Ukuthuthukisa Amakhono Ethu Enkonzweni—Ukuqeqesha Abamemezeli Abasanda Kuhlanganyela

Kungani Kubalulekile: Abafundi bakaJesu abasanda kuhlanganyela kumelwe bafunde ukugcina “konke” abayale ngakho, okuhlanganisa ukufundisa abanye iqiniso. (Math. 28:19, 20) Abaningi abasanda kuhlanganyela sebengabhalisa eSikoleni Senkonzo Esingokwasezulwini futhi kungenzeka bayashumayela ngokwethukela emalungwini omndeni nakubangane. Noma kunjalo, njengoba bekwazisa ngokwengeziwe lokho abakufundayo futhi befunda ukuthi uJehova ufuna ukuba bonke abantu bezwe izindaba ezinhle, bangase baveze isifiso sabo sokuhlanganyela enkonzweni yasensimini. (Roma 10:13, 14) Lapho sebekufanelekela ukuba abamemezeli abangabhapathiziwe, ukuqeqeshwa okuhle kuyobasiza ukuba babe nesibindi njengoba bethatha lesi sinyathelo esifanele entuthukweni yabo engokomoya.—Luka 6:40.

Indlela Yokukwenza:

Siza ummemezeli osanda kuhlanganyela ukuba athole izincwadi azozidinga lapho eshumayela. Mbonise indlela ohlela ngayo isikhwama sakho sasensimini futhi umchazele ukuthi iyini injongo yencwadi ngayinye oyiphethe.
Ninobabili, khethani intshumayelo kwezisikiselwe kuyi-Nkonzo Yethu YoMbuso bese niyiprakthiza. Khuthaza abamemezeli abasanda kuhlanganyela ukuba babeke intshumayelo ngamazwi abo. Prakthizani nisebenzisa izimo ezivamile ensimini yendawo ezisencwadini ethi ISikole Senkonzo Esingokwasezulwini, ikhasi 82. Gcizelela ukubaluleka kokugqoka nokuzilungisa ngesizotha.—2 Kor. 6:3, 4.
Qhubeka umqeqesha. Bonisa ummemezeli ikhadi lensimu futhi umfundise ukuthi lisetshenziswa kanjani enkonzweni yendlu ngendlu. Mbonise indlela yokubhala phansi abantu abathakazelayo. Mfundise indlela yokusebenzisa i-jw.org enkonzweni nencwajana ethi Good News for People of All Nations. Msize ukuba ahlakulele isithakazelo asitholayo.—1 Kor. 3:6.
Yiba nesineke futhi umncome. (IzAga 25:11) Beka isibonelo esihle. Intshiseko yakho nesithakazelo ombonisa sona kuyoba nemiphumela emihle nehlala njalo.

Zama Lokhu Phakathi Nenyanga:

Sebenza nomuntu ofunda naye iBhayibheli ensimini uphinde uhambe naye lapho uyokwenza izimpindelo noma uyoqhuba izifundo zeBhayibheli. Uma ungenaye umuntu omfundelayo, hamba nommemezeli ongenakho okuhlangenwe nakho.