Ibinyuto Pwocci pi Ginkok Nining?

1-2. Ginkok pa Yecu omyero otug cwinywa me timo gin ango, dok pingo? (2 Jo Korint 5:​14, 15) (Nen bene cal.)

KET kong ni onongo imoko i kin matafali me ot ma opoto i komi ci ngat mo obino okwanyi woko ki iye, ibiwinyo nining i kom ngat meno ma olaro kwoni-ni? Ngene kene ni ibibedo ki pwoc madit adada dok ibitito ki ngat meno pwoc ma itye kwede dok wii pe biwil pi gin ma en otimo piri.

² Kit ma waneno kwede i pwony mukato-ni, wamito ni ngat mo olarwa ki i bal kacel ki to. Dok meno aye gin ma Jehovah otimo kikome. En omiyo wode me to piwa wek ebed ki kare me timiwa kica pi balwa, wabed ki gen me bedo labongo roc i kare me anyim dok wabed ki wat macok kwede odoco. Pi ginkok, watye ki gen me kwo pi naka i lobo manyen. Yecu onyuto mar madit ma en tye kwede pi dano i kare ma omiyo kwone piwa. Dok en onongo maro dano cakke wacon ma pud peya obino i lobo. (Car. 8:​30, 31) Lakwena Paulo ocoyo ni ‘mar pa Kricito loyo kwowa.’ (Kwan 2 Jo Korint 5:​14, 15.) Man tyen lokke ni mar pa Yecu omyero otug cwinywa me nyuto pwocwa pire dok wiwa myero pe owil i kom gin ma en otimo piwa.

3. Pingo yo ma ngat acel twero nyuto kwede ki pwocce pi ginkok twero bedo pat ki pa lawote?

³ Gin ango ma ibitimo me nyuto pwocci pi ginkok? Lagammi twero bedo pat ki pa ngat mukene. Me tito pingo twero bedo kit meno, go kong ni jo adek gitye ka cito i kabedo acel, ento gitye ka a ki i boma mapatpat. Gin ducu gibitic ki yo mapatpat. Yub ango ma in itye kwede? Itye ki yub me nyuto pwoc pi ginkok. Ento yo ma ibitic kwede me nyuto pwocci twero bedo pat ki pa jo mukene. Pi meno, pwony man binyamo yo ma gurup adek magi gitwero nyuto kwede ki pwocgi pi ginkok: (1) Lutino kwan me Baibul, (2) Lukricitayo ma gunongo batija, ki (3) romi murwenyo ki i kacokke.

LUTINO KWAN ME BAIBUL

4. Jehovah winyo nining i kom lutino kwan me Baibul?

⁴ Ka Lucaden pa Jehovah gitye ka kwano Baibul kwedi, ci tam i kom lok man: Kit ma dong ityeko jolo lok me kwena maber-ri, meno nyuto ni itye i kin jo ma Jehovah tye ka nyikogi cok bote me bedo ki wat maber kwede. (Jon 6:44; Tic 13:48) Jehovah neno gin ma tye i cwinyi. Man tyen lokke ni, en neno tuteni me pwonyo lok i kome dok cwinye bedo yom ka neno itye ka timo alokaloka i kwoni me yomo cwinye. (Car. 17:3; 27:11) Ginkok weko twerre boti me bedo ki wat macok ki Jehovah. (Rom. 5:​10, 11) Dong pe iwek wii owil i kom lok meno.

5. Lutino kwan me Baibul gitwero keto i tic tira ma nonge i Jo Pilipi 3:16 nining?

⁵ Ka itye latin kwan me Baibul, itwero nyuto pwocci nining pi ginkok? Yo acel aye ki timo gin ma lakwena Paulo owaco bot jo Pilipi, ni: “Myero wamedde me cung matek i yo ma dong wao iye.” (Pil. 3:16) Pi meno, pe iwek gin mo nyo ngat mo keken ogengi ki medde ki wot i yo ma tero dano i kwo.—Mat. 7:14; Luka 9:62.

6. Gin ango ma lutino kwan me Baibul giromo timone ka ginongo ni tek me timo alokaloka? (Nwoyo Cik 30:​11-14) (Nen bene cal.)

