Abagcina Ubuqotho Bekhulu Lama-20 Bayahlangana!

IMPI yahlelwa ekuqaleni impela komlando wesintu. Ukuhlubuka kwagqashuka ezidalweni ezingokomoya nasezidalweni ezingabantu, futhi ukulunga kokubusa koMdali kwabekelwa inselele! Lokhu kwaveza impikiswano yokuziphatha ehilela umbuzo othi, Ingabe labo abasathembekile kuJehova uNkulunkulu bayokusekela ukubusa kwakhe ngokugcina ubuqotho babo kuye?—Genesise 3:1-24; Eksodusi 9:16; Luka 22:31.

USathane uDeveli uye wamangalela ngamanga abakhulekeli bakaJehova ukuthi bamkhonza kuphela ngenxa yezinzuzo zobugovu futhi akuveli othandweni. (Jobe 1:1–2:10) Nokho, baye bahlala bethembekile kuNkulunkulu naphezu kwemizamo kaSathane nezwe lakhe eliphikisayo yokwephula ubuqotho babo. (Heberu 11:4-38; IsAmbulo 12:10-17) Ukuze ikhuthaze izinceku zikaJehova zalelikhulu lama-20 ukuba ziqhubeke zithembekile, iWatch Tower Society yalungiselela uchungechunge lwemihlangano yoFakazi BakaJehova “Yabagcina Ubuqotho” ukuba iqhutshwe emazweni amaningi, kusukela ehlobo lika-1985. Usuku ngalunye lwaluqokomisa isihloko esifanelekayo esingokweBhayibheli.

“Ukuhamba Ngobuqotho”

Lesihloko sosuku lokuqala lomhlangano salola isithakazelo esingokomoya. Inkulumo ethi “‘Zwanini, Bantu Bami,’ IZwi LikaJehova” yavula inkundla ngokukhumbuza bonke ukuba balalelisise. Inkulumo kasihlalo yafakazela ukuhlakanipha kwalokho kutusa, “Ubuqotho Mabusilondoloze.” Ubuqotho bukwenza kanjani lokho? Ubuqotho budinga ukuba sibe ngabaphelele ekuzinikeleni kwethu kuNkulunkulu, sigcine izinhliziyo zethu, izisusa, nezifiso kuhlanzekile. “Uma lokho kuwukuzimisela kwethu,” kwasho usihlalo, “khona-ke ubuqotho bethu buyosilondoloza.”—IHubo 25:5; 31:23.

Ngokulandelayo sakhuthazwa esithi “Ukukhuthazwa Isibonelo Sabagcina Ubuqotho Abavivinyiwe.” Ngemva kokubhekisela ezibonelweni ezikhuthazayo zesikhathi esidlule, isikhulumi saxoxa nabagcina ubuqotho abayisibonelo besikhathi sethu. Labo abalondoloza ubuqotho ‘Abanamahloni Ngezindaba Ezinhle.’ Lenkulumo, eyayisekelwe kuMarku 8:38, yakwenza kwaba sobala ukuthi ukuzibonakalisa ngokungenamahloni enkonzweni yethu, emsebenzini wokuziphilisa, nakwezinye izindawo kuyisivikelo. ‘Futhi yeka ukuthi kuyoba yinto emangalisa kanjani lapho uJesu Kristu ekhuluma phambi kwezingelosi zasezulwini nakuYise, ethi singabafundi bakhe abaye bahamba ngobuqotho!’

“Okwambuliweyo Kungokwethu Nokwabantwana Bethu” kwakuyinkulumo eyayisesimisweni eyayibonisa ukuthi, njengoBaba onothando, uJehova uyakujabulela ukwambulela abantu bakhe “izimfihlakalo.” (Duteronomi 29:29; Amose 3:7) Ukutadisha ngenkuthalo lezinto ezambuliweyo kuyosiqinisa ukuze sibambelele ngokuqinile ebuqothweni bethu. Isihloko esilandelayo esasithi, “Ukuthola Injabulo EZwini LikaJehova,” sagcizelela iphuzu lokuthi oFakazi BakaJehova kumelwe babe ngabafundi beBhayibheli. (IHubo 1:1, 2) Ngempela, “ukutadisha kuyingxenye yokuphila kwawo wonke umKristu ohamba ngobuqotho.”

