Okuphawulwa Abafundi Balomagazini
Ukufuna Kwengane Yokutholwa Ngifisa ukunibonga ngendaba ethi “Isimangaliso Esivusa Amadlingozi.” (February 22, 1997) Kwakushukumisa ngempela ukufunda ngendlela lendodana eyathola ngayo unina oyizalayo nokuthi wayengudadewabo ongokomoya!
M. G. D., Italy
Ngafunda indaba yokuphila kukaDana Folz ngezinyembezi. Nginomfowethu wokutholwa owahlangana nonina omzalayo esemdala. Akubanga ukuhlangana okujabulisayo. Ngisho namanje, kumelwe alwisane nemizwa engajabulisi ngomkhaya wethu. Lesi sihloko sangisiza ukuba ngibone ukubaluleka kokumbekezelela nokumbonisa uthando.
M. D. L., Argentina
Ngathola lomagazini wenu endlini yangasese esitolo sangakithi. Wawunenye yezindaba ezishukumisa kakhulu engake ngazifunda! Bengilokhu ngibuza: “Kuthiwani uma ingane yatholakala ngokudlwengulwa? Ingabe anikusekeli ukukhishwa kwesisu ezimweni ezinje?” Indaba engokoqobo kaDana Folz evusa amadlingozi yayiwukunxusa okushukumisayo kwempilo yomntwana ongakazalwa.
M. P., United States
Ubugebengu Obuhleliwe Ngingumeluleki wonogada nelungu le-Police-Community Relations Committee. Ukusikisela kwenu ngendlela yokuvikela umkhaya wakho ebugebengwini ngikuthole kusebenziseka futhi kuzuzisa kakhulu. (“Indlela Ubugebengu Obuhleliwe Obukuthinta Ngayo,” kumagazini ka-March 8, 1997) Lomagazini sengiwudlulisele kwamanye amalungu ekomiti. Kuyaqabula ukwazi ukuthi ngolunye usuku kuyoba khona izwe elingenabo ubugebengu.
C. E. J. A., Nigeria
Lezi zihloko zaziwusizo kakhulu ngoba ngangitadisha iBhayibheli nendoda eyayihileleke ebugebengwini obuhleliwe iminyaka engu-11 edlule. Ubunzima bokugqashula ebugebengwini obuhleliwe babuchazwe ngokunembile. Ngosizo lukaJehova, naye angagqashula uma ekucabangela ukwenza kanjalo.
A. M., United States
Izimbali Ngineminyaka eyishumi ubudala, futhi ngifisa ukunibonga ngesihloko esithi “Izimbali Zibonisa Ukuthi Othile Uyakukhathalela.” (March 8, 1997) Sangifundisa indlela yokunakekela izimbali ukuze zihlale isikhathi eside.
L. C., Italy
Eminyakeni eminingi bengilokhu ngifuna ukwazi indlela yokulondoloza izimbali zingabuni, ngoba ngizithanda kakhulu. Nokho, bezilokhu zibuna ngokushesha. Ukusikisela okukuyi-Phaphama! kuye kwangisiza kakhulu. Ngibonga kakhulu ngomsebenzi eniwenzayo.
J. P., Mexico
Ukuzalwa Kwenkanyezi Isihloko esithi “Ukuzalwa Kwenkanyezi ‘Esidlekeni’ Sokhozi” (March 8, 1997) sangenza ngacabanga ngokujulile ngendalo kaJehova uNkulunkulu enhle, engonakalisiwe. Ngathinteka ngokujulile.
J. A., Australia
Ukutholwa Ngiyakwazi ngempela okushiwo isihloko esithi “Isicelo Esivela Enhliziyweni.” (March 8, 1997) Ngase ngingumama ongashadile ngineminyaka engu-19 ubudala. Umama wami wayethukuthele egane unwabu, futhi wangitshela ukuthi ingane ayamukelekile. Ngaba nomuzwa wokuthi kuzoba ngcono kakhulu ngengane yami ukuba inakekelwe abanye. Ngemva kokuba umKristu, ngathandaza iminyaka engu-15 ukuba ngihlangane nayo. Ekugcineni umthandazo wami waphendulwa esikhathini esithile esidlule, ngahlangana nayo futhi ngahlanganyela nayo izindaba ezinhle. Yasiqonda kahle isimo esangibangela ukuba ngiyisise. Iseluleko sami kwabesifazane abakulesi simo ukuba baqhubeke bethandaza kuJehova. Mhlawumbe kuyokwenzeka ukuba uphinde uhlangane nomntanakho. Uma kungenjalo, uNkulunkulu angakunika ukuthula kwengqondo nenhliziyo uma umethemba ngokugcwele.
G. S., United States