Imibiko Evelele Yonyaka Odlule

INHLANGANO kaJehova yasemhlabeni iye yaqhubeka ichuma phakathi nonyaka odlule wenkonzo. Isibusiso sikaNkulunkulu sisobala ngenxa yokuthi emazweni angu-235, oFakazi BakaJehova abangaphezu kwezigidi eziyisithupha babonisa ubuqotho babo kuye nokholo lwabo esithembisweni sakhe sokuletha izwe elisha lokulunga. Lezi zigidi azibona nje abantu abazisholo ukuthi bayizinceku zikaNkulunkulu, kodwa abantu abamemezela izindaba ezinhle zoMbuso kaNkulunkulu ngentshiseko, njengoba kwabikezela uJesu futhi kulotshwe nakuMathewu 24:14. Ngokuvumelana nesihloko sonyaka sika-2001, bayaqhubeka ‘bemi bephelele futhi benokuqiniseka okuqinile kuyo yonke intando kaNkulunkulu.’—Kol. 4:12.

Kuningi okujabulisayo okwenzeke kubantu bakaNkulunkulu phakathi nonyaka. Ake sicabangele imibiko embalwa evelele.

Imihlangano Yesigodi Yokufundisa Abafundisi Bezwi LikaNkulunkulu

Esinye sezici ezikhumbulekayo zonyaka uMhlangano Wesigodi WoFakazi BakaJehova ‘Wabafundisi Bezwi LikaNkulunkulu,’ owaqhutshwa ezindaweni eziningi kuwo wonke umhlaba kusukela maphakathi no-2001 kuya ekuqaleni kuka-2002. Kwaba khona izigidi zabantu. Isikhulumi osukwini lokuqala lwalo mhlangano wezinsuku ezintathu sachaza okushiwo yisihloko somhlangano. Sathi: “UJesu wayengakujabuleli ukuba isihluthulelo solwazi sinikwe iqembu eliphakeme lezazi zemiBhalo. Wathi kubafundi bakhe: ‘Lokho mina enginitshela khona ebumnyameni, nina kushoni ekukhanyeni; nalokho enikuzwa kuhletshwa, kushumayeleni phezu kwezindlu.’ UJesu wayekulangazelela kakhulu ukunika abantu abaningi ngangokunokwenzeka ulwazi ngoNkulunkulu. Kuyena, ulwazi lwemiBhalo lwaluyinto yokwabelana, hhayi yokufihlwa.”

Isimiso somhlangano sasihlanganisa izinkulumo ezazidingiga lokho okushiwo yisiprofetho seBhayibheli nendlela amaKristu okufanele azisebenzise ngayo izimiso ezingokomBhalo ekuphileni kwawo. NgeSonto kwakunedrama yasendulo enesihloko esithi Hlonipha Igunya LikaJehova. Le drama yagxila ekulandiseni kweBhayibheli ngokuhlubuka kukaKora ehlane, okwakuhlukile enkambweni yokwethembeka yamadodana akhe.

Kwakhululwa izincwadi ezimbili emhlanganweni. Eyokuqala kwakuyincwadi ethi Isiprofetho Sika-Isaya—Ukukhanya Kuso Sonke Isintu, Umqulu Wesibili. Eyesibili kwakuyincwajana ethi A Satisfying Life—How to Attain It. Ngaphezu kwalokho, kwakhululwa ipheshana elisha—elithi Ingabe Unomoya Ongafi?

Phakathi nenyanga ka-August, kwaqhutshwa imihlangano yesigodi ekhethekile eFrance nase-Italy. EFrance le mihlangano ekhethekile yaqhutshelwa eParis, eLyons naseBordeaux, kwaba nenani eliphakeme eliyingqikithi yabangu-160 045. Le mihlangano yabakhuthaza kakhulu abafowethu eFrance, abaye baba yizisulu zemibiko yezindaba engemihle. Umfowethu othile wathi: “Ngezinye izikhathi sizizwa sisodwa kule mpi, kodwa manje ngemva kokuvakashelwa yizinkulungwane zabafowethu abangamaKristu, sishukunyiselwe ukuba siqhubekele phambili.”

E-Italy, imihlangano yesigodi ekhethekile yaqhutshwa eRoma, eMilan, eTurin naseBari. Amanye amadolobha amahlanu okwakunemihlangano kuwo axhunywa ngesimiso socingo ukuze ezwe izingxenye ezithile zesimiso. Ingqikithi yababa khona kule mihlangano engu-9 yayingu-289 133. Emhlanganweni ngamunye kule mihlangano eyayiseFrance nase-Italy, izilaleli zafundelwa izwi lesinqumo elishukumisayo. Izihambeli zomhlangano, ezazivela emazweni amaningi ahlukahlukene, zabonisa ukuthi ziyavumelana nalo ngo-elethu ohlokomayo! Ngemva kwalesi simemezelo kwakhala ihlombe isikhathi eside.

Ukufakaza Emhlabeni Wonke Nge-Kingdom News No. 36

Phakathi nenyanga ka-October no-November 2000, kwahanjiswa amakhophi angaba yizigidi ezingu-500 e-Kingdom News No. 36 ngezilimi ezingu-189 emhlabeni wonke. Umyalezo ongokomBhalo ophathelene nokuBusa KukaKristu Jesu Kweminyaka Eyinkulungwane, kanye nezithombe ezinhle, kwenza le Kingdom News yakhanga kakhulu. Uma ungomunye woFakazi BakaJehova, cishe wahlanganyela ekusakazeni leli pheshana. Nansi eminye yemibiko ephathelene nalo mkhankaso evela ezingxenyeni ezihlukahlukene zomhlaba.

Naphezu kwamakhaza ashubisa umnkantsha e-Alaska, oFakazi abazange baphazamiseke emsebenzini. Umbonisi owengamele eBandleni LaseNorth Pole wathi: “Nakuba kusebusika, abanye abaninikhaya babemi emagcekeni abo befunda i-Kingdom News No. 36. Umyalezo olula oqhathanisa isimo sezinto namuhla nezibusiso ezizofika esintwini muhle kakhulu.”

E-Albania, amabandla angu-15 emadolobheni ambalwa amakhulu acelwa ukuba avakashele imizana engaphandle. Abafowethu nodadewethu bamukela lesi simemo ngentshiseko nangenjabulo enkulu. Ngokokuqala ngqá, kwafinyelelwa amadolobhana angu-56 anabantu ababalelwa ku-50 000.

Igatsha lase-Angola liyabika: “Ngenxa yentshiseko yabamemezeli, umkhankaso we-Kingdom News No. 36 ensimini yethu waba yimpumelelo enkulu. Lokhu kwenzeka naphezu kobunzima bezimali nempi eqhubeka ithinta amabandla kulo lonke izwe. Lapho kuhanjiswa i-Kingdom News, abantu abaningi babeyamukela ngenjabulo. Ngenxa yalokho, phakathi no-November, elase-Angola labika inani elisha eliphakeme lezifundo zeBhayibheli ezingu-94 026, okuwukwanda okungaphezu kuka-10 000 kunenyanga eyayandulele.”