“Ukubonisana NgemiBhalo” kuyindlela esetshenziswa abagcina ubuqotho ekusebenzelaneni nabantu bezinhlobo ezihlukahlukene abashumayela kubo. Ngokwesibonelo, esinagogeni laseThesalonika, umphostoli uPawulu ‘waphendulana nabo amasabatha amathathu, ethathela emiBhalweni, ebachasisela ukuthi kwakumelwe ukuba uKristu ahlupheke.’ Ingabe uPawulu waphumelela? Yebo, ngoba ezinye zezilaleli zakhe zakholwa. (IzEnzo 17:1-4) Ingabe ababekhona emhlanganweni babengalwazisa usizo ekuphenduleni imibuzo abahlangabezana nayo enkonzweni yabo? Yeka injabulo eyaba khona ekuyitholeni lapho isikhulumi sikhulula incwadi entsha yasensimini engena ephaketheni ethi, Ukubonisana NgemiBhalo!

“Ukuqondisa Kahle IZwi Leqiniso”

Ngosuku lwesibili, kwakujabulisa ukubona amaphayona amaningi kakhulu—izinkulungwane kweminye imihlangano—esukuma njengokunxusa kwesikhulumi, enikeza ubufakazi bokuthi izihlwele ziyahlanganyela enkonzweni yesikhathi esigcwele. Kulengxenye ethi, “Phikelelani Enkonzweni Yesikhathi Esigcwele,” kwagcizelelwa ukuthi ukuphayona kuwufanele umzamo, nakuba ukulwa kudingekile ukuze uhlanganyele kulomsebenzi.—Luka 13:24.

Inkulumo eyisihluthulelo ethi, “Jabulisa Inhliziyo KaJehova Ngokugcina Ubuqotho,” yayisekelwe kuzAga 27:11. Lenkulumo yajula enqolobaneni yomcebo weZwi likaNkulunkulu futhi yaphuma nalamagugu: “Ubuqotho bangempela busho ukuzinikela komuntu okungenakwephulwa—kuJehova uNkulunkulu.” “USathane ungumholi ekuphuleni ubuqotho,” futhi ukuhlubuka kwakhe kwaphakamisa “impikiswano yelungelo lokubusa kukaNkulunkulu.” “Nakuba ukubusa kukaJehova kungasekelwe ekugcineni kwezidalwa zakhe ubuqotho, isenzo sikaDeveli sokuhlubuka senza indaba yobuqotho bomuntu entandweni yokubusa kukaNkulunkulu yaba yingxenye ebalulekile yempikiswano yokubusa kwendawo yonke.” Isikhulumi sabuza: “Kungenzeka kanjani ngathi ukuba sinqobe njengabagcina ubuqotho?” “Singenza kanjalo ngoba silalela iZwi likaNkulunkulu,” siphendula.—Roma 14:8.

Ukubeka izithakazelo ezingokomoya kuqala ekuphileni kwakuwumongo wenkulumo eyalandela eyayithi, “Isibusiso SikaJehova Siyacebisa.” Sasizwa ukuba siqaphele ngokwengeziwe ukuthi nakuba imali iwusizo, ukuthanda imali kungaba yingozi enkulu. (UmShumayeli 7:12; 1 Thimothewu 6:10) Ukwethembeka okuletha isibusiso sikaJehova, umcebo woqobo.—IzAga 10:22.

Idrama ethi “Ikusasa Lakho—Inselele” yafanisa inkambo yokugcina ubuqotho yamaNaziri nenselele intsha engoFakazi ebhekene nayo esifisweni sayo sokuba amaphayona nokuhlala enkonzweni yesikhathi esigcwele esikhundleni sokuphishekela imigomo yezinto ezibonakalayo. Yanxusa abasha ukuba bamukele inselele futhi bakhonze uJehova ngokugcwele. Idrama yabonisa futhi indlela abazali nabanye abangaba usizo ngayo.

