Winyo Lok Olaro Kwo-gi

YECU KRICITO ociko pi agikki me yub pa Lujudaya ma onongo centa-ne tye i ot pa Lubanga i Jerucalem. En pe omiyo nino ma nongo gin meno bitimme iye. Ento en otito pi jammi ma bitimme ma nongo dong kicok ki turo-ne. En ocuko cwiny lupwonnyene me kiyo piny ki me a woko ki ka marac.

Yecu otito woko con ni: “Ka wuneno mony orumo Jerucalem, ci wunge ni kare me nginyo-ne dong onyiko cok.” En bene owaco ni: “Dong ka wubineno gin mo me kwer, malik, mabalo cwiny dano . . . kun ocung i kabedo maleng, . . . i kare meno jo ma tye i Judaya myero guring woko i wi godi.” Yecu ociko lupwonnyene pe me dok cen ka coko jammi ma gitye kwede. Ngwec pi oyot onongo mitte mada pi laro kwo-gi.​—Luka 21:20, 21; Matayo 24:15, 16.

Me keto jemo ma onongo ori pi kare malac-ci, Cestius Gallus otelo wi lulweny me Roma i kom Jerucalem i mwaka 66 K.M. En odonyo wa i boma ka gurumo ot pa Lubanga woko i dyere. Peko otugi guro boma woko. Jo ma gubedo ka kiyo piny guneno ni peko onongo dong tye cok mada. Ento ngwec onongo mono twere? I yo me atura tutwal, Cestius Gallus ogwaro lumonnye ci odok kwedgi cen. Lulweny pa Lujudaya guryemo korgi. Man aye onongo dong obedo kare me ngwec woko ki i Jerucalem ki i kabedo ducu me Judaya!

I mwaka ma olubo, lumony me Roma gudwogo cen i te tela pa Vespasian gin ki wode Tito. Lweny oguro lobo meno woko ducu. I acakki me mwaka 70 K.M., jo Roma gugero tadi ma wigi pit orumu Jerucalem woko i dyere. Guloro yo me loyo ducu. (Luka 19:43, 44) Gurup ma onongo gitye i boma gucako neke keken-gi. Udong dano mukene-ni jo Roma guneko-gi mukene gutero-gi me bedo opii. Boma ki ot pa Lubanga gunginyo woko kwicikwici. Ma lubbe ki lok pa langec mo me tekwaro pa Lujudaya ma nyinge Josephus, Lujudaya ma kato milion gudeno can dok guto iye. Ot pa Lubanga dong pe gimedo ki gero-ne odoco matwal.

Ka onongo Lukricitayo gumedde ki bedo i Jerucalem nio wa i mwaka 70 K.M., onongo kono gineko-gi nyo gitero-gi i opii ki jo mukene ma gudong. Ento, lunge tekwaro gutito ni Lukricitayo guwinyo cik pa Lubanga ci guringo gucito woko ki i Jerucalem ki i Judaya ducu i kin godi ma tung kunyango me Kulu Jordan. Jo mukene gugony i Pella, matye i ka bedo me Perea. Gin onongo guweko Judaya dok pe gudok cen. Winyo lok pa Yecu olaro kwo-gi.

In Mono Itero Lok ma Ciko Dano ma a ki ka ma Gene Calo Gin ma Pire Tek?

Inge winyo lok ma ciko dano mapol ma pe gucobbe, pol pa dano gitero lok ma kit meno calo gin me tuko. Ento winyo lok ma ciko-wa oromo laro kwo-wa.

I lobo China in mwaka 1975, gicikogi ni oyeng yeng onongo obiyengo piny. Luloc guniango lwak. Ki dano bene guwinyo lokgi. Ci kilaro kwo pa dano alip mapol.

I dwe me angwen me mwaka 1991 i lobo Philippines, jo ma onongo gibedo ite got Pinatubo gucwalo lok ni itu ki bwuru tye ka duny kun a ki i kum Got. Inge ngiyo jammi meno pi dwe aryo, Dul matye ki diro i lok kom got ma ngulo mac ki Oyeng yeng guciko lok ni peko cok poto. Cutcut, gicako da- ko dano alip mapol ki i kabedo meno. I odiko me nino dwe 15 me dwe me Abicel, mwoc madit tutwal owinnye, cogi jammi mogo ma oleny ki lyeto ongulle malo i polo ka ocako dwogo piny i kabedo ma orumu kenyo mairo aryo. Winyo cik olaro kwo pa dano alip mapol.

Baibul bene ciko pi agikki me yub me jammi me kare man. Kombeddi wan dong watye ka kwo i kare me agikki. Kit ma agikki dong onyiko cokki, in itye ka bedo kun ikiyo piny? In mono ikiyo piny? In mono itye ka ciko jo mukene bene me timo kit meno ki tam ni man mitte pi oyot?

[Cal ma tye i pot karatac 20]

Winyo lok ma ciko dano, olaro kwo pa dano mapol i kare ma Got madit me Pinatubo ongulo bwuru me volkano

[Cal ma tye i pot karatac 21]

Lukricitayo ma guwinyo lok ma Yecu ociko gularo kwogi i kare ma gijwero Jerucalem i mwaka 70 K.M.