Uma Ubonisa Ukuqonda “Uyophumelela”

1-2. Kuyini ukuqonda, futhi kungasisiza kanjani?

KWAKE kwenzeka yini othile wangakubonisa inhlonipho owawulindele ukuba akubonise yona? Kwake kwenzeka yini othile wakwahlulela ngokungeyikho noma wenza into ethile eyakuphatha kabi? Noma wake wabhekana yini nesimo esakwenza wesaba? Uma lokho kwake kwenzeka, cishe uyazi ukuthi kungaba nzima kangakanani ukwenza noma ukusho into efanele ezimweni ezinjalo. Siyajabula ngokuthi iBhayibheli lisitshela ngemfanelo engasisiza ezimweni ezinjengalezo nakwezinye eziningi: ukuqonda.

² Ukuqonda ukukwazi ukubona isimo njengoba sinjalo—ukubona ngale kwalokho okusobala. Kusenza siqonde ukuthi kungani into ethile yenzekile noma kungani othile enze ngendlela enze ngayo. Ngenxa yalokho, ukuqonda kungasenza senze ngokuhlakanipha, senze into enengqondo. Ngokwesibonelo, kungasisiza ‘silawule izindebe zethu,’ sazi nokuthi kunini lapho kufanele ‘sithule’ khona. (IzAga 10:19; IHu. 4:4) Kungasisiza silawule intukuthelo yethu, sishalazelele namaphutha abanye. Kungasisiza nokuba samukele iseluleko nokulungiswa. (IzAga 19:20) Lapho sibonisa ukuqonda, asigcini nje ngokujabulisa uJehova, kodwa sizuzisa nathi nalabo abathintwa yilokho esikushoyo nesikwenzayo. Kuba njalo nakakhulu lapho sibhekene nesimo esisenza silingeke ukuba siphendule ngokhahlo noma sihluleke ukulawula imizwa yethu. Ake sixoxe ngezibonelo ezintathu eziseBhayibhelini ezibonisa indlela ukuqonda okungasisiza ngayo sihlale sithobekile, sizolile futhi sithembele ngokuphelele kuJehova.

THOBEKA KUNOKUBA UQHOSHE

3. Wayengubani uNahamani?

³ Ukuze siphumelele ngempela, kudingeka sigweme ukuqhosha. (1 Pet. 5:5) Ukuqonda kungasisiza ukuba senze kanjalo. Kanjani? Cabanga ngesibonelo sikaNahamani. Wayehlala eSiriya, isizwe esisenyakatho yakwa-Israyeli. UNahamani wayeyindoda eyaziwayo, induna yempi yaseSiriya. Noma kunjalo, wayenesifo sesikhumba esibi kakhulu—uchoko.—2 AmaKh. 5:1.

4. UNahamani wakubonisa kanjani ukuqonda ngezinga elithile?

⁴ UmkaNahamani wayenencekukazi eyintombazanyana yakwa-Israyeli, eyamtshela ukuthi kwa-Israyeli kwakunomprofethi owayengelapha ukugula komyeni wakhe. (2 AmaKh. 5:​2, 3) UNahamani wayengase athi, ‘Ingabe intombazanyana ephansi, eyisigqila evela esizweni esiyisitha ingangitshela into engangisiza?’ Kodwa uNahamani wabonisa ukuqonda ngezinga elithile. Kunokuba aqhoshe azibe konke lokhu okwakushiwo intombazanyana, ngokuthobeka wawalalela amazwi ayo. Wathola imvume enkosini yaseSiriya yokuba ahambe aye kwa-Israyeli ayolashwa ukugula kwakhe.—2 AmaKh. 5:​4, 5.

5. Yini eyenzeka kuNahamani lapho efika kwa-Israyeli?

⁵ UNahamani wafika egcekeni leNkosi yakwa-Israyeli uJehoramu, enethemba lokuthi wayezokwelashwa uchoko. Kodwa uJehoramu, wayecabanga ukuthi inkosi yaseSiriya yayimane ifuna ukuxabana naye. Lapho umprofethi u-Elisha ezwa ngale ndaba, wacela uJehoramu ukuba athumele uNahamani kuye. (2 AmaKh. 5:​6-9) Izinto azihambanga ngendlela uNahamani ayeyilindele. U-Elisha akaphumanga ngisho nasendlini yakhe ukuze ayohlangana noNahamani noma akhulume naye. Kunalokho, u-Elisha wathumela isithunywa ukuba sitshele uNahamani lokho okwakudingeka akwenze ukuze elapheke.—2 AmaKh. 5:10.

