Lwongo Dano pi Gure Madit

1. Rwec me lwongo dano pi gure madit me mwaka-ni bicakke awene?

¹ Ka itye ka yubo dek mo mamit pi luremi nyo jo me ot-ti, tutwalle dek ma welle tek dok tedone bene pe yot, ci ibibedo ki mit kom ka itye ka lwongo dano. I yo acel-lu, dong kitiyo tic mapol me yubo cam me cwiny ma kibimiyone i gure madit me mwaka-ni. Ma nongo pud odong cabit adek me cito i gure madit, Jehovah tye ka miyowa mot me lwongo jo mukene me bedo tye iye. Ngo ma biweko wanywako i rwec man ki mit kom?

2. Ngo ma bitugo mitiwa me tute matek i rwec man?

² Ka walwodo kit ma wan ki acel acel watye ka nongo kwede ber pa cam me cwiny ma Jehovah miyowa i gure madito, ci bitugo mitiwa me tute matek i rwec man. (Ic. 65:13, 14) Omyero wiwa bene opo ni, rwec man ma bedo mwaka ki mwaka-ni kelo adwogi maber. (Nen bok ma wiye tye ni “Rwec Man Kelo Adwogi Maber.”) Jo mogo ma walwongogi gibibedo tye i gure madit kacel kwedwa, ento mukene pe gibino iye. Ento kadi bed dano mapol gibibedo tye nyo pe, tutewa i rwec man bikelo pak bot Jehovah kun nyuto yot cinge.—Jab. 145:3, 7; Yabo 22:17.

3. Wabipoko karatac me lwongo-ni nining?

³ Luelda me kacokke myero gumok kit ma gibipoko kwede karatac me lwongo i kabedo ducu, ka ce gibiweko i paci ma pe gunongo iye dano nyo gibipoko ka ma kimiyo iye caden i dye lwak. I tum pa cabit wuromo poko magajin kacel ki karatac me lwongo ka opore. I nge tyeko rwec man, pud dong wabibedo ki yomcwiny me ngeyo ni wan bene wanywako iye ki mit kom dok walwongo jo mapol kit ma watwero me nywako kwedwa i cam me cwiny ma Jehovah omiyo!

Rwec Man Kelo Adwogi Maber

Mwaki mapol angec i kare ma lamego acel mo onongo tye ka nywako i rwec man, en obedo ka pennye kene ka tic man nyako nyige. En otamo ni, ‘Tika ada dano bijolo lwongo man ci gibino i gure madit kacel kwedwa?’ I Ceng Abicel odiko i gure madit, en oneno laco Indi Cinga Cinga obedo cok ka ngete, ci owoto ka motone. En oniang ni laco-ni obino i gurewa madit pien onongo karatac me lwongo. Laco-ni onongo tye ki lapeny mapol ma lamego-ni ogamo. En oloko i kom kit ma yub man mit kwede dok owacci ruk ki kit pa wele ogudo cwinye adada. Lacen i nino meno, lamego-ni dok ocako boko lok ki luot mo ma gubedo cok kwede. Gin bene gunongo karatac me lwongo ci gubino i gure madit ki bac. Gunongo ni gure madit mit adada dok gumoko tamgi me bino i Ceng Cabit bene. Lamego man dong oniang ni rwecwa ma timme mwaka ki mwaka-ni obedo gin ma pire tek.
I gure madit ma obedo cokcok-ki, laco ki dako ma gubedo painia marii gunyutte bot jo munyomme mo ma dong gutii. Jo munyomme meno gutito ni man obedo tyen mukwongo me binogi. Luot ma gubedo painia-ni gupenyo ni, “Nga ma olwongowu?” Gugamo ni, “I kare ma wadwogo paco i nino mo, wanongo karatac me lwongo i te doggolawa.” Gin gukwano karatac me lwongo meno dok gupongo bene fom ma i ngeye. Wele mukene ma i gure madit gunywako cam me dyeceng ki luot man. Yub man oyomo cwinygi mada mumiyo guketo pulan me dwogo cen orwone. Kiketo yub me limogi wek gimedde ki dongo mitigi.