Imibiko Evelele Yonyaka Odlule
USUPHELILE omunye unyaka obusisekile enkonzweni engcwele, futhi sinezizathu ezizwakalayo zokujabula. Lapho sibukeza eminye yemibiko evelele yomsebenzi omkhulu kakhulu uNkulunkulu wethu awenzayo esebenzisa izinceku zakhe, singasho ngokungananazi: “Uthwesé unyaka ubuhle bakho njengomqhele”!—IHu. 65:11.
“IZINDABA EZINHLE” KUYI-INTERNET
NjengoFakazi BakaJehova, siwuthatha ngokungathí sina umthwalo wethu wemfanelo ‘wokushumayela lezi zindaba ezinhle zombuso emhlabeni wonke owakhiwe ngenjongo yobufakazi ezizweni zonke’ ngaphambi kokuba ukuphela kufike. (Math. 24:14) Njengoba iminyaka ihamba, intuthuko kwezobuchwepheshe iye yasiza ekusheshiseni ukusakazwa ‘kwezwi lombuso.’ (Math. 13:18-23) Sekuyiminyaka engu-11 sisebenzisa ingosi ye-Internet esemthethweni ethi, www.watchtower.org, ukuze umphakathi ukwazi ukuthola ukudla okungokomoya kuyi-Internet. Abavula le ngosi bangafunda iqiniso leBhayibheli ngezilimi ezingu-314 ezitholakala kuyo, futhi bangafunda izihloko ezinjengezithi “Beliefs and Activities [Izinkolelo Nemisebenzi Yabo],” “Current Topics [Izihloko Zamuva],” “God and Your Future [UNkulunkulu Nekusasa Lakho],” “Medical Care and Blood [Ezokwelapha Negazi]” nesithi “Publications Available [Izincwadi Ezitholakalayo].”
Abantu abaningi bavula le ngosi ukuze bafunde iBhayibheli. Usuku ngalunye bangaphezu kuka-6 300 abafunda INguqulo Yezwe Elisha YemiBhalo Engcwele kuyi-Internet ngezilimi eziyishumi etholakala ngazo. Izincwadi zeBhayibheli ezithandwa kakhulu kule ngosi amaHubo, izAga nokulandisa kwamaVangeli ngokuphila kukaJesu.
Isonto ngalinye kunezelwa izihloko ezikhethiwe ze-Nqabayokulinda noma ze-Phaphama! ngezilimi ezingu-12—ikakhulu izihloko ezibhalelwe umphakathi. Abaningi bafisa ukwazi ukuthi yini esiyikholelwayo, ukuthi imihlangano yethu iqhutshwa kanjani nokuthi umsebenzi wethu wokushumayela usekelwa kanjani ngokwezimali. Abavula le ngosi bathola izimpendulo zale mibuzo encwajaneni ethi OFakazi BakaJehova—Bangobani? Yini Abayikholelwayo? Ipheshana elithi Ukuphela Kwenkolo Yamanga Kuseduze! liyatholakala kule ngosi ngezilimi ezingu-252, kuhlanganise nezingxenye ze-video ngezilimi zezandla ezinhlanu.
UKUTHOLA IQINISO KUYI-INTERNET
Uye waba yini umphumela wokuba nalezi zincwadi kuyi-Internet? Nsuku zonke kunabantu abalinganiselwa kwabangaphezu kuka-60 000 abayivakashelayo le ngosi! Abantu abaningi bahlala ezindaweni lapho kunoFakazi abambalwa kakhulu noma emazweni lapho umsebenzi wethu uvinjelwe noma ubekelwe khona imingcele. Nokho, abomele iqiniso bangathola amanzi eqiniso aqeda ukoma akule ngosi yethu.
UBryon uthi: “Bengilokhu ngikuthanda ukwazi iBhayibheli, kodwa njalo lapho ngiye esontweni nabangane bami ngithole ukuthi kuyaculwa nje kuphela noma kudlalwa imidlalo.” UBryon waphishekela imfundo nemidlalo. Wafunda izilimi ezinhlanu, wathola umfundaze wokuya ekolishi, kodwa wayelokhu elambile ngokomoya. Ngakho, wathandazela ukuthola iqiniso.
UBryon uyalandisa: “Ngangilangazelela ukuthola izimpendulo. Nganquma ukufuna oFakazi BakaJehova kuyi-Internet ngoba abanye babangane bami abangoFakazi esikoleni babengitshele ukuthi igama likaNkulunkulu nguJehova. Ngavula ingosi yabo futhi ngaqala ukufunda incwajana ethi Yini UNkulunkulu Ayifunayo Kithi? Ekugcineni, ngazithola izimpendulo zemibuzo yami.” UBryon wacela isifundo seBhayibheli, wathuthuka ngokushesha futhi ngo-2004 wanikezela ukuphila kwakhe kuJehova. Manje ukhonza njengephayona elivamile futhi unesifiso sokuba isithunywa sevangeli esiqeqeshwe ngeBhayibheli, asebenzise izilimi azaziyo.
“UNKULUNKULU UNANI”
Yeka ukuthi kujabulisa kangakanani ukwazi ukuthi izinkulungwane zabantu bazo “zonke izilimi zezizwe” bavakashela ingosi ethi www.watchtower.org nsuku zonke! Abangaba ngu-94 ngosuku bagcwalisa ifomu elithi Ungakujabulela Ukuvakashelwa? elikuyi-Internet.—Zak 8:23.
UDenise ungomunye wabantu ababenemibuzo ngezinkolelo zoFakazi BakaJehova, kodwa wayemadolonzima ukuya eHholo LoMbuso lendawo. Wanquma ukucwaninga kuyi-Internet futhi wathola ingosi ethi www.watchtower.org. Ukwaziswa akuthola kuyo kwamkholisa ukuthi wayethole iqiniso, kodwa wayenqikaza ukucela isifundo seBhayibheli ngoba wayazi ukuthi kwakuyodingeka enze izinguquko ekuphileni kwakhe ukuze kuvumelane nezindinganiso zeBhayibheli. Waligcwalisa kane ifomu elithi Ungathanda Ukuvakashelwa? elitholakala kuyo le ngosi, kodwa isikhathi ngasinye wayesaba ukuchofoza inkinobho yokulithumela.
Ngo-March 2007, uDenise waligcwalisa okwesihlanu leli fomu futhi kulokhu walithumela. Isicelo sakhe sathunyelwa ebandleni lendawo futhi abadala bacela udade ogama lakhe linguVonnie ukuba avakashele uDenise. Waqala ukuya emihlanganweni eHholo LoMbuso ngesonto lokuqala evakashelwe uVonnie.
Ngasekupheleni kwehlobo lasenyakatho yenkabazwe, uDenise wayeseyishise yonke impahla yakhe yesonto, wasula esontweni futhi wafanelekela ukuba ummemezeli ongabhapathiziwe. Yena namadodana akhe amabili bathuthuka ngokushesha, futhi indodana yakhe eneminyaka engu-8 yabhalisa eSikoleni Senkonzo Esingokwasezulwini. Ngo-January 2008, uDenise wabhapathizwa, futhi ngemva kwezinyanga ezimbili—sekuphele unyaka owodwa agcwalisa ifomu kuyi-Internet—wafaneleka ukukhonza njengephayona elisizayo. UDenise uthi: “Ukube yayingekho le ngosi bengingeke ngixoxe le ndaba engiyixoxa namuhla.”