6. (a) Yini eyayingenza uNahamani aqhoshe angafuni ukwenza lokho okwakushiwo isithunywa? (b) Izinceku zikaNahamani zakubonisa kanjani ukuqonda, futhi waba yini umphumela? (2 AmaKhosi 5:​13, 14)

⁶ Ekuqaleni, uNahamani akazange akuthande lokho isithunywa esamtshela ukuba akwenze. “Kwamthukuthelisa” futhi “wahamba ethukuthele.” (2 AmaKh. 5:​11, 12) Kungani? Kungenzeka wayenomuzwa wokuthi akaboniswanga inhlonipho eyayimfanele njengoba ayenesikhundla esiphezulu ebuthweni lamaSiriya. Ngaphezu kwalokho, kungenzeka uNahamani wayenomuzwa wokuthi izinto u-Elisha ayethi akazenze zazibonisa ukuthi akayihloniphi iSiriya. Kunoma yikuphi, uNahamani wavele wanquma ukuba angabe esalashwa abuyele ekhaya. Kodwa, izinceku zakhe zabonisa ukuqonda lapho zimncenga ukuba acabangisise ngesinqumo sakhe. Ngokuhlakanipha uNahamani wayeka ukuqhosha, ngokuzithoba wenza lokho u-Elisha ayethe akakwenze. Ngenxa yalokho, welapheka!—Funda eyesi-2 AmaKhosi 5:​13, 14.

7. Yini esingayifunda endabeni kaNahamani? (IzAga 22:4) (Bheka nezithombe.)

⁷ Yini esingayifunda endabeni kaNahamani? Sibonisa ukuqonda lapho sibheka ngale kwalokho okusobala, okungahlanganisa ukubukeka kwangaphandle. Sibonisa ukuqonda nalapho singavumeli ukulawulwa yimizwa yethu. Ukuqonda kungasenza sithobeke. Empeleni, siyavuma ukuthi asazi yonke into. Singase siludinge usizo lwabanye, ikakhulukazi usizo lukaJehova. UNahamani wayengakabi umkhulekeli kaJehova; noma kunjalo, wabonisa ukuqonda ngokuzithoba alalele abanye: intombazanyana eyincekukazi yomkakhe, izinceku zakhe, okubaluleke nakakhulu ummeleli kaJehova u-Elisha. UNahamani wakwazi ukuyeka ukuqhosha nokucabanga ngemizwa yakhe ebuhlungu kuphela. Ekugcineni, wenza isinqumo esihlakaniphile esamenza welapheka. Ngaphambi kokuba sisho okuthile noma senze okuthile—njengalapho sithole iselukelo esingokomBhalo esingavumelani naso noma isiqondiso esivela enhlanganweni esingasiqondi—akufanele yini sithi ukuma kancane sicabangisise ngokuthi ingabe lokho esifuna ukukusho noma ukukwenza kubonisa ukuthi siyaqhosha noma sithobekile?—Funda izAga 22:4.

HLALE UZOLILE KUNOKUBA UTHUKUTHELE

8. Yiziphi izimo esingakuthola kunzima kuzo ukuhlale sizolile?

⁸ Ukuqonda kungasisiza sihlale sizolile sigweme nokuthukuthela lapho kunezimo ezisicasulayo. Yiqiniso ukuthi lokho akulula ngaso sonke isikhathi ngoba singase sicasulwe amazwi abanye angabonisi umusa, noma yizenzo zabo ezingenabulungisa futhi kube kufanele. (Efe. 4:26) Cabanga ngendlela uDavide no-Abhigayili ababonisa ngayo ukuqonda ngesikhathi isimo sishubile.

9. UNabali wamphatha kanjani uDavide?

⁹ Bona lokhu ngeso lengqondo: uDavide namadoda akanye nawo baphila njengababaleki ehlane lasePharanu. (1 Sam. 25:1) Njengoba belapho, bayasiza ekuvikeleni abelusi nemihlambi yendoda ecebile okuthiwa uNabali. (1 Sam. 25:​15, 16) Lapho sekuyinkathi yokugundwa kwezimvu, uDavide uthumela izithunywa kuNabali ukuba zimfisele okuhle bese ngokuzithoba zicele abaphe noma yini angabapha yona. (1 Sam. 25:​6-8) Kodwa uNabali akabonisi nhlobo ukuthi uyabonga ngakho konke uDavide namadoda akanye naye abamenzele kona. Usiphendula ngokwedelela isicelo sikaDavide, aze athuke uDavide namadoda akanye naye.—1 Sam. 25:​10, 11.

