Itwero Lweny ki Turcwiny

1-2. Lakwena Paulo onongo winyo nining i kare mogo, dok i yo ma nining ma wan bene warom kwede? (Jo Roma 7:​21-24)

KA WATAMO i kom lakwena Paulo, wiwa twero po ni en otito kwena i kabedo mapol, ocoyo bukke mapol ma nonge i Baibul dok onongo obedo lapwony ma ladiro. Nen ka maleng ni en obedo laco ma cwinye tek dok lagen. Kadi bed kit meno, Paulo onongo bene cwinye tur i kare mogo. Dong Paulo onongo rom ki wan i kare-ni.

² Kwan Jo Roma 7:​21-24. I waragane bot Luroma, Paulo otito kit ma ewinyo kwede. Pol pa wan bene i kare-ni wawinyo kit ma Paulo owinyo kwede. Paulo obedo Lakricitayo ma lagen dok i kare ducu onongo mito bedo lawiny bot Lubanga, ento kit macalo en onongo tye ki roc, oweko obedo tek bote me timo gin ma Lubanga mito i kare ducu. Dok i kare ma Paulo obedo ka tamo jami ma etimo ma pud peya edoko Lakricitayo, cwinye ocwer adada. Paulo bene cwinye ocwer pi peko mo ma onongo tye ka timme i kwone ma obedo ka medde ameda.

3. Gin ango ma wabinyamo i pwony man? (Nen bene “Lok ma Kitito Tere.”)

³ Kadi bed i kare mogo cwiny Paulo otur,a ento en otute matek pe me bedo ka keto tamme tutwal i kom jami maraco. I pwony man, wabinyamo lapeny magi: Gin ango ma oweko Paulo i kare mogo owinyo ni konnye pe? Gin ango ma okonyo Paulo pe me bedo ka keto tamme tutwal i kom jami maraco? Dok wan bene watwero lweny ki turcwiny nining?

GIN ANGO MA OWEKO PAULO OWINYO NI KONNYE PE?

4. Gin ango ma oweko Paulo owinyo calo konnye pe?

⁴ Jami maraco ma en otimo ma peya odoko Lakricitayo. Ma peya Paulo odoko Lakricitayo, en otimo jami maraco mapol ma oweko en okoko iye ange. Me labolle, en obedo tye i kare ma kineko laco ma lagen ma nyinge Citefano. Paulo onongo tamo ni etye ka timo gin ma atir. (Tic 7:58; 8:1) En bene ouno Lukricitayo mapol dok oterogi i yo marac adada.—Tic 8:3; 26:​9-11.

5. Paulo owinyo nining pi jami ma en otimogi ma peya odoko Lakricitayo?

⁵ I kare ma Paulo odoko Lakricitayo, en owinyo marac adada pi jami ma etimogi i kare mukato angec. Me labolle, i mwaka 55 K.M, ma en ocoyo waraga bot Lukricitayo me Korint, en owaco ni: “Pe porre me lwonga ni an lakwena, pien yam aketo can i kom jo pa Lubanga muye Kricito.” (1 Kor. 15:9) Lacen i nge mwaki abic ma en ocoyo waragane bot Lukricitayo me Epeco, en otito botgi ni, “atidi twatwal ki i kin jo pa Lubanga ducu.” (Ep. 3:8) I kare ma en bene ocoyo waraga bot Temceo, Paulo oloko i kome kekene ni “yam abedo ka yete [Kricito] pi keto ayela i kome ki balo nyinge.” (1 Tem. 1:13) Lacen i kare ma lakwena Paulo obedo ka limo kacokke, twero bedo ni obedo tek adada bote me rwatte ki utmege ma yam ounogi kacel ki jo me pacogi.