Isihloko esithi, “Hlwanyela Kakhulu, Vuna Kakhulu” sachaza ukuthi isimiso esithi ‘sivuna esikuhlwanyele’ sihlakaniphile, silungile, futhi singesothando. Ngokulingisa uNkulunkulu, uKristu, ‘nenceku ethembekileyo,’ siyohlwanyela kakhulu ngokuba khona emihlanganweni, emithandazweni, ekufakazeni, nakubo bonke ubuhlobo bethu bomkhaya. (Mathewu 24:45-47) Ukuhlwanyela okunjalo kuyasiqinisekisa ukuthi siyovuna isibusiso sikaJehova.—Heberu 6:10.

Phakathi nenkulumo ethi “Indlela Enifanele Ukubaphendula Ngayo Bonke Abantu,” izilaleli zakulalelisisa ukusikisela nemiboniso yokusebenzisa incwadi entsha ethi Ukubonisana NgemiBhalo. Kwagcizelelwa isidingo sokunqoba ukungabi nasithakazelo kwabantu ngokusebenzisa izingeniso ezifanelekile, ukuze kwenziwe ukusabela okuhle lapho kukhona ukusabela kobuqotho nakuba kungokuphambene, nokubonisa iBhayibheli njengomthombo wezimpendulo zethu.—Kolose 4:6.

Ngemva kwenkulumo yokugcina yosuku lwesibili ethi, “Ukumemezela Imisebenzi KaJehova Emangalisayo,” saba matasatasa ngokwenza lokho kanye ngokuhlanganyela enkonzweni yasensimini. Ngayo leyontambama uFakazi owayengena indlu ngendlu eVancouver, eCanada, wahlangabezana nalokhu kuphikiswa: “Uma uNkulunkulu enguNkulunkulu wothando, kungani evumela ububi?” Impendulo elungiselelwe kulencwadi entsha Ukubonisana yenelisa owayebuza, futhi isifundo seBhayibheli saqaliswa khona lapho.

“Ukungabi Nabala Phakathi Kwesizukulwane Esiphambeneyo”

Lesi kwakuyisihloko esasivusa amadlingozi sosuku lwesithathu. Ekuseni ngalolosuku, inkulumo ethi “Ukudumisa UJehova Ngezinto Zethu Eziyigugu” yagcizelela ukuthi ukuphila kwethu okunikezelwe, ubuhlobo bethu obuseduze noJehova, amandla ethu, ingqondo, amakhono angokomoya, nezinto ezibonakalayo konke kuyizinto eziyigugu okumelwe sidumise ngazo uBaba wethu wasezulwini.—IzAga 3:9, 10.

Inkulumo ethi “Ukuzuza Amandla, Hhayi Ukukhathala” yanikeza isiyalo esingesikhathi sokusisiza ukuba simelane nemizamo kaSathane yokwephula ubuqotho bethu ngokungabaza, ukulahlekelwa ukholo, ukuthanda izinto ezibonakalayo, izilingo, nezindlela ezihlukahlukene zokudumazeka. Ukutadisha, ukuzindla, umthandazo, ukuba khona emihlanganweni, nokuhlanganyela njalo ekushumayeleni ngoMbuso kuyizindlela eziqinisekile zokuvulela uMthombo ongakhathali wamandla, uJehova.—Isaya 40:28-31.

Iphuzu eliyinhloko enkulumweni ethi “Ukuphilela Intando KaNkulunkulu Namuhla Naphakade” laliwukuthi uma sinesimo sengqondo sikaKristu, ‘ngeke sisaphilela izinkanuko zabantu kodwa intando kaNkulunkulu.’ (1 Petru 4:1, 2) UJesu akazange neze avumele noma isiphi isifiso somuntu ukuba simphambukise kuleyonkambo. Ababezobhapathizwa kakhulukazi bayilalelisisa inkulumo elandelayo ethi “Ukuzihlanganisa Nabagcina Ubuqotho BakaJehova.” Batshelwa ukuthi isinyathelo sokubhapathizwa kumane kuyisiqalo somncintiswano wabo wokugcina ubuqotho. Ukuze bagijime kahle kudingeka bawasebenzise ngokunenzuzo amalungiselelo afana nomthandazo, iZwi likaNkulunkulu, izincwadi zobuKristu, nokuhlanganyela ngenkuthalo nebandla. Ababezobhapathizwa bema ukuba baphendule imibuzo emibili ebonisa ukuthi babesiqonda yini isinyathelo esibalulekile ababesithatha. Ukubhapathizwa kwabo emanzini kwalandela, ngezinye izikhathi kwakubukelwa abantu abaningi ababeze emhlanganweni.

