Ungakwazi Ukulwisana Nemizwa Engakhi

1-2. Wayezizwa kanjani umphostoli uPawulu ngezinye izikhathi, futhi kungani singase sizizwe ngendlela ayezizwa ngayo? (Roma 7:​21-24)

YINI efika engqondweni yakho lapho ucabanga ngomphostoli uPawulu? Ingabe ucabanga ngesithunywa sevangeli esinesibindi, uthisha onekhono noma ngombhali weBhayibheli onekhono? Kunembile ngempela ukumchaza ngaleyo ndlela. Noma kunjalo, ngezinye izikhathi uPawulu wayeba lusizi, adikibale noma akhathazeke. Njengeningi lethu, ngezinye izikhathi wayehlushwa yimizwa engakhi.

² Funda eyabaseRoma 7:​21-24. Encwadini yakhe ayibhalela abaseRoma, uPawulu wakhuluma ngemizwa iningi lethu eliba nayo. Nakuba ayengumKristu oqotho, kwakunempi ngaphakathi kuye—wayenesifiso esiqotho sokwenza intando kaNkulunkulu kanye nesifiso sokwenza izinto ezingalungile. Ngaphezu kwaleyo mpi ayenayo ngaphakathi kuye, ngezinye izikhathi uPawulu wayehlushwa nayimizwa engakhi eyayibangelwa yizinto azenza esikhathini esidlule nenkinga eqhubekayo ayebhekene nayo.

3. Sizoxoxa ngani kulesi sihloko? (Bheka “Incazelo Yamagama.”)

³ Nakuba ngezinye izikhathi uPawulu ayehlushwa yizifiso ezingafanele lapho efisa ukwenza okuhle, akayivumelanga leyo mizwa engakhia ukuba ilawule indlela ayecabanga ngayo. Kulesi sihloko, sizoxoxa ngale mibuzo elandelayo: Yini eyayenza uPawulu abe ‘lusizi’ ngezinye izikhathi? Walwisana kanjani nemizwa engakhi? Thina singayinqoba kanjani imizwa engakhi esinayo?

YINI EYENZA UPAWULU WABA NEMIZWA ENGAKHI?

4. Yini eyenza uPawulu waba nemizwa engakhi?

⁴ Izinto azenza esikhathini esidlule. Ngaphambi kokuba abe umKristu, uPawulu owayaziwa ngokuthi uSawulu, wenza izinto ayezozisola ngazo kamuva. Ngokwesibonelo, wayebukele ngesikhathi uStefanu othembekile eshaywa ngamatshe waze wafa futhi wayekwamukela lokho ayekubuka kwenzeka. (IzE. 7:58; 8:1) USawulu wayehola nasekushushiseni amaKristu ngonya.—IzE. 8:3; 26:​9-11.

5. Wayezizwa kanjani uPawulu ngezinto ayezenze esikhathini esidlule?

⁵ Ngemva kokuba umKristu, ngezinye izikhathi umphostoli uPawulu wayephatheka kabi lapho ecabanga ngezinto azenza esikhathini esidlule. Njengoba iminyaka yayiqhubeka, kungenzeka zazimzwisa ubuhlungu nakakhulu izinto ayezenza njengoba ayeshushisa amaKristu ngonya. Ngokwesibonelo, ngesikhathi ebhalela abaseKorinte incwadi yakhe yokuqala ngawo-55 C.E., wathi: “Angifaneleki ukubizwa ngomphostoli, ngenxa yokuthi ngashushisa ibandla likaNkulunkulu.” (1 Kor. 15:9) Ngemva kweminyaka engaba mihlanu kamuva, encwadini ayibhalela abase-Efesu, wazichaza ‘njengomuntu ongaphansi kunomncane kunabo bonke abangcwele.’ (Efe. 3:8) Ngesikhathi ebhalela uThimothewu, uPawulu wazichaza ngokuthi ‘wayengumhlambalazi nomshushisi nomuntu oweyisayo.’ (1 Thim. 1:13) Ungayicabanga indlela okumele ukuba uPawulu wayezizwa ngayo lapho ehlangana nabantu ayebashushisile noma amalungu emindeni yalabo bantu lapho evakashele amabandla.

