Ахыԥхьаӡарақәа

12 Мариа́ми Ааро́ни Моисеи иқәыӡбо, иакәым изырҳәо иалагеит, Куш инхоз ԥҳәысс дахьигаз азы. 2 Дара ус рҳәон: «Моисеи ила заҵәык аума Иегова дышцәажәо? Ҳара ҳалагьы дымцәажәаӡои?» Иегова уи зегь иаҳауан. 3 Моисеи адгьыл иқәынхоз зегь раасҭа иҟәымшәышәыз* уаҩын.

4 Иегова иаалырҟьаны Моисеии, Ааро́ни, Мариа́ми ус реиҳәеит: «Шәыхҩык аиқәшәара ақьалахь шәца». Даргьы уахь ицеит. 5 Иегова аԥҭа шьаҟа далаланы дылбаан, ақьала аҩналарҭаҿы дгылеит, нас Ааро́ни Мариа́ми дрыԥхьеит. Даргьы уахь инаскьеит. 6 Иара ус реиҳәеит: «Шәысзыӡырҩы. Шәыбжьара Иегова иԥааимбар дыҟазҭгьы, сара уи абарақәа рҿы сизцәырҵлон, ԥхыӡлагьы сиацәажәалон. 7 Аха смаҵзуҩы Моисеи даҽакала сизыҟоуп. Сыҩны зегьы иара инапы иануп*. 8 Сара уи лабҿаба сиацәажәоит, маанала акәымкәа, иаартны сиацәажәоит. Сара, Иегова, уи иҿаԥхьа сцәырҵуеит. Шәышԥацәымшәеи, нас, смаҵзуҩы Моисеи иҟоу зегь изҳәара?»

9 Иегова урҭ игәы рзыԥжәан, наҟ дцеит. 10 Аԥҭа ақьала ишаадҵыз еиԥш, Мариа́м ацәеилабаара лыхьит, асеиԥш дышкәакәаӡагьы дҟалеит. Ааро́н Мариа́м лахь дхьаҳәны данԥшы, ацәеилаабара шлыхьыз ибеит. 11 Иара иаразнак Моисеи абас диҳәо далагеит: «Суҳәоит, ухаҵкы, ари агәнаҳазы ахара ҳадумҵан. Ҳара агаӡара ҟаҳҵеит. 12 Суҳәоит, зан лымгәарҭаҿы иԥсхьоу, зыбжакгьы баахьоу асаби диеиԥшны даанхар умун!» 13 Усҟан Моисеи дӷьаҵәыӷьаҵәуа Иегова иҳәара далагеит: «Суҳәоит, Сынцәа, дхәышәтәы! Суҳәоит!»

14 Иегова Моисеи ус иеиҳәит: «Лаб дылҿажьцәазҭгьы, бжьымш ахьымӡӷ дшаҵоу даанымхаӡози? Алагер далҵааит, бжьымшгьы уахь дыҟазааит, нас дхынҳәыр лылшоит». 15 Мариа́м бжьымш алагер анҭыҵ дыҟан, дхынҳәаанӡагьы ажәлар амҩа иқәымлаӡеит. 16 Уи ашьҭахь израильаа Хацеро́тынтәи иқәҵны ицеит. Дара рлагер Пара́н ацәҳәыраҿы идыргылеит.