Incwadi Evela ENdikimbeni Ebusayo
BoFakazi BakaJehova Abathandekayo Esikanye Nabo:
Kusinika injabulo enkulu ukunibhalela, nina zinceku zikaJehova ezithembekile nezithandekayo eningaphezu kwezigidi ezingu-7. Lapho uhlangana nelinye ikholwa elivela kwelinye izwe, ngaso leso sikhathi uzwa isibopho esikhethekile sothando ngalo. (Joh. 13:34, 35) Akungabazeki ukuthi njengoba ufunda le Ncwadi Yonyaka, ukulandisa okuhlaba umxhwele kokholo nobuqotho babafowenu nodadewenu emazweni ahlukahlukene, kuzokwenza usizwe futhi leso sibopho esikhethekile.
Imibiko evela emhlabeni wonke ibonisa ukuthi iningi lenu likubheka njengobubaluleke kakhulu ukuKhulekela Komkhaya. Labo abanezingane ezisencane baye basebenzisa ubuhlakani obukhulu ukuze bagcine izingane zinesithakazelo. (Efe. 6:4) Imibhangqwana isondelene ngenxa yalesi simiso esiyenza ihlanganyele izinto ezingokomoya. (Efe. 5:28-33) Impela, abantu ngabanye nemikhaya bayazuza kuleli lungiselelo elisisiza sihlolisise iZwi likaNkulunkulu.—Josh. 1:8, 9.
Sizwelana nani nonke eniye nalahlekelwa ngenxa yezinhlekelele zemvelo zamuva. Sithatha leli thuba sibonge abaningi abaye bahlanganyela ngaphandle kokunqikaza emizamweni yokunikeza usizo phakathi nalezo zikhathi zobunzima. (IzE. 11:28-30; Gal. 6:9, 10) Ngaphandle kwalokhu, ebandleni ngalinye kunalabo abaqaphela isidingo esingokwenyama sabafowethu bese bebasiza kungazi muntu. NjengoDorka wasendulo, nichichima izenzo “eziningi ezinhle nezipho eziningi zesihe.” (IzE. 9:36) Qinisekani ngokuthi uJehova uyakuqaphela lokhu futhi uyonivuza ngokufanele.—Math. 6:3, 4.
Kwamanye amazwe, amalungelo enu acekelwa phansi yilabo abasebenzisa kabi umthetho ukuze ‘babiyele inkathazo ngesinqumo somthetho.’ (IHu. 94:20-22) Njengoba niqaphela ukuthi uJesu wabikezela ngalolu shushiso, nibekezela ngesibindi futhi nibheke kuJehova njengesiphephelo senu. (Joh. 15:19, 20) Qinisekani ngokuthi siyaqhubeka sinithandazela bathandekayo njengoba ‘nikuvikela phambi kwabo bonke abafuna ngenkani isizathu sethemba elikini.’—1 Pet. 3:13-15.
Sinincoma ngemfudumalo nonke nina eniyizigidi enizigcina nihlanzekile ngokuziphatha unyaka nonyaka naphezu kwemizamo kaSathane ekhohlakele namacebo akhe omshoshaphansi okubhebhethekisa ukuziphatha okubi. Kulesi sikhathi samanje, lapho izindinganiso zokuziphatha zaleli zwe ziwohloka kunanini ngaphambili, niqhubeka “nizuza amandla eNkosini nasebukhulwini bamandla ayo.” (Efe. 6:10) Niye nagqoka “zonke izembatho zempi ezivela kuNkulunkulu,” futhi ngenxa yalokho nimelana ngokuqinile “namaqhinga kaDeveli.” (Efe. 6:11, 12) Yazini ukuthi uJehova usebenzisa isibonelo senu ukuze anikeze impendulo ecacile kumklolodeli, uSathane!—IzAga 27:11.
Sijabule kakhulu ukuzwa ukuthi ngo-2011, kwakunabangu-19 374 737 ababethamele iSikhumbuzo sokufa kwenkosi yethu. Lelo nani elihlaba umxhwele lababekhona, ngokuyingxenye libangelwe ukusabela kwenu obizweni lokuba amaphayona asizayo ngo-April odlule. Izigidigidi zabakhileyo emhlabeni zezwa imvunge enobunye yokudumisa uJehova ivela koFakazi bakhe abaqotho! (Roma 10:18) Kungakhathaliseki ukuthi ungomunye wabangu 2 657 377 abakhonza njengamaphayona asizayo kuleyo nyanga noma walwela ukuthuthukisa inkonzo yakho ngezinye izindlela, nonke nasenza saqhakaza yinjabulo ngenxa yomoya wenu ovumayo nentshiseko ngenkonzo.—IHu. 110:3; Kol. 3:23.
Ngonyaka odlule abantu abangu-263 131 babonisa ukuzinikezela kwabo kuJehova. Siyambonga uJehova ngalokhu, futhi sinibonga nonke ngokuhlanganyela nathi ekudluliseleni lesi simemo nakwabanye: “‘Woza!’ Noma ubani ozwayo makathi: ‘Woza!’ Noma ubani owomile makeze; nanoma ubani othandayo makathathe amanzi okuphila ngesihle.” (IsAm. 22:17) Ikakhulukazi ngemva kokucabangela izici zoMbuso kaNkulunkulu omisiwe emihlanganweni yethu yesigodi yango-2011, sisho ngomdlandla kunanini ngaphambili, “UMbuso kaNkulunkulu mawuze!” Sishukunyiswe isiqinisekiso sikaJesu esithi, “ngiyeza masinyane,” ngezinhliziyo zethu zonke senanela amazwi omphostoli uJohane: “Amen! Woza, Nkosi Jesu.”—IsAm. 22:20.
Njengoba niqhubeka nilinde leso senzakalo esivusa amadlingozi, sicela niqiniseke bafowethu nodadewethu ukuthi sithanda ngamunye wenu ngokujulile, njengoba nifakazela uthando lwenu ngoJehova “ngesenzo nangeqiniso”!—1 Joh. 3:18.
Abafowenu,
Indikimba Ebusayo YoFakazi BakaJehova