Ngo-January 2008, kwanezelwa okuthile okusha engosini yethu ethi www.jw.org—ama-CD alalelwayo ezincwadi ezithile umuntu angase azikopishele wona ngezilimi ezingu-17. Baningi abantu ababonise isithakazelo esikhulu kuleli lungiselelo, futhi inyanga nenyanga kukopishwa izigidi zezincwadi nezihloko ezihlukahlukene! Abamemezeli abaningi balalela izihloko zomagazini lapho beya emsebenzini noma esikoleni.
UKUHUMUSHA OKUFEZA UMSEBENZI OMUHLE
Yeka indlela okujabulisa ngayo ukusekelwa izingelosi njengoba sinxusa abantu ‘bazo zonke izizwe nezinhlanga nezilimi’ ukuba bakhazimulise uNkulunkulu! (IsAm. 14:6, 7) Ukuze basize abantu ukuba bezwe isigijimi seBhayibheli ngolimi abaluqonda kahle, manje oFakazi BakaJehova banyathelisa izincwadi ngezilimi ezingaba ngu-450.
Muva nje kuye kwakhululwa incwadi ethi Lifundisani Ngempela IBhayibheli? ngesiTetum, ulimi olukhulunywa e-East Timor, kodwa kwanyatheliswa amakhophi anganele. UMaria, owayesanda kuqala ukufundelwa wayesebenzisa incwadi ethi Okufundiswa IBhayibheli yesi-Indonesia ngoba akayitholanga eyesiTetum. Wacela umuntu owayemfundela ukuba amboleke incwadi yesiTetum izinsuku ezimbili. Ezinsukwini ezalandela, wayengawuvali umlomo ngezinto ayezifundile. Ngenxa yokuthi wayesefunda ngolimi aluncela, wawaqonda ngokucace kakhudlwana amaqiniso amaningi ayewafunde esifundweni sakhe esebenzisa incwadi yesi-Indonesia. Umuntu omfundelayo waba namahloni okumcela ukuba ayibuyise incwadi yesiTetum. UMaria uyaqhubeka efunda futhi uba khona emihlanganweni.
EKenya, izilimi ezisetshenziswa kakhulu kuhulumeni nakwezamabhizinisi yisiNgisi nesiSwahili. Nokho, izigidi zabantu baseKenya zikhululeka kakhudlwana uma zikhuluma isiKikuyu, isiKikamba, isiLuo nezinye izilimi zendawo. Ngakho, ukunyathelisa izincwadi ngalezi zilimi ezikhulunywa endaweni kuye kwenza abantu baba nesithakazelo sokukhulekela uJehova. Ngemva kokuba iBandla LaseSiaya liqale ukusebenzisa izincwadi zesiLuo nokuqhuba imihlangano ngalolu limi, abadala babhala: “Abafowethu sebekuqonda kangcono okufundiswayo. Izingane sezilalela ngokwengeziwe. Selokhu saqala ukunikeza izinkulumo sisebenzisa izinhlaka ezibhalwe ngesiLuo, inani lababa khona emihlanganweni liye landa ngamaphesenti angu-60.”
ENicaragua, kunabantu abaningi abakhuluma isiMiskito esikhundleni seSpanishi, futhi bangaphezu kuka-200 ababa khona emhlanganweni wesigodi wesiMiskito. Abanye benza imizamo emikhulu ukuze babe khona. Ngokwesibonelo, abazalwane abangu-13 basedolobheni elincane lase-Asang, elingaseMfuleni iCoco, bakha isihlenga ngezingodo, bahamba ngaso izinsuku ezimbili baya edolobheni laseWaspam elisezansi nomfula, base behamba ngeloli amahora amahlanu sebeya edolobheni lomhlangano. Abaningi ababekuleli qembu babeqala ukuya emhlanganweni wesigodi. Bakujabulela ukulalela isimiso ngolimi lwabo. Njengoba babesebenzise yonke imali yabo ukuze bafike edolobheni lomhlangano, ezinye izihambeli zomhlangano zanikela ukuze laba bazalwane bakwazi ukuba nemali yokubuyela emuva.
Izilaleli ezikhuluma isiMiskito ezazikulowo mhlangano zajabula lapho kukhululwa incwadi ethi Lifundisani Ngempela IBhayibheli? ngolimi lwazo. Amaphayona ayijabulela ngokukhethekile le ncwadi ngoba phela ayesebenziza izincwadi zeSpanishi lapho eqhuba izifundo zeBhayibheli bese ehumushela izigaba nemibuzo olimini lwesiMiskito. Manje aseyakwazi ukugxila ekufundiseni amaqiniso eBhayibheli kunokucabanga ngokuhumusha.
IsiQuechua ulimi lwamaNdiya omdabu olukhulunywa eNingizimu Melika. Abamemezeli abathile basePeru abakhuluma isiQuechua babhala: “Lapho siphetha intshumayelo yethu, siye sitshele umninikhaya ukuthi sinezincwadi zesiQuechua. Abanye baye bathinteka kakhulu lapho bethola izincwadi zolimi lwabo baze bakhala futhi baziqabula izincwadi zabo.” Ihhovisi legatsha lasePeru labhala: “Abanye abazalwane abahlala lapho kukhulunywa khona isiQuechua baye benza lukhulu ukuze babonise ukwazisa kwabo. Ngemva kokufunda ethi Lifundisani Ngempela IBhayibheli? ngesiQuechua, omunye umzalwane wathi ekugcineni useyakuqonda lokho okushiwo isihlengo sikaKristu nokubaluleka kwaso. Abafundi baye bathumela egatsheni amazambane, ophaya, izithelo nezinye izinto ukuze babonise ukwazisa kwabo.”
Inhlangano yenza nomzamo omkhulu wokuhumusha izincwadi ngezilimi ezikhulunywa eziqhingini ezicezile zasePacific. Omunye udade ohlala esiqhingini sasePohnpei esiseMicronesia watshela isithunywa sevangeli: “Ngiyambonga uJehova ngokuthi uye wasikhumbula. Ngaphambili, sasithola INqabayokulinda yesiPonapea ngemva kwezinyanga eziningi kuphume eyesiNgisi.” Wabe esencokola: “Sasicabanga nokuthi mhlawumbe ne-Armagedoni iyophuza ukufika kithi. Kodwa manje sifunda INqabayokulinda ngesikhathi esifanayo nomhlaba wonke, futhi umagazini wethu muhle njengowesiNgisi. Asive siyibonga iNdikimba Ebusayo ngokusinakekela.”