⁶ Ket kong ni inongo ni tek me ye pwony mo me Baibul ma ipwonyo cokcok-ki. Ka tye kit meno, ci tim kwed i kom pwony meno dok ileg bot Jehovah wek okonyi me niang pwony meno maber. (Jab. 86:11) Ka pud inongo ni tek me niang pwony meno, juk bedo ki par madwong iye, ento pe ijuk kwano Baibul woko. I nge kare mo, ibibedo ki kare me niang pwony meno maber. Nyo ket kong ni inongo ni tek me juko timo gin mo ma Jehovah dagi. Ka tye kit meno, wii myero opo ni Jehovah pe penyowa me timo gin mo keken ma kerowa pe romo. Itwero kwo ma lubbe ki rwom me kit ma atir pa Jehovah. (Kwan Nwoyo Cik 30:​11-14.) Dok Jehovah ocikke me konyi. (Ic. 41:​10, 13; 1 Kor. 10:13) Dong pe iil cingi woko. Pe iket cwinyi tutwal i kom jami ma inongo timogi tek, ento tam i kom jami mabeco ducu ma Jehovah obedo ka timone piri, tutwalle pi cwalo Wode me to piri. Ka marri pi Jehovah woto ki dongo, ci ibinongo ni “cikke pe nurowa.”—1 Jon 5:3.a

7. Gin ango ma jo matino ma lunyodogi tye Lucaden gitwero bedo ka tam iye?

⁷ Wun jo matino ma lunyodowu tye Lucaden kono? Wun bene wutye lutino kwan me Baibul. Ki lok ada, wun aye wubedo lutino kwan ma pigi tego loyo pa lunyodowu. Baibul waco ni: “Wunyik cok bot Lubanga, ci en bene binyiko cok botwu.” (Yak. 4:8; 1 Tekwaro 28:9) Ka ikwanyo kare me nyikke cok ki Jehovah, en bene binyikke cok boti. Jehovah pe keto cwinye i komi mere pien ni lunyodoni gitye Lucaden, ento pien en mito bedo laremi macok. Dong gin ango ma Jehovah otimo wek ibed lareme macok? En omiyo Wode piri. Pe iwek wii owil i kom mic man mamwonya adada ma en omiyo piri-ni. (Rom. 5:​1, 2) Dong i cabit mogo ma peya kikwero Nipo me mwaka-ni, kwany kare me tam matut i kom gin ma Jehovah gin ki Yecu gutimo piri. I nge meno, tam i kom kit ma imito ni kwoni obed kwede kacel ki yub ma itwero ketone me nyuto bot Jehovah pwoc ma itye kwede pire.b

LUKRICITAYO MA GUNONGO BATIJA

8. I yo ma nining ma Lukricitayo ma gunongo batija gunyuto kwede pwocgi pi ginkok?

⁸ Ka ibedo Lakricitayo ma dong onongo batija, nongo ityeko nyuto i yo mapatpat ni itye ki pwoc pi ginkok. Me labolle, itimo alokaloka i kwoni me yomo cwiny Jehovah ki doko lareme macok. Ilubo cik pa Yecu me tito kwena ki pwonyo jo mukene ki lok i kom Jehovah gin ki Yecu. Idyere bot Jehovah dok ingeye inongo batija. Twero bedo ni jo mogo guketo aunauna i komi pi tam ma imoko me tic pi Jehovah. (2 Tem. 3:12) Ento imedde ki tic pi Jehovah ki gen dok meno nyuto ni imaro Jehovah dok itye ki pwoc pi ginkok.—Ibru 12:​2, 3.

9. Peko ango ma Lukricitayo ma gunongo batija omyero gunge ni gitwero kemme kwede?

⁹ Ka dong inongo batija mwaki mogo angec, omyero inge ni tye peko mo ma itwero kemme kwede. Pwoc ma itye kwede pi ginkok twero cako rweny woko motmot. Man twero timme nining? Nen kong gin mutimme i kom Lukricitayo me Epeco i cencwari me acel. Gin guciro can mapol dok Yecu opwoyogi pi timo meno. Ento en bene owaco botgi ni: ‘Atye ki lok man i komwu, pien dong wuweko mar ma onongo yam wutye kwede mukwongo ca woko.’ (Yabo 2:​3, 4) Gin ma Yecu owaco nyuto ni inge kare mo, Lakricitayo twero cako cobo ticce pi Lubanga ma nongo cwinye nok i tic meno. Twero bedo ni dano ma kit meno lego, cito i cokke dok nywako i tic me pwony pien meno obedo tic ma en kare ducu timo. Ento nongo dong pe timo jami magi pi mar. Dong gin ango ma itwero timone ka iwinyo ni marri pi Jehovah pe tye matek kit ma con onongo tye kwede?

