Indlela Izimpi Nezingxabano Ezinodlame Eziyoqedwa Ngayo

UNKULUNKULU UZOBAQEDA OHULUMENI

UNkulunkulu uzoqeda ohulumeni esebenzisa lokho iBhayibheli elikubiza ngokuthi impi ye-Armagedoni.a (IsAmbulo 16:16) Ngaleso sikhathi, ‘amakhosi omhlaba wonke owakhiwe ayobuthelwa ndawonye empini yosuku olukhulu lukaNkulunkulu uMninimandla Onke.’ (IsAmbulo 16:14) I​-Armagedoni iyimpi kaNkulunkulu eyoqeda zonke izimpi.

UMbuso kaNkulunkulu uyothatha isikhundla sohulumeni abasemhlabeni, uyobusa usezulwini futhi ngeke nanini ubhujiswe. (Daniyeli 2:44) UNkulunkulu ukhethe iNdodana yakhe, uJesu Kristu ukuba ibe iNkosi yawo. (Isaya 9:6, 7; Mathewu 28:18) Lo hulumeni unguMbusob uJesu afundisa abafundi bakhe ukuba bawuthandazele. (Mathewu 6:9, 10) Bonke abantu bayoba nobunye njengoba beyobe bengaphansi kukahulumeni obusa umhlaba wonke futhi uJesu uyobe eyiNkosi yawo.

UJesu uyolisebenzisa kahle igunya lakhe, ngeke abe ugombela kwesakhe njengababusi abasiphethe namuhla. Ngenxa yokuthi uJesu unobulungisa futhi akakhethi, akekho umuntu okuyodingeka akhathazeke ngokuthi ngeke anakwe ngenxa yobuhlanga, ubuzwe nesizinda sakhe. (Isaya 11:3, 4) Nabantu ngeke kusadingeka balwele amalungelo abo. Ngobani? Yingoba uJesu uyonakekela umuntu ngamunye. ‘Uyokhulula ompofu okhalela usizo, nohluphekile nanoma ubani ongenamsizi. . . . Uyobakhulula ekucindezelweni nasebudloveni.’​—IHubo 72:12-14.

UMbuso kaNkulunkulu uyosusa zonke izikhali ezibulalayo emhlabeni. (Mika 4:3) Uzosusa nabantu abonakele, abangafuni ukuyeka ukulwa nokulimaza abanye. (IHubo 37:9, 10) Wonke umuntu, ngisho noma ngabe owesifazane noma ingane, uyozizwa ephephile noma ngabe ukuphi nezwe.​—Hezekeli 34:28.

Lapho abantu bebuswa uhulumeni kaNkulunkulu bayophila kamnandi. Uyoqeda izinkinga ezibangela ukuthi abantu balwe, njengokuhlupheka, indlala nokungabi nazo izindlu zokuhlala. Wonke umuntu uyoba nenala yokudla okunempilo futhi abe nendawo yokuhlala ayijabulelayo.​—IHubo 72:16; Isaya 65:21-23.

UMbuso kaNkulunkulu uzoqeda yonke imiphumela ebuhlungu ebangelwa izimpi. Le miphumela ayizona nje izingozi ezitholakala empini kuphela kodwa ihlanganisa nokuphazamiseka kwengqondo nokungokomzwelo ngenxa yezinto ezibuhlungu ezenzeka phakathi nempi. Ngisho nalabo asebashona bayovuswa baphinde baphile emhlabeni. (Isaya 25:8; 26:19; 35:5, 6) Imindeni iyophinde ibe ndawonye futhi abantu ngeke besazikhumbula izinto ezimbi ezenzeka empini ngoba ‘izinto zakudala ziyobe sezidlulile.’​—IsAmbulo 21:4.

UNKULUNKULU UYOQEDA ISONO

Lapho uMbuso kaNkulunkulu usubusa emhlabeni, bonke abantu bayokhonza uNkulunkulu weqiniso, uJehova,c “uNkulunkulu wothando nokuthula.” (2 Korinte 13:11) Abantu bayofunda ukuhlala ndawonye ngokuthula. (Isaya 2:3, 4; 11:9) Labo abakusebenzisayo ekuphileni kwabo lokho abakufundayo bayokhululeka esonweni.​—Roma 8:20, 21.

UNKULUNKULU UYOQEDA NGOSATHANE NAMADEMONI AKHE

UMbuso kaNkulunkulu uyobhubhisa ababangela abantu ukuba balwe izimpi, uSathane namademoni akhe. (IsAmbulo 20:1-3, 10) ‘Ukuthula kuyochichima’ lapho ithonya labo elibi lingasekho.​—IHubo 72:7.

Qiniseka ngokuthi isithembiso sikaNkulunkulu sokuqeda izimpi nezingxabano ezinodlame siyofezeka nakanjani. Unawo amandla okuziqeda izimpi futhi uyakulangazelela ukuziqeda.

• UNkulunkulu uhlakaniphile futhi unamandla adingekayo ukuze kuqedwe izimpi nodlame. (Jobe 9:4) Ayikho into engamhlula.​—Jobe 42:2.

• UNkulunkulu uyakuzonda ukubona abantu bezwa ubuhlungu. (Isaya 63:9) “Uyamzonda umuntu othanda ubudlova.”​—IHubo 11:5.

• UNkulunkulu uhlale ekwenza akushilo, akakwazi ukuqamba amanga.​—Isaya 55:10, 11; Thithu 1:2.