ECameroon, lapho liya edolobhaneni elithile, iqembu loFakazi ngephutha lawisa isikhwama esasine-Kingdom News No. 36. Indoda eyayibone oFakazi behambisa i-Kingdom News yayilibangise epulazini layo lapho ibona lesi sikhwama endleleni. Yasicosha yabe isiqala ukuhambisa i-Kingdom News No. 36 yona ngokwayo! Ekugcineni, yayisiwahambise wonke amapheshana kwasala amane kuphela. Lapho abaninikhaya bewacela, le ndoda yenqaba ithi: “Angikwazi phela ukusebenzela ize; lawa ngizowagcinela abakwami. Lapho oFakazi befika, bazonipha amakhophi enu.”

EColombia oFakazi baphindela kowesifazane owayethathe ikhophi ye-Kingdom News No. 36. Lona wesifazane wathi wayengakaze afune ukuxoxa noFakazi BakaJehova. Kodwa ngemva kokufunda i-Kingdom News No. 36, waqaphela ukuthi wayephuthelwa okuthile okuhle kakhulu. Wabe eseguqa enxusa uNkulunkulu ukuba amthethelele. Ngemva kwalokho, wathintana noFakazi, futhi njengamanje, uqhutshelwa isifundo seBhayibheli.

Edolobhaneni elithile eCongo (Kinshasa), iphoyisa elaligqoke inyufomu lafunda i-Kingdom News No. 36 ngomdlandla. Kamuva lathola oFakazi labatshela ukuthi lesi sigijimi sinamandla futhi siyaduduza. Labe seliyahamba ithutshana labuya seligqoke izingubo ezivamile liphethe neBhayibheli ngesandla. Lathi: “Ngifuna ukuhlanganyela nani ekusakazeni lesi sigijimi ngoba sibalulekile futhi siyaphuthuma!” OFakazi bachaza ngomusa ukuthi kufanele lifundelwe iBhayibheli kuqala. Le ndoda yavuma, futhi isifundo sayo siqhubeka kahle kakhulu.

Owesifazane osemusha okuthiwa uJoy wathola ikhophi ye-Kingdom News No. 36 ngaphansi komnyango kwakhe eGreece. Ngemva kokuyifunda, ngokushesha washayela umamekazi wakhe ucingo, ongomunye woFakazi BakaJehova. Watshela umamekazi ukuthi isigijimi sasimthinte inhliziyo futhi wayefuna ukuxoxa noFakazi BakaJehova. Umamekazi wakhe wathinta udade oyiphayona elikhethekile kuleyo ndawo, futhi leli phayona labonana nale ntokazi. Bamangala lapho bethola ukuthi bayazana. UJoy watshela leli phayona ukuthi nakuba ayeneBhayibheli, wayengakwazi ukuthola imiBhalo yokuxazulula izinkinga ayebhekene nazo. Wavuma ngokushesha ukuqhutshelwa isifundo seBhayibheli sasekhaya.

UFakazi othile eKorea wahambisa i-Kingdom News No. 36 kowesifazane owayephikisa indodana yakhe ngoba ingomunye woFakazi BakaJehova. Ngemva kwezinsuku ezintathu lo Fakazi waphindela kulona wesifazane wachaza ukuthi iBhayibheli lithini ngePharadesi. Lona wesifazane wasabela kahle, futhi kwaqalwa isifundo seBhayibheli. Ikhala izinyembezi, indodana yakhe yathi: “Angikholelwa ukuthi umama useqale ukutadisha iBhayibheli.” Uthuthuka kahle.

Enkabeni yeLiberia, oFakazi abathile babehambela amadolobhana ahlukene besakaza i-Kingdom News baze bazithola sebephumile emgwaqweni omkhulu, bagcina sebesepulazini eliqhelile phakathi ehlathini. Lapho lab’ oFakazi betshela abalimi ukuthi babedukile, insizwa ethile yathi: “Niqondiswé umoya kaNkulunkulu ukuba nize lapha ukuze nathi sithole amakhophi.”

Abantu baseNetherlands bayamukela ngenjabulo i-Kingdom News No. 36. Kwasakazwa amakhophi angaphezu kwezigidi ezimbili ngokushesha. Igatsha laseSelters, eJalimane, lanyathelisa amanye amakhophi angu-100 000, kodwa amabandla acela angaphezu kwalokho. Edolobheni laseHelmond, uFakazi watshela umninikhaya ukuthi leli pheshana lalihanjiswa emhlabeni wonke. Le ndoda yathi: “Ngicela ungilinde.” Yangena endlini yashayela umngane wayo ucingo eFrance ukuze ithole ukuthi ummemezeli wayekhuluma iqiniso yini. Le ndoda yathi kumngane wayo: “KunoFakazi KaJehova ongivakashele ophethe ipheshana athi lihanjiswa emhlabeni wonke. Ingabe usulitholile?” Umngane wayo waphendula: “Yebo, ngilithole emizuzwini eyishumi edlule.” Le ndoda yavala ucingo, yaphindela emnyango, futhi yazithathela ikhophi.

Igatsha laseRussia lathola incwadi ethakazelisayo evela kumfundi osebangeni lesihlanu. Wabhala: “Sanibona. Ngijabule kakhulu lapho ngithola ipheshana eposini elikhuluma ngenkulungwane entsha yeminyaka! Leli pheshana enisiphe lona liyinto ejabulisa kunazo zonke esizithole phakathi nalo nyaka! Sizani nisithumelele ukwaziswa okwengeziwe.”

Ngaphandle nje kokusiza umphakathi, umkhankaso we-Kingdom News No. 36 wazuzisa noFakazi uqobo. UFakazi othile eSaipan wathi: “Ngikujabulele ngempela ukuhambisa i-Kingdom News. Ngabhapathizwa ngo-1998, ngakho bengiqala ukuhlanganyela kulesi sici senkonzo. Kungikhuthazelé ukuba ngizame ukushumayela kusihlwa, okuye kwangivulela ithuba lokuxoxa nabantu abengeziwe. Ngenxa yalo msebenzi, ukholo lwami luye lwaqina, futhi ngizizwa ngisondelene kakhudlwana noJehova.”