Ngaleyontambama, inkulumo ethi “Ingabe Siyamesaba UJehova?” yagcizelela ukuhlonipha uMbusi Wendawo Yonke. (IzAga 8:13) Phakathi kweNkosi yakwaJuda eyesaba uNkulunkulu uJehoshafati noJehoshafati Omkhulu obusayo manje, uJesu Kristu, kunokufana okunjengalokhu: ukugcina ukukhulekela kuhlanzekile (1 AmaKhosi 22:16; Malaki 3:1-18); ukulwela inkululeko yokukhulekela (2 IziKronike 17:1, 2, 12-19; Filipi 1:6, 7); ukuhlelela ukufundisa abakhulekeli beqiniso (2 IziKronike 17:7-9; Mathewu 28:19, 20); nokumisa izinkantolo zemithetho engokwasezulwini ukuze zengamele ukwahlulela ngokulunga.—2 IziKronike 19:6, 7; 1 Korinte 6:5, 6.

Ingxenye ethi “ImiBhalo Ilungele Ukuqondisa” yakhomba indlela iBhayibheli elisisiza ngayo ekuphileni ukuphila okuhlelekile nokubonisa inhlonipho ngenhlangano, ababonisi abamisiwe, nasebekhulile. Engxenyeni eyalandela ethi “Ukuzimisela Ukukhonza UJehova Ngenhliziyo Epheleleyo,” sahlatshwa umxhwele isidingo sokuba nenhliziyo engokomfanekiso ephilile, leyo ehlala inobunye—iphelele—ukuze yenze inkonzo kaJehova.—1 IziKronike 28:9.

Kodwa kuthiwani ngeso? Isikhulumi esilandelayo saphendula umbuzo othi, “Njengelungu Lomkhaya, Ingabe Iso Lakho Lihle?” Njengoba uSathane esebenzisa izinto eziningi ukuba aphambukise iso lethu elingokomoya, kubalulekile ukuba obaba, omama, nabantwana abangamaKristu balondoloze umbono olinganiselwe futhi babeke izithakazelo zoMbuso kuqala. (Mathewu 6:33) Isidingo sokuqaphela uMhleli Omkhulu ngokubonisa inhlonipho ngabadala abamisiwe nangebandla kwagcizelelwa enkulumweni eyalandela enesihloko esithi, “Ukulandela Ngokunakekela Iziyalezo ZeNkosi.”—IzAga 8:32-36.

Umvuthwandaba wosuku kwakuyinkulumo ethi “Ubuqotho Eqinisweni Ezweni Elingamesabi UNkulunkulu.” Phakathi kwezinye izinto, amaKristu kumelwe alondoloze ubuqotho eqinisweni ngokuvikela imfundiso yeBhayibheli yendalo nokuphikisa izimfundiso okungezona ezikaNkulunkulu. Izilaleli zajatshuliswa ukukhululwa kwencwadi enamakhasi angama-256 ephendula kahle umbuzo ophakanyiswa isihloko sayo esithi, Life—How Did It Get Here? By Evolution or by Creation? Yeka indlela lencwadi ephumelela ngayo! Owayeyisazi sokuziphendukela kwemvelo, manje onguFakazi eSweden, wayifunda yonke lencwadi ngalobobusuku futhi waphawula: “Uma bengiyisazi sokuziphendukela kwemvelo izolo, nakanjani ngabe ngiwushintshile umqondo wami namuhla ebusuku.”

“Ukulondoloza Ukuziphatha Okuhle Phakathi Kwabezizwe”

Lesi kwakuyisihloko sosuku lokugcina lomhlangano. Enye yezinkulumo ezanikezwa ngalolosuku ekuseni yaphendula umbuzo othi “Ingabe Kukhona Okungakuhlukanisa Nothando LukaNkulunkulu?” Thina sisodwa singazehlukanisa othandweni lukaNkulunkulu nolukaKristu. Kodwa uma kuphela silondoloza ukholo lwethu, akukho kucindezela, izimo, noma umphikisi ongenza uNkulunkulu aphelelwe uthando ngathi.—Roma 8:35-39.

