Ukudalulwa Kwemfihlakalo YeKimbilikiti
IKIMBILIKITI inkolo yokhokho besizwe samaRega esifundazweni iKivu, esisempumalanga ephakathi neZaire. Amadoda amaRega azingela emahlathini acinene, abesifazane badoba emifuleni, futhi imikhaya ilima amasimu. Kodwa ukuphila kwabo bonke kubuswa ngokuphelele iKimbilikiti, idlozi elikhulu lesizwe okumelwe balilalele ngokuphelele. Futhi kumelwe bafihle zonke izimfihlo eziphathelene nokuzinikela kulo, ngoba ukudalula noma yini yalezizinto kusho ukujeziswa ngokubulawa ngokushesha. Eqinisweni, noma yikuphi ukusola ngokubulawa kwelungu lomkhaya yiKimbilikiti ngokufanayo kuphumela ekubulaweni ngokushesha.
Lenkolo enamandla yaqala kanjani? Ukuze sithole impendulo, sifanele sibheke emlandweni.
Ukuqala Kwemfihlakalo
Ngokwenganekwane, kudala kakhulu emlandweni wesizwe indoda ethile yayinamadodana amathathu. UKatima Rega, izibulo, wayemubi, emfushane, futhi exhwale kangangokuba wayengeke ashade. Nokho, wayehlakaniphe kakhulu futhi enamasu okuqamba izinto. Wayekuthanda ukudla kuze kube sezingeni lokuminza. Ukuze athole ukudla ngaphandle kokukusebenzela, wasungula imfijoli esamtshingo yoqalo oluveza imisindo esabekayo. Walungisa futhi ukhuni oluyisicaba olumise okwesikebhe olunentambo eboshelwe kolunye uhlangothi. Uma lolukhuni ulushwizisa ngokushesha phezu kwekhanda lomuntu, lwalwenza umsindo omkhulu wokushwiliziswa okwesabekayo.
Lomqambi wenganekwane yasendulo okokuqala wazama amacebo akhe kubashana bakhe ababili, ebaqinisekisa ukuthi lomsindo wawuvela edlozini elithile futhi khona-ke ebesabisa ukuze bayomntshontshela ukudla nogwayi kubafowabo ababili. Enquma ukwandisa indima yakhe yomsebenzi, wacasha ehlathini futhi walinda ukuba abesifazane bazobamba izinhlanzi futhi bazifake kobhasikiti. Khona-ke wayeshaya izimfijoli zakhe, ethusa abesifazane ukuze babuyele ekhaya, beshiya ngemuva izinhlanzi abazibambile.
Ekuqaleni, imibiko yabesifazane abesatshiswayo yayingatshazwa. Kodwa lapho isimo esifanayo silokhu siqhubeka senzeka futhi abantu besigodi bengasenazo izinhlanzi abazozidla, amadoda ngokucophelela ahlasela “isilwane esisadimoni,” kodwa athola ukuthi kwakunguKatima Rega. Amanye ayefuna ukumbulalela khona lapho, kodwa amanye aphetha ngokuthi lokho ayekucebile kwakuwukuhlakanipha okukhulu futhi avumelana ukuba kubhekwe “izwi” njengedlozi labo lesizwe. Kwakungezukudalulwa futhi kwakuyoba imfihlakalo kubo bonke abangazi. Wonke oyilungu lesizwe kwakufanele alalele yonke imithetho, iziyalezo, kanye nezimemezelo ezivela “ezwini,” idlozi lehlathi. Kodwa laliyobizwa ngokuthini? Bonke bavumelana lapho indoda endala ehlakaniphile isikisela ukuthi “iKimbilikiti.”
Khona-ke inkolo yesizwe samaRega yazalwa. Lonke uhlelo lwemithetho, imikhuba, kanye nokukholelwa ezeni kwakhiwa kususelwa kulesosiqalo esilula. Ngokuhamba kwesikhathi, amanye “amadlozi” amathathu angabonakali anezelwa njengabangane bakaKimbilikiti. UKabile, owayecatshangelwa ngezinye izikhathi njengodadewabo futhi nangezinye izikhathi njengomkakhe, wayengowesifazane omuhle nongavamile. Bonke abesilisa abathumbayo kwakuthiwa basokwa ngokumangalisayo ngokuba nobuhlobo bobulili naye! UTwamba, umfowabo omncane kaKimbilikiti, kuthiwa unamandla angabangela isichotho, adilize izindlu, njalonjalo. “Izwi” lakhe lizwakala ngokushwizisa ukhuni olumise okwesikebhe! Idlozi lesithathu uSabikangwa, noma uMukungambulu. Ungomunye umfowabo omncane kaKimbilikiti futhi ubonakala efeza indima yokuba isithunywa sakhe.