6. Tyen lok mukene ango ma omiyo Paulo obedo ki par? (Nen lok ma tye i tere piny.)

⁶ Okuto ma kirwako i kome. Paulo oporo gin mo ma onongo tye ka kelle par ki “okuto ma kirwako i kome.” (2 Kor. 12:7) Lakwena Paulo pe otito gin meno ma onongo tye ka kelle par tutwal-li. Twero bedo ni en obedo ki peko me two nyo peko mo mukene mumiyo en obedo ki par.b

7. Pingo onongo tek bot Paulo me timo gin maber kare ducu? (Jo Roma 7:​18, 19)

⁷ Roc ma onongo en tye kwede. Paulo obedo ki turcwiny pi jami maraco ma en otimogi. En otute matek adada me timo alokaloka i kwone. (Kwan Jo Roma 7:​18, 19.) Ento en owaco ni i kare mogo, pe etimo gin ma onongo emito timone, dok i kine mukene, etimo jami ma onongo myero pe etimgi. Paulo oye ni ebedo ka tute teretere pe me timo jami ma lubbe ki mitine ento me timo gin ma atir. (1 Kor. 9:27) Kadi bed kit meno, en pud otimo bal. Watwero goyo i wiwa kit ma cwinye otur kwede i kare ma en owaco nyo otimo gin mo ma en obedo ka tute me timo alokaloka iye pi kare malac!

GIN ANGO MA OKONYO PAULO ME LOYO TAM MARACO?

8. Jami ango ma Paulo otimogi ma okonye me loko kwone kacel ki kite?

⁸ Paulo otamo matut i kom kit ma cwiny maleng pa Lubanga twero konyo kwede Lukricitayo me juko tam maraco ki dong me timo alokaloka i kwogi. Watwero niang lok meno ki i waragane mapatpat ma en ocoyogi. (Rom. 8:13; Gal. 5:​16, 17) Paulo oweko ongene ka maleng kodi miti kacel ki tim mogo ma Lakricitayo myero ogwokke kwede ka ce mito yomo cwiny Jehovah. (Gal. 5:​19-21, 26) Man nyuto ni Paulo otamo matut i kom kit ma myero etim kwede ki alokaloka ma mitte. Dong ka wakwano gin ma Paulo owaco ki jo mukene ni omyero gutim me yomo cwiny Lubanga, watwero bedo ki gen ni en bene otimo jami magi.

9-10. Gin ango ma okonyo Paulo i kare ma cwinye otur? (Jo Epeco 1:7) (Nen bene cal.)

⁹ Kadi bed i kare mukene Paulo olwenyo ki turcwiny, ento tye bene jami mapol ma okonye me bedo ki yomcwiny. Me labolle, cwinye obedo yom adada i kare ma en owinyo lok mabeco i kom kacokke ma onongo gitye ka maboco. (2 Kor. 7:​6, 7) Wat maber ma onongo tye i kin en ki utmege bene omiyo en obedo ki yomcwiny. (2 Tem. 1:4) Paulo bene obedo ki yomcwiny pien en onongo tye ki wat macok ki Jehovah dok onongo ngeyo ni Jehovah cwinye yom i kome. (2 Tem. 1:3) Kadi wa i kare ma en onongo tye i buc i Roma, Paulo ocuko cwiny utmege me ‘bedo ki yomcwiny i Rwot kare ducu.’ (Pil. 4:4) Ka wakwano lok pa Paulo, watwero niang ni en pe oketo cwinye me bedo ka tamo pi pekkine kacel ki bal ma etimogi. Ka en ocako tamo pi jami mogo ma turo cwinye, en onongo cutcut cako loko tamme me tamo pi jami ma kelle yomcwiny.

¹⁰ Gin mukene ma okonyo Paulo me bedo ki yomcwiny obedo mic me ginkok. En wiye opo ni Jehovah mare dok omiyo ginkok kadi wa pi en bene. (Gal. 2:20; kwan Jo Epeco 1:7.) Macalo adwogine, en onongo tye ki gen ni Jehovah dong otyeko timme kica dok pud bimedde ki timme kica. (Rom. 7:​24, 25) Jami magi ducu okonyo Paulo me medde ki tic pi Jehovah ki yomcwiny.—Ibru 9:​12-14.

11. Pingo lanen pa Paulo cuko cwinywa adada?

¹¹ Calo Paulo, wan bene i kare mukene mitte ni wati matek pe me tam, lok, nyo timo gin mo ma pe yomo cwiny Jehovah. Dok i kare mogo cwinywa twero tur pien ni pe watwero yomo cwiny Jehovah! Laminwa mo ma nyinge Estherc otito kit ma ewinyo kwede, ni: “Cwinya yom adada me ngeyo ni onongo mitte ni atim alokaloka i kwona kit ma Paulo bene otimo kwede. Man tye calo lapo wic ni Jehovah ngeyo pekki ducu ma luticce gitye ka kato ki iye.” Dong gin ango ma watwero timone calo Paulo me yomo cwiny Jehovah ki dok me bedo ki yomcwiny, kadi bed i kare mukene cwinywa tur?