Inkulumo ethi “Ningasheshi Ninyakaziswe Engqondweni Yenu” yagcizelela isidingo sokulondoloza indawo yethu epharadesi elingokomoya. Kanjani? Ngokwengxenye, ngokugwema umoya wokukhononda nokumelana nokuhlubuka, kanjalo sinamathele eselulekweni sikaPawulu sokungasheshi sinyakaziswe engqondweni yethu nganoma isiphi isigijimi somlomo noma esibhaliwe esihloselwe ukudala ukungabaza nokonakalisa ukholo lwethu.—2 Thesalonika 2:1, 2.

“Yesaba UNkulunkulu, Balekela Okubi,” kwakuyidrama yesibili ethakazelisayo. Yayikhuluma ngomgcini wobuqotho uJobe futhi yabonisa ukuthi ushushiso nokuhlupheka ngenxa yokukhonza uNkulunkulu akukusha. Naphezu kwemizamo eyenziwayo yokusiphambukisa, njengoJobe kumelwe sizimisele ukubambelela ngokuqinile ebuqothweni bethu, sesabe uJehova futhi sibalekele okubi.

Inkulumo yeningi ethi, “Izikhathi Nezinkathi ZikaNkulunkulu—Zikhombani?” yasikhumbuza ukuthi uJehova ‘ubesusa amakhosi, ebeka amakhosi’ ngokuvumelana nenjongo yakhe engenakuguquka. Ngakho-ke, lapho isikhathi sakhe sifika, ngokungenakwehluleka uyoqeda ububi futhi abuyisele ukulunga.—Daniyeli 2:21, 44.

Izinkulumo ezimbili zokuphetha zazifaneleka ngempela. “Induduzo Yabantu Abaqotho” yasiduduza ngesiqinisekiso sokuthi ngeZwi lakhe, ngomoya wakhe, nangokuphendula imithandazo yethu, uJehova ngokungenakwehluleka uyosisekela ekuvivinyweni. Futhi njengoba inkulumo yokuphetha yabonisa, oFakazi BakaJehova abahlehleli emuva ngenxa yokuthi baphila kulelizwe eliphikisayo. Kunalokho, ‘Bayinhlangano Egcina Ubuqotho Eqhubekela Phambili’! Lenhlangano yiyo yodwa esekela ubukhosi bukaJehova neqiniseka ngokunqoba nokusinda.

Phambili Njengabagcina Ubuqotho!

Ngaphezu kwenjabulo yabo yokwamukela okunye ukudla okucebile okungokomoya, kuhlanganise nezincwadi ezimbili ezinhle, ababekhona emhlanganweni bajatshuliswa ukukhululwa kwencwajana egcwele imifanekiso enamakhasi angama-32 ethi Uhulumeni Oyoletha IPharadesi. Futhi yeka injabulo okwakuyiyo ukuthola iKingdom Melodies No. 6, ikhasethi yomculo omnandi wokuzijabulisa!

Ziqabuleke kakhulu futhi zibusisiwe, izihambeli zabuyela emakhaya zibonga ngempela ngedili elingokomoya elizuzisa kakhulu. Ithemba lethu elivuselelwe elokuthi Lowo oye wasekela abasekeli bobukhosi bakhe iminyaka eyizi-6 000 uyobona ngokunqobayo ofakazi bakhe bedlulela ngale kwalezinsuku zokugcina esezisemvuthwandaba futhi bengena ngokulondeka oHlelweni Olusha, konke kube sekulwelweni kwakhe kwaphakade.—2 Thimothewu 3:1; IsAmbulo 7:9-12; 21:1-5.

Sinalelithemba nokholo kuNkulunkulu wethu, uJehova, sizimisele ukwenzani? Phela, sizimisele ukuhlala siqhubekela phambili ngesibindi njengenhlangano kaJehova yekhulu lama-20 yabagcina ubuqotho!