Imikhuba Yesiko Eyimfihlo
Ekusithekeni, uKimbilikiti umelelwa indikimba yabapristi abakhulu (oBami abahlakaniphile). Omunye wabo, ubizwa ngokuthi uMukuli, owengamela amasiko okusoka. UKitumpu, omunye umpristi omkhulu, osebenza njengodokotela futhi empeleni osoka abathombile. Owesithathu, uKilezi, onakekela abafana abasanda kusokwa. Indima yokuxhumanisa inkambu yokusoka nezakhamuzi ezivamile ifezwa iBikundi, iqembu lalabo kakade asebedlulile esikweni.
Imikhuba yesiko (ebizwa ngokuthi iLutende) yenzelwa phakathi ehlathini, endaweni okuthiwa ihlala uKimbilikiti. Ukucasha ngokucophelela kufihla lemikhuba, futhi noma yimuphi owesifazane (isilwane noma umuntu) osondela eduze naleyondawo uyaklinywa ngokushesha! Ngosuku lwesiko, imikhosi emikhulu yenzelwa ezigodini ezahlukahlukene, nemidlalo enganqamuki nokusina kusukela entathakusa. Lokhu kuklanyelwe ukuvivinya ukuqina kwabafana abancane abazosokwa. Ngemva kwalokho, batshelwa umlando kaKimbilikiti, kuhlanganise nazo zonke izinganekwane eziye zaqanjwa eminyakeni ethile. Abafana benziwa bakholwe ukuthi uKimbilikiti noKabile ongudadewabo-mkakhe bangabantu abangokoqobo. Lentsha itshelwa ukuba izilungiselele ukulwa noKabile, ngemva kwalokho iyoba nobuhlobo bobulili naye futhi isokwe ngokuyisimangaliso. Uma noma yimuphi wabo ehluleka kulezivivinyo ezimbili, uKabile ukhononda ngokuthukuthela kuKimbilikiti, oyobulala umoni!
Nokho, uma besehlathini, abafana abaziboni izinto ababezitsheliwe. Kunalokho, abapristi abathathu abakhulu (uMukuli, uKitumpu, noKilezi) babamba ngamunye futhi bamsoke. Lokho, bathi, ukulwa noKabile! Uma umfana engapholi kahle ugaphambi kwesikhathi esimisiwe ukuze abuyele ekhaya, uyaklinywa futhi alahlwe ngoba isimo esinjalo singabulala inganekwane yokusokwa ngokuyisimangaliso ngemva kobuhlobo noKabile omuhle, nongesiye ongokwemvelo.
Naphezu kokuhlonishwa okuphakeme kanjalo kukaKabile, phakathi nemikhosi yesiko abafana bafundiswa amazwi angcolile obulili ukuba bawasho kwabesifazane, kuhlanganise nakonina nodadewabo. Lapho abasokile bebuyela esigodini sakubo, abesifazane baphoqelelwa ukuba bavele befana nokuthi banqunu futhi bagaqe ngamadolo basine phambi kwabo futhi babe izisulu zenhlamba abasanda kuyifunda.
Phakathi nezikhathi zesiko, amaBikundi (labo asebesokiwe) baya esigodini ngasinye bephanga ukudla noma izimpahla. Imikhaya iphoqelelwa ukuba ikhiphe noma yini ecelelwa uKimbilikiti kanye nalabo abasenkanjini yokusoka. Imigwaqo iyavalwa futhi abadlula ngendlela babophekile ukuba bakhokhe lokho okufunwa abalandeli abashisekayo bakaKimbilikiti. Okwenza baqhubeke ngalendlela inhloso yokuqala ‘yezwi’—ukuthola ukudla ngaphandle kokukusebenzela.
Khona-ke empeleni, iyini iKimbilikiti? Ubuqili obuhlobene nezincezu ezithile zoqalo! Nokho, ukuze buphakanyiswe, kuye kwacetshwa isimiso sokwesabisa ngokufa njengesikhali esiyisisekelo. (Heberu 2:14, 15) Amanye amathuluzi awukukholelwa ezeni, ubugovu, nenhlamba. Konke lokhu kulondolozwa indikimba yabapristi abakhulu. Kodwa lokhu kuhlangana kanjani nokushushiswa koFakazi BakaJehova?
[Izithombe ekhasini 6]
“Imitshingo” ka Kimbilikiti
[Isithombe ekhasini 7]
OFakazi abagcina ubuqotho endaweni yasePangi