Ахыԥхьаӡарақәа

33 Абар Моисеии Ааро́ни зхагылаз, гәыԥ-гәыԥла* Египет иалҵыз израильтәи ажәлар ахьаангылоз аҭыԥқәа. 2 Иегова ишиҳәаз еиԥш, Моисеи израильаа ахьаангылоз аҭыԥқәа аниҵон. Абар урҭ знысыз амҩеи иахьаангылоз аҭыԥқәеи. 3 Дара актәи амза жәохәтәи амш аҽны Раамсе́с аҟынтә амҩа иқәлеит. Мшаԥныҳәа адырҩаҽны израильаа египтаа ишырбоз, шәарак аамырԥшӡакәа, аиааира згаз реиԥш Египет иалҵит. 4 Уи аамҭазы египтаа Иегова иишьыз, раԥхьа ииз рԥацәа анышә иарҭон — Иегова урҭ рынцәахәқәа данрықәыӡбоз иишьыз, раԥхьа ииз рԥацәа.

5 Израильаа Раамсе́с иқәҵын, Сукко́тҟа идәықәлеит. Уа рлагер дыргылеит. 6 Анаҩс Сукко́т иқәҵын, рлагер ацәҳәыра аҿықәан ишьҭаз Ефа́м идыргылеит. 7 Нас Ефа́м иқәҵын, Ваа́л-Цефо́н иаҵанакуаз аҭыԥаҿы ишьҭаз Пи-Хахиро́тҟа рхы дырхеит, рлагергьы Мигдо́л аҿаԥхьа идыргылеит. 8 Уи ашьҭахь Пи-Хахиро́т иқәҵын, амшын иҭысны ацәҳәырахь инеит. Хымш дара ефамтәи ацәҳәыра иқәын, нас Ма́ра инеин, уа рлагер дыргылеит.

9 Анаҩс Ма́ра аҟынтә идәықәлан, Ели́м инеит. Ели́м 12 ӡыхьи 70 пальмеи ыҟан, убри аҟынтә уа рлагер дыргылеит. 10 Нас Елим иқәҵын, рлагер Амшын ҟаԥшь азааигәара идыргылеит. 11 Уи ашьҭахь Амшын ҟаԥшь аҟынтә иқәҵын, рлагер Син ацәҳәыраҿы идыргылеит. 12 Анаҩс Син ацәҳәыра аҟынтә идәықәлан, До́фка инеит. Уа рлагер дыргылеит. 13 Ԥыҭрак ашьҭахь До́фка иқәҵын, рлагер Алу́ш идыргылеит. 14 Нас Алу́ш иқәҵын, рлагер Рефиди́м идыргылеит. Уа ауаа иржәуаз аӡы рымаӡамызт. 15 Уи ашьҭахь Рефиди́м иқәҵын, рлагер синаитәи ацәҳәыраҿы идыргылеит.

16 Дара синаитәи ацәҳәыра аҟынтә идәықәлан, Кибро́т-Хаттаа́ва инеит. Уа рлагер дыргылеит. 17 Анаҩс Кибро́т-Хаттаа́ва аҟынтә иқәҵын, рлагер Хацеро́т идыргылеит. 18 Уи ашьҭахь Хацеро́т иқәҵын, рлагер Ри́тма идыргылеит. 19 Нас Ри́тма иқәҵын, рлагер Риммо́н-Фаре́ц идыргылеит. 20 Анаҩс Риммо́н-Фаре́ц иқәҵын, рлагер Ли́вна идыргылеит. 21 Уи ашьҭахь Ли́вна иқәҵын, рлагер Ри́сса идыргылеит. 22 Нас Ри́сса иқәҵын, рлагер Кегела́та идыргылеит. 23 Анаҩс Кегела́та иқәҵын, ашьха Шафе́р инеит. Уа рлагер дыргылеит.