Abazalwane nodade eMarshall Islands esenyakatho yePacific bajabula kakhulu lapho kuphuma uhlelo olusha lwe-Nqabayokulinda yomphakathi ngolimi lwabo. Laba bazalwane bayakuthanda ukufunda izindaba zokuphila kodwa ngaphambili sasingekho isikhala salezi zihloko, ngakho babecela othile ukuba azihumushe ezisusela kumagazini wesiNgisi. Yingakho bajabula kakhulu lapho beqala ukubona indaba yokuphila kumagazini womphakathi wolimi lwabo. Omunye umfundi oneminyaka engu-16 ubudala wathi: “Sekuyiminyaka ngithanda ukuphenya umagazini wesiNgisi ngibuke nezithombe ezisezindabeni zokuphila bese ngifisa sengathi ngingazifunda lezo zihloko. Manje sengiyakwazi ukuzifunda.”
Ngisho nokuba nencwadi eyodwa yolimi owaluncela kungakushintsha ukuphila kwakho. Kwelinye izwe elise-Asia Ephakathi, lapho umsebenzi wethu ubekelwe khona imingcele, kwasakazwa kakhulu incwajana ethi Yini UNkulunkulu Ayifunayo Kithi? Insizwa ethile yayithola le ncwajana, yayifunda futhi yathinteka kakhulu kangangokuthi yaya emfuleni obudebuduze yafike “yazibhapathiza.” Lapho izwa ukuthi kudingeka iqhutshelwe isifundo seBhayibheli, yavumela phezulu futhi ngokushesha yabhapathizwa ngendlela efanele. Manje ichitha isikhathi sayo esiningi ihlanganyela izindaba ezinhle nabanye.
INTUTHUKO EKUHUNYUSHWENI KWEBHAYIBHELI
OFakazi BakaJehova bayalazisa iZwi likaNkulunkulu, iBhayibheli, futhi bayazisa kakhulu inguqulo enembile nefundeka kalula. Ngenxa yaleso sizathu, abantu bakaNkulunkulu bayajabula namuhla ngokuba ne-Nguqulo Yezwe Elisha, ephelele noma eyingxenye, ngezilimi ezingaphezu kuka-70. Nakuba sivukwa amadlingozi lapho siqeda ukuyithola, ukuyisebenzisa nsuku zonke lapho senza isifundo somuntu siqu, emihlanganweni yebandla nasenkonzweni yasensimini yikhona okuthinta izinhliziyo zabantu futhi kulolonge ukucabanga kwabo.
Ihhovisi legatsha laseRussia belilokhu lithola izincwadi eziningi ezibonga INguqulo Yezwe Elisha ephelele ngesiRussia. Owesifazane othile wabhala: “Nakuba sengilifunde kaningi iBhayibheli, lapho ngifunda le nguqulo kuba sengathi ngiyaqala ngqá ukufunda iBhayibheli! Ngezinye izikhathi ngicweba izinyembezi futhi ngibe nohlevane njengoba isigijimi seBhayibheli singithinta inhliziyo.”
Indlela le nguqulo ecace ngayo yashukumisela omunye umfundi ukuba athi: “Ngemva kokufunda uGenesise isahluko 18 namuhla, ngiye ngashukumiseleka ukuba nginibhalele. Ingxoxo ka-Abrahama noJehova, esemavesini 23-32, ingithinte ngokujulile. Nakuba sekungokwesihlanu ngifunda iBhayibheli, bengiqala ngqá ukucabanga ngijule kangaka ngale ngxoxo yabo. Ngiye ngamzwela u-Abrahama futhi “ngalalelisisa” njengoba bekhuluma. Ukulalela kukaJehova u-Abrahama kungilethele izinyembezi. Le nguqulo iyenze yaphila le ndaba. Angigcinanga nje ngokuphawula izimfanelo zikaJehova, kodwa futhi ziye zangithinta.”
USvetlana waseMoscow wabhala: “Siyabonga nge-Nguqulo Yezwe Elisha ephelele! Manje asisasali sididekile uma sifunda ‘iThestamente Elidala’ ngoba inguqulo ebesinayo ibingeyakudala futhi ingaqondakali! Leli alive lilula!”
Omunye umfundi wabhala: “Emsebenzini ngaxoxa nesisebenzi sami, u-Irina, ngeqiniso. Ngaqale ngayikhulumela kuphela imiBhalo. Kodwa lapho ngivula iBhayibheli ukuze ngimbonise umthandazo kaJesu oyisibonelo, wabuza, ‘Ingabe yiwo lo mthandazo obizwa ngokuthi uBaba Wethu Osezulwini?’ Ngemva kokufunda amazwi kaJesu, amehlo akhe agcwala injabulo, wathi: ‘Waze wamnandi bo! Ubekwe ngendlela elula! Bengike ngiwuzwe lo mthandazo kodwa bengingawuqondi neze. Kuleli Bhayibheli ucacile futhi ulula! Ngiyalifuna nami. Ngicela ungitholele lona!’ Ngamphendula, ‘AmaBhayibheli siwanikeza kuphela abantu abanesifiso sangempela sokuwafunda.’ Waphendula ngobuqotho: ‘Angikaze ngibe nesifiso sokufunda iBhayibheli ngaphambili. Nakuba ngike ngaba nawo amaBhayibheli amaningana, ngaphisana ngawo, kodwa manje sengifuna ngempela ukulifunda!’”
Umzalwane othile wabhala lokhu nge-Nguqulo Yezwe Elisha YemiBhalo YamaKristu YesiGreki yesi-Ukraine: “Ngifisa ukubonga ngalesi sipho esihle kangaka esivela kuJehova nasenhlanganweni yakhe. Kuyangijabulisa ukufunda ikhasi ngalinye, futhi leli Bhayibheli ngiliphatha nomaphi lapho ngiya khona. Ulimi olusetshenziswe kulo lulula futhi luyaqondakala. Amazwi alo afinyelela inhliziyo futhi enza kube lula ukuba ngiqonde izimfundiso zeBhayibheli ezijulile.”
Inguqulo yesiSerbia neyesiCroatia nazo ziye zajatshulelwa kakhulu. Udade waseCroatia wabhala: “Leli Bhayibheli lifundeka kalula kakhulu futhi liqondakala kangcono kakhulu kunaleli osekuyiminyaka silisebenzisa. Iseluleko esisemiBhalweni siyithinta kalula inhliziyo yami futhi ngiya ngimazi kangcono uJehova kunanini ngaphambili.”
Ngo-November 2, 2007, uMfoweth’ uGeoffrey Jackson weNdikimba Ebusayo wakhulula INguqulo Yezwe Elisha YemiBhalo YamaKristu YesiGreki yesiSamoa. AmaBhayibheli avamile esiSamoa awatholatholakali futhi ayabiza, ngakho abazalwane bajabule kakhulu ngokuthi sekulula manje ukuthola amaBhayibheli. Ngemva kokuyisebenzisa izinyangana ezithile le nguqulo, omunye ummemezeli wathi, “Kubonakala sengathi iBhayibheli elidala liyawagqiba amaphuzu, kanti leli elisha liyawembula, liwenze acace ngokwengeziwe.”
