PWONY ME 58
Medde ki Bedo Lagen bot Jehovah
Lukricitayo me ada gumoko tamgi pe me ye ni ngat mo nyo gin mo keken obal watgi ki Jehovah. Labongo akalakala in bene iwinyo kit meno. Dok cwiny Jehovah bedo yom ka ibedo lagen. (Kwan 1 Tekwaro 28:9.) Ariya ango ma twero weko bedo tek boti me bedo lagen bot Jehovah, dok gin ango ma twero konyi?
1. Jo mukene gitwero temo genneni nining?
Jo mukene bitemme me juki ki tic pi Jehovah. Angagi ma gitwero timo gin ma kit meno? Jo mogo ma gua woko ki i ada giwaco lok goba i kom dul pa Jehovah wek gibal niyewa. Magi gubedo jo mungak. Lutela dini mogo bene giwaco lok goba i komwa wek jo ma giye lokgi-ni gua woko ki i ada. Obedo gin marac adada me laro lok ki jo ma dagwa, me kwano bukkegi, cito i kabedogi me intanet nyo me neno vidiogi. Madok i kom jo ma temme me turo cwinywa wek pe wati pi Jehovah, Yecu owaco ni: “Wek gubedi; meno gin lutowang ma gipeyo lutowang wadigi. Ka ce latowang peyo latowang lawote, ci gin aryo ducu gibipoto woko i bur.”—Matayo 15:14.
2. Tam ma wamoko twero nyutone nining ni watye lugen bot Jehovah?
Marwa pi Jehovah bimiyo wagwokke ki gin mo keken ma kubbe ki dini goba. Pi meno dog ticwa, gurup mo keken ma wadonyo iye, nyo gin mo keken ma watimo myero pe okubbe ki dini goba. Jehovah ocikowa ni: “Wun jona, wua woko ki bote [Babilon Madit].”—Niyabo 18:2, 4.
NONG NGEC MATUT
Nen kit ma itwero gwokke kwede wek ngat mo keken pe owek itur genneni bot Jehovah. Ki bene, nen kit ma itwero nyuto kwede ni in lagen ki a woko ki i Babilon Madit.
3. Gwokke ki lupwonye ma lugoba
Omyero wadok iye nining ka wawinyo lok marac i kom dul pa Jehovah? Kwan Carolok 14:15, ci wunyam lapeny man:
Pingo wagwokke pe me ye jami ducu ma wawinyo?
Kwan 2 Jon 9-11, ci wunyam lapeny magi:
Omyero water jo mungak nining?
Ka pe wagwokke, ci watwero nongo pwony pa jo mungak nining kadi bed pe waloko kwedgi wang ki wang?
Itamo ni Jehovah biwinyo nining ka waketo cwinywa ka winyo lok maraco ma kiwaco i kome nyo i kom dulle?
4. Medde ki bedo lagen bot Lubanga kadi bed omego nyo lamego mo otimo bal
Gin ango ma myero watim ka waniang ni ngat mo me kacokke otimo bal madit? Nen pwony ma wanongo ki i Cik ma Lubanga omiyo bot Luicrael. Kwan Lulevi 5:1.
Kit ma kiwaco kwede i tyeng man, ka waniang ni ngat mo otimo bal madit, omyero watit lokke bot luelda. Ento ma peya watimo meno, bedo ber ka wawaco ki latim bal-li wek en aye ocit bot luelda ka tuco balle. Ka en pe ocito, ci wabibedo lugen bot Jehovah kun watito lokke bot luelda. Timo meno nyuto marwa nining pi . . .
Lubanga Jehovah?
latim bal-li?
jo me kacokke?
Ka laye lawoti mo opoto i peko, konye!
5. A woko ki i Babilon Madit
Kwan Luka 4:8 ki Niyabo 18:4, 5, ci wunyam lapeny magi:
Tika dini me goba pud gitera calo abedo lamembagi?
Tika atye i dul mo ma kubbe ki dini goba?
Tika dog ticca konyo dini goba i yo mo keken?
Tika pud tye kabedo mo i kwona ma weko akubbe ki dini goba?
Ka lagamma tye ni eyo pi lapeny mo i kin lapeny magi, ci alokaloka ango ma myero atim?
I yo me kwoni ducu, mok tam ma weko cwinyi pe pidi dok nyuto ni in lagen bot Jehovah.
Gin ango ma ibitimo ka kiwaco ni imi ajog pi yub ma dini mo tye kwede me konyo lupeko?
JO MOGO GIWACO NI: “Omyero ange gin ma jo mungak giwaco i kom Lucaden pa Jehovah wek awek dano gunge lok ada.”
Tika meno nyuto ryeko? Pingo nyuto ryeko, nyo pingo pe nyuto ryeko?
WOT WIYE WIYE
Wek wamedde ki bedo lugen bot Jehovah, omyero pe waribbe ki jo ma gimito ni wangak woko.
Ngo ma ipwonyo?
Pingo myero pe wawiny tam pa jo mungak?
Ka waniang ni laye lawotwa mo otimo bal madit, ci gin ango ma omyero watim?
I yo mene ma watwero lubo kwede cik ma wacci myero waa woko ki i dini goba?
TIM KWED
Nen gin ma myero itim ka jo mogo gitye ka waco lok goba i kom Lucaden pa Jehovah.
Itwero ngeyo nining ka dul nyo tic moni kubbe ki dini goba?
“Medde ki Tic Matek i Agikki me ‘Kare me Agikki’” (Wi Lubele, Oktoba 2019, paragraf 16-18)
Gin ango ma jo mogo ma dagwa gutimo wek gibal niyewa?
I lok ma wiye tye ni “Abedo ka Yenyo Lubanga Cakke ma Pud Atidi,” kwan kit ma padi mo me Shinto oa kwede ki i dini goba.