Medde ki Yenyo “Tira pa Lubanga”

1. Miti ango ma Jehovah oketo i cwiny dano? (Matayo 5:3)

JEHOVAH ngeyo gin ma dano mito me medde ki bedo kwo. Me labolle, wamito ginacama, ginaruka, kacel ki kabedo maber ma watwero kwo iye. Ka pe watye ki jami magi, watwero to woko nyo bene kwo twero doko tek adada. Jehovah ngeyo ni tye bene gin mo mukene ma mitte pi dano. En ocweyowa ki miti me ngeyo en ki me jenge i kome pi tira. (Kwan Matayo 5:3.) Ka wamito bedo ki yomcwiny me ada, ci mitte ni wange ni wamito tira pa Jehovah dok wamedde ki geno en.

2. I yo ma nining ma kwowa rom aroma ki kwo pa lapeko ma tye ka lego kony?

² Nyig lok me leb Grik ma kigonyo ni “jo ma gingeyo ni gimito tira pa Lubanga” loko i kom lapeko ma tye ka lego kony. Tam kong i kom lapeko mo ma bongone col adada dok pe ki ginacama mo. I dyeceng, en bedo i wi ceng malyet dok i dyewor koyo neke matek. Dano pe gimito bedo cok kwede pi kit ma en nen kwede. Kare ducu en bedo muol dok ma nongo cwinye pe yom. Lapeko man ngeyo ni emito kony wek emedde ki bedo kwo dok ma kome yot. I yo acel-lu, jo ma gingeyo ni gimito tira pa Lubanga gibedo ki miti matek me penyo pi kony ki bote ki me winyo lokke.

3. Gin ango ma wabinyamo i pwony man?

³ I pwony man, wabicako ki nyamo gin ma wapwonyo ki bot dako mo ma Lapoiniki ma olego Yecu pi kony. Wabineno kit ma watwero lubo kwede lanen pa dako meno ka wamito ni Jehovah omedde ki tirowa. I nge meno, wabinyamo lanen pa lakwena Petero ki Paulo, ki dong Kabaka Daudi, ma gujenge i kom Jehovah pi kony.

LABOL MABER ME MWOLO, DIYO CWINY KI NIYE

4. Gin ango ma onongo dako mo ma Lapoiniki mito ki bot Yecu?

⁴ I nino mo acel, dako mo ma Lapoiniki obino bot Yecu. Nyare onongo “tye ki cen marac ma tye ka une matek.” (Mat. 15:​21-28) Dako meno orumo conge i nyim Yecu ci obako doge pi kony. En onyuto kit mogo mamwonya adada i kare ma ocito bot Yecu. Kong wanenu yo adek ma watwero lubo kwede lanen pa dako-ni.

5. Kit mapatpat ango ma dako ma Lapoiniki-ni onyuto, dok Yecu odok iye nining? (Nen bene cal.)

⁵ I kare ma dako ma Lapoiniki-ni olego pi kony ki bot Yecu, Yecu owacce ni: “Pe pore me kwanyo mugati pa lutino me abola bot lutino gwogi.” Ka onongo obedo ngat mukene, kono onongo okeco matek dok oa woko kun nongo tamo ni Yecu tye ka yete kun pore ki gwok. Ento dako man pe otimo meno! En onyuto kom mwolo kikome mumiyo en otimo gin mo mukene. En omedde ki bako doge bot Yecu pi kony dok meno onyuto diyo cwiny ma en obedo kwede. Gin ango ma oweko en otimo meno? En onongo tye ki niye matek i kom Yecu. Dok i kare ma Yecu oneno niye matek ma dako meno tye kwede, en omoko tamme me konyo dako meno. Kadi bed Yecu onongo pud oa ka waco ni kicwale bot “romi murwenyo me rok me Icrael” keken, Yecu oryemo cen woko ki i kom nya pa dako man ma obedo Larok-ki.

6. Pwony ango ma wanongo ki i gin mutimme i kom dako ma Lapoiniki-ni?

⁶ Ka wamito nongo adwogi maber ki i tira pa Jehovah, mitte ni walub lanen pa dako ma Lapoiniki-ni. Omyero wabed mwol, wamedde ki diyo cwinywa, dok wabed ki niye matek. Ngat mamwol keken aye bidiyo cwinye me medde ki lego kony ki bot Lubanga. Omyero bene wabed ki niye matek i kom Yecu Kricito dok wagen jo ma en tiyo kwedgi me tiro lulub kore. (Mat. 24:​45-47) Yomo cwiny Jehovah gin ki Yecu adada ka wabedo jo mamwol, wamedde ki penyo pi kony dok watye ki niye matek. Ka watimo kit meno, gibikonyowa dok gibitirowa. (Por ki Yakobo 1:​5-7.) Kong dong wanenu kit ma Jehovah tirowa kwede dok miniwa jami ma wamito me medde ki bedo ki yomcwiny. Wabineno bene kit ma watwero lubo kwede lanen pa lakwena Petero ki Paulo ki dong Kabaka Daudi.