10. Itwero keto i tic gin ma lakwena Paulo owaco ki Temceo nining? (1 Temceo 4:​13, 15)

¹⁰ Lakwena Paulo owaco bot Temceo ni ka odok i kom ticce macalo Lakricitayo, en myero ‘onyut lok magi i tic dok oket cwinye iye.’ (Kwan 1 Temceo 4:​13, 15.) Ma lubbe ki tira meno, in bene itwero tamo pi yo mogo ma itwero weko woroni pi Jehovah bedo matek wek ‘imedde ki bedo lyet i cwinyi.’ (Rom. 12:11; nen jami akwana me nwtsty-E pi “Wubed lyet i cwinywu.”) Me labolle, itwero tero kare muromo me yubbe pi cokke. Man bikonyi me keto cwinyi ka itye i cokke. Nyo ka imito kwan piri keni, itwero cito i kabedo ma oling mot wek ibed ki kare me lwodo gin ma itye ka kwanone. Man bikonyi me nongo adwogi maber loyo ki i kwanni piri keni. Dong kit macalo mitte ni ibed ka medo yen wek mac olyel maber, mitte bene ni ibed ka timo jami magi wek imedde ki bedo ki pwoc pi ginkok kacel ki jami mukene ma Jehovah otimo piri. I cabit mogo ma pud peya kikwero Nipo, iromo bene tam i kom jami mabeco ma Jehovah tye ka timo piri pien ibedo Lacadenne. Labongo akalakala mo, meno bikonyi me dongo pwocci pi ginkok ma en aye guti me bedo ki wat maber ki Jehovah.

11-12. Tika tyen lokke ni Jehovah dong ojuko mini cwiny mere maleng woko ka i kare mogo iwinyo ni dong ipe ki mit kom me tic pire kit macon? Tit kong. (Nen bene cal.)

¹¹ Ka i kare mogo iwinyo ni mit kom ma onongo itye kwede me tic pi Jehovah orwenyo woko, pe iwek cwinyi otur nyo icak tamo ni Jehovah dong pe tye ka mini cwiny mere maleng. Wii omyero opo i kom gin ma lakwena Paulo ocoyo bot Lukricitayo me Korint madok i kom ticce me pwony, ni: “Ka atimo ma kun pe amito, nongo atye ka cobo tic ma gimiya.” (1 Kor. 9:17) Gin ango ma onongo en tye ka lok iye?

¹² Paulo bene onongo i kare mukene pe bedo ki miti me tito kwena. Kadi bed kit meno, en omoko tamme me medde ki tito kwena labongo paro pi kit ma ewinyo kwede. In bene itwero moko tammi kit meno. Mok tammi me timo gin ma atir kadi bed ipe ki miti me timone. Leg Jehovah wek omini “miti ki teko me tic.” (Pil. 2:13) Medde ki timo jami ma konyi me nyikke cok ki Jehovah. Timo meno biweko ibedo ki gen ni inge kare mo, marri pi Jehovah bidongo odoco.

13. I yo ma nining ma watwero medde kwede ki ngine kekenwa me neno ‘ka ce wacung matek i niyewa?’

¹³ Kare ki kare, bedo ber me ngine kekenwa kit ma lakwena Paulo owaco kwede i 2 Jo Korint 13:​5, ni: “Kong wungine kekenwu, wek wunen ka ce wucung matek i niyewu. Wutemme kekenwu.” Me labolle, itwero pennye kekeni ni: ‘Tika pud atye ka keto pi Ker-ri mukwongo i kwona?’ (Mat. 6:33) ‘Tika galowang ma ayero nyuto ni adag gin marac?’ (Jab. 97:10) ‘Tika atute me gwoko kuc kacel ki note i kin dano ma i kacokke?’ (Ep. 4:​2, 3) Kare me Nipo obedo kare maber adada me tam i kom jami magi. Ka watamo i kom gin ma Jehovah gin ki Yecu gutimo piwa, meno bitugo cwinywa me nyuto pwocwa bot Jehovah ki me nyuto ni watye ka kwo pi Kricito ento pe pi cobo mitiwa kenwa.c