6. Yini enye eyayimbangela ukucindezeleka okukhulu uPawulu? (Bheka nombhalo waphansi.)

⁶ Iva enyameni. UPawulu wafanisa into eyayimcindezela ‘neva enyameni.’ (2 Kor. 12:7) Akazange ayigagule leyo nto eyayimcindezela, kodwa umfanekiso awusebenzisa ubonisa ukuthi kungenzeka wayezwa ubuhlungu ngenxa yokugula okuthile noma into ethile eyayimbangela ukucindezeleka ngokomzwelo, noma enye into.b

7. Wayezizwa kanjani uPawulu ngamaphutha akhe? (Roma 7:​18, 19)

⁷ Amaphutha akhe. UPawulu wayewenza amaphutha. (Funda eyabaseRoma 7:​18, 19.) Nakuba ayefuna ukwenza okulungile, inyama yakhe enesono yayiphazamisa ukuzimisela kwakhe ukwenza okulungile. Wavuma ukuthi kwakuhlale kunempi phakathi kwalokho okufiswa yinyama yakhe nesifiso sokwenza okulungile. Noma kunjalo, uPawulu wasebenza kanzima ukuze abe nobuntu obungcono. (1 Kor. 9:27) Kumele ukuba wayedikibala ngempela lapho ephinde esho noma enza into ayesebenze kanzima ukuze ayiyeke!

UPAWULU WALWISANA KANJANI NEMIZWA ENGAKHI?

8. Yini izincwadi zikaPawulu eziyibonisayo mayelana nendlela abhekana ngayo nobuthakathaka bakhe?

⁸ Njengoba kubonisiwe ezincwadini zakhe, uPawulu wacabanga kabanzi ngendlela yena nakholwa nabo ababengalwisana ngayo nezifiso zokwenza okungalungile futhi bazinqobe besizwa umoya ongcwele kaNkulunkulu. (Roma 8:13; Gal. 5:​16, 17) UPawulu wayevame ukukhuluma ngemikhuba emibi nezifiso amaKristu okufanele alwisane nazo. (Gal. 5:​19-21, 26) Akungabazeki ukuthi uPawulu wacabangisisa ngobuthakathaka bakhe, wafuna iseluleko eBhayibhelini, wazibona nezinto okwakufanele azenze ukuze alwisane nabo. Singaqiniseka ukuthi wayesisebenzisa iseluleko ayesinika abanye.

9-10. Yini eyasiza uPawulu ukuba alwisane nemizwa engakhi? (Efesu 1:7) (Bheka nesithombe.)

⁹ Nakuba ngezinye izikhathi uPawulu ayedikibala, wakwazi ukuhlale enombono omuhle. Ngokwesibonelo, wayekujabulela ukuthola imibiko emihle kulabo ayehamba nabo njengoba babeshumayela. (2 Kor. 7:​6, 7) Wakujabulela ukuba umngani nakholwa nabo. (2 Thim. 1:4) Wayazi nokuthi uJehova wayejabula ngaye. Ngempela, uPawulu wayejabule ngoba wayekhonza uNkulunkulu “ngonembeza ohlanzekile.” (2 Thim. 1:3) Ngisho nangesikhathi eboshiwe eRoma, uPawulu wanxusa akholwa nabo ukuba ‘bajabule eNkosini.’ (Fil. 4:4) Amazwi akhe awazwakali njengamazwi omuntu onqotshwe imicabango engakhi. Kusobala ukuthi lapho efikelwa yimicabango engakhi, uPawulu wayekwazi ukuyinqoba leyo micabango ukuze akwazi ukuphinde acabange ngezinto ezijabulisayo.

¹⁰ Enye into eyenza uPawulu wakwazi ukunqoba imizwa engakhi ukuthi wayekholelwa ukuthi isihlengo sasiyisipho sakhe esivela kuJehova. (Gal. 2:20; funda eyabase-Efesu 1:7.) Ngenxa yalokho, wayengaqiniseka ukuthi uJehova wayemthethelele ngempela ngenxa yomhlatshelo kaJesu Kristu. (Roma 7:​24, 25) Naphezu kwamaphutha awenza esikhathini esidlule nobuthakathaka bakhe, uPawulu wakwazi ‘ukunikela inkonzo engcwele’ kuNkulunkulu ngenjabulo.—Heb. 9:​12-14.

11. Kungani sisikhuthaza isibonelo sikaPawulu?

¹¹ NjengoPawulu, singase sibe nomuzwa wokuthi sihlale silwisana nesifiso sokwenza okungalungile lapho sifisa ukwenza okuhle. Kungenzeka sizizwe ngaleyo ndlela ngokuphathelene nezinto esizicabangayo, esizenzayo, noma esizishoyo. Nathi singase sizizwe njengoPawulu owathi, “Yeka mina muntu wosizi!” Udade owevile eminyakeni engu-20 okuthiwa u-Eliza,c lapho ekhuluma ngezinto abhekene nazo, uthi: “Kuyangikhuthaza ukucabanga ngesimo sikaPawulu. Kuyangiduduza ukwazi ukuthi akumina ngedwa ozizwa ngale ndlela. Indaba kaPawulu ingikhumbuza ukuthi uJehova uyazi ukuthi yini abantu bakhe ababhekene nayo.” Yini esingayenza ukuze nathi njengoPawulu sibe nonembeza ohlanzekile futhi sijabule ngisho noma ngezinye izikhathi siba nemizwa engakhi?