CALO PETERO, MEDDE KI NONGO PWONY KI I LOK PA LUBANGA

7. Tic ango ma Yecu omiyo bot Petero, dok gin ango mukene ma onongo mitte ni Petero otim? Tit kong. (Jo Ibru 5:14–6:1)

⁷ Tam kong i kom lanen pa Petero. En obedo i kin Lujudaya ma gukwongo niang ni Yecu obedo Meciya. En oniang ni Jehovah onongo tye ka tic ki Yecu me pwonyo dano ki “lok me kwo ma pe tum.” (Jon 6:​66-68) Ma peya Yecu odok cen i polo, en owaco bot Petero ni: “Kwa romina.” (Jon 21:17) Petero olubo tira pa Yecu meno dok okonyo me pwonyo omege ki lumege ma i kacokke. Dok Jehovah otiyo ki Petero me coyo waraga aryo ma nonge i Baibul. Ento onongo bene mitte ni Petero omedde ki kwano Lok pa Lubanga pire kene i yo matut. Me labolle, en okwano waraga mapatpat ma Paulo ocoyogi ma onongo dong tye but Ginacoya i kare meno. Petero oye ni jami mogo ma Paulo ocoyo onongo “niang iye tek.” (2 Pet. 3:​15, 16) Ento Petero omedde ki kwano lok magi i yo matut. En onongo tye ki niye ni Jehovah bikonye me niang kacel ki keto i tic lok magi.—Kwan Jo Ibru 5:14–6:1.

8. Gin ango ma Petero otimo i kare ma onongo tira manyen ki bot Jehovah?

⁸ Petero onyuto ni etye ki niye matek i kom Jehovah ki lubo tira ma kimine. Me labolle, i nino mo acel ma Petero tye i Jopa, en oneno ginanyuta mo dok lamalaika owacce ni ocam lee ma onongo Cik pa Moses pe ye ni Lujudaya gucam. Kit macalo Petero onongo obedo Lajudaya, en onongo ni pe pore kulu me timo gin ma lamalaika-ni owacce. I acakkine, Petero ogamo ni: “Pe, Rwot, peya acamo jami ata me kwer.” Ci kiwacce ni: “Gin ma Lubanga olonyo in pe ilwong ni obedo me kwer.” (Tic 10:​9-15) Petero oye dok oloko tamme. Wangeyo man nining? I nge neno ginanyuta man, co adek gubino i ot ka ma Petero obedo iye. Guwaco ni laditgi Kornelio mito ni Petero ocit bote. Petero onongo pe biye cito i ot pa Kornelio ma peya en oneno ginanyuta man pien Kornelio obedo Larok. Lujudaya onongo gipwonyo danogi ni obedo gin me kwer me donyo i ot pa dano ma pe obedo Lajudaya. (Tic 10:​28, 29) Ento i kare ma Jehovah onyuto ki Petero ni cakke i nino meno emito ni jo ducu guwiny lok me kwena maber, Petero otimo alokaloka oyotoyot me lubo tira meno. (Car. 4:18) En otito kwena bot Kornelio kacel ki wadi ki lurem Kornelio ma gubino i gange. Gin ducu gunyuto niye i kom Yecu, gunongo cwiny maleng dok gunongo batija.—Tic 10:​44-48.

9. I yo aryo meno ma watwero nongo kwede adwogi maber ka wakwano jami ma wanongo ni niang iye tek?

⁹ Calo Petero, mitte ni wakwan lok pa Lubanga nino ducu. Pol kare jami ma wakwano nongo obedo jami ma niang iye yot. Mitte bene ni wadong miti me camo cam me cwiny matego—ma meno obedo lok ada ma niang iye pe yot. Mitte ni water kare muromo me kwano Lok pa Lubanga ki diro. Dok pire tek ni watute me niang jami ma onongo pe waniang i kare mukato. Pingo? Pien weko wanongo adwogi maber i yo aryo magi: Me acel, wapwonyo jami i kom Jehovah ma weko marwa ki worowa pire dongo matut. Me aryo, ka wapwonyo gin mo i kom Jehovah ma onongo con pe wangeyo, weko wabedo ki miti me tito ki jo mukene lok madok i kome. (Rom. 11:33; Yabo 4:11) Gin mukene ma wapwonyo ki bot Petero aye ni: Ka Jehovah ki dulle gutimo alokaloka mo i kit ma onongo waniang kwede ginacoya mo, mitte ni waye niango meno dok waket i tic oyotoyot. Ka watimo meno, ci Jehovah bimedde ki tirowa dok wabimedde ki tic pire ki gen.

CALO PAULO, RUK KIT PA DANO MANYEN

10. Ma lubbe ki Jo Kolocai 3:​8-10, gin ango ma mitte ni watim me yomo cwiny Jehovah?

¹⁰ Jehovah tirowa ki nyutiwa kit ma watwero dongo kwede kit pa dano manyen ma yomo cwinye. En nyutiwa yo me dongo kit meno. (Kwan Jo Kolocai 3:​8-10.) Tero kare kacel ki kero me dongo kit ma yomo cwiny Jehovah. Tam kong i kom lakwena Paulo. Cakke ma en pud tidi, en otiyo matek me yomo cwiny Lubanga. (Gal. 1:14; Pil. 3:​4, 5) Ento en onongo pe ki ngec ma atir i kom yub pa Lubanga dok meno oweko en onongo pe woro Lubanga i yo ma atir. En bene onongo pe ngeyo lok ada madok i kom Yecu. Paulo bene onongo obedo lawaka, meno oweko en okwo i yo ma pe yomo cwiny Jehovah. Paulo kikome owaco ni onongo ebedo “laco ma ger.”—1 Tem. 1:​13, NWT.

11. Alokaloka ango ma onongo mitte ni Paulo otim? Tit kong.

¹¹ Ma peya Paulo odoko Lakricitayo, en onongo obedo ngat ma keco oyotoyot adada. Lok mo ma kicoyo i buk me Tic pa Lukwena nyuto ni i kare mo, Paulo okeco adada mumiyo ocito ka “buro lupwonnye pa Rwot kun mito nekogi.” (Tic 9:1) Dong i kare ma Paulo odoko Lakricitayo, onongo mitte ni en oti matek me juko kinigane. En odoko laco ma lakica dok ma diyo cwinye. (Ep. 4:​22, 31) Kadi bed kit meno, Paulo pud otimo bal i kare mogo. I kare ma en ki Barnaba gubedo ka laro lok magwar i kingi, Paulo okeco adada. (Tic 15:​37-39) Cwiny ma Paulo onyuto i cawa meno onongo pe rwatte ki gin ma Lubanga mito. Ento en omedde ki tic matek me bedo ngat ma yomo cwiny Lubanga.—1 Kor. 9:27.

12. Gin ango ma okonyo Paulo me weko kite macon?

¹² Paulo obedo ki kero me weko kite macon ki me ruko kit pa dano manyen pien pe ojenge i kome kekene. (Pil. 4:13) Calo Petero, Paulo bene ojenge i kom “tek ma Lubanga omiyo.” (1 Pet. 4:11) Kadi bed kit meno, i kare mogo Paulo pud otimo bal dok meno oturo cwinye. Ento i kare ma cwinye otur, wiye obedo ka po i kom jami ducu ma Jehovah otimo pire. Dok me nyuto pwocce, en omedde ki timo alokaloka kacel ki yomo cwiny Jehovah.—Rom. 7:​21-25.

13. Watwero lubo lanen pa Paulo nining?

¹³ Kadi bed dong watiyo pi Jehovah pi mwaki mapol, mitte ni wamedde ki tic matek me ruko kit pa dano manyen. Ngene kene ni, wabitimo bal i kare mogo. Me labolle, waromo keco adada nyo waco lok mo ma pe nyuto kica. Ka gin ma kit meno otimme, pe omyero watam ni pe dong wabitwero yomo cwiny Jehovah kulu. Me ka meno, myero wamedde ki tute me loko tamwa kacel ki kitwa. (Rom. 12:​1, 2; Ep. 4:24) Ka wawoto ki timo meno, wiwa myero opo i kom lok ma pire tek man: Ka wamito ni bongo moni oromwa maber, waromo yubone ma rwatte ki komwa. Ento ka odok i kom ruko kit pa dano manyen, wan aye omyero walok kitwa. Mitte ni walok kitwa wek obed ma rwatte ki cik pa Lubanga.

CALO DAUDI, MEDDE KI BEDO I TE GWOK PA JEHOVAH

14-15. I yo mapatpat ango ma Jehovah gwoko kwede jone i yo me cwiny? (Jabuli 27:5) (Nen cal ma i ngeye.)