GIN MA WATWERO TIMONE KA CWINYWA OTUR

12. Jami mene ma omyero watimgi kare ducu me bedo ki yomcwiny?

¹² Omyero wamedde ki timo jami ma nyikowa cok bot Jehovah. Tam kong i kom lok man: Pol kare wawinyo maber ka wacamo kwai cam mapatpat, waryeyo ler dok nino romowa maber. I yo acel-lu, wanongo cuko cwiny ka wakwano Lok pa Lubanga nino ducu, wanywako i tic me pwony, wayubbe pi cokke, wabedo tye i cokke dok wamiyo lagam. Ka wamedde ki timo jami magi, gibikonyowa me bedo ka tamo pi jami mabeco me ka tamo pi jami ma turo cwinywa dok meno biweko wabedo ki yomcwiny.—Rom. 12:​11, 12.

13-14. Adwogi maber ango ma Lukricitayo mogo gunongo ki i timo jami ma nyikogi cok ki Jehovah?

¹³ Nen kong gin mutimme i kom omego John. I kare ma en tye ki mwaka 39 keken, kinongo ni tye ki two kanca. I acakkine, en obedo ki par kacel ki turcwiny matek adada. John obedo ki ur dok onongo pe twero ye ni two man twero make i mwakane-ni. I kare meno, wode onongo pud tye mwaka adek keken. Gin ango ma okonyo John pe me bedo ki turcwiny i kare ducu? John owaco ni: “Kadi bed onongo awinyo ni aol adada, ento pud atute me neno ni jo ganga gubedo tye i cokke, gucito i tic me pwony dok wabedo ki yub me woro pi jo me ot cabit ducu. Wabedo ka timo jami magi ducu kadi bed i kare mogo onongo pe yot.” John omedde ni: “I kare ma kwo tek, i acakkine cwinywa twero tur adada. Ento apwonyo ni ka wamedde ki diyo cwinywa, wabineno kit ma Jehovah miniwa kwede teko ma mitte ki kit ma en marowa kwede. Jehovah bene bikonyi kit ma en okonya kwede-ni.”

¹⁴ Laminwa Esther ma kiloko i kome con-ni, owaco ni: “Kare ducu ka acito i cokke dok akwano pira kena, poyo wiya ni Jehovah winyo legana dok mara adada. Meno weko abedo ma cwinya yom.” Omego mo ma nyinge Nolan ma tiyo macalo laneno me adwol i Afrika, otito gin ma okonye gin ki dakone Diane. En owaco ni: “Wamedde ki lega, kwano Baibul, wot i cokke ki dong tito kwena kare ducu kadi bed wawinyo ni cwinywa otur. Ka cwinywa otur, watute me poyo wiwa ni kare ducu Jehovah bikonyowa dok bigoyo laane i komwa. Pol kare nongo pe wangeyo kit ma Jehovah bikonyowa kwede ento wabedo ki gen ni en bikonyowa.”

15. Gin ango mukene ma watwero timone ka cwinywa otur? Mi labol.

¹⁵ Me juko bedo ma cwinywa otur, bimitte ni watim jami mogo me lweny ki tam maraco. Me labolle, go kong ni itye ka winyo arem i dye ngeyi. Twero bedo me kony boti ka ikwanyo cawa nino ducu me wot ki tyeni. Ento me juko arem meno, bimitte ni itim gin makato wot keken. Mukwongo, bimitte ni kong ilok ki daktar me niang pingo itye ka winyo arem meno. I yo acel-lu, bimitte ni itim kwed i bukkewa me niang pingo cwinyi otur ki dok gin ma itwero timone me winyo maber. Twero mitte bene ni ilok ki omego nyo lamego mo muteggi ma twero mini tam maber i kom peko ma itye ka kato ki iye.