OFakazi báya emajukujukwini aseMalaita, eSolomon Islands, beyohambisa i-Kingdom News No. 36. Ngemva kokuhamba ngezinyawo amahora angaphezu kwayisihlanu, bafika edolobhaneni elithile lapho bamukelwa khona umfundisi wendawo futhi wabonisa isithakazelo esikhulu. Wathi kwase kuphele iminyaka engaphezu kwengu-9 kungenammeleli wesonto labo obavakashelayo noma obanakayo. Kodwa, leli qembu lezihambi lalenze umzamo wokunqamula izintaba ukuzobasiza baqonde isigijimi seBhayibheli. Kwaqalwa izifundo zeBhayibheli nayo yonke imikhaya yakuleli dolobhana. Abafowethu babuyela njalo ngemva kwamasonto amabili, futhi ngokushesha kwase kunezifundo eziyishumi ezithuthuka kahle. Umfundisi wathi uma othile ayengahlala nabo ukuze avule iqembu, isonto lendawo lalingase lisetshenziselwe ukuqhuba imihlangano. Manje kunephayona elikhethekile elivakashela leli qembu njalo. Embikweni wokugcina kwabikwa ukuthi ummeleli wesonto wavakasha futhi wathembisa abantu bomuzi ukudla uma bengavuma ukuyeka ukufunda noFakazi BakaJehova. Nokho, bonke bathé abafuni nokuzwa ngokuyeka ukutadisha iBhayibheli.

Lapho bevakashele indawo eqhelile eVenezuela, oFakazi abathile bahambisela umqondisi wezivakashi oyiNdiya elingumPemón i-Kingdom News No. 36. Ejabule ngaleli pheshana, walifunda ephindelela. Lapho linethwa phakathi nesivunguvungu, waleneka kahle ukuze alomise. Wacela amakhophi engeziwe ayengawanikeza abantu bakubo.

Izindaba Zezomthetho Phakathi Nonyaka Wenkonzo

Ngenxa yezizathu zikanembeza, u-Ivailo Stefanov wenqaba ukujoyina impi eBulgaria. Ngenxa yalokho, wagwetshwa unyaka nesigamu ejele. UMfoweth’ uStefanov wadlulisela icala eNkantolo Yamalungelo Abantu YaseYurophu, ethi wayephucwe inkululeko yakhe engokwenkolo. Lapho inkantolo imemezela ukuthi yayizoliqula icala, iziphathimandla zaseBulgaria zahlela ukuba liqulwe kahle, futhi lamthetha uMfoweth’ uStefanov nabanye oFakazi ababethinteka endabeni efanayo. Ngo-May 3, 2001, inkantolo yasamukela lesi sinqumo sokuthula. Njengengxenye yesinqumo, iziphathimandla zaseBulgaria zavuma nokunciphisa ubude benkonzo yomphakathi eyenziwa esikhundleni sokuya empini, ngaphambili eyayithatha isikhathi eside ngokuphindwe kabili kunenkonzo yezempi ephoqelelwe.

EQuebec, eCanada, idolobha laseBlainville lashaya umthetho othi abantu abangena indlu ngendlu ngezizathu zenkolo kumelwe baqale bathenge imvume. Le mvume yayigunyaza ukungena indlu ngendlu kusukela ngoMsombuluko kuze kube uLwesihlanu kuphela, yayithatha izinyanga nje ezimbili, futhi yayingeke ivuselelwe kungakapheli izinyanga ezingu-12. Ngo-April 17, 2001, ijaji lenkantolo ephakeme eQuebec lakhipha isinqumo sokuthi lo mthetho awusebenzi enkonzweni yasobala yoFakazi BakaJehova. Ijaji lathi oFakazi BakaJehova babengenasibopho sokuthola imvume futhi babengenakubekelwa amahora, izinsuku, izinyanga noma iminyaka emisebenzini yabo engokwenkolo yendlu ngendlu. Wabiza inkonzo yoFakazi BakaJehova ngokuthi “inkonzo yomphakathi yobuKristu” futhi wathi izincwadi zabo “zisingatha izindaba ezibalulekile, ziqukethe izihloko eziphathelene nenkolo, iBhayibheli, izidakamizwa, ukusebenzisa uphuzo ngokweqile, ukufundiswa kwentsha, izinkinga zomshado nesehlukaniso.” Ijaji lathi ukufanisa oFakazi nabathengisi “kuwukuhlambalaza, ukululaza, kuwukuhlukumeza nokunyundela.”

Ngo-February 22, 2001, iNkantolo Ephakeme yaseTbilisi, eGeorgia, yakhipha isinqumo esichitha ukubhaliswa kwezinhlangano ezimbili ezisetshenziswa oFakazi BakaJehova kulelo zwe: i-Union of Jehovah’s Witnesses of Georgia ne-Representation of the Watch Tower Society in Georgia. Inkantolo yakwenza kwacaca ukuthi lesi sinqumo asibenqabeli oFakazi BakaJehova. Kunalokho, inkantolo yathi oFakazi BakaJehova bangaqhubeka nemisebenzi yabo yenkolo, kuhlanganise ukuqhuba imihlangano, ukungenisa izincwadi ezivela kwamanye amazwe nokuqasha noma ukuthenga indawo. Nokho, ontamolukhuni benkolo baye bayishaya indiva inkantolo futhi babahlasela bephindelela oFakazi ngonya kulokho inhlangano ethile yamalungelo abantu eyakubiza ngokuthi “ukubusa ngonya.” Ngo-June 29, 2001, oFakazi BakaJehova bafaka isikhalo eNkantolo Yamalungelo Abantu YaseYurophu ngokungenzi lutho kukahulumeni ukunqanda ubudlova, futhi ngo-July 2 inkantolo yakhipha isinqumo sokuba lesi sikhalo sisingathwe ngokushesha. Okuhle ukuthi ngo-May 30, 2001, uMnyango Wezentela waseGeorgia wakhulula amathani abalelwa kwangu-20 ezincwadi zethu zeBhayibheli, ezazithathwe ngokungemthetho ngo-March 14, 2001. Lezi zincwadi zasakazwa ngokushesha emabandleni aseGeorgia.

Ngo-1997 iFederal Administrative Court eBerlin, eJalimane, yenqaba ukunikeza oFakazi BakaJehova ilungelo elingokomthetho lokuba inhlangano evunyelwe umthetho womphakathi. Lokhu kwenqaba kwakusekelwe emagameni athi oFakazi BakaJehova babengathembekile ngokwanele eMbusweni ngenxa yokungathathi hlangothi kwabo okhethweni lwezombangazwe. OFakazi bafaka isikhalo. Ngo-December 19, 2000, iFederal Constitutional Court yaseJalimane yanquma ukuthi ukuthembeka okunjalo okwedlulele akudingekile. Kodwa-ke, icala labuyiselwa ezinkantolo ezaqula icala ekuqaleni ukuba ziyolalela isicelo sokuqashelwa ngokomthetho, kodwa manje kucatshangelwe ukuthi oFakazi BakaJehova bayawephula yini amalungelo abantu. Muva nje leli cala seligxile ezinkolelweni nasemikhubeni ephathelene negazi, ukukhuliswa kwezingane, ukususa ekuhlanganyeleni nobuhlobo bomkhaya.