10. UDavide no-Abhigayili bakubonisa kanjani ukuqonda? (1 Samuweli 25:​32, 33) (Bheka nesithombe.)

¹⁰ Ukube wawubhekene nesimo esifana nesikaDavide, wawuyozizwa kanjani? Akumangazi ukuthi kungani uDavide athukuthela kakhulu. Wayeyindoda engayifihli indlela ezizwa ngayo futhi kulokhu wathukuthela kakhulu waze wafuna ukubulala uNabali! (1 Sam. 25:​13, 21, 22) Empeleni, uDavide wayesendleleni eyokwenza lokho kanye ngesikhathi evinjwa umkaNabali ohlakaniphile, u-Abhigayili. Wakubonisa kanjani ukuqonda u-Abhigayili? Wayeqonda ukuthi uDavide wayeyindoda ekahle nakuba ayethukuthele kakhulu, ngakho wenza konke okusemandleni akhe ukuze amsize alawule intukuthelo yakhe. Wamlethela isipho esikhulu, ngokuzithoba wamnika neseluleko esihlakaniphile. (1 Sam. 25:​18, 23-31) UDavide wabonisa ukuqonda ngokulalela lokho okwashiwo u-Abhigayili, eqaphela ukuthi ayekusho kwakuveza indlela uJehova ayezizwa ngayo ngesimo ayebhekene naso. Ngenxa yalokho, uDavide wehlisa umoya, wagwema nokwenza iphutha elibi kakhulu.—Funda eyoku-1 Samuweli 25:​32, 33.

11. Ukubonisa ukuqonda kungasisiza kanjani lapho othile esicasula? (IzAga 19:11)

¹¹ Yini esingayifunda kule ndaba? Ukubonisa ukuqonda kungasisiza senze izinto ngendlela enokuthula, ngisho nalapho sinesizathu esizwakalayo sokuthukuthela. Kungasisiza sicabange ngemiphumela yalokho esikushoyo nesikwenzayo. (Funda izAga 19:11.) Lapho u-Abhigayili ekhumbuza uDavide indlela uJehova acabanga ngayo, wakwazi ukulawula intukuthelo yakhe. Uma into ethile noma umuntu othile ekuthukuthelisa noma ekucasula, melana nesilingo sokusho noma sokwenza izinto ungacabanganga. (Jak. 1:19) Thandaza kuJehova umcele akusize, uzinike nesikhathi sokucabanga ngendlela azizwa ngayo ngaleyo ndaba, cishe okuyinto eyokusiza wehlise umoya.

12. Abanye bangasisiza kanjani ukuba sibonise ukuqonda futhi sihlale sizolile?

¹² Njengoba nje uJehova asebenzisa u-Abhigayili ukuba asize uDavide abone ngale kwesimo ayebhekene naso, angasebenzisa nabanye ukuba basisize siqonde indlela acabanga ngayo. Ngakho ngaphambi kokuba usho noma wenze okuthile lapho ubhekene nesimo esikwenza uthukuthele, cabanga ngokuthi ungakwazi yini ukukhuluma nomKristu ovuthiwe—umuntu ongakusiza ubheke izinto ngendlela kaJehova. (IzAga 12:15; 20:18) Ngakolunye uhlangothi, uma unethuba lokusiza umngani obhekene nesimo esinjalo, ungamlingisa yini u-Abhigayili? Ungamsiza yini umngani wakho abone izinto ngendlela kaJehova? Ngokuqinisekile, uJehova uzoyibusisa imizamo yakho yokusiza abanye babonise ukuqonda futhi bahlale bezolile.

THEMBELA KUJEHOVA KUNOKUBA WESABE

13. Ukuqonda kungasisiza kanjani sibone ngale kwezinto ezisethusayo?

¹³ Ngezinye izikhathi, siyobhekana nezimo ezisenza sesabe. Ukuqonda kungasisiza sibone ngale kwezinto ezisethusayo ngokukhumbula ukuthi noma yiziphi izenzakalo ezethusayo ezenzeka kuleli zwe azilutho uma ziqhathaniswa namandla kaJehova ababazekayo. (IHu. 27:1) UJehova angasisiza kunoma yisiphi isimo esibhekene naso, ngisho nezimo ezingase zibonakale zingenathemba. Lokho sikubona kahle endabeni yomprofethi uJona. Wayemthanda kakhulu uJehova, kodwa wayedinga ukuqonda okwengeziwe ukuze asenze ngempumelelo isabelo esinzima.