Omunye udade ulandisa ngokwenzeka lapho eqhuba isifundo seBhayibheli, futhi isahluko ababesifunda sasinomBhalo kaJakobe 4:8. Uthi: “Ngasikisela kumninikhaya ukuba siwufunde lo mBhalo kuyi-Nguqulo Yezwe Elisha nakuba siwazi. Saqale sacabanga ukuthi sivule umBhalo okungewona kodwa kwathi lapho sibheka sathola ukuthi cha yiwona kanye. Udade engangihamba naye wamangala, wathi, ‘Hhayi bo, selishintshile leli vesi!’ Sakuqonda kahle ukuthi ‘ukusondela kuJehova’ kusho ukuthi kufanele sibe nobuhlobo obufudumele noJehova, okuyiphuzu elalingaveli eBhayibhelini elivamile. Lokhu kwazithinta ngempela izinhliziyo zethu, kwasenza safuna ukusondelana noJehova ngokwengeziwe.”
Ngemva kwesikhathi esithile kukhululwe INguqulo Yezwe Elisha ngesiShayina, izithunywa zevangeli ezikhonza eTaiwan zabhala: “Sakwazi ukulihambisela ummeli obafunda njalo omagazini bethu iBhayibheli le-Nguqulo Yezwe Elisha. Wafuna ukwazi ukuthi kungani kwaba nesidingo sokuba nenguqulo entsha. Ngemva kokumbonisa amavesi ambalwa nje, wahlabeka umxhwele kakhulu, wathi kulula ukuqonda le nguqulo entsha kuneye-Union Version, ayeyisebenzisa.” Lezi zithunywa zevangeli zalihambisela nowesifazane oyilungu lePhalamende leli Bhayibheli, owabe eselishiya ehhovisi lakhe. Umfundi wezindaba emsakazweni owayebagxeka oFakazi BakaJehova wayibona le nguqulo ehhovisi lalona wesifazane, wayithatha wafunda indinyana ethile kuyo. Yamhlaba umxhwele kangangokuthi washayela lezi zithunywa zevangeli ucingo ecela elakhe iBhayibheli.
Udade othile okhuluma isiKirghiz ofunda kanzima ngenxa yenkinga yamehlo wayecabanga ukuthi kuwumsebenzi ukufunda iBhayibheli. Nokho, indlela ayecabanga ngayo yashintsha lapho esene-Nguqulo Yezwe Elisha YemiBhalo YamaKristu YesiGreki ngesiKirghiz. Manje usekujabulela kakhulu ukufunda iBhayibheli ngoba le nguqulo ayinzima futhi icacile.
Omunye udade wathi: “Yaze yamnandi le nguqulo! Angingingizi lapho ngiyifunda. Akuvumi ukuba ngiyibeke phansi. Ngizizwa sengathi ngifunda iqiniso okwesibili.”
Udade othile oyisithulu wabhalela iNdikimba Ebusayo: “Ngiyalithanda iVangeli likaMathewu ngoLimi Lwezandla LwaseMelika. IBhayibheli liyaphila futhi selingithinta inhliziyo. Manje sengiyakwazi ukubona ngamehlo engqondo ukuthi uJesu wayengumuntu onjani, ngibone isimo sobuso bakhe, umusa wakhe nothando lwakhe olukhulu ngabantu. Ngiyalithanda leli Vangeli elihunyushwe ngolimi lwezandla. Kodwa . . . ningakwazi yini ukusheshe nisenzele nezinye izincwadi zeBhayibheli zolimi lwezandla?”
Akungatshazwa, iBhayibheli elihunyushwe kahle lingenza iZwi likaNkulunkulu lizwakale ngendlela ecace bha futhi umyalezo walo ungene ugxile ezinhliziyweni zabafundi. Yingakho labo abalangazelela ukusondela kuYise osezulwini bejabula lapho INguqulo Yezwe Elisha itholakala ngolimi abaluncela—ulimi olukhuluma nezinhliziyo zabo.
KUYE KWATHUNYELWA IZISEBENZI EZENGEZIWE EKUVUNENI
Ngenxa yokuncishiswa komsebenzi emagatsheni, kunamalungu amaningi omkhaya waseBethel yase-United States acelwa ukuba ayokhonza kwezinye izabelo. Amanye athunyelwa emagatsheni akwamanye amazwe, kwathi angamakhulu amaningana abelwa ukuba ayoba amaphayona akhethekile navamile kulo lonke elase-U.S.A. Laba bazalwane bázizwa kanjani lapho bethola izabelo ezintsha? Baye babhekana kanjani nezinselele zasesabelweni esisha? Amabandla aye azuza kanjani?
UTodd noLeslie bayakhumbula: “Sekuyiminyaka eminingi ‘sincenga iNkosi yokuvuna ukuba ithumele izisebenzi ekuvuneni kwayo.’ Besingazi ukuthi siyoba ingxenye yale mpendulo! Manje siyabona ukuthi uJehova uqondisa izinto futhi sikubheka njengelungelo ukuthi uKristu uye ‘wasibheka njengabathembekile ngokusabela inkonzo.’”—Math. 9:37, 38; 1 Thim. 1:12.
UFranco ukhumbula izinyanga zokuqala ezimbalwa yena nomkakhe abazichitha esabelweni sabo esisha: “Mina nomkami sasingaqapheli ukuthi kanti kusenomsebenzi ongaka e-United States. Lapho sifika esabelweni sethu, sathola ukuthi kunenqwaba yabantu abafuna ukufundelwa iBhayibheli.” UCurtis noKarolynne baveza indlela amaningi ala maphayona azizwa ngayo. Bathi: “Isabelo sethu sasensimini sisamukela ngazo zombili! Yithuba lethu lokubonisa uJehova ukuthi sasizidela ngempela lapho sinikezela ukuphila kwethu kuye.”
UKUTHEMBELA ‘ENKOSINI YOKUVUNA’
Njengoba kulindelekile, lezi zikhonzi zaba nexhala lapho zithunyelwa ensimini ngemva kokukhonza eBethel iminyaka eminingi. Omunye umbhangqwana wabuza: “Sizokwazi yini ukuthola indawo yokuhlala engabizi, futhi sizokwazi kanjani ukwenza amahora angu-120 noma angu-130 enkonzweni yasensimini njengoba kade sasingabamemezeli futhi sizokwazi yini ukuba isikhuthazo ebandleni?” Bona nabanye bábhekana kanjani nezimo zabo ezishintshile?
Abanye baze bayithola ngosuku lokugcina indawo yokuhlala ebiza kahle ezabelweni zabo ezintsha. Ngokwesibonelo uJessica, udade ongashadile, waya esabelweni sakhe eyofuna indawo yokuhlala, kodwa kwaphela amasonto amabili engayitholi. Ngosuku lokugcina esezobuyela eBethel ukuze ayoqoqa izimpahla zakhe, wajabula wafa lapho umdala wendawo emtshela ukuthi wayenendlu encane ayengayiqasha ngemali encane.