Kuze kube muva nje, oFakazi abangaphezu kuka-3 500 eGreece bebenerekhodi lokuthi bayizigebengu ngenxa yokuthi babeboshelwe ukungathathi hlangothi. Ukuba nerekhodi lobugebengu kwakusho ukuthi lab’ oFakazi babengeke baqashwe ezikhundleni zezinkonzo zomphakathi, izinhlangano zezenhlalakahle nasemabhange. Abanye benqatshelwa nezimvume zokusebenza kweminye imikhakha yobuchwepheshe. Manje umthetho osanda kushaywa eGreece uthi lab’ oFakazi bangabe besabhekwa njengababeyizigebengu. Ngokungangabazeki, isinqumo esihle seNkantolo Yamalungelo Abantu YaseYurophu ecaleni lika-Thlimmenos v. Greece eliphathelene nelungelo lomuntu lokwenqaba ukubuthelwa empini ngenxa kanembeza sabeka isisekelo salo mthetho omusha.

INkantolo YeSifunda SaseKobe eJapane yakhipha isinqumo esihle ngo-March 30, 2001, ecaleni elalihilela omunye woFakazi BakaJehova. Kunodade owathunjwa futhi wavalelwa ngenkani izinsuku ezingu-17 ukuze “akhishwe” izimfundiso zakhe ezingokwenkolo. Inkantolo yanquma ukuthi ummangalelwa—ongumfundisi waseBaptist—wayebophe uzungu nowayekade engumyeni walo dade nomkhaya wakubo ukuba bamvalele ngenkani. Ummangalelwa wayalwa ukuba akhokhe isinxephezelo sama-yen angu-400 000 (R32 100).

INkantolo Ephakeme yaseRomania yanquma ngazwi linye emacaleni amabili ukuthi iNhlangano Engokwenkolo yoFakazi BakaJehova iyinkolo eqashelwa ngokomthetho futhi kufanele ijabulele wonke amalungelo umthetho owanika izinkolo. IHhovisi Likanobhala Kahulumeni Kwezenkolo lazama ukushintsha lezi zinqumo kodwa kwanhlanga zimuka nomoya. Ngo-April 2, 2001, iNkantolo Ephakeme yaphinda yagcizelela izinqumo zayo zangaphambili. Kuze kube manje, iHhovisi Likanobhala Kahulumeni Kwezenkolo alikakuqapheli ngokugcwele ukuvunyelwa ngokomthetho koFakazi BakaJehova, naphezu kweziyalezo zeNkantolo Ephakeme zokuba lenze kanjalo.

Ngo-February 23, 2001, ijaji lagcina lilichithile icala lokuvimbela oFakazi BakaJehova eMoscow, eRussia, ngemva kokuphenywa kwecala cishe iminyaka eyisithupha nokuqulwa kwalo enkantolo iminyaka emithathu. Nokho, injabulo yabafowethu yaba ngeyesikhashana ngoba ngo-May 30, 2001, iNkantolo Yedolobha LaseMoscow yachitha isinqumo senkantolo ephansi futhi yayala ukuba icala liqulwe kabusha. Lokhu kuyobe kungokwesithupha kusukela ngo-1996 lapho kudingeka ukuba oFakazi BakaJehova bazivikele emacaleni abathweswa wona ngokungenasizathu.

Isinqumo sango-February 21, 2001, esakhishwa yiNkantolo Ephakeme yasePennsylvania, e-United States, salivikela ngokuqinile ilungelo lesiguli lokuzinqumela ngokuphathelene nomzimba waso kanye namandla ommeli wezokunakekelwa kwempilo ekucindezeleni isinqumo. Lesi sinqumo sasithinta uMaria Duran, owayekwenze kwacaca kaningi ukuthi uyakwenqaba ngokuphelele ukumpontshelwa igazi. Naphezu kokuba uMaria ayethathe izinyathelo zokuqapha, umyeni wakhe ongeyena uFakazi, esekelwa ngodokotela bakaMaria nabaphathi besibhedlela, wathola imvume yenkantolo eyayimbeka njengomnakekeli ezimweni eziphuthumayo, yize uMaria ayebeke othile akholwa kanye naye ngokuqondile njengommeleli wakhe kwezokwelapha. Inkantolo ephakeme yayichitha imvume ephuthumayo yathi ngisho noma umngane womshado, izihlobo nodokotela bemelene noMaria, iziyalezo zakhe ezicacile zezokwelashwa kwakufanele zihlonishwe futhi nommeleli ayemkhethekile aqashelwe.

Kudingeka AmaHholo OMbuso Engeziwe

Emazweni amaningi, ukwakha amaHholo OMbuso kwakunzima kakhulu futhi kuthatha isikhathi eside. Amanye amabandla kwakuphela izinyanga—ngisho neminyaka—ehlanganyela ezindaweni eziqashiwe kuyilapho kusakhiwa ihholo. Kwelinye iHholo LoMbuso elalingaphelanga ezweni elithile e-Afrika, upholi wasendle wakha isidleke emishayweni yophahla. Ngokuhamba kwesikhathi lo pholi waqala ukushaya ikhwelo uhambisana nezingoma zoMbuso, kodwa akukho muntu owayekhathazeka ngalokho. Umsebenzi wawuhamba kancane kangangokuba lo pholi waze wafunda ukulingisa umqhubi weSifundo Se-Nqabayokulinda, ubiza ngisho nabafowethu nodade ngamagama! Ekugcineni, iHholo LoMbuso laqedwa, futhi kwadingeka ukuba upholi ufune enye indawo.

Namuhla, ngenxa yohlelo olusha oluhle lokwakha, amaHholo OMbuso aseqedwa ngokushesha okukhulu. Phela, emazweni amaningi asathuthuka, amaHholo OMbuso manje akhiwa futhi anikezelwe ngemva nje kwamasonto amathathu noma amane! E-Afrika iyodwa, kwakhiwa amaHholo OMbuso amasha angu-1 074 phakathi nonyaka wenkonzo odlule—okuyisilinganiso samane ngosuku!

Umgomo walolu hlelo olusha lokwakhiwa kwamaHholo OMbuso ukabili. Okokuqala, ukuba kutholakale izindawo ezanele zokuhlanganyela. Igatsha laseNingizimu Afrika liyabhala: “Lena yintuthuko enhle kakhulu esinomuzwa wokuthi iyophumela ekwakhiweni kwamaHholo OMbuso amaningi emazweni lapho edingeka kakhulu khona.” Okwesibili, ukunakekela izidingo zesikhathi esizayo ngokuhlela umsebenzi wokwakha kusetshenziswa oFakazi bendawo abafanelekayo. Ngokwesibonelo, eBenin, uhlelo lokwakha selwenziwa abantu bendawo kuphela futhi bayokwazi ukunakekela izidingo zamaHholo OMbuso esikhathini esizayo.