ROMI MURWENYO KI I KACOKKE

14. Gin ango ma twero weko omege ki lumege mogo gia woko ki i kacokke?

¹⁴ Omege ki lumege mogo gujuko ribbe ki kacokke woko, kadi bed onongo dong gutiyo pi Jehovah pi mwaki mapol. Pingo? Jo mogo giwinyo ni dong giol adada pi paro “lok me kwo man” ma miyo pe dong gibedo ki kero me tic pi Jehovah. (Luka 21:34) Mukene cwinygi ocwer pi gin mo ma ngat mo me kacokke owaco nyo otimo i komgi. (Yak. 3:2) Jo mukene doki nongo gutimo bal madongo ci lewic tye ka makogi me penyo pi kony. Dong gin ango ma itwero timone ka itye i kin jo ma gua woko ki i kacokke? Gin ango ma ginkok kacel ki mar ma Jehovah gin ki Yecu gitye kwede piri tugo cwinyi me timone?

15. Jehovah nyuto nining ni eparo pi romi ma gurwenyo woko ki i kacokke? (Ejekiel 34:​11, 12, 16)

¹⁵ Tam kong i kom kit ma Jehovah winyo kwede i kom romi ma gurwenyo woko ki i kacokke. En pe tye ki akemo dok wiye pe wil i komgi. En pitogi dok konyogi me dwogo cen bote. (Kwan Ejekiel 34:​11, 12, 16.) Tika twero bedo ni Jehovah tye ka timo meno piri bene? Eyo! Kit macalo itye ka kwano pwony man, meno nyuto ni pud itye ki miti me yomo cwinye. Jehovah oneno jami mabeco i cwinyi i kare ma okonyi me ngeyo en ki me keli i kin jo me ode. En pud neno ni itye ki jami mabeco i cwinyi dok en mito ni idwog cen i kacokke.

16. Gin ango ma twero konyo romi murwenyo me dwogo cen bot Jehovah? (Nen bene cal.)

¹⁶ Buk me Return to Jehovah tye ki lok man me cuko cwiny: “Bed ki gen ni Jehovah bikonyi i tuteni ducu me dwogo cen bote. En bikonyi me lweny ki par ma itye kwede, me timo kica bot ngat mo keken ma i kacokke ma ocwero cwinyi, dok en bene bitimmi kica pi balli wek ibed ma cwinyi pe pidi. Meno ducu biweko bedo yot boti me cako tic pi Jehovah odoco kacel ki omege ki lumege.” Wii bene myero opo ni, luelda gitye atera me konyi. Gitwero bedo “macalo ka-gwok ka yamo tye, dok macalo ka-gwok ka kot ocorre piny.” (Ic. 32:2) Me nyuto pwocci pi ginkok, pennye kekeni ni, ‘Gin ango ma atwero timone i kare-ni me dwogo cen bot Jehovah?’ (Ic. 1:18; 1 Pet. 2:25) Me labolle, tika itwero cito i cokke i Ot me Ker? Tika itwero lok ki laelda mo me tite ni imito dwogo cen bot Jehovah? En twero keto yub pi ngat mo me kwano Baibul kwedi odoco pi kare mo. Itwero bedo ki gen ni Jehovah bigoyo laane i kom tuteni me dwogo cen bote ki dong me nyuto pwocci pi ginkok.

GIN ANGO MA IBITIMO ME NYUTO PWOCCI?

17-18. I yo ma nining ma watwero tic ki cawawa maber i cabit mogo ma peya kikwero Nipo me mwaka-ni?

¹⁷ Yecu owaco ni Jehovah ocwale me miyo kwone “wek dano ducu ma ye en owek to, ento obed ki kwo ma pe tum.” (Jon 3:16) Ginkok obedo yo ma Jehovah tiyo kwede me larowa ki i bal kacel ki to. Pe wamito ni warweny pwocwa pi ginkok. (Rom. 3:​23, 24; 2 Kor. 6:1) I cabit mogo ma peya kikwero Nipo, kwany kare me tam i kom mar ma Jehovah gin ki Yecu gunyuto. Meno bitugo cwinywa me nyuto pwocwa botgi.

¹⁸ Dong in ibinyuto pwocci nining pi ginkok? Lagammi pi lapeny meno twero bedo pat ki lagam pa ngat mukene. Ento itwero bedo ki gen ni Jehovah bigoyo laane i kom tuteni ka iribbe kacel ki omege ki lumege milion mapol ma ‘pe dong gimedde ki bedo kwo pigi kengi, ento gibedo kwo pi ngat ma yam oto ka ocer pigi ca.’—2 Kor. 5:15.