Imibuzo Evela Kubafundi
Njengoba amaJuda ayeyalwe ukuba ‘angadli lutho olufakwe imvubelo’ ngePhasika, kungani uJesu asebenzisa iwayini—eliwumkhiqizo obilile—lapho emisa iSikhumbuzo sokufa kwakhe?—Eksodusi 12:20; Luka 22:7, 8, 14-20.
IPhasika, elaliyisikhumbuzo sokuFuduka kwabantwana baka-Israyeli eGibhithe, laqalwa ngo-1513 B.C.E. Lapho ekhipha iziqondiso zokuthi kufanelwe ligujwe kanjani, uJehova wathi: “Akumelwe nidle lutho olufakwe imvubelo. Kuzo zonke izindawo zenu zokuhlala kumelwe nidle amaqebelengwane angenamvubelo.” (Eksodusi 12:11, 20) Lo mthetho waphezulu wawuqondene kuphela nohlobo lwesinkwa esasidliwa ngePhasika. Akukhulunywanga lutho ngewayini.
Isizathu esiyinhloko sokwenqatshelwa kwemvubelo sasiwukuthi ama-Israyeli aphuma esethatheleka phezulu eGibhithe. U-Eksodusi 12:34 uyachaza: “Abantu bathwala inhlama yabo kafulawa ingakavutshelwa, imikhombe yabo yokuxovela isongwe ngeziphuku zabo beyetshethe.” Ukungafakwa kwemvubelo emigubhweni yePhasika elandelayo kwakuyokhumbuza izizukulwane ezilandelayo leli qiniso elibalulekile.
Ngokuhamba kwesikhathi, imvubelo ngokuvamile yabe isibhekwa njengefanekisela isono noma ukonakala. Ngokwesibonelo, lapho ebhekisela kumuntu oziphethe kabi ebandleni lobuKristu, umphostoli uPawulu wabuza: “Anazi yini ukuthi imvubelo encane iyibilisa yonke inhlama?” Wayesethi: “Susani imvubelo endala, ukuze nibe yinhlama entsha, njengoba nje ningenayo imvubelo. Ngoba, ngempela, uKristu iphasika lethu uye wenziwa umhlatshelo. Ngenxa yalokho, masiwugcine lo mkhosi, hhayi ngemvubelo endala, noma ngemvubelo yobubi nokukhohlakala, kodwa ngamaqebelengwane angenamvubelo obuqotho nangeqiniso.” (1 Korinte 5:6-8) Yisinkwa esingenamvubelo kuphela esasingafanekisela umzimba kaJesu wobuntu ongenasono.—Hebheru 7:26.
AmaJuda alenezela kamuva iwayini lapho kugujwa iPhasika. Kungenzeka ukuthi lokhu akwenza ngemva kokubuya ekuthunjweni eBhabhiloni. IBhayibheli alisho ukuthi lokhu kwakwenqatshelwe, ngakho uJesu wayengalisebenzisa kufanele ngenkathi kudliwa isidlo sePhasika. Phela indlela engokwemvelo iwayini lasendulo elalibila ngayo yayihlukile endleleni isinkwa esasifakwa ngayo imvubelo. Lapho kuxovwa inhlama, ukuze ibile kufakwa imbiliso noma imvubelo. Iwayini elenziwa ngamagilebhisi alifakwa izinto ezinjalo. Izinto ezibilisa iwayini zikhona kakade emagilebhisini. Ujusi wamagilebhisi wawungeke utholakale ngenkathi yePhasika ngoba kwakungeke kwenzeke uhlale ungabili kusukela ngesikhathi sokuvuna ekwindla kuze kuyoba inkathi yePhasika entwasahlobo.
Ngakho, ukusebenzisa kukaJesu iwayini njengesifanekiselo eSikhumbuzweni akungqubuzani nganoma iyiphi indlela neziqondiso zePhasika maqondana nemvubelo. Noma yiliphi iwayini elibomvu elingafakiwe izinandisi noma izinongo liyakufanelekela ukuba lisetshenziswe njengesifanekiselo ‘segazi eliyigugu’ likaKristu.—1 Petru 1:19.