[Ibhokisi ekhasini 29]

Lokho Abanye Abaye Bakusho

Umphathi wamaphoyisa, eLeeds, eNgilandi: “Ngizothanda ukudlulisela ukubonga kini, ezisebenzini zenu, nakubo bonke abantu benu ababa khona . . . ngendlela ephumelela kakhulu oye wahlelwa futhi waqhutshwa ngayo. Kuye kwaba udumo kini nonke. Ngavakashela leNkundla ngoMgqibelo ntambama nangeSonto ekuseni futhi ngathola isimo nenqubo kungokuhlangenwe nakho okuqabula kakhulu. Abaningi engisebenza nabo baye baba nokukhulumela okufanayo.”

Umbhali omkhulu wohla lomhleli wephephandaba laseMontreal, eCanada, ngaphansi kwesihloko esithi “Nathi masibaphathe ngomusa abantu bakaJehova”: “Kuthangi, emahoreni angaphansi kwamabili, bangqongqoza eminyango engama-800 000 endaweni. Uhlobo lokuphendulwa kwabantu abaningi ngokomoya, okungase kucasule kancane kodwa okungesona ngempela isicefe. . . . Uma wamukela izivakashi emzini wakho, awubi nandaba nokukhathazeka isikhashana ukuze uzivulele indawo. . . . Ngakho-ke, kuthiwani uma singahlanganyeli ukholo loFakazi BakaJehova; siyoluhlanganyela, izinsukwana ezimbalwa, okuncane nje kokuthula kwabo, futhi siyozizwa singcono ngakho. Labantu abanokuthula baye bakhetha ukuhlangana eMontreal; abengeziwe babo mabeze, amashumi ezinkulungwane abo.”

Isikhulu samaphoyisa eDortmund, eFederal Republic yaseJalimane: ‘Uma kunemidlalo lapha siba okungenani namaphoyisa angama-200 ahlala eqaphile; emihlanganweni yenu sidinga amabili kuphela, namabili kuphela ukuze aqondise izimoto.’

Umphathi wenkundla yebhola eNorwich, eNgilandi: “Isimo sokuthula ezinsukwini ezine . . . siyaheha. Uzizwela ngokwakho ukuthula kobuntu okuphambene ngokuphelele nalokho ongakuthola nganoma iziphi izinsuku ezine ezweni lezamabhizinisi elicindezelayo nasekuphileni kwansuku zonke okusizungezile. OFakazi ngempela banento ehlukile ngabo futhi okunzima ukuyichaza.”

[Ibhokisi ekhasini 30]

Umhlangano WaseMontreal—Okuthile Okukhethekile!

Okwakuqukethwe isimiso somhlangano wesigodi “Wabagcina Ubuqotho” owaqhutshelwa enkundleni edumile yeOlympic yaseMontreal, eQuebec, eCanada, kwakufana neminye ekuloluchungechunge. Kodwa wawukhethekile ngandlela-thile. Phakathi kwezinye izinto, wawungowokuqala eqenjini lalemihlangano owawuyoba ngokhethekile ngobukhulu noma ngezinye izindlela.

Ubukhulu: Ingqikithi yabayizi-78 804 yahlangana ivela empumalanga Canada nasenyakatho mpumalanga yeUnited States. Kwakuqinisa ukholo ukuba yingxenye yezihlwele ezinkulu kangako zabagcina ubuqotho belalela, becula, futhi bethandaza ndawonye. Lokho kwakukhethekile!

Ubhapathizo: Kwakujabulisa ngokukhethekile ukubona abayi-1 004 abasand’ ukuzinikezela bemele ukuyobhapathizwa. Lokhu kwakuwubufakazi obubonakalayo bokukhula obenzekayo phakathi kwethu.

Izilimi: Kwakunezimiso zezilimi eziyi-11—IsiArab, isiShayina, isiNgisi, isiFulentshi, isiGreki, isiHangari, isiNtaliyane, isiKorea, isiPutukezi, iSipanishi, nesiUkraine. Enkabeni yenkundla, isimiso esikhethekile sokuqondiswa komsindo sasihlelwe kahle kangangokuba labo ababesezingxenyeni zesiFulentshi babelalele ngolimi lwabo lapho izihambeli ezikhuluma isiNgisi zazizwa ngolimi lwazo.

