kom Jehovah, en odoko labalo. Kit macalo wan ducu wabedo likwayone-ni, wan ducu walako bal meno. Pi meno, wan ducu bal omakowa kit macalo laco ma i lapor ca omoko kwede i kin matafali me ot ma opoto-ni. Dok calo laco meno, wan bene wamito ngat mo ma twero larowa ki i bal. I waraga ma Paulo ocoyo bot Luroma, en otito kit ma bedo ki roc miyo wawinyo kwede. (Kwan Jo Roma 7:​22-24.) En openyo ni, “Anga ma bilara ki i kom man ma to woko-ni?” Paulo onongo tye i i opii me bal ma olako ki bot Adam, ma onongo bimiyo en to woko. (Rom. 6:23) Wan bene watye i kit kwo acel meno. Pi meno, wamito ngat mo ma twero larowa ki i bal kacel ki to!

3. Ginkok weko twerre bot Jehovah me timo gin ango?

³ Ki pwoc madit, i nge tito kwo matek ma en tye iye, Paulo bene owaco lok mo ma miniwa gen. I nge penyo ni: “Anga ma bilara ki i kom man ma to woko-ni?” Paulo ogamo lapennye kekene ni: “Apwoyo Lubanga pi Yecu Kricito Rwotwa!” (Rom. 7:25) Ki kany, Paulo onongo tye ka tito ni Jehovah olarowa kun tiyo ki ginkok pa Yecu.a Pi ginkok meno, (1) Jehovah twero timiwa kica pi balwa, (2) watye ki gen me bedo labongo roc i kare me anyim, dok (3) watwero bedo ki wat macok ki Jehovah. Ka wawoto ki nyamo jami adek magi, marwa pi Jehovah “Lubanga ma miyo dano ducu bedo ki gen” bidongo. (Rom. 15:13) Dok wabidongo pwocwa pi Yecu, ma en aye ngat ma ‘koko dano a ki bote.’—Kol. 1:14.

PI GINKOK, JEHOVAH TWERO TIMIWA KICA

4-5. Pingo wan ducu wamito ginkok? (Latitlok 7:20)

⁴ Wamito ginkok wek Jehovah otimiwa kica pi balwa. Pi roc ma watye kwede, wan ducu watimo bal i lokwa ki dong i ticwa. (Kwan Latitlok 7:20.) Bal mogo gidongo loyo mukene. Me labolle, Cik pa Moses onongo waco ni, ka Laicrael mo otimo abor nyo oneko dano, en bene omyero kineke woko. (Levi. 20:10; Wel 35:​30, 31) Ento kadi bed bal moni pe dit, nongo pud obedo bal. Me labolle, Daudi ocoyo ni: “Abigwokke i kit gin ducu ma atiyo, wek pe atim bal ki lok ma aloko.” (Jab. 39:1) Man nyuto ni, kadi wa lok ma waloko bene twero bedo bal.—Yak. 3:2.

⁵ Tika dong iwaco lok mo bot ngat mo ma omiyo ikoko ange? Tika dong itimo jami mogo ma weko ikoko ange? Labongo akalakala mo, wan ducu wawaco dok watimo jami ma omyero pe watim. Baibul waco ni: “Ka ce wawaco ni wape ki bal, meno nongo wabwolle abwola kenwa, lok ada nongo pe i iwa.”—1 Jon 1:8.

6-7. Gin ango ma omiyo ki Jehovah tyen lok ma atir me timo kica pi balwa? (Nen bene cal.)

⁶ Kit macalo Jehovah ngolo kop atir, onongo mitte ni en otim gin mo ma mine tyen lok ma atir me timiwa kica pi balwa. Ginkok weko twerre bot Jehovah me timiwa kica pi balwa. (Ep. 1:7) Ento kadi bed Jehovah twero timiwa kica kun wok ki i ginkok, meno pe tyen lokke ni en pe paro kadi bed watimo bal. Cwiny Jehovah cwer adada ka watimo bal.—Ic. 59:2

