Rwec ma Nyako Nyige

Ma nongo pud odong cabit adek me cito i gure madit, kacokke ducu bibedo ki rwec me lwongo jo ma gitye ki miti pi gure madit man. Tye tyen lok maber pi rwec man ma bedo mwaka ki mwaka-ni. Jo ma gijolo lwongowa ci gibino i gure man pol kare gibedo ki pwoc madit pi pwony ma jenge i kom Ginacoya, yub maber me tic i dipatmen mapatpat ma omege ki lumege ma gumine kengi aye gicwako, ki dong kit mabeco ki mar ma wanyuto. (Jab. 110:3; 133:1; Ic. 65:13, 14) Kadi bed kit meno, rwec man tika nyako nyige, tutwalle ka ma jo ma gitye ki miti myero guwot ka mabor wek gunywak iye?

I nge gure madit me distrik me mwaka 2011, jang gang kal onongo waraga ki bot dako mo ma onongo karatac me lwongo i te doggolane. En pol kare kanne woko tekke Lucaden pa Jehovah gudwongo doggolane. En ocoyo ni: “Onongo atye ki gang maber, ki laco ma mara, mumiyo atamo ni atye ki jami ducu ma twero kela yomcwiny. Ento kadi bed kit meno, cwinya onongo pud pe yom, dok kwona onongo pe ki tyen lok. Ci amoko tamma me dwoyo mutoka mairo 200 me bedo i yub me Ceng Abicel.” Yub me gure oyomo cwinye mada mumiyo en ogoyo cim bot cware me wacce ni ebibuto i boma me gure madit pi winyo yub me Ceng Cabit bene. En owacci, “Awinyo pwony ducu, arwatte ki Lucaden pa Jehovah mapol, dok amoko tamma ni pe dong abijuko ribbe kacel kwedgi.” Ma en odok cen paco, dako-ni ocako kwano Baibul ci i nge dwe angwen en odoko latit kwena ma peya onongo batija. En dok owacci, “Cwinya pud dong yom ni anongo karatac me lwongo man i te doggolana, kombeddi dong kwona tye ki tyen lok!”

Jo mukene ma ginongo karatac me lwongo pi gure man gibibedo tye i yub. Pi man omyero watute me nywako i yub me rwec man ki cwinywa ducu. Kel karatac me lwongo ma odonge i boma ma gure bibedo iye, ci ibitic kwede me miyo caden ma pe iyubbe iye.

[Bok i pot karatac 4]

Wabipoko Karatac me Lwongo-ni Nining?

Me tyeko wang ticwa ducu, myero walok macek. Waromo wacci: “Irii maber. Watye ka nywako i tic ma kwako wi lobo ducu me poko karatac me lwongo man. Kopi ma megi en. Ibinongo ngec me lwongo man ki iye.” Lok ki mit kom. Ka itye ka nywako i poko karatac me lwongo i tum pa cabit, itwero bene miyo magajin ka ineno ni opore.