SINGALWISANA KANJANI NEMIZWA ENGAKHI?

12. Ukuqhubeka senza izinto ezisenza sisondelane noJehova kusisiza kanjani ukuba silwisane nemicabango engakhi?

¹² Kumele siqhubeke senza izinto ezisenza sisondelane noJehova. Lapho senza kanjalo, kuba lula ukugxila ezintweni ezakhayo. Lokhu singakufanisa nokuhlale senza izinto ezithuthukisa impilo yethu. Lapho sidla kahle, sizivocavoca njalo futhi silala ngokwanele, ngokuvamile sizizwa kangcono. Ngendlela efanayo, sonke siyayazi injabulo esiba nayo lapho sifunda iZwi likaNkulunkulu njalo, siya enkonzweni yasensimini, silungiselela imihlangano yebandla, siya kuyo futhi siba nengxenye kuyo. Ukwenza lezi zinto ezakhayo kusisiza sikwazi ukumelana nemicabango engakhi.—Roma 12:​11, 12.

13-14. Amanye amaKristu azuze kanjani ngokuhlale enza izinto eziwenza asondelane noJehova?

¹³ Cabanga ngesibonelo sikaJohn, owathola ukuthi unekhensa engajwayelekile lapho eneminyaka engu-39. Ekuqaleni, wayehlushwa yimizwa engakhi. Wayezibuza, ‘Ngingagula kanjani nje ngempela ngimncane kangaka?’ Ngaleso sikhathi, indodana yakhe yayineminyaka emithathu nje kuphela. Yini eyasiza uJohn ukuba alwisane nemizwa engakhi? Uthi, “Nakuba ngangikhathala, ngangiqikelela ukuthi umndeni wami uhlale wenza izinto ezisenza sisondelane noJehova. Sasiya kuyo yonke imihlangano yebandla, siya enkonzweni yasensimini masonto onke futhi sasiba nokukhulekela komndeni njalo ngisho noma kwakunzima ukuhlela isikhathi sako.” Lapho ecabanga ngalokho okwenzeka, uJohn uyenezela: “Lapho sibhekene nesimo esinzima, ekuqaleni singase sishaqeke. Kodwa ukubona amandla kaJehova nendlela asithanda ngayo, kuyayiqeda imicabango ekhathazayo esisuke sinayo. UJehova angakunika amandla njengoba nje nami anginika amandla.”

¹⁴ U-Eliza, okukhulunywe ngaye ekuqaleni, uthi: “Njalo lapho ngiya emihlanganweni yebandla futhi ngenza isifundo sami somuntu siqu, lokho kungikhumbuza ukuthi uJehova uyangizwa futhi ungithanda ngempela. Kuyangijabulisa lokho.” UNolan, umbonisi wesigodi wase-Afrika, ekhulumela yena nomkakhe uDiane, uthi: “Sihlale senza izinto ezisenza sisondelane noJehova ngisho noma sizizwa sidikibele. UJehova uhlale ekwenza kucace ukuthi uyasisiza ukuba sibe nesimo sengqondo esihle. Sizama ukukhumbula ukuthi uJehova uzosisiza futhi asibusise; asazi ukuthi kanjani, kodwa siyazi ukuthi uzokwenza lokho.”

15. Yini okungase kudingeke siyenze ukuze sinqobe imicabango engakhi? Nikeza isibonelo.

¹⁵ Ukuze sinqobe imicabango engakhi, kungase kudingeke singagcini nje ngokwenza izinto eziyisisekelo kuphela. Ngokwesibonelo, ake sithi uphethwe yiqolo. Ukuze ulelaphe, kungase kudingeke ungagcini nje ngokulula izinyawo usuku nosuku. Ukuze uthole ukuthi bubangelwa yini ubuhlungu obuzwayo, kungase kudingeke wenze ucwaningo, uze ukhulume ngisho nanodokotela. Ngendlela efanayo, kungase kudingeke wenze ucwaningo eBhayibhelini nasezincwadini zethu, uze ukhulume ngisho nanomKristu ovuthiwe ukuze uthole ukuthi ungayinqoba kanjani imizwa engakhi elokhu ibuya. Cabanga nangamanye amacebiso angaba wusizo.