Ipaki Lamakharavani: Lokhu kwakungesinye isici esikhethekile. Ukuze izihambeli ezazidinga indawo yamakharavani, izimoto zokuzijabulisa, namathende zithole indawo, ngoDecember 1984 kwaqalwa imizamo yokuthola imvume yokusebenzisa iPaki eliseduzane iMaisonneuve, elingaphesheya komgwaqo ukusuka enkundleni. Lapho izikhulu zithintwa okokuqala ngokuqashwa kwepaki, zahlekwa usulu. Empeleni, ukuqasha lonke ipaki ledolobha kwakungazange kwenziwe lapho ngaphambili. Nokho, ekugcineni imvume yanikezwa. Idumela elihle loFakazi BakaJehova lasiza.

Ekugcineni, kwamiswa izinto zokuhlala ezingama-4 300, futhi cishe kwahlaliswa abantu abayizi-20 000 endaweni enotshani obuhle obunemithi enemithunzi eminingi. Futhi sasiyini isimo sepaki ngemva kokuba abantu abaningi kangaka beye balisebenzisa cishe isikhathi esingangesonto? Izikhulu ezazimangele azitholanga lutho olwalonakele kakhulu noma ikuphi. Ngenxa yalesosizathu, yonke imali eyayikhokhiwe yezindleko zokwakungonakala yabuyiselwa kubo!

Ayekhona Amalungu ENdikimba Ebusayo: Lokhu futhi kwenza umhlangano waseMontreal waba okhethekile. Lapho oFakazi BakaJehova begwema konke ukukhulekelwa kwezidalwa, ngokungangabazeki abaningi baba nomuzwa ofana nowaboniswa omunye umzalwane owathi ngokwazisa: “Ukuba khona kwamalungu ayisikhombisa eNdikimba Ebusayo ethandekayo, abanye babo engingakaze ngibabone noma ngibezwe benikeza inkulumo ngaphambili, kwakukhuthaza kakhulu.” Ukuhlangana okunjalo kuyaye kuphumele ‘ekududuzaneni’ ngokomoya.—Roma 1:11, 12.

Ukwamukelwa Okuhle: Izikhulu nomphakathi zasebenzelana noFakazi BakaJehova ngendlela encomekayo nengenalo ubandlululo. Lokhu kwakungokukhethekile uma kukhunjulwa ukuthi eminyakeni embalwa edlule uNdunankulu wangaphambili waseQuebec uMaurice Duplessis wathi ngokusobala “akuliwe ngokungenamusa noFakazi BakaJehova” baze baphele nya. Khona-ke, inesizathu esihle, enye intatheli yephephandaba yaqaphela: “Ake ucabange nje, izolo [ngoLwesihlanu] bekunoFakazi abayizi-74 846 phakathi nemingcele yenkundla! UMaurice Duplessis, owavimbela lenhlangano, kumelwe ukuba ucasuke kakhulu ethuneni lakhe.”

Bekungaqali ukuba uJehova abusise abagcina ubuqotho kakhulu kangaka. Nokho, umhlangano WaseMontreal wawungokhethekile ngezindlela eziningi.

[Ishadi ekhasini 28]

Eminye imihlangano “Yabagcina Ubuqotho”

Izwe Imihlangano Ababekhona Ababhapathizwa

EAustria 3 23,123 237

EBrazil 25 389,387 4,825

EziQhingini zaseBrithani 10 142,859 925

ECanada 14 146,897 1,585

E-Ecuador 4 22,918 394

EFrance 11 119,940 2,002

EGreece 3 37,367 368

EItaly 25 184,078 4,153

EJapane 25 202,221 3,512

ENetherlands 1 40,694 151

EPortugal 10 52,581 990

ESpain 13 90,808 1,628

ESweden 8 27,194 315

ESwitzerland 3 20,601 213

EVenezuela 4 69,843 1,063

[Izithombe ekhasini 31]

EMontreal, uW. L. Barry weNdikimba Ebusayo wakhulula incwadi entsha ethakazelisayo ethi “Life−How Did It Get Here? By Evolution or by Creation?”

Inkambo kaJobe yokugcina ubuqotho yaqokonyiswa kuledrama engokweBhayibheli, eyanikezwa emhlanganweni waseAthens, eGreece