⁷ Cik pa Moses onongo waco ni Luicrael myero gumi lee macalo gityer me kwanyo balgi. (Levi. 4:​27-31; 17:11) Lee ma onongo gityero-ni onongo nyuto ni dano mito ginkok makato lee. Ginkok pa Yecu keken aye onongo bikelo adwogi maber bot dano. Dong to pa Yecu onongo bimiyo ki Jehovah tyen lok ma atir me timiwa kica pi balwa. Paulo oniang maber adwogi ma ginkok onongo bikelone bot dano. I kare ma en ocoyo waraga bot Lukricitayo ma i Korint, en oryeyo bal ma Lukricitayo magi gutimo i kare mukato angec, ci i nge meno en owaccigi ni: ‘Dong kityeko lonyowu me bedo jo maleng, kityeko kwanowu ni wun jo ma kitwu atir pi nying Rwot Yecu Kricito ki pi cwiny pa Lubangawa.’—1 Kor. 6:​9-11.

8. Gin ango ma iromo bedo ka tam iye ka iwoto ki yubbe pi Nipo me mwaka-ni?

⁸ Ka iwoto ki yubbe pi Nipo me mwaka-ni, kwany kare me tam i kom kit ma kwoni dong oyubbe kwede pien Jehovah otyeko timmi kica. Me labolle, pi ginkok, pe dok mitte ni cwinyi obed ka pidi pi bal ma itimogi i kare mukato ma dong ityeko ngut iye woko. Tika inongo ni tek me ye ni Jehovah otyeko timmi kica pi bal ma itimogi i kare mukato angec? Twero bedo ni iloko kekeni ni, ‘Aniang ni Jehovah twero timma kica, ento pe atwero timo kica i koma kekena.’ Ka iwinyo kit meno, ci wii myero opo ni: Jehovah aye obedo ngat ma timo kica, dok en omiyo twero me ngolo kop i komwa bot Wode. Jehovah pe omiyo boti nyo bot ngat mo keken twero me moko anga ma omyero kitime kica nyo pe. Baibul waco ni: ‘Ka wawoto ka maleng, macalo en [Jehovah] bene tye ka maleng, . . . remo pa Wode Yecu Kricito bene lwoko bal ducu woko ki i komwa.’ (1 Jon 1:​6, 7) Watwero bedo ki gen ni lok man tye ada marom aroma ki pwony mukene me Baibul. Pi ginkok, Jehovah tye ki tyen lok ma atir me timiwa kica dok Baibul waco ni en tye ‘atera me weko bal pa dano.’—Jab. 86:5.

PI GINKOK, WATYE KI GEN NI WABIBEDO LABONGO ROC

9. I Baibul, nyig lok man ni “bal” kwako gin ango? (Jabuli 51:5)

⁹ I Baibul, nyig lok man ni “bal” pe kwako timo gin marac keken ento bene kwako bal ma walako ma kinywalowa kwede. (Kwan Jabuli 51:5.) Bal ma walako-ni miyo wabedo ki tam maraco, watimo jami maraco dok bene miyo dul komwa pe tiyo maber kit ma Jehovah oyubo kwede, pi meno two yelowa, watii dok wato woko. Man aye tyen lok mumiyo kadi wa lutino ma pud kinywalogi anywala, ma pe gutimo gin mo marac, bene two makogi dok gito. Man konyowa bene me niang tyen lok mumiyo jo maraco wa ki jo mabeco gideno can dok gito. Likwayo pa Adam ducu gulako roc man.

10. Adam gin ki Kawa guwinyo nining i nge timo bal?

¹⁰ Tam kong kit ma Adam gin ki Kawa guwinyo kwede i kare ma gutimo bal. Bal oweko guwinyo marac adada. Cutcut ma gutimo bal, Adam ki Kawa gucako winyo marac adada pien guturo cik pa Jehovah, ma meno cik ma onongo “dong gicoyo woko i cwinygi.” (Rom. 2:15) Guwinyo cutcut ni gin mo olokke woko i kwogi. Gin guwinyo ni omyero gium dul komgi mogo woko dok gucako kanne ki bot Lacwecgi. (Acak. 3:​7, 8) Pi tyen mukwongo i kwogi, Adam gin ki Kawa gubedo ki poto cwiny, par, lworo, arem ki lewic. Dok onongo gibibedo ka winyo kit meno nio wa i togi.—Acak. 3:​16-19.