Ngaphandle kwe-Design/Build Office eBrooklyn, kunamaHhovisi Esifunda Okwakhiwa KwamaHholo OMbuso amahlanu anikeza usizo lokuhlela umsebenzi emagatsheni aseMpumalanga Yurophu, e-Afrika, e-Asia, e-Oceania, eMelika Ephakathi naseNingizimu Melika, kanye naseziqhingini zaseCaribbean. La mahhovisi asebenzelana eduze namaKomiti Egatsha ukuze asize ekusebenziseni ngokugcwele iziqondiso namalungiselelo atholakalayo. Ngokwesibonelo, kumiswa uMnyango Wokwakhiwa KwamaHholo OMbuso egatsheni ngalinye ukuze uxhumanise umsebenzi wokwakha kuleyo nsimu. Lo mnyango usiza namabandla lapho ekhetha indawo futhi uye waklama amapulani okwakha asekelwe ezintweni nasezindleleni zokwakha ezitholakala kuleyo ndawo.

Emazweni angu-92 lapho ukuntuleka kwezimali okukhulu nezisebenzi ezinamakhono kwake kwathiya khona umsebenzi wokwakha, sekunezisebenzi zokuzithandela zesikhashana nezasikhathi sonke ezingaphezu kuka-4 000 ezakha amaQembu Okwakha AmaHholo OMbuso angu-352 asebenza sikhathi sonke. Okuye kwaphumelelisa la maqembu nakakhulu ukumiswa kwezisebenzi zokwakha amaHholo OMbuso, okuwumkhakha omusha wenkonzo ekhethekile yesikhathi esigcwele yabazalwane abafanelekayo abathathwe emazweni athile. Ngaphezu kwalokho, izisebenzi zamazwe ngamazwe ezingu-152 ziqeqesha abazalwane bendawo ukuba bafeze izindima eziyinhloko ohlelweni lokwakha. Yiqiniso, ukwakha iHholo LoMbuso kuwumsebenzi webandla, ngakho amalungu ebandla ngokuzithandela akha iqembu elikhulu lezisebenzi zokuzithandela.

Abantu basabela kanjani kulolu hlelo olusha lokwakha? ETrujillo, eVenezuela, kusanda kwakhiwa iHholo LoMbuso lokuqala eSara Linda. Ekhala izinyembezi zenjabulo, ummemezeli othile wathi: “Kuthinta inhliziyo ngempela ukuthi uJehova uye wasikhumbula. Idolobhana lakithi alikho ngisho nasebalazweni!”

Udade othile eRio de Janeiro, eBrazil, washukumiseleka ukuba abhale: “Sekuphele iminyaka eyishumi ngihamba ibanga elingamakhilomitha amane ngiya emihlanganweni, ngiwela ibhuloho lezinyawo ngisho nalapho ngikhulelwe. Ekugcineni, isifiso sami sagcwaliseka. SekuneHholo LoMbuso endaweni yakithi! Abantu abaningi abafundelwa iBhayibheli sebeqalile kakade ukuba khona emihlanganweni. Ubaba, owayefundelwa esikhathini esidlule kodwa kamuva wangiphikisa, akakaze aphuthe ngisho nakanye emhlanganweni kusukela kwanikezelwa ihholo. Uphinde waqala ukufundelwa kuleli sonto.” Umuntu othile ongeyena uFakazi wavuma: “Ngineminyaka engu-60 ubudala kodwa ngiyayiqabuka into enje! OFakazi basebenza ngokushesha nangenjabulo ndawonye. Ngingumeselandi womkhandlu-dolobha, futhi uma umsebenzi uqhubeka isikhathi eside, uye uzwe othile ethi: ‘Mhlawumbe kufanele sicele oFakazi BakaJehova basisize!’”

Umdala othile e-Ukraine uthi: “Sakwazi ukwakha iHholo LoMbuso elivamile ngenyanga nje eyodwa, ngakho asizange siphazamiseke isikhathi eside emithwalweni yethu yomkhaya neyebandla.” Udade walapho uyanezela: “Sijabule kakhulu. Sizibonele ngawethu ukuthi uJehova ubasiza kanjani abantu bakhe. Ngaphambili, ngenxa yokuswela izimali, sasingenalo ithemba lokuba neHholo LoMbuso elithi thina.”

Abantu abathakazelayo eMalawi bamagange ukuhlanganyela nathi uma kunendawo efanelekayo yokuqhuba imihlangano. IBandla LaseNafisi liyabika: “Manje sineHholo LoMbuso elihle elinikeza ubufakazi obuhle. Ngenxa yalokho, sekulula ukuqala izifundo zeBhayibheli uma sishumayela. Abantu kuyo yonke indawo bayamangala. Esikoleni, emsebenzini noma emizini yabo, iHholo LoMbuso lethu seliyindaba egudwini.”

Abaholi bomphakathi eMozambique nabo bahlabeke umxhwele kakhulu ngohlelo lokwakhiwa kwamaHholo OMbuso. Induna ethile yacelwa indawo yokwakha iHholo LoMbuso. Lapho ikhipha imvume, yaphendula: “Ngezwa ngokwakhiwa kwamaHholo OMbuso kwezinye izindawo futhi ngakhathazeka, ngoba akukho nelilodwa endaweni yami. Ngiyanibonga boFakazi BakaJehova, ngokuhlela ukwakha iHholo LoMbuso lethu!”

Imisebenzi yokwakha ehlelwe kahle inaliphi ithonya emoyeni wokuzithandela webandla? Ilungu leqembu elakhayo eZimbabwe liyalandisa: “Ngemva kokuqeda amahora sihamba emvuleni, safika esizeni seHholo LoMbuso emaphandleni. Abafowethu nodadewethu ababelindile babebuthene ngaphansi kwesihlahla botha umlilo. Nakuba lalina, basibingelela bemomotheka. Lapho belungiselela ukufika kwethu, abangu-60 ebandleni bemba imigodi yesisekelo sesakhiwo. Babeqalé ngehora lesine entathakusa ngayizolo baqeda ngehora lesithupha kusihlwa.”

Kulo leli zwe elifanayo, iBandla LaseZongoro lalingenalo iHholo LoMbuso. UNathan Muchinguri ubelokhu ekhonza kuleli bandla kusukela abhapathizwa ngo-1924. Iminyaka eminingi, wahumushela izincwadi zeBhayibheli olimini lwesiShona. Ngenxa yokuthi wayengahlali eBethel, ihhovisi legatsha lasikisela ukumsiza ngezindleko zokuphila, kodwa wala. Kodwa-ke, wazwakalisa isifiso sakhe sokuhlanganyela eHholo LoMbuso ngaphambi kokuba aqede inkambo yakhe yasemhlabeni. Ngo-April 8, 2001, uMfoweth’ uMuchinguri oneminyaka engu-93 ubudala wasibona sifezeka isifiso sakhe. IBandla LaseZongoro lahlanganyela eHholo LoMbuso lalo elisha ngokokuqala ngqá. Lesi senzakalo sasiwumkhosi weSidlo SeNkosi Sakusihlwa.

