Ekugcineni Ngalithola Iqiniso

Ngasekupheleni kuka-August 1939, ngama eMoscow lapho ngibhekise amabombo ekhaya eBudapest, eHungary. Kwakusayinwe i-German-Soviet Nonaggression Pact ezinsukwini ezimbalwa ezidlule, ngo-August 23, futhi izindonga zaseKremlin zazihlotshiswe ngamafulege e-“swastika” yamaNazi. Kungani ngangiseRussia, futhi ngangizobhekana nani ekhaya?

OKOKUQALA, ake ngiphindele emuva edolobhaneni laseHungary iVeszprém, lapho ngazalelwa khona ngo-January 15, 1918. Ngangiyizibulo ezinganeni ezine, futhi abazali bethu babeqikelela ukuthi sasiya njalo esontweni. Lapho ngineminyaka emihlanu ubudala, ngase ngisiza eMiseni esigodlweni sezindela zamaRoma Katolika. Ekhaya, ngangilingisa ukuqhutshwa kweMisa ezinganeni zakithi, ngigqoke isivatho sephepha engangisenzele lenkonzo.

Lapho ngineminyaka engu-8 ubudala, ubaba wadliwa izindunduma, futhi