11. Bedo ki roc weko wawinyo nining?

¹¹ Kit macalo wan ducu watye ki roc-ci, i kare mukene cwinywa poto, lewic makowa dok wabedo ki par. Turcwiny kacel ki arem ma wabedo kwede bino macalo adwogi me bal ma kinywalowa kwede. Kadi bed watute matek me kelo alokaloka i kwowa dok watemme me gengo pekki, pud wabibedo ki pekki mogo ma pe watwero cobone piwa kenwa. Pingo? Pien Baibul tito ni nicakke ma Adam ki Kawa gubalo, dano gibibedo ki pekki kare ducu. (Rom. 8:20) Man tye ada i kom wan ducu ki acel acel ki dok pi dano ducu lumuku. Me labolle, gamente mapol i kare-ni gitute matek me gwoko kabedo murumowa, giko tim gero, ryemo can, ki dong giko lweny i kin lobe. Ento kadi bed gitute matek, cobo pekki magi pud oloyogi woko. Dong ginkok twero larowa ki i roc ma walako nining?

12. Ginkok miniwa gen ango?

¹² Ginkok miniwa gen ni “ceng mo gibigonyo ginaketa woko ki i opii me bedo gin ma top.” (Rom. 8:21) Man tyen lokke ni ka dong kikwanyo roc ma watye kwede woko ducu i paradic, two dong pe bimakowa dok pe wabibedo ki turcwiny. Pe dong wabibedo ki poto cwiny, lworo, lewic nyo par. Medo i kom meno, Yecu ma en aye “Laloc ma kelo kuc” ma oculo ginkok piwa, aye bibedo ka loc. En bikonyo dano me cobo pekki ducu ma cobone oloyogi woko.—Ic. 9:​6, 7.

13. Gin ango mukene ma itwero tam iye ka iwoto ki yubbe pi Nipo me mwaka-ni?

¹³ Go kong kit ma kwo bibedo kwede ka dong ipe ki roc. Nino ducu ibico ma nongo iwinyo maber, pe ibibedo ki lworo mo keken ni cam bibedo pe piri nyo pi joni me amara, nyo ni komi bibedo lit nyo ibito. Dok kadi wa i kare-ni, pud itwero bedo ma wii opye mot ka ikwanyo kare me tam matut i kom genwa pi anyim. (Ibru 6:​18, 19) Kit macalo lajuk meli weko meli cung mot, genwa pi anyim bene jingo niyewa dok konyowa me ciro peko mo keken ma wakemme kwede i kare-ni. Ki lok ada, itwero bedo ki gen ni Jehovah “miyo bakacic bot jo ma yenye.” (Ibru 11:6) Gen ma itye kwede pi anyim kacel ki kwecwiny ma gen meno mini i kare-ni twerre keken pi ginkok.

PI GINKOK, WATWERO BEDO KI WAT MACOK KI JEHOVAH ODOCO

14. Nicakke i kare ma Adam ki Kawa gubalo, gin ango ma otimme i kom wat ma tye i kin dano ki Jehovah, dok pingo?

¹⁴ Nicakke ma Adam ki Kawa gubalo, dano onongo dong pe gitwero bedo ki wat macok ki Jehovah. Baibul bene waco ni mone tye i kin dano kacel ki Lacwecgi. (Rom. 8:​7, 8; Kol. 1:21) Pingo? Pien Jehovah pe tye ki roc mo keken dok pe twero cayo bal ma watimo acaya. Baibul loko kit man i kom Jehovah ni: “In wangi leng, pe romo neno gin marac, cwinyi dag neno jo ma timo dano marac.” (Kab. 1:13) Nicakke wa i kare ma dano gubalo, wat i kingi ki Lubanga oballe woko. Pe tye ngat mo i kinwa ma twero bedo ki wat macok ki Jehovah nikwanyo ka wat meno ma oballe-ni kiyubo woko. Ginkok aye weko twerre me yubo wat ma oballe i kin dano ki Lubanga.