Kusukela lolu hlelo lokwakha lwaqala ngo-November 1999, kuye kwakhiwa amaHholo OMbuso amasha angu-2 097 emazweni angu-92—isilinganiso sangu-22 ngesonto! Iminikelo yothando yabafowethu emhlabeni wonke yenza kube ‘nokulingana,’ ukuze ‘[ibandla] elinokuningi lingabi nokuningi kakhulu, [nebandla] elinokuncane lingabi nokuncane kakhulu.’ (2 Kor. 8:14, 15) Ingabe uJehova uyawubusisa lo mkhankaso womhlaba wonke? Ake ucabange: Phakathi nenyanga nje eyodwa kwakhiwe iHholo LoMbuso elinethezekile kweziningi zalezi zindawo, inani lababa khona emihlanganweni ngokuvamile liphindeka kabili.

Ama-video Amathathu Okwelapha Nokuhlinza Ngaphandle Kwegazi

I-Audio/Video Services, kanye nabafowethu baseJalimane nakwamanye amazwe baye bakhiqiza uchungechunge lwama-video amathathu abonisa ukuba nengqondo nokuphumelela kokwelapha nokuhlinza ngaphandle kwegazi. Kuwo womathathu la ma-video, odokotela abahlinzayo abaziwayo baqhathanisa ukuphumelela kwezindlela zokwelapha ngaphandle kwegazi nezinqubo ezisebenzisa igazi. I-video yokuqala kulolu chungechunge inesihloko esithi Transfusion-Alternative Strategies—Simple, Safe, Effective. Yaklanyelwa ngokukhethekile odokotela nabantu abafundela ubudokotela. Kusetshenziswa imifanekiso ye-computer ukuze kuboniswe ukusebenza kwezakhi zegazi.

I-video yokuqala yaqedwa ngesikhathi esifanele ukuze ingenele umkhosi waminyaka yonke wama-34 we-U.S. International Film and Video Festival. Sekukonke, kwakunama-video nezithombe ezingu-1 500 zasemazweni angu-33. I-video ethi Transfusion Alternatives yahlaziywa ngokwemikhakha emithathu. Kwemibili yale mikhakha—owoBuciko Bokucwaninga noBuchwepheshe Bemfundiso—le video yathola indawo yesibili futhi yaklonyeliswa nge-Silver Screen Award. Emkhakheni wesithathu, weZindaba Zamuva, le video yaphuma phambili futhi yathola umklomelo we-Gold Camera Award. Le miklomelo ibonisa ukuthi ochwepheshe bezamabhayisikobho bayaliqaphela izinga, ukunemba nobuchwepheshe bale video, okuqokomisa nobuqiniso bomyalezo wayo.

I-video yesibili inesihloko esithi Transfusion-Alternative Health Care—Meeting Patient Needs and Rights. Yaklanyelwa ngokukhethekile izintatheli zezokwelapha, izikhulu zezempilo, izisebenzi zezenhlalakahle namajaji. Njengoba isihloko sayo sibonisa, lolu hlelo lucabangela indlela yokunakekela izidingo zokwelashwa zeziguli kuyilapho kuqashelwa namalungelo azo angokomthetho. Ngaphezu kwalokho, kuboniswa ukuthi izinqubo zokuhlinza ngaphandle kwegazi zonga imali.

I-video yesithathu kulolu chungechunge inesihloko esithi No Blood—Medicine Meets the Challenge. Njengoba iklanyelwe ngokukhethekile umphakathi uwonke, le video kakade isibonisiwe eziteshini zethelevishini e-United States. Akungabazeki ukuthi imibono emihle evezwa ochwepheshe abangebona oFakazi okwaxoxwa nabo kule video iyoba usizo olukhulu ekufundiseni abantu ngosizo lokuhlinza ngaphandle kwegazi futhi kunciphise ukucabanga okungekuhle kwabantu abangenalwazi.

Izakhiwo Ezintsha Zamagatsha Zidumisa UNkulunkulu

Nansi imibiko yamagatsha amahlanu anikezelwa phakathi nonyaka odlule wenkonzo. Ngeso lengqondo, ake siqale siye eNingizimu Melika, lapho kwanikezelwa khona izakhiwo ezintsha zamagatsha eVenezuela nase-Uruguay. Sibe sesiya e-Ukraine, eMpumalanga Yurophu, lapho umsebenzi woFakazi BakaJehova wawuvinjelwe khona iminyaka engaphezu kwengu-50. Ngemva kwalokho, sizoya eMalawi, eningizimu ye-Afrika, lapho oFakazi bakhuthazela khona iminyaka eminingi bevinjelwe futhi beshushiswa. Ekugcineni, sizoya eBarbados, isiqhingi esihle saseCaribbean.

EVENEZUELA: Ngo-March 3, 2001, izivakashi ezingaba ngu-1 600 ezazivela emazweni angu-22 zahlangana endaweni enamagceke alungiswe kahle, amakhilomitha angu-80 entshonalanga yenhloko-dolobha, iCaracas, ukuzonikezela isakhiwo esisha segatsha. Izulu lomisile ngo-March, futhi iziNtaba Zase-Aragua zazomile, kodwa ngenxa yokunisela ngenkasa ngamanzi asemthonjeni, utshani nezihlahla zesundu okuzungeze izakhiwo zegatsha kwakuncwaba futhi kuluhlaza. Izihambeli—ezazivunule ziconsa futhi eziningi ziphethe amakhamera—zazihamba zibuka amagceke futhi zingena ezakhiweni, zincoma futhi zijabule.

Ihhovisi legatsha lokuqala laseVenezuela lavulwa ngo-September 1946, lapho kwakusenabamemezeli abangu-19 kuphela ababeshumayela izindaba ezinhle kulelo zwe. Phakathi neminyaka engu-50 eyalandela, indawo yaba ncane ezakhiweni eziningi ezihlukene zegatsha ngenxa yokwanda kwezidingo. Igatsha elikhona manje linakekela abamemezeli abangu-88 541 bezindaba ezinhle eVenezuela.