UJeff noCynthia batshela imenenja eqashisa ngamafulethi ukuthi bangoFakazi BakaJehova. Le menenja yathi: “Ngiyabazi oFakazi BakaJehova, futhi ngiyazi ukuthi ngeke ningihluphe. UJehova nguye oqinisekisayo ukuthi niyayikhokhela imali yokuhlala!”
U-Eric noMelonie bathi: “Okuhlangenwe nakho kwethu kusikhumbuza ukuthi kufanele sincike kuJehova ngaso sonke isikhathi. Siyabubona ubufakazi bezinto asenzela zona nsuku zonke. Lokhu kuye kwaluqinisa ngempela ukholo lwethu.”
AMABANDLA ASEKELAYO
Uthando olutholwa yila maphayona emabandleni akuwo luye lwawasiza kakhulu ukuba ajwayele ezabelweni zawo ezintsha. Umbonisi wesifunda uthi amabandla amaningi ayawancoma “amaphayona ethu akhethekile.” Uyanezela, “Isifunda sisonke sawamukela ngezandla ezifudumele.” Omunye umzalwane wendawo wabhalela igatsha eveza ukwazisa kwakhe: “Ngifisa ukunibonga. La maphayona aweve eyisibusiso kithi sonke!”
Elinye ibandla eKansas lalinamasimu ayikhulu okwase kuyizinyanga engasetshenzwa. Manje, ngosizo lombhangqwana ongamaphayona akhethekile, amaningi ala masimu asesetshenzwa njalo. Abadala babhala: “Besingakucabangi nakukucabanga ukuthi leli lungiselelo liyozuzisa kangaka.”
Nakuba amabandla aye aba “usizo oluqinisayo” kula maphayona, abamemezeli nabo baye bazuza. (Kol. 4:11) Omunye umbonisi wesifunda uyabika, “Intshiseko nomdlandla wala maphayona uye wabakhuthaza futhi wabashukumisa ngempela abafowethu nodadewethu.” Omunye umjikelezi wabhala, ‘Into ephawuleka kakhulu ngala maphayona akhethekile uthando nenjabulo yawo, futhi asewuthelele nabanye lo moya.’
Umbhangqwana othile wavuselela abamemezeli abayishumi abase bepholile. Ngaphezu kwalokho, abazalwane abakhonza njengabadala bawusizo olukhulu. Umdala webandla elithile wabhala: “Akuve kusiza ukuba nomzalwane onokulinganisela noqeqeshwe kahle. Yilokho kanye obekudingwa ibandla nendikimba yabadala.”
“IZISEBENZI EZIKANYE NONKULUNKULU”
UJehova uye wabusisa abamemezeli boMbuso ngokuhlangenwe nakho okuningi okujabulisayo. Ngokwesibonelo, uSteve noGaye baya ensimini ngosuku olwalubanda kakhulu. Emzini wokuqala abangena kuwo baqala isifundo seBhayibheli nekhehla elalicindezelekile. Kungakapheli namasonto amabili, laya emhlanganweni eHholo LoMbuso. Njengoba bexoxa nalo, balibonga ngomusa elababonisa wona mhla libangenisa okokuqala emzini walo. Laphendula: “Anginingenisanga kwami ngoba nginomusa. Nganingenisa ngoba ngangazi ukuthi niyeza. Ngase ngithandazele usizo izinsuku ezintathu.” Leli khehla seliba khona njalo emihlanganweni futhi lithuthukela ekubhapathizweni.
Suku lumbe kusekuseni uRay noJill behamba ngemoto, babona indoda ethile ihamba eceleni komgwaqo banquma ukuxoxa nayo. Bayibonisa izincwadi ababeziphethe bayitshela nangelungiselelo lesifundo seBhayibheli. Yathatha omagazini, yachaza nokuthi oFakazi BakaJehova bake bayifundela ngaphambili. Yayisanda kuthuthela kuleyo ndawo futhi yavuma ukuqhubeka nesifundo sayo seBhayibheli.
Bonke abaqhubeka bezidela enkonzweni kaJehova bayazi ukuthi ‘uNkulunkulu akayena ongalungile ukuba akhohlwe umsebenzi wabo nothando abalubonisa kulo igama lakhe.’ (Heb. 6:10) Njengoba nje umzimba womuntu unezitho eziningi ezifeza izidingo ezihlukahlukene, ilungu ngalinye lebandla linganezela ekukhuleni nasebuhleni bebandla. “UNkulunkulu uye wabeka amalungu [ebandleni], ngalinye lawo, njengoba nje ethanda,” futhi ukubambisana kwala malungu kwenza ‘wonke amalungu ajabule.’ (1 Kor. 12:18, 26) Lokhu kubambisana okuhle ‘kwezisebenzi ezikanye noNkunkulu’ kukhazimulisa uJehova oye “waqhubeka ekhulisa.”—1 Kor. 3:6, 9.
UKUMISA NGOKOMTHETHO IZINDABA EZINHLE
UJesu watshela abaphostoli bakhe: “Niyoba yizinto zokuzondwa abantu bonke ngenxa yegama lami.” (Math. 10:22) Abafundi beqiniso babengalindela ukuba abaphikisi ‘basho yonke inhlobo yento embi ngabo, bebaqambela amanga ngenxa yakhe.’ (Math. 5:11) Abafundi bakaKristu banamuhla baye benzani ukuze ‘bazimise ngokomthetho izindaba ezinhle’?—Fil. 1:7.
E-Armenia
Phakathi kuka-April 2007 no-April 2008, izisebenzi ezilawula ukungena kwezimpahla e-Armenia zazingafuni ukudedela amaBhayibheli nezincwadi ezisekelwe eBhayibhelini ezingamathani angaphezu kwangu-7 ezazikuzo kuze kube yilapho sikhokhe intela emba eqolo. Ekugcineni, ngo-April 2008, ngemva komzukuzuku abazalwane banikwa izincwadi zokuqala ngokukhokha leyo ntela kodwa ezinye izincwadi zisabanjiwe. Abazalwane sebethathe izinyathelo ezingokomthetho ukuze kulungiswe lolu daba.
EKazakhstan
Abazalwane ababili abavela endlunkulu yoFakazi BakaJehova ababezele ukuzokhuthaza abafowabo ngokomoya baboshwa eKazakhstan ngemva komhlangano okhethekile e-Almaty. Bagcinwa esiteshini samaphoyisa, baphonswa imibuzo base beyiswa phambi kwejaji lenkantolo yombuso elabathola benecala “lokushumayela kwelinye izwe.” Nakuba badedelwa kamuva, kusenziwa imizamo yokuba amacala abekwe laba bazalwane ababili asulwe. Muva nje, iziphathimandla ziye zahlasela amakhaya abazalwane ukuze ziphazamise lapho bebuthene ngenjongo yokuthandaza nokutadisha iBhayibheli. Izinkantolo ziye zamisa imisebenzi engokwenkolo yamabandla amathathu abhaliswe ngokusemthethweni, futhi izisebenzi zomthetho ziye zayiphazamisa ngokuphindaphindiwe imisebenzi engokwasezulwini esifundeni esisenyakatho yoLwandle iCaspian.