16. Yini engakusiza uthole ukuthi ibangelwa yini imicabango engakhi onayo? (IHubo 139:​1-4, 23, 24)

¹⁶ Thandaza kuJehova umcele akusize uqonde ukuthi yini oyidingayo. INkosi uDavide yayazi ukuthi uJehova wayeyazi kahle. Ngakho uDavide wacela uJehova ukuba amsize abone ukuthi yayibangelwa yini ‘imicabango yakhe emkhathazayo.’ (Funda iHubo 139:​1-4, 23, 24.) Nawe ungacela uJehova akusize ubone ukuthi ibangelwa yini imicabango engakhi onayo, uqonde nokuthi ungayinqoba kanjani. Ungase uzibuze nemibuzo enjengokuthi: ‘Yini okubonakala sengathi iyimbangela yemicabango yami engikhathazayo? Ikhona yini into ethile engenza ngifikelwe yile micabango engakhi? Lapho ngifikelwa yimicabango engakhi, ingabe ngivame ukucabanga ngayo isikhathi eside kunokuba ngizame ukucabanga ngezinye izinto?’

17. Yiziphi izihloko ongazisebenzisa esifundweni sakho somuntu siqu ezingakusiza ugxilise ingqondo yakho ezintweni ezakhayo? (Bheka nesithombe.)

¹⁷ Yenza isifundo sakho somuntu siqu sihambisane nezidingo zakho. Ngezikhathi ezithile, ungase ukuthole kuwusizo ukutadisha ngezinye zezimfanelo zikaJehova ezinhle. Ngokwesibonelo, umphostoli uPawulu wazuza kakhulu ngokuzindla ngesihlengo nangentethelelo kaJehova. Nawe ungenza okufanayo. Sebenzisa INcwadi Yokucwaninga YoFakazi BakaJehova, i-Watch Tower Publications Index, noma ezinye izincwadi ezikusiza utadishe iBhayibheli ezitholakala ngolimi lwakho ukuze uthole izihloko ezikhuluma ngesihe sikaNkulunkulu, intethelelo yakhe nothando lwakhe oluqotho. Uma usuzitholile izihloko ezizokusiza, zibhale phansi. Beka into ozibhale kuyo la ozoyibona khona bese utadisha lezo zihloko lapho uqala ukuzizwa udikibala. Zama ukusebenzisa lokho okufundayo esimweni obhekene naso.—Fil. 4:8.

18. Yiziphi izinto amanye amaKristu akuthole kuwusizo ukuzisebenzisa lapho etadisha?

¹⁸ U-Eliza, okukhulunywe ngaye ekuqaleni, wenza isifundo sakhe somuntu siqu ngoJobe okukhulunywa ngaye eBhayibhelini. Uthi: “Ngiyayiqonda ngempela indlela uJobe ayezizwa ngayo. Wabhekana novivinyo lulandelana. Kodwa ngisho nalapho uJobe ayedikibele kakhulu, akayekanga ukuthembela kuJehova—ngisho noma ayengazi ukuthi zazibangelwa yini izinkinga zakhe.” (Jobe 42:​1-6) UDiane, okukhulunywe ngaye ekuqaleni, uthi: “Mina nomyeni wami sitadisha incwadi ethi Sondela KuJehova. Siyabonga ngokuthi uJehova usibumba njengombumbi. Kunokuba sigxile ekudunyazweni amaphutha ethu, sizama ukumbona ngeso lengqondo uJehova esibumba, ezama ukusenza sibe abantu abangcono. Lokho kusenza sisondele nakakhulu kuye.”—Isaya 64:8.

QINISEKA NGEKUSASA ELIHLE ESILITHENJISIWE

19. Yini esingalindela ukuthi iyokwenzeka ngezinye izikhathi?

¹⁹ Ngisho noma sizenza njalo izinto ezisenza sisondelane noJehova futhi sitadisha ngezinto eziqondene nezidingo zethu, ngeke silindele ukuba imicabango engakhi nemizwa engakhi imane inyamalale ngokuphelele. Ngezinye izinsuku singase sizizwe silusizi! Kodwa ngosizo lukaJehova singakwazi ukuzama ukungagxili kakhulu emizweni engakhi lapho isifikela. Singaqiniseka ukuthi ziningi izinsuku esiyojabula ngazo ngokuthi sinonembeza ohlanzekile nobuhlobo obuhle noJehova futhi siyazi ukuthi uyajabula ngenkonzo esimenzela yona.

20. Yini ozimisele ukuyenza?

²⁰ Masizimisele ukuba singalawulwa yimizwa engakhi ebangelwa yizinto ezenzeka esikhathini esidlule, izinkinga zethu noma amaphutha ethu. Ngosizo lukaJehova singakwazi ukulawula imizwa engakhi. (IHu. 143:10) Singabheka phambili esikhathini lapho kungeke kusaba nzima khona ukucabanga ngezinto ezakhayo. Kunalokho, usuku ngalunye siyovuka singenayo imicabango esikhathazayo, sijabulele ukukhonza uNkulunkulu wethu onothando, uJehova!