Incwadi Evela ENdikimbeni Ebusayo
NJENGOBA sesiqala ikhulu lama-21, siyajabula ngonibhalela, nina ‘nhlangano yonke yabafowethu’ emhlabeni wonke, ukuze sinincome ngokuzikhandla kwenu. (1 Pet. 2:17) Eminyakeni engaba ngu-2 000 edlule, uJesu wabuza: “Lapho iNdodana yomuntu ifika, ingabe ngempela iyoluthola ukholo emhlabeni?” (Luka 18:8) Umsebenzi wenu wentshiseko phakathi nonyaka wenkonzo odlule uwuphendula ngoyebo ocacile umbuzo kaJesu! Abanye benu baye bagconwa futhi bahlekwa usulu ngenxa yokholo lwabo. Ezindaweni eziningi, nikhuthazelela izimpi, izinhlekelele, izifo, noma indlala. (Luka 21:10, 11) Ngenxa yokuzikhandla kwenu emisebenzini emihle, uJesu ‘usaluthola ukholo emhlabeni.’ Ngokuqinisekile kunenjabulo ezulwini ngenxa yalokho!
Siyazi ukuthi akulula ukukhuthazela. Cabangela ukuvivinywa kwabafowethu kwelinye izwe lasentshonalanga ye-Asia. Ukuphathwa koFakazi BakaJehova ngobudlova kuyinsakavukela kulelo zwe. Muva nje, amaphoyisa ahlakaze umhlangano onokuthula wabantu abangaba ngu-700. Ukuvalwa kwemigwaqo kwavimba abanye abangu-1 300 bangakwazi ukufika emhlanganweni. Iqembu labantu ababegqoke izifihla-buso, abanye babo ababengamaphoyisa, langena endaweni yomhlangano, lashaya izihambeli eziningi zomhlangano, futhi lashisa indawo eyayizosetshenziselwa ukuqhuba umhlangano. Kwezinye izimo, ontamo lukhuni benkolo baye bashaya abafowethu ngonya ngamawisa afakwe izipikili.
Ukuhlaselwa ngale ndlela kuyashaqisa kodwa akusona isimanga. Umphostoli uPawulu waphefumulelwa ukuba abhale: “Bonke labo abafisa ukuphila ngokuzinikela kokuhlonipha uNkulunkulu ebuhlotsheni noKristu Jesu nabo futhi bayoshushiswa.” (2 Thim. 3:12) Ekhulwini lokuqala, amaKristu akhuthazelela ukushushiswa ngokomzimba nokukhulunyelwa kabi, futhi amanye aze abulawa. (IzE. 5:40; 12:2; 16:22-24; 19:9) Kwenzeka okufanayo ekhulwini lama-20, futhi akungabazeki ukuthi kuyoqhubeka kunjalo ekhulwini lama-21. Noma kunjalo, uJehova uyasitshela: “Asikho isikhali esenzelwa wena esiyakuphumelela.” (Isaya 54:17) Yeka ukuthi lokhu kuyisiqinisekiso esimangalisa kangakanani! Ngempela, siyigugu elikhulu kuJehova kangangokuba ngomprofethi wakhe uZakariya, wathi: “Othinta nina uthinta inhlamvu yeso [lami].” (Zak. 2:8) Izitha zabakhulekeli bakaJehova azisoze zanqoba ekugcineni. Ukukhulekela okuhlanzekile kuyonqoba!
Ngokwesibonelo, ezweni esikhulume ngalo ngenhla, oFakazi BakaJehova bajabulela amanani amabili amasha aphakeme abamemezeli phakathi nonyaka wenkonzo ka-2001. Yebo, naphezu kobunzima, abafowethu bakulelo zwe bayakhuthazela, njengoba kunjalo kuzo zonke izindawo. Emhlabeni wonke phakathi nonyaka wenkonzo odlule, kwabhapathizwa abangu-5 066 isonto ngalinye njengesibonakaliso sokuzinikezela kwabo kuJehova. Bekanye nathi sonke, laba abasanda kuhlanganyela bazimisele ‘ukuma bephelele futhi benokuqiniseka okuqinile kuyo yonke intando kaNkulunkulu.’—Kol. 4:12.
Cabangela nezenzakalo zamuva eGreece. Naphezu kweminyaka eminingi yokuphikisa okushubile kweSonto LamaGreki Lobu-Orthodox, oFakazi BakaJehova manje sebeqashelwa uhulumeni “njengenkolo eyaziwayo.” Incwadi ebagunyazayo iphawula nokuthi isakhiwo saseBethel eGreece “siyindawo engcwele nenikelwe ekukhulekelweni kukaNkulunkulu.” Siyajabula nokunazisa ukuthi phakathi nonyaka wenkonzo odlule, izinkantolo ziye zakhipha izinqumo ezingokomthetho ezivuna ukukhulekela kwethu eBulgaria, eCanada, eJalimane, eJapane, eRomania, eRussia nase-United States. Yeka indlela esimbonga ngayo uJehova ngokugcina umnyango oholela enkonzweni uvulekile kulawo mazwe!
Njengoba sicabangela izindlela uJehova abasekela ngazo abantu bakhe phakathi nalezi zinsuku zokugcina, siyaqaphela ukuthi unguMngane omkhulu kakhulu esingaba naye. Siyajabula ngobuhlobo esinabo naye, siyazi ukuthi uyasithanda, uyasifundisa futhi uyasiqondisa. Yebo, siyoqhubeka sibhekana nokuvivinywa kokholo. Kodwa ukholo olungantengi kuJehova luyosiphasa. UJakobe wabhala: “Kubhekeni njengenjabulo yodwa, bafowethu, lapho nihlangabezana nokulingwa okuhlukahlukene, njengoba nazi ukuthi lesisimo esivivinyiwe sokholo lwenu siveza ukukhuthazela.” (Jak. 1:2, 3) Ngaphezu kwalokho, ukukhuthazela kwethu kubonisa ukuthi siyamthanda uJehova, futhi lokhu kusilethela injabulo enkulu! Bafowethu abathandekayo, qinisekani ngokuthi uJehova uyosekela ngamunye wethu. Uma sihlala sithembekile, akungabazeki ukuthi uyosisiza ukuba singene ezweni elisha. Ufuna ukuba siphumelele.
Ngakho, siyaninxusa bafowethu nodadewethu, abasha nabadala, ukuba nihlale nicabanga ngezibusiso ezimangalisayo ezingaphambili. Kwangathi isimo sethu sengqondo singaba njengesomphostoli uPawulu, owabhala: “Ngicabanga ukuthi izinhlupheko zenkathi yamanje azilutho uma ziqhathaniswa nenkazimulo ezokwambulwa kithi.” (Roma 8:18) Ncikani kuJehova lapho nibhekene nobunzima banoma yiluphi uhlobo. Khuthazelani, ningavumi ukuyeka. Anisoze nanini nazisola. IZwi likaNkulunkulu liyasiqinisekisa: “Olungileyo uzakuphila ngokukholwa kwakhe.”—Hab. 2:4.
Abafowenu,
INdikimba Ebusayo YoFakazi BakaJehova