ETajikistan
Ngo-1994, iNhlangano Yenkolo YoFakazi BakaJehova eTajikistan yabhaliswa ngokusemthethweni, okwenza bakwazi ukuhlangana ndawonye ngenjongo yokukhulekela. Nokho, ngo-October 11, 2007, umnyango wezamasiko wakhipha isinqumo esasivimbela ukukhulekela koFakazi BakaJehova. Abazalwane benza imizamo yokubonisa iziphathimandla ukuthi oFakazi BakaJehova bangabantu abathanda ukuthula, abangadali izinxushunxushu emphakathini.
E-Uzbekistan
Isimo soFakazi BakaJehova e-Uzbekistan siyaqhubeka siba sibi. Ngasekuqaleni kuka-2008, omunye uFakazi kaJehova wagwetshelwa ukuya ekamu lokusebenza kanzima iminyaka emine ngenxa yokholo lwakhe. Abanye baye baboshwa, bagcinwa emajele, balahlwa ngamacala futhi bahlawuliswa ngokwephula imithetho ephathelene nezinhlangano zezinkolo nokufundisa izimfundiso ezingokwenkolo. Kuye kwaphazanyiswa imihlangano yethu, kwaseshwa imizi yabazalwane, kwathathwa izincwadi futhi kwaboshwa abamemezeli. Abafowethu nodadewethu abaningi baye bathukwa futhi bahlukunyezwa amaphoyisa.
Izikhulu eziningi zakulesi sifunda ziye zembula ukuthi ngabefundisi bendawo abangobhongoza balezi zenzo ezimbi kangaka. Siyaqhubeka sithandazela ukuba iziphathimandla zisheshe zibone ukuthi izenzo zazo azifaneleki kangakanani nokuba zivumele abafowethu nodadewethu ukuba ‘baqhubeke bephila ukuphila okuzolile nokunokuthula ngokuzinikela kokuhlonipha uNkulunkulu okuphelele nokungathathi izinto kalula.’—1 Thim. 2:1, 2.
EGrisi
Inkantolo ephakeme eGrisi yakhipha izinqumo ezimbili ezisivunayo mayelana nelungelo labantu abenqaba ukuya empini ngenxa kanembeza ngesisekelo sezinkolelo zabo. UKonstantinos Kotidis wayekhonze ebuthweni lezempi laseSoviet Union iminyaka ethile ngaphambi kokuba athuthele eGrisi futhi abe omunye woFakazi BakaJehova. Lapho iziphathimandla zibizela uMfoweth’ uKotidis empini futhi enqaba ukuya khona azimvumelanga ukuba enze ezinye izinkonzo zomphakathi. Zathi ngenxa yokuthi wayeke wakhonza kwezempi ngaphambili, akakwazi ukuthi wenqaba ukuya empini ngenxa kanembeza. Nokho, uMkhandlu WoMbuso wathi umuntu oke wakhonza kwezempi ngaphambili, kodwa manje onembeza wakhe ungasamvumeli ngenxa yenkolo, angase abhekwe njengomuntu onelungelo lokwenqaba ukuya empini ngenxa kanembeza futhi angavunyelwa ukuba enze ezinye izinkonzo zomphakathi.
Kwesinye isigameko, umnyango othile kahulumeni wenqaba ukuqasha uStylianos Ioannidis ngenxa yokuthi wayeke waboshelwa ukwenqaba ukuya empini ngenxa kanembeza, ngakho wathi akakasifezi isibopho sakhe sokuya empini. Nokho, uMkhandlu WoMbuso wakhipha isinqumo sokuthi uma umuntu oye wenqaba ukuya empini ngenxa kanembeza eye wadonsa isigwebo sasejele uyakufanelekela ukukhululwa enkonzweni yezempi. Inkantolo yabuye yathi lowo muntu kuyefana nokuthi useyifezile inkonzo yakhe yezempi, ngakho-ke akufanele agodlelwe umsebenzi eminyangweni kahulumeni. Kwakuqala ngqa ukuba uMkhandlu WoMbuso usekele isinqumo sawo ezizathwini zenkululeko yenkolo ngendlela okwakwenze ngayo INkantolo YaseYurophu Yamalungelo Abantu kwelinye icala elalihilela omunye woFakazi BakaJehova owancishwa umsebenzi ngoba wake waboshelwa ukwenqaba ukuya empini ngezizathu zikanembeza.
E-Eritrea
Abafowethu nodadewethu e-Eritrea basaphethwe kabuhlungu nangendlela engenabulungisa. Iziphathimandla zisagcine oFakazi BakaJehova abaningi emakamu amajele, abanye bahlala ezimweni ezinyantisa igazi. Ngo-July 2008, kwaboshwa abanye abazalwane abayisithupha, kuhlanganise nabadala abanemithwalo yemfanelo yokuhola kuleli zwe. Naphezu kwemizamo eminingi nezicelo ezivela kwamanye amazwe zokuba bakhululwe, uhulumeni usazimisele ukuphikisa ukukhulekelwa kukaNkulunkulu weqiniso, uJehova.
ESouth Korea
Kunenqubekela phambili eSouth Korea, lapho uhulumeni enqabe khona ukuqaphela ilungelo labantu eliyisisekelo lokwenqaba ukuya empini ngenxa kanembeza. Kunabafowethu abangaphezu kuka-13 000 abaye badonsa izigwebo emajele phakathi neminyaka engu-50 edlule, futhi abangaba ngu-500 basaboshiwe sikhuluma nje. Ukuzimisela nokuziphatha kwabo kobuKristu kuye kwanikeza ubufakazi obuhle kakhulu kwabayiziphathimandla zamajele nezikahulumeni futhi lokho kujabulisa uNkulunkulu wethu uJehova. (1 Pet. 2:20) Sikhuluma nje, kuye kwadluliselwa amacala angu-488 eKomitini Yamalungelo Abantu Yezizwe Ezihlangene, futhi iye yakhipha izinqumo ezisivunayo kwamabili awo ngo-2006. Okwamanje, abafowethu bethemba ukuthi uhulumeni uzokwenza ngokuvumelana nomgomo anawo wokubeka umthetho ovumela umuntu ukuba enze ezinye izinkonzo zomphakathi kunokuba aye empini.
ERwanda
Ngo-April 2008, bonke othisha baseRwanda babizelwa emhlanganweni, kuhlanganise nabaningi abangoFakazi BakaJehova. Othisha ababengathandi ukuhlanganyela ezintweni ezithile ezingqubuzana nonembeza wabo oqeqeshwe ngeBhayibheli abazange babonelelwe. Ngenxa yalokho, oFakazi abangaba ngu-215 abenqaba ukuya baxoshwa emisebenzini, kwaboshwa nodade ababili futhi bahlala ejele amasonto amaningana. Lo mhlangano wawuhlanganisa ezombusazwe nezempi, futhi abaya kuwo batshelwa ukuba bahlanganyele emisebenzini ethile yezombusazwe nasemikhosini yobuzwe. Amasosha ayevimba noma ubani ozama ukuhamba kulo mhlangano. Kusukela ngaleso sikhathi, sekuxoshwe izingane zoFakazi BakaJehova ezingu-90 ezikoleni ngoba zenqaba ukucula iculo lesizwe noma ukushayela ifulege indesheni. Siyaqiniseka ukuthi uJehova uzobaqinisa abafowethu nodadewethu kanye nezingane zabo ukuba bahlale beqotho kulolu shushiso olusanda kuqubuka.
