“Pe Gumedo Ki Ngeyo Gin Mo”

BEDO ki par manok i kom lok ma ciko dano kelo peko.

I Darwin, Australia, dano ma gibedo iye onongo gitye ki yub me karama mo i mwaka 1974 i kare ma gimiyogi ngec me bino pa yamo lapiru mo magwar mada. Ento lapiru onongo peya obalo Darwin pi mwaki ma romo 30 kulu. Pingo dok kombeddi? Pol pa jo ma kunnu pe guneno peko meno calo tye ada nyo obibedo gin marac, nio wa i cakke pa yamo mager ma ocako pwutu bati me wi ot-gu ka omuku bene wa ot ka ma dano gukanne iye. Me o wa i odiko-ne mukene, gedo me boma ducu onongo dong oony woko piny.

I dwe me Apar wiye acel me mwaka 1985, i lobo Colombia got ongulo mac. Pee ma omakke ma dwong ulor omolo coto oumo lwak dano ma kato 20,000 kulu ma onongo gibedo i boma me Armero. Onongo mono pe gipoyo wigi con? Got meno onongo obedo ka yenge pi dwe ma pol. Ento, kit ma pol dano me Armero onongo dong gungiyo woko ki kwo inget got me volkano-ni, pe dong guketo tamgi iye. Kipoyo wi luloc pi peko ma cok poto, ento pe gumedo ki cwalo lok me ciko dano. Kicwalo kwena i radio ni peko mo pe. Kitiyo ki lakub dwan me ot lega me cuku cwiny dano ni gubed ma cwinygi opye mot. I otyeno, piny omwoc giryo magwar i kom got. Ka in onongo kono iweko jammi-ni ducu iringo woko? Jo ma nok keken aye gutimo meno ma onongo dong bene pe larre.

Jo ma gitye ki diro i lok kom ngom pol kare gitito ka ma oyeng yeng obitimme iye woko con labongo goba. Ento tyen ma nok keken aye gitwero ngeyo awene ma gin meno poto iye kikome. I mwaka 1999, i kabedo ma orumu lobo ducu, oyeng yeng oneko dano maromo 20,000 kulu. Pol pa jo ma guto-ni gutamo ni gin meno onongo pe bitimme i komgi.

In Mono Itero Lok pa Lubanga me Ciko Dano Nining?

Baibul otito pi jammi ma binyuto kare me agikki kamaleng wacon. Ma lubbe ki meno, Baibul ocuko cwinywa ki “kare pa Nua.” “I kare ca, ma peya pii aluka ocorre,” dano onongo guketo komgi i tic me kwo kit ma jwi, ento onongo mere giparo pi tim bwami ma tye ma polli. Ma dok i kom lok ma Lubanga ocikogi kwede kun tiyo ki Nua, “pe guketo tamgi iye nio ka pii aluka opong, ci omologi woko ducu.” (Matayo 24:37-39, NW) Ka in onongo kono ilubo lok meno? Itye ka timo meno kombeddi?

Ka onongo ibedo dano me Codom ma onongo gitye cok ki Nam me Kado, i kare pa Lot okeyo Abraim ni kono? Kabedo meno onongo tye calo paradic. Boma ne onongo olony mada. Dano onongo gibedo labongo par mo. I kare pa Lot, “onongo gicamo, gimato, giwillo jammi, gicato jammi, gipito ginapita, gigero odi.” Dano ma gubedo i kare meno bene onongo gimaro tim tarwang marac tutwal. Ka in onongo kono iketo cwinyi i kom cik ma Lot obedo ka miyo-ne pi tim maraco meno? I kare ma Lot ocikogi ni Lubanga dong omoko tamme me jwero Codom, ka in onongo kono ibedo ki winy iye? Kece kono itero calo lok oree kit macalo awobe ma onongo gimito nyomo anyira pa Lot gutero kwede? Ka onongo obed in kono icako ngwec ka dok ilokke me neno ngeyi, kit ma dako pa Lot otimo-ni? Kadi bed jo mukene pe gutero cik meno calo gin ma pire tek, i nino ma Lot oa woko ki i Codom, “mac ki gweng calfa ma mac oliyo ocwer ki i polo, otyekogi ducu.”​—Luka 17:28, 29.

Dano mapol i karewa ni gipe ki par mo iye. Ento lanen magi gigwoko-gi i Lok pa Lubanga me cikowa, me cuku cwinywa wek WABED MA WAKIYO PINY!

[Bok/Cal ma tye i pot karatac 22]

Lobo Tika Yam Ada Opong ki Pii Aluka?

Lucer lok mapol giwacci Pe otimme. Ento Baibul waco ni Otimme.

Yecu Kricito kikome bene oloko pire, en onongo dong kwo i kare ma gin man otimme dok i kare ma gin man timme kwede, en oneno ki i polo.

[Bok/Cal ma tye i pot karatac 23]

Jwero Codom ki Gomora Mono Otimme Ada?

Jammi ma gigolo ki piny omiyo caden i kom lok man.

Lok me tekwaro atani bene oloko i iye.

Yecu Kricito omoko lok meno, dok giloko i kom gin man ma otimme-ni i buke 14 mapat pat me Baibul.