14. Kungani uJona ayengase anqikaze ukwamukela isabelo ayesinikwe uJehova?

¹⁴ UJehova wanika uJona isabelo esethusayo: ukuya eNineve ayomemezela umyalezo wesahlulelo kubantu bakhona. (Jona 1:​1, 2) Wawuyozizwa kanjani ukube wawuthole leso sabelo? Kwakuyomthatha isikhathi esingangenyanga uJona ukuhamba ngezinyawo esuka kwa-Israyeli eya edolobheni laseNineve i-Asiriya, nokwakuwuhambo olunzima. Abase-Asiriya babaziwa ngokuba nolaka nodlame. INineve lalize libizwe ngokuthi ‘idolobha lokuchithwa kwegazi.’ (Nah. 3:​1, 7) Kunokuba amukele leso sabelo, uJona wanquma ukubaleka.—Jona 1:3.

15. Yini eyasiza uJona ukuba amethembe nakakhulu uJehova? (Jona 2:​6-9)

¹⁵ UJona wayebaleka ngesikhathi uJehova emkhumbuza ngamandla akhe ngokusindisa ukuphila kukaJona ngendlela emangalisayo. (Jona 1:​15, 17) UJona wasifunda isifundo. Waqala ukubona ngale kwezinto ezazimethusa ngesabelo sakhe saseNineve, wagxila eqinisweni lokuthi uJehova wayengamvikela kunoma iyiphi ingozi. (Funda uJona 2:​6-9.) Lapho uJehova emnika ithuba lesibili lokwamukela isabelo sakhe, uJona akabalekanga. Waya eNineve, abantu bakhona bakulalela lokho ayekusho futhi abazange babhujiswe.—Jona 3:5.

16. Ukuqonda kungasisiza kanjani lapho sibhekene nezimo ezethusayo? (IzAga 29:25) (Bheka nezithombe.)

¹⁶ Yini esingayifunda endabeni kaJona? Asifuni ukuvumela noma yini isivimbe ukuba sikhonze uJehova, ikakhulukazi ukwesaba abantu. (Funda izAga 29:25.) Ukubonisa ukuqonda kwasiza uJona ukuba abone ngale kwezinselele zesabelo sakhe, agxile ekutheni uJehova wayezomsiza. Nathi sifuna ukubheka ngale kwezinto ezisethusayo, sicabange ngendlela uJehova asesisize ngayo futhi wasivikela ngayo esikhathini esidlule. Singazindla nangezibonelo zabafowethu nodadewethu abakwazile ukubhekana nezimo ezethusayo noma ukwenza izabelo ezinzima ngokuncika kuJehova. (Heb. 13:6) Kwangathi singabonisa ukuqonda ngokuthembela ngokuphelele kuJehova nangokusiza abanye ukuba nabo benze kanjalo.

UKUTHOLA UKUQONDA NOKUKULONDOLOZA

17. Singakuthola kanjani ukuqonda okwengeziwe?

¹⁷ Njengoba sixoxile, ukubonisa ukuqonda kungasisiza sibhekane ngokuphumelelayo nezimo ezinzima. Singakuthola kanjani ukuqonda okwengeziwe? UJehova unguMthombo wokuqonda obaluleke kakhulu futhi ukunika abakhulekeli bakhe ngeZwi lakhe nangomoya wakhe ongcwele. (Neh. 9:20; IHu. 32:8) Usinika iseluleko esingasisiza senze izinqumo ezihlakaniphile futhi silawule imizwa yethu. (IHu. 119:​97-101) Sithola ukuqonda njengoba sihlola ngokucophelela lokho okushiwo iBhayibheli futhi sithandaza kuJehova simcela asiphe umoya wakhe ongcwele onamandla. Lokho kwenza sisiqonde kahle isimo esisuke sibhekene naso, sazi nokuthi singasisingatha kanjani ngendlela engcono ukuze esikushoyo nesikwenzayo kubonise ukuthi sicabanga njengoJehova.—IzAga 21:​11, mbhw.

18. Yini ozimisele ukuyenza?

¹⁸ Kwangathi singaqhubeka sifuna ukuqonda esikuthola kuJehova futhi sikubheke njengokuyigugu. (IHu. 14:2) Uma senza kanjalo, asisoze saphambuka “endleleni yokuqonda.” (IzAga 21:16) Kodwa siyozimisela nakakhulu ukubonisa ukuqonda ngaso sonke isikhathi nakuzo zonke izimo esibhekene nazo. Ngenxa yalokho, ‘siyophumelela.’