Abaningi ababekhona uma kunikezelwa izakhiwo babehlanganyele emsebenzini weminyaka eyisithupha wokwakha lezi zakhiwo. Isisebenzi esithile samazwe ngamazwe sathi: “Kwakukhuthaza kakhulu ukubona ukuthi abafowethu babezimisele ukuhamba amahora amaningi ukuyohlanganyela emsebenzini wokwakha. Ngokwesibonelo, iqembu lakwelinye ibandla laqasha ibhasi, lasuka ngo-11 ebusuku, lahamba ubusuku bonke laze layofika ngo-6 ekuseni, ladla ukudla kwasekuseni, lasebenza nathi usuku lonke, labe seligibela ibhasi lithatha uhambo lwamahora angu-7 lokubuyela ekhaya.” Ubudlelwane obabukhona phakathi nokwakha babubuhle, njengoba abafowethu babesebenza ndawonye ngobunye.—IHu. 133:1.

UGerrit Lösch weNdikimba Ebusayo wanikeza inkulumo yokunikezela izakhiwo eyayinesihloko esithi “Ukwanda Okuletha Udumo KuJehova.” Ngakusasa, inani eliyingqopha-mlando loFakazi nabantu abathakazelayo abangu-113 260 ababevela kuzo zonke izingxenye zezwe lahlangana edolobheni laseValencia ukuzolalela esinye isimiso esivusa amadlingozi, kuhlanganise nokubukezwa kwesimiso sokunikezelwa kwegatsha.a

E-URUGUAY: “Yeka abantu abakahle kangaka! Ngempela kuyajabulisa ukubona abantu abaningi kangaka, abesilisa nabesifazane, besebenza ngokuzikhandla futhi bejabule kangaka. Lokhu kungenziwa kuphela uma ninezisusa ezinhle futhi ningafuni nzuzo yezinto ezibonakalayo. Siyanihalalisela, qhubekani nomsebenzi omuhle!” Lawa amazwi omuntu oyedwa kwabaningi abavakashela izakhiwo zegatsha zase-Uruguay.

Umoya wentshiseko nokubambisana owaboniswa oFakazi BakaJehova phakathi nomsebenzi wokwakha, abantu bakaJehova baye bawubonisa naphakathi neminyaka eminingi benza umsebenzi wabo wokufundisa. Eminyakeni engu-60 edlule, kwakunoFakazi abambalwa e-Uruguay, kuhlanganise namaphayona ayisithupha aseJalimane, ayehambela lonke izwe ngamabhayisikili. Manje oFakazi BakaJehova e-Uruguay bayinhlangano eqinile, eyaziwayo nehlonishwa kakhulu, lapho ngokwesilinganiso, ummemezeli oyedwa eshumayeza khona izakhamuzi ezingu-287, futhi ibandla ngalinye linabadala ababalelwa kwabahlanu. Yiqiniso, ukwanda kuletha isidingo sezakhiwo zegatsha ezinkudlwana.

Phakathi nesimiso sokunikezelwa kwegatsha ngo-March 31, 2001, kwabongwa oFakazi abaningi ababenikele ngamakhono nolwazi lwabo kulo msebenzi. Isimiso sasihlanganisa nokuxoxa nabaningi ababeyizithunywa zevangeli ababeke bakhonza e-Uruguay. Babefiké bevela emazweni akude bezonikezela igatsha. Inkulumo yokunikezela izakhiwo yanikezwa nguMfoweth’ uLösch. Wagcizelela ukuthi isizathu esiyinhloko somsebenzi wokushumayela ukuletha udumo nenkazimulo kuJehova.b

E-UKRAINE: Sekuyiminyaka engaphezu kwengu-110 kunabamemezeli bezindaba ezinhle e-Ukraine. Kodwa-ke, kuleli shumi leminyaka elidlule baye banda ngokushesha kakhulu. Ukwanda okungamaphesenti angu-530 enanini labamemezeli phakathi nawo-1990 kwabangela isidingo esiphuthumayo sezakhiwo zegatsha. Ukuze kuhlangatshezwane nalesi sidingo, kwakhethwa isiza esihle sokwakha igatsha esisemaphandleni esingaba amakhilomitha amahlanu ukuya enyakatho yeLvov. Lesi sakhiwo sinamagumbi okuhlala angu-104, amahhovisi esimanje, ikhishi, ilondolo, igalaji nendawo yokugcina izincwadi.

Ngemva kweminyaka emibili nezinyanga ezintathu abafowethu bethole imvume yokwakha, base beguqule lesi siza esasiyikamu lentsha ngaphambili saba isikhungo esihle sezakhiwo zegatsha. Lisehlathini abafowethu ababelisebenzisela ukuqhuba imihlangano phakathi neminyaka lapho umsebenzi usavinjelwe.

Iziphathimandla zendawo zazifuna ukuba umgwaqo oya egatsheni ugandaywe ngamatshe. Abafowethu baqasha inkampani yokwakha yendawo ukuba yenze lo msebenzi, bethi lo mgwaqo, ongaba amakhilomitha angu-1,2 ubude, kwakufanele uqedwe ngaphambi kokuphela kuka-October 2000. Lokhu kwakungenxa yokuthi ngokuvamile liqala ukukhithika ngo-November. Le nkampani ayikwazanga ukuqeda ngesikhathi okwakuvunyelwene ngaso. Njengoba isimo sezulu sasisavuma ukuba kwakhiwe umgwaqo, abafowethu banquma ukusiza ekuqedeleni umsebenzi. Wonke umuntu wasebenza ngokuzikhandla, futhi ekugcineni ngoMgqibelo, ngo-December 16, 2000, umgwaqo wawusuqediwe. Ngabo lobo busuku lakhithika kuyo yonke indawo. Uma ubuza izakhamuzi zendawo ukuthi kungani ikwindla yonyaka ka-2000 yayifudumele futhi iyinde ngokungavamile, baphendula bathi: “Kungenxa yokuthi oFakazi BakaJehova kwakufanele baqede ukwakha umgwaqo.”

Isimiso sokunikezela igatsha sasingo-May 19, 2001. Kwakukhona abafowethu nodadewethu abavela emazweni angu-35 esimisweni, esasinezinkulumo ezethulwa nguTheodore Jaracz noGerrit Lösch beNdikimba Ebusayo. Ngosuku olwalandela isixuku sabangu-72 023 sahlangana ukuzolalela isimiso esikhethekile ezinkundleni ezinkulu eLvov naseKiev. Kwakukhona abaningi ababekhonze amashumi eminyaka ngaphansi kokuvinjelwa. Babejabule ukubona igatsha elihle kangaka, elizoletha udumo olukhulu kuJehova.c

EMALAWI: Ntambama selizoshona ngoMgqibelo, ngo-May 19, 2001, oFakazi baseMalawi abangaphezu kuka-2 200 nezivakashi ezingu-200 ezivela emazweni angu-21 bahlangana ngaphansi komthunzi owenziwe ngezingodo ezinde zikagamthilini, uqalo notshani. Njengoba kwase kuqala ukuhwalala, kwakunzima ukubona amagama eculweni lapho kuhlatshelelwa ingoma yokuphetha. Emi epulatifomu enhle, umbhidisi wahola izilaleli ekuculeni iNgoma 56 ngendlela aboMdabu abenza ngayo—ngaphandle kwezinsimbi zomculo nangezindlela zephimbo ezine. Izilaleli zazingawadingi amaculo; zaziwazi ngekhanda amagama engoma. Izivakashi ezivela kwamanye amazwe zavukwa usinga lapho zilalele lezi zinceku ezithembekile zikaJehova, eziningi ezineminyaka engu-40 noma ngaphezulu zibhapathiziwe, futhi ezashushiswa kanzima ngenxa yokholo lwazo.