ESpain
Uhulumeni waseSpain wagunyaza isimemezelo sasebukhosini esithinta oFakazi BakaJehova abasenkonzweni ekhethekile yesikhathi esigcwele, njengamalungu omkhaya waseBethel nababonisi abajikelezayo. Lesi simemezelo sathi izikhonzi ezisenkonzweni ekhethekile yesikhathi esigcwele kufanele zibhekwe “njengezikhonzi ezimisiwe . . . ezizinikelele kuphela ukwenza umsebenzi wezithunywa zevangeli noma wokwalusa, ukufundisa ngenkolo, noma ngaphezu kwalokho, ukwenza imisebenzi ethile edingekayo esekela imigomo yenkolo.” Lesi simemezelo sifika ngesikhathi iziphathimandla zamanye amazwe athile zizibuza ukuthi izikhonzi ezisenkonzweni ekhethekile yesikhathi esigcwele zoFakazi BakaJehova zingabhekwa yini ngempela njengezikhonzi ezifanelekela ukuthola izinzuzo ezitholwa izikhonzi zezinye izinkolo.
INKANTOLO YASEYUROPHU YAMALUNGELO ABANTU
OFakazi BakaJehova e-Armenia, e-Austria, e-Azerbaijan, eFrance, eGeorgia, eRussia, eTurkey nase-Ukraine basalinde ukuba kucatshangelwe izicelo zabo ezingu-24 ezadluliselwa eNkantolo YaseYurophu Yamalungelo Abantu [European Court of Human Rights (ECHR)], eseStrasbourg, eFrance. Lezo zicelo zihlobene namalungelo abantu ayisisekelo ezakhamuzi ezihlala ezindaweni ezingaphansi kwe-European Convention on Human Rights, njengelungelo lokwenqaba ukuya empini ngenxa kanembeza. Ezinye izicelo zihilela ukushushiswa noma ukucwaswa ngenxa yenkolo, ukusulwa noma ukuvinjelwa kwenhlangano engokomthetho esetshenziswa oFakazi BakaJehova ukuze bahlele umsebenzi wabo, ukungenela kukahulumeni elungelweni lokuba nemihlangano enokuthula naselungelweni lomzali onguFakazi lokukhulisa ingane yakhe ibe ngomunye woFakazi BakaJehova.
E-Austria
Ecaleni elaliphakathi ko-Fakazi BakaJehova Nezwe Lase-Austria, i-ECHR yakhipha isinqumo esivuna oFakazi ngo-July 31, 2008. Inkantolo yathi umthetho wezenkolo wase-Austria wephula ilungelo loFakazi BakaJehova lenkululeko yokukhulekela ngokunamathela esimisweni sokuhlukaniswa kwezinkolo ngezigaba ezimbili, wenze ukuba kube nesigaba sezinkolo ezibhekwa njengeziphansi, futhi ngenxa yalokho wenze kube nezakhamuzi ezibukelwa phansi. Lesi sinqumo siphuma sekuphele iminyaka engu-30 abafowethu bezama ukuba baqashelwe ngokomthetho e-Austria. Inkantolo yathi: “Akufaneleki neze [ukulindiswa isikhathi eside] kwamaqembu ezinkolo ezikade zaba khona emhlabeni wonke nesezinezimpande ezweni futhi esezaziwa iziphathimandla ezihilelekile, njengoba kunjalo ngoFakazi BakaJehova.” Manje uhulumeni wase-Austria kulindeleke ukuba ushintshe imithetho ekhona, futhi lokho kungase kunike abafowethu amalungelo afana nawezinkolo ezinkulu e-Austria.
E-Azerbaijan
Ngo-November 2007, kwadluliselwa isicelo kuyi-ECHR esimangalela amaphoyisa ngokungalihloniphi ilungelo lethu lenkululeko yokukhulekela. Nakuba oFakazi BakaJehova bebhaliswe ngokomthetho e-Azerbaijan, kunemibiko ephazamisayo eyandayo yokuboshwa nokuphathwa kabi kwabafowethu. Amaqembu amakhulu amaphoyisa ahlomile aye angena ngodlí emihlanganweni enokuthula yoFakazi BakaJehova, athatha izincwadi nezimpahla zabafowethu, abopha abakhona, athuka futhi ashaya abafowethu nodadewethu. Njengoba le mikhuba yamaphoyisa iqhubeka, inkantolo iye yabona ukuthi lesi simo siyaphuthuma futhi yalusukumela phezulu lolu daba. Sethemba ukuthi maduze abafowethu bazovunyelwa ukuba bahlangane ngokuthula ngaphandle kokwesaba ukuphazanyiswa amaphoyisa.
EFrance
Ngo-February 2005 kwafakwa isicelo kuyi-ECHR ngokuqondene nohulumeni waseFrance ofuna ukuba iNhlangano YoFakazi BakaJehova EFrance ikhokhe izintela ezingekho emthethweni nezingenabo ubulungisa. Sisalinde ukuzwa ukuthi inkantolo izovuma yini ukulifakela izibuko leli cala. Njengoba sisalindile, abaphikisi bethu baye bakhuluma izinto ezingelona iqiniso ngezinkolelo zethu kangangokuthi kuye kwaba nezigameko ezingu-70 zokucekelwa phansi kwamaHholo OMbuso ngonyaka odlule. Nokho, abazalwane baseFrance bahlalele ethembeni lokuthi maduze inkantolo izosho ukuthi lesi senzo sikahulumeni sinobandlululo, oFakazi BakaJehova kuleli zwe bathole ukuphumula.
ERussia
Ngo-December 2001, oFakazi BakaJehova eRussia bafaka isicelo kuyi-ECHR esikhalaza ngokuboshwa nokushushiswa ezinkantolo kaningi koFakazi BakaJehova. Ngo-June 2004, iNkantolo YaseMoscow City yasekela isinqumo senkantolo ephansana sokumisa umsebenzi woFakazi BakaJehova eMoscow nokuqeda inhlangano yabo esemthethweni. Kodwa iningi labazalwane baseMoscow lisakwazi ukuhlangana ukuze likhulekele nokushumayela izindaba ezinhle zoMbuso. Nokho, eMoscow nakwezinye izindawo eRussia, kube nezenzakalo eziningi zezikhulu eziphazamisa imihlangano yethu emikhulu nemincane kuhlanganise nokunye ukuphathwa kabi kwabafowethu nodadewethu. Ngokwesibonelo, ngo-July, edolobheni laseChekhov, eliqhele ngamakhilomitha angaba ngu-60 eningizimu yeMoscow, kwafika izidlamlilo zashisa iHholo LoMbuso. Nakuba izicisha-mlilo zabizwa ngokushesha, ababebukele bathi abezicisha-mlilo abazihluphanga kangako ukuzama ukuwucima, futhi kuze kube manje amaphoyisa ayenqaba ukuqala uphenyo. Naphezu kobunzima nokuphikiswa, abafowethu nodadewethu eRussia bayaqhubeka bethembekile futhi balindele uJehova ukuba abasekele.