24 Уи ашьҭахь ашьха Шафе́р аҟынтә амҩа иқәлан, рлагер Хара́да идыргылеит. 25 Анаҩс Хара́да иқәҵын, рлагер Макело́т идыргылеит. 26 Нас Макело́т иқәҵын, рлагер Таха́т идыргылеит. 27 Уи ашьҭахь Таха́т иқәҵын, рлагер Тара́х идыргылеит. 28 Анаҩс Тара́х иқәҵын, рлагер Ми́тка идыргылеит. 29 Ԥыҭрак ашьҭахь Ми́тка иқәҵын, рлагер Хашмо́на идыргылеит. 30 Нас Хашмо́на иқәҵын, рлагер Мосеро́т идыргылеит. 31 Анаҩс Мосеро́т иқәҵын, рлагер Бе́не-Иака́н идыргылеит. 32 Уи ашьҭахь Бе́не-Иака́н иқәҵын, рлагер Хор-Хагидга́д идыргылеит. 33 Нас Хор-Хагидга́д иқәҵын, рлагер Иотва́та идыргылеит. 34 Ԥыҭрак ашьҭахь Иотва́та иқәҵын, рлагер Авро́н идыргылеит. 35 Анаҩс Авро́н иқәҵын, рлагер Ецио́н-Геве́р идыргылеит. 36 Уи ашьҭахь Ецио́н-Геве́р иқәҵын, рлагер Цин ацәҳәыраҿы ишьҭаз Каде́ш идыргылеит.

37 Ԥыҭрак ашьҭахь Каде́ш иқәҵын, рлагер Едо́м аҳәааҿы, ашьха Ор азааигәара идыргылеит. 38 Аԥшьаҩы Ааро́н, Иегова ишиҳәаз еиԥш, ашьха Ор дхалан, уа дыԥсит. Уи ҟалеит израильаа Египет ианалҵ ашьҭахь 40-тәи ашықәс азы, ахәбатәи амза актәи амш аҽны. 39 Ааро́н ашьха Ор аҿы данԥсуаз 123 шықәса ихыҵуан.

40 Уи аамҭазы Ара́д аҳ израильаа шааз иаҳаит. Иара дханане́ин, ханаантәи адгьыл аҿы ишьҭаз Неге́в дынхон.

41 Ԥыҭрак ашьҭахь дара ашьха Ор аҟынтә идәықәлан, рлагер Цалмо́на идыргылеит. 42 Уи ашьҭахь Цалмо́на иқәҵын, рлагер Пуно́н идыргылеит. 43 Нас Пуно́н иқәҵын, рлагер Ово́т идыргылеит. 44 Анаҩс Ово́т иқәҵын, рлагер Моа́в аҳәааҿы, И́е-Авари́м идыргылеит. 45 Ԥыҭрак ашьҭахь Ии́м иқәҵын, рлагер Диво́н-Гад идыргылеит. 46 Уи ашьҭахь Диво́н-Гад иқәҵын, рлагер Алмо́н-Дивлатаи́м идыргылеит. 47 Анаҩс Алмо́н-Дивлатаи́м иқәҵын, рлагер аваримтәи ашьхақәа рҿы, Не́во аҿаԥхьа идыргылеит. 48 Аҵыхәтәаны аваримтәи ашьхақәа рҟынтә идәықәлан, рлагер Моа́в акаршәрақәа рҿы, Иордан азааигәара, Иерихо́н аҿаԥхьа идыргылеит. 49 Дара рлагер Моа́в акаршәрақәа рҿы Иордан иаваршәны идыргылеит, Бет-Иешимо́т инаркны Аве́л-Шитти́м аҟынӡа.

50 Моа́в акаршәрақәа рҿы, Иордан азааигәара, Иерихо́н аҿаԥхьа Иегова Моисеи ус иеиҳәеит: 51 «Израильаа абас сызраҳә: „Шәара Иордан шәырны ханаантәи адгьыл ахь шәцоит. 52 Уа инхо зегьы наҟ иқәышәца. Уи адгьыл аҿы иҟоу ахаҳәтә баҟақәеи аихатә баҟақәеи наҟ иқәыжәга, рыԥшьаҭыԥқәа зегьы ԥыххааса иқәышәҵа. 53 Шәара уи адгьыл жәгоит, уаҟагьы шәынхалоит, избанзар сара уи шәара ишәысҭоит. 54 Аҭаацәарақәа зегьы адгьыл аҵәы ҭаԥсаны ирзышәша. Аҭаацәара ду еиҳаны адгьыл рышәҭ, аҭаацәара маҷ — еиҵаны. Аҵәы анҭарыԥсо дасу иқәшәо адгьыл аҿы дынхалоит. Шәара шәабиԥарақәа ирзалху адгьыл аҿы шәынхалоит.

55 Аха уи адгьыл аҿы инхо ықәшәымцар, иааншәыжьыз ауаа шәыла иалоу амаӷ еиԥш ишәзыҟалоит, шәывара иалоу ақәыц ишәзаҩызахоит. Дара ҭаха шәырҭаӡом, уи адгьыл аҿы ҭынч шәындырхом. 56 Усҟан дара ирзызурц исҭахыз шәара ишәзызуеит“».