Ekuseni ngalolo suku ngesikhathi abafowethu nodade bebona izakhiwo ezintsha zegatsha, babevele basho ngamaphimbo bahlabelele izingoma zoMbuso futhi bavayizele bonke ababehlangana nabo endleleni. Ngaphambi kwalesi senzakalo, abaphathi besikhumulo sezindiza babevumile ukudlala i-Kingdom Melodies uMqulu 1 ngemibhobho yasesikhumulweni ukuze bamukele izivakashi ezazivela emhlabeni wonke. Yeka ukuthi kwakuyindlela efudumele nengokwasezulwini kangakanani ezamukelwa ngayo! Namanje lo mculo usadlalwa esikhumulweni sezindiza.

USébastien Johnson, owayehambele elaseMalawi njengombonisi wamagatsha, wabuza umbuzo othi “Ingabe Uzibonakalisa Unokubonga Enkonzweni KaJehova?” Njengoba ayehlola uMika 6:6-8, uMfoweth’ uJohnson wabonisa ukuthi akukukhulu lokho uJehova akufunayo kithi. Isikhulumi sakhuthaza ukufunda iBhayibheli nsuku zonke nokusebenzisa izimiso zalo ezinhle. UGuy Pierce weNdikimba Ebusayo, wagxilisa inkulumo yakhe yokunikezela igatsha esihlokweni esithi “Thokoza Ngalokho UJehova Akudalayo.” UMfoweth’ uPierce wathi: “Umsebenzi wenu nomlando wenu omude wenkonzo yokwethembeka uye wabeka isisekelo sokwanda esikubonayo namuhla. Qhubekani nenza konke okusemandleni enkonzweni yenu engcwele kuNkulunkulu oPhezukonke, uJehova.”

NgeSonto, ngo-May 20, enkundleni yezemidlalo eLilongwe, abantu abangu-17 378 ababekhona bakhunjuzwa ukuthi inani labamemezeli eMalawi lalicela ku-30 000 lapho umsebenzi uvunyelwa ngokomthetho ngo-1993. Namuhla, kunoFakazi ababalelwa ku-50 000 eMalawi! Yebo, ukunikezelwa kwesakhiwo esisha saseBethel kwakuyisikhathi okufanele sikhunjulwe, usuku lokunqoba kukaJehova!d

EBARBADOS: Igatsha elisha laseBarbados kanye neHholo LoMbuso elingumakhelwane kusegcekeni elinotshani nezitshalo eziqhakazayo, esizeni esiphezulu esingaba yihektare elilodwa ubukhulu, esengamele iCaribbean Sea eseduze. Lezi zakhiwo ezinhle, ezakhiwa ngezinyanga ezingu-18, zisesifundeni esithule saseProspect, eSt. James, amakhilomitha angaba mane ukusuka eBridgetown, inhloko-dolobha yeBarbados.

Lesi sakhiwo esisha segatsha sinomkhaya waseBethel wabantu abayishumi. Sinamagumbi okuhlala angu-8, amahhovisi nendawo yokudlela. Kukhona neHholo LoMbuso elinezihlalo ezingu-275. Lezi zakhiwo zithatha indawo yegatsha langaphambili eliqhele ngemizuzu eyishumi uma uhamba ngemoto enkabeni yeBridgetown. Lapho lezi zakhiwo zangaphambili—ezisendaweni ethule enkabeni yenhloko-dolobha yeBarbados—ziqala ukusetshenziswa ngo-1969, ingqikithi yabamemezeli eziqhingini eziyisithupha ezinkulu nedlanzana leziqhingi zaleli gatsha yayingaba ngu-1 200. Ngonyaka ka-2000, lelo nani lase lenyukele kubamemezeli abangu-2 390 emabandleni angu-25 kanye neqembu elingalodwa. Ngaleso sikhathi isakhiwo segatsha sase sisincane kakhulu ukuthi singanakekela inani elandayo lamabandla, futhi le ndawo eyayithule edolobheni yase iyisifunda sezentengiselwano esinesiyaluyalu.

NgoMgqibelo, ngo-June 2, 2001, izimenywa ezingu-676 ezivela eziqhingini zegatsha laseBarbados nakwamanye amazwe angu-15 zajabulela isimiso sokunikezelwa kwegatsha, esasihlanganisa nomlando womsebenzi eBarbados. Ingxenye evelele yesimiso kwakuyinkulumo ethi “Ukwenza Inhliziyo KaJehova Ithokoze,” eyanikezwa ngemfudumalo nguJohn E. Barr weNdikimba Ebusayo. Ukuze kuzuze labo ababengakwazanga ukuba khona esimisweni sokunikezelwa kwegatsha, kwaba nomhlangano okhethekile ngakusasa. Kwakukhona abangu-3 332.e

Izakhiwo zamagatsha ezinjengalezi emhlabeni wonke zinezisebenzi eziyizikhonzi ezimisiwe ezingu-20 133. Zonke zingamalungu e-Order of Special Full-Time Servants.

[Imibhalo yaphansi]

[Izithombe ekhasini 6]

IMihlangano Yesigodi ‘Yabafundisi Bezwi LikaNkulunkulu’ yahlanganisa nokukhululwa kwe-“Nguqulo Yezwe Elisha” ngesiShayina esivamile kanye nesenziwe lula, eHong Kong

[Izithombe ekhasini 11]

Kwahanjiswa cishe izigidi ezingu-500 zamakhophi e-“Kingdom News” No. 36 emhlabeni wonke

[Isithombe ekhasini 13]

INkantolo Yamalungelo Abantu YaseYurophu, eStrasbourg, eFrance

[Isithombe ekhasini 21]

UMfowethu noDade Muchinguri phambi kweHholo LoMbuso labo elisha

[Isithombe ekhasini 22]

Imiklomelo emithathu eyatholwa yi-video ethi “Transfusion-Alternative Strategies—Simple, Safe, Effective”

[Izithombe ekhasini 28, 29]

Amagatsha asanda kunikezelwa

(1) EMalawi

(2) EBarbados

(3) E-Uruguay

(4) EVenezuela

(5) E-Ukraine