Ажәамаанақәа
6 Сыҷкәын, аӡә иуал ашәара ухахьы иугазар,
Атәымуаҩ инапы имухызар,
2 Изықәургәыӷыз иахҟьаны ашьацҳәа уаҿашәазар,
Иуҳәаз ажәа ацәҟьа еиԥш уакызар,
3 Аӡәы уитәитәит ауп.
Абар иҟоуҵаша, сыҷкәын, ухы уақәиҭхарц азы:
Аамҭа мгакәа ирласны иара иахь уцаны, уӷьаҵәыӷьаҵәуа урыцҳаишьарц уиҳәа.
4 Уцәар умун,
Улацәақәа хумҩан.
5 Ашьабысҭа ашәарыцаҩ ианицәыбнало еиԥш ухы еиқәырха,
Аԥсаатәкҩы аҵыс шицәцо еиԥш уԥсы га.
6 Ашышкамс ахь уца, аашьаҩ,
Иҟанаҵо гәаҭ, нас уҟәышха.
7 Уи аиҳабы дамам, ахада дамам, анапхгаҩы дамам,
8 Аха аԥхын афатә еизнагоит,
Ҭагалара аан аҭаҵәах ҟанаҵоит.
9 Шаҟа аамҭа ушьҭазаалои, аашьаҩ?
Ацәа уалҵны уанбагыло?
10 Хәыҷык уцәап, хәыҷык улацәа ааихьушьып,
Хәыҷык унапқәа еиқәыԥсаны унатәап —
11 Нас ақәылаҩ иеиԥш аӷарра ухҭыгәлоит,
Бџьарла еибыҭоу арҳәҩы иеиԥш амамзаара узнеиуеит.
12 Акгьы иаԥсам ауаҩы цәгьа дааҟәымҵӡакәа амц иҳәоит,
13 Длацәҟәысуеит, ишьапы шьҭишьуеит, инацәкьарақәа рыла адырга уирбоит.
14 Иара игәаҭа цқьаӡам,
Дааҟәымҵӡакәа ацәгьара ихәыцуеит, аҵәы иршуеит.
15 Убри аҟынтә иаалырҟьаны арыцҳара дақәшәоит,
Еимгеимцарак аҩныҵҟа дықәгахоит — еиқәхашьагьы иоуӡом.
16 Абарҭ фба Иегова ицәымӷуп,
Ааи, быжьбагьы игәы дырхынҳәуеит:
17 Аԥагьара, амцҳәара, акгьы зхарам ршьа акаҭәара,
18 Ацәгьахәыцра, уҩуа ацәгьа ашьҭалара,
19 Иашак аауҿымшәо, амц ҳәо ашаҳаҭра,
Аишьцәа рыбжьара аҵәыршра.
20 Сыҷкәын, уаб иԥҟара уқәныҟәала,
Уан лылабжьарақәагьы* мап рцәумклан.
21 Наунагӡа угәы иакәыршаны иумаз,
Ухәда иахаҵа.
22 Урҭ амҩа уанықәу, уахьцо удырбалоит,
Уанышьҭало урыхьчалоит,
Уанааԥшуа умҩақәырҵалоит.
23 Избанзар аԥҟара — лашарбагоуп,
Азакәан — лашароуп,
Узыриашо амҩақәҵара — аԥсҭазаара узҭо мҩоуп.
24 Урҭ аԥҳәыс хәымга лҟынтә урыхьчоит,
Иламысдоу аԥҳәыс* лажәа хаақәа ухырымхырц иуцхраауеит.
25 Лыԥшӡара уазымгәышьын,
Лылақәа ухырхыр умун,
26 Избанзар акаҳԥы лымшала аӷәыцәҳәы уқәтәоит*,
Аӡә иԥҳәыс лымшала уԥсҭазаара уцәыӡуеит.
27 Амца укәа иҭоуҵар, умаҭәа мблыкәа иаанхома?
28 Акәицқәа урықәгылар, ушьапқәа мблыкәа изаанхома?
29 Убас ихьуеит аӡә иԥҳәыс лҿы зхы назго,
Уи илылакьысуа иқәнага дақәдмыршәакәа дзаанхаӡом,
30 Ауаа аӷьыч дырцәымӷӡам,
Амла дахьакуа азы дӷьычуазар.
31 Аха данырклак, бжьынтә еиҳаны ирхынҳәуеит,
Иҩны иҩноу зыхә ҳараку зегь риҭоит.
32 Аӡә иԥҳәыс илыцышьҭало ахшыҩ имаӡам*.
Ус ҟазҵо ихы ҭаирхоит.
33 Иара агәаҟрақәеи аԥхашьареи роуп изыԥшу,
Ииго ахьымӡӷ ахаан изхыхӡом.
34 Избанзар ахыбаара ахаҵа иԥсахы еибанаркуеит,
Ишьа аниуло рыцҳашьарак ааирԥшӡом.
35 Аԥара* идугаларгьы, идикылаӡом,
Аҳамҭа егьа ахә ҳаракызаргьы, иҽеиқәикӡом.