UJehova uthembisa ukuthi asikho isikhali esiyokwakhelwa izinceku zakhe esiyophumelela. (Isaya 54:17) Ngisho nezimo ezinzima kakhulu zingaphumela “ekuqhubekeleni phambili kwezindaba ezinhle.” Ngakho-ke, izinceku zikaNkulunkulu zizimisele ukuqhubeka ‘zimi ziqinile emoyeni munye, ngomphefumulo munye zilulwela ndawonye ukholo lwezindaba ezinhle, futhi azethuswa nangayiphi indlela yilabo abaphikisana nazo.’ (Fil. 1:12, 16, 18, 27, 28) Siyanicela, ‘qhubekani nithandazela’ abafowethu nodadewethu emhlabeni wonke njengoba bethembela kuJehova, ‘isiphephelo sabo noMenzi wendlela yokuphunyuka.’—2 Thes. 3:1; IHu. 18:2.
UKUNIKEZELWA KWAMAGATSHA
UMgqibelo wango-November 10, 2007 waba usuku olujabulisa kakhulu egatsheni lase-Ningizimu Africa, njengoba kwakubuthene abafowethu nodadewethu abangaba ngu-4 000 ekunikezelweni kwesakhiwo sokunyathelisa esinwetshiwe, indawo yokudlela kanye nezindlu zokuhlala.
Izihambeli ezeza zizobona isakhiwo sokunyathelisa esinwetshiwe zajabula kakhulu lapho zibona umshini wokunyathelisa, obizwa ngokuthi i-MAN Roland Lithoman, unyathelisa amashumi ezinkulungwane zamaBhayibheli nezincwadi ezisekelwe eBhayibhelini. Umshini omusha wokuhlanganisa izincwadi usuhlanganise amakhophi angaphezu kwesigidi e-Nguqulo Yezwe Elisha ngezilimi zase-Afrika ezingu-16. Izihambeli zabona nendawo enkulu okugcinwa kuyo izincwadi zeBhayibheli ezisetshenziswa amabandla angaba ngu-8 000 asemazweni ayishumi aseningizimu ye-Afrika.
Ngo-June 7, 2008, izakhiwo ezinwetshiwe zegatsha lase-Nigeria zanikezelwa eLagos, indawo eqhele ngamakhilomitha angu-360 ukusuka eningizimu-ntshonalanga yezakhiwo zaseBethel ezise-Igieduma. Ihhovisi laseLagos linesakhiwo esinamakamelo okuhlala angu-24, ishede lokugcina izincwadi kanye nesakhiwo esinamahhovisi. Imisebenzi eminingi yegatsha inakekelwa eLagos, inhloko-dolobha echumayo kuleli zwe. Lezi zakhiwo ezintsha zihlalisa izikhonzi zaseBethel ezisuke zizolanda izimpahla ethekwini lakhona noma zizothenga izinto ezithile zegatsha, zibuye zihlalise nalabo abasuke bevela esikhumulweni sezindiza noma beya kuso. Okwamanje, neSikole Sokuqeqeshela Inkonzo siqhutshelwa khona ehhovisi laseLagos kuze kuphele umsebenzi wokunweba igatsha elise-Igieduma. Isibusiso sikaJehova sibonakala ngempela emsebenzini wokushumayela e-Afrika, njengoba kunjalo nasemhlabeni kabanzi.
SIHLONYISELWE UKWENZA INTANDO KANKULUNKULU
Yeka indlela esimbonga ngayo uJehova ngokuthi uye wasihlomisa ‘ngazo zonke izinto ezinhle ukuba senze intando yakhe, enza kithi ngoJesu Kristu lokho okujabulisayo emehlweni akhe.’ (Heb. 13:21) Ngenxa yokuthi uJehova uye wabonisa ukuthi nguye “ongenza okungaphezu kakhulu kwazo zonke izinto esizicelayo noma esizicabangelayo,” sisho ngokusuka enhliziyweni: “Kuye makube yinkazimulo ngebandla nangoKristu Jesu kuzo zonke izizukulwane kuze kube phakade naphakade.”—Efe. 3:20, 21.
[Ibhokisi ekhasini 25]
Kungani Kufanele Inkolo Ibhaliswe, Futhi Ibhaliswa Kanjani?
Ukubhaliswa kwenkolo kuyahlukahluka kuye ngamazwe. Amanye amazwe, njenge-Armenia ne-Azerbaijan, anemithetho eqondile evumela izinkolo ukuba zifake isicelo sokubhaliswa nokuqashelwa njengezisemthethweni. Uma isicelo samukelwa, leyo nkolo ibe isiqashelwa njengesemthethweni kulelo zwe. Kwamanye amazwe, izinkolo zihlukaniswe ngezigaba ezimbili. Izinkolo ezinkulu nezindala zingena esigabeni sokuqala. Lesi sigaba sinezinzuzo eziningi, ezihlanganisa ukungayikhokhi intela. Izinkolo ezincane nezintsha zona ziwela esigabeni sesibili.
Amanye amazwe, njengeGeorgia ne-United States of America, awanayo imithetho eqondile yokubhaliswa kwezinkolo. Ezimweni ezinjalo, umthetho-sisekelo unikeza wonke umuntu inkululeko yokuzikhethela inkolo. Nakuba ingekho imithetho ebekiwe yokuqashelwa kwamaqembu ezinkolo, angakwazi ukubhalisa inhlangano yawo ibe esemthethweni. Uma isicelo sawo samukelwa, lelo qembu lingabe selisebenzisa inhlangano yalo esemthethweni ukuze lenze imisebenzi engase ihlanganise ukunyathelisa nokusakaza izincwadi kanye nokuthenga indawo nempahla.
[Ibalazwe ekhasini 21]
(Ukuze ubone ukuthi indaba ihlelwe kanjani, bheka encwadini)
E-AUSTRIA
EFRANCE
ESPAIN
EGRISI
E-ERITREA
ERWANDA
E-ARMENIA
E-AZERBAIJAN
ERUSSIA
EKAZAKHSTAN
E-UZBEKISTAN
ETAJIKISTAN
ESOUTH KOREA
[Isithombe ekhasini 11]
IBandla LaseSiaya elikhuluma isiLuo
[Isithombe ekhasini 13]
“INguqulo Yezwe Elisha” itholakala iphelele noma iyingxenye ngezilimi ezingaphezu kuka-70
[Isithombe ekhasini 22]
UKonstantinos Kotidis
[Isithombe ekhasini 22]
UStylianos Ioannidis
[Isithombe ekhasini 29]
Isakhiwo esisha sokuhlala eLagos, eNigeria
[Isithombe ekhasini 29]
Isakhiwo sokunyathelisa, egatsheni laseNingizimu Afrika