15. I yo ma nining ma to pa Yecu oweko twerre pi dano me bedo ki wat maber ki Jehovah odoco?

¹⁵ Baibul waco ni Yecu omiyo “gitum pi kwanyo balwa.” (1 Jon 2:2) I yo ma nining ma gitum pa Yecu weko twerre bot dano me bedo ki wat macok ki Jehovah odoco? To pa Yecu omiyo ki Lubangawa ma pe ki roc-ci tyen lok ma atir me yubo wat ki dano odoco. (Rom. 3:​23-26) En bene onongo twero kwano kadi wa jo ma gutiyo pire ma pud peya Yecu oto ni kitgi atir. (Acak. 15:​1, 6.) Pingo? Pien Jehovah onongo pe ki akalakala mo keken ni Wode Yecu biculo ginkok i kare me anyim. (Ic. 46:10) Ginkok oyabo yo bot dano me bedo ki wat maber ki Lubanga.

16. Gin ango ma itwero bedo ka lwodone ka iwoto ki yubbe pi Nipo me mwaka-ni? (Nen bene cal.)

¹⁶ Tam kong kit ma kwoni tye maber kwede i kare-ni pien dong itye ki wat maber ki Jehovah. Me labolle, itwero lwongo Jehovah ni ‘Woru,’ kit ma Yecu opwonyowa kwede me timone. (Mat. 6:9) I kare mogo, itwero bene lwongo Jehovah ni “Laremi.” Ento ka watye ka lwongo Jehovah ni “Wonwa” nyo “Laremwa” omyero watim meno ki woro dok ki mwolo. Pingo? Pien wabedo lubalo dok pe watwero bedo ki wat macok ki Jehovah piwa kenwa. Bedo ki wat maber ki Jehovah twerre keken pi ginkok. Jehovah ‘oye dwoko jami ducu bote i Kricito, gin ma tye i wi lobo ki gin ma tye i polo, kun Kricito okelo kuc pi remo me tone i kom yat.’ (Kol. 1:​19, 20) Meno aye tyen lok mumiyo watwero bedo ki wat maber ki Jehovah i kare-ni kadi bed watye ki roc.

GINKOK NYUTO KICA PA JEHOVAH

17. I yo ma nining ma ginkok nyuto ni Jehovah lakica adada? (Jo Epeco 2:​4, 5)

¹⁷ Ginkok nyuto ni Jehovah “lalonyo i kicane.” Dong “kadi bed onongo wadoko jo muto pi turo cikke, en omiyo wadoko kwo.” (Kwan Jo Epeco 2:​4, 5.) Calo laco ma omoko i kin matafali me ot ma opoto i kome-ni, jo mamwol giniang ni gitye i opii me bal dok mitte ni ngat mo ogonygi. Gitye ka bako doggi pi kony. (Tic 13:48) Jehovah konyo jo ma kit meno ki neno ni gupwonyo lok me kwena maber madok i kom Kerre, wek gunge en kacel ki Wode Yecu. (Jon 17:3) Ka Catan otamo ni bal pa Adam ki Kawa onongo bigengo Lubanga ki cobo yubbe, ci en otamo marac.

18. Gin ango ma omyero wiwa pe owil iye ka wawoto ki lwodo lok i kom ginkok?

¹⁸ Ka wawoto ki lwodo adwogi mabeco ma ginkok weko twerre piwa, myero wiwa pe owil i kom tyen lok ma pire tek loyo mumiyo Jehovah omiyo ginkok. En pe omiyo ginkok me larowa keken, ento bene me cobo gin mo ma pire tek adada. Ginkok aye obedo yo ma Jehovah tiyo kwede me gamo lok me adot ma Catan okelo i Kome i poto me Eden. (Acak. 3:​1-5, 15) Pi ginkok, Jehovah obedo ki kare me nyuto ni lok ducu maraco ma Catan owaco i kome obedo lok goba. Jehovah bene ogonyowa ki i opii me bal ki to, dok meno nyuto ni en Lubanga ma lamar. Dok kadi bed wan lubalo, pi kica pa Jehovah ma pe wapore pire, En miniwa kare me nyuto ni lok ma Catan owaco i Kome obedo lok goba. (Car. 27:11) Dong itwero nyuto pwocci pi ginkok nining? Wabigamo lapeny meno i pwony ma lubo man.