16. Gin ango ma twero konyi me niang gin ma tye ka keli turcwiny? (Jabuli 139:​1-4, 23, 24)

¹⁶ Leg bot Jehovah me konyi niang ngo ma imito. Kabaka Daudi onongo ngeyo ni Jehovah ngeye maber adada. Pi meno, Daudi openyo Jehovah ni okonye me niang tyen lok mumiyo ‘etye ki par.’ (Kwan Jabuli 139:​1-4, 23, 24.) In bene itwero penyo Jehovah me konyi niang pingo itye ki par ki dong kit ma itwero bedo ma cwinyi opye mot. Itwero bene pennye kekeni ki lapeny mogo calo,‘Ngo ma atye ka parone? Tika tye gin mo ma pol kare miyo abedo ki par? Ka atye ki par, tika atute me tamo i kom jami ma miyo abedo ki yomcwiny?

17. Pwony macalo mene ma itwero kwanogi me konyi tamo i kom jami ma twero kweyo cwinyi? (Nen bene cal.)

¹⁷ Watwero kwano pwony mo ma twero konyowa ki i peko ma watye ka kato ki iye. Kare ki kare, twero bedo me kony adada boti me kwano lok i kom kit pa Jehovah mogo. Me labolle, lakwena Paulo onongo adwogi mabeco ki i tamo i kom ginkok kacel ki kica pa Jehovah. In bene itwero lubo lanen pa Paulo ki kwano pwony mo ma imito niang iye. Itwero kwano pwony mogo ma nonge i bukkewa ma loko i kom kit pa Jehovah calo kica, gen ki dong mwolo. Ka dong ityeko nongo pwony ma twero konyi, ci cogi piny. Ket pwony magi ma icoyogi-ni ka ma itwero nenone maber dok iromo kwanone ka icako bedo ki par odoco. Tute me keto gin ma ikwano i tic ka itye ka kato ki i kwo matek.—Pil. 4:8.

18. Pwony macalo mene ma Lukricitayo mogo gukwano dok gunongo adwogi maber ki iye?

¹⁸ Laminwa Esther ma kiloko i kome con-ni, otimo kwed i kom latic pa Jehovah ma lagen ma nyinge Yubu. En owaco ni: “Akwano lok i kom Yubu i kare ma abedo ka kato ki i pekki mapol teretere. Yubu obedo ki pekki mapol dok cwinye bene otur adada. Kadi bed en onongo pe ngeyo pingo etye ka deno can, en pud omedde ki jenge i kom Jehovah pi kony.” (Yubu 42:​1-6) Laminwa Diane, ma kiloko i kome con-ni owaco ni: “An kacel ki cwara watye ka kwano lok i kom kit pa Jehovah mapatpat ki i bukkewa. Watye ki pwoc ni Jehovah tye ka konyowa me lubo kite magi. Ka cwinywa otur pi bal mogo ma watimogi, wiwa po ni Jehovah tye ka pwonyowa dok bene tye ka konyowa me doko jo mabeco. Man jingo wat ma watye kwede ki Jehovah.”—Ic. 64:8.

BED KI GEN NI JEHOVAH BIKONYI DOK BIMINI MOT

19. Gin ango ma watwero bedo ki gen iye?

¹⁹ I kare mogo, pud wabibedo ki par kacel ki cwercwiny kadi bed waketo pwony ma i ginakwana man ducu i tic. Kadi bed kit meno, ki kony pa Jehovah, pud watwero juko tamo i kom jami ma keliwa par kun wabedo ma wiwa opye mot. Wabibedo ki gen ni wabinongo mit pa kwo kare ducu dok wabibedo ma cwinywa yom pien wangeyo ni watye ki wat maber ki Jehovah. En bene cwinye bibedo yom pi jami mabeco ma watimo pire.

20. In imoko tammi me timo gin ango?

²⁰ Dong wamedde wunu ki tute matek wek pekkiwa, jami ma otimme i kwowa i kare mukato angec nyo bal ma watimo pe ogengwa ki nongo mit pa kwo. Ki kony pa Jehovah, watwero medde ki lweny ki par ma watye kwede. (Jab. 143:10) Watye ka kuro kwo i lobo manyen ka ma jami ducu ma watamo bikeliwa yomcwiny. I kare meno, pe tye gin mo keken ma biweko wabedo ki par. Dok i odiko me nino ducu, wabico ki yomcwiny madwong ma nongo watye atera me tic pi Lubangawa, Jehovah!