¹⁴ Me bedo ki yomcwiny me ada, mitte ni wabed i te gwok pa Jehovah. I yo ma nining ma Jehovah gwokowa kwede? Dok gin ango ma mitte ni watim me nongo gwok meno?

¹⁵ Kabaka Daudi onongo tye ki gen ni Jehovah bigwokke i kare ma kwo tek. (Kwan Jabuli 27:5.) Jehovah gwoko jone nining i kare-ni? Jehovah gwokowa ki bot ngat mo nyo gin mo keken ma twero balo niyewa. Kadi bed dano gitemme me jukowa ki woro Jehovah, en ocikke me gwoko wat ma tye i kinwa kwede. (Jab. 34:7; Ic. 54:17) Kadi bed Catan, jogine kacel ki jo ma giunowa gitek loyowa, ento Jehovah tek loyogi ducu. Kadi bed gunekowa, Jehovah pud bicerowa woko i kare me nicer. (1 Kor. 15:​55-57; Yabo 21:​3, 4) Jehovah bene konyowa me medde ki tic pire ka watye ki par. (Car. 12:25; Mat. 6:​27-29) Dok macalo Wego ma lamar, en ominiwa utmege ma gicuko cwinywa dok gikonyowa i kare ma kwo tek. En bene ominiwa luelda ma gipwonyowa dok gikonyowa me medde ki bedo ki niye matek. (Ic. 32:​1, 2) Ka watye i cokke, wapwonyo yo mapatpat ma watwero weko Jehovah konyowa dok gwokowa kwede.—Ibru 10:​24, 25.

16. I yo mapatpat ango ma Jehovah ogwoko kwede ki Daudi?

¹⁶ I kare ma Daudi obedo ka lubo tira pa Jehovah, Jehovah okonye me moko tam ma nyuto ryeko dok cwiny Daudi obedo yom adada. I yo ma kit meno, Jehovah ogwokke. (Por ki Carolok 5:​1, 2.) Ento i kare ma Daudi okwero lubo tira pa Jehovah, en odeno can pi tam maraco ma omoko. Jehovah pe ogengo adwogi maraco ma obino pi tam ma Daudi omoko. (2 Cam. 12:​9, 10) I kare mogo, Daudi bene odeno can pi aunauna ma dano gubedo ka ketone i kome. I kare ma jami magi gubedo ka timme, Daudi otito ki Jehovah par ducu ma etye kwede dok Jehovah ogwoke. Jehovah otimo meno nining? En okweyo cwiny Daudi kun cikke bote ni ebigwokke dok okonye me niang ni emare.—Jab. 23:​1-6.

17. I yo ma nining ma watwero lubo kwede lanen pa Daudi?

¹⁷ Watwero lubo lanen pa Daudi ka walego bot Jehovah dok wayenyo tirane me konyowa moko tam mabeco. Wiwa bene myero opo ni ka wakwero bedo luwiny bot Jehovah, en pe bigengo jami maraco ma twero timme i komwa macalo adwogi me tam maraco ma wamoko. (Gal. 6:​7, 8) Ento kadi bed walubo tira pa Jehovah, i kare mogo wadeno can pi tyen lok mapatpat. I kare ma kwo tek, watwero tito ki Jehovah jami ducu ma kelliwa lworo dok walege pi kony ma mege. Ka watimo kit meno, en bikweyo cwinywa dok bikonyowa me niang ni emarowa.—Pil. 4:​6, 7.

MEDDE KI JENGE I KOM JEHOVAH PI TIRA

18. Gin ango ma pol pa dano gitamo ka odok i kom lubo tira pa Lubanga, dok gin ango ma omyero watim ka wamito ni Jehovah omedde ki tirowa? (Nen bene cal.)

¹⁸ Ginacoyawa me mwaka 2026 waco ni: “Jo ma gingeyo ni gimito tira pa Lubanga gitye ki yomcwiny.” Pire tek adada i kare-ni ma loyo kare mo keken me jenge i kom Jehovah pi tira. Pingo? Pien jo mapol i kare-ni pe giye ni gimito Lubanga kacel ki tirane. Dok jo mapol giye i kom Lubanga ento giyero me woro Lubanga i yo ma gitamo ni opore pigi. Jo mogo gijenge i kom tira pa dano. Timo magi ducu miyo cwinygi pe bedo yom kulu. Omyero wagwokke adada wek pe walub kit ma gikwo kwede. Watwero timo man nining? Omyero wamedde ameda ki kwano Lok pa Jehovah nino ducu, pwonyo kit ma watwero nyuto kwede kit mabeco ma yomo cwiny Jehovah ki dong bedo luwiny bot Jehovah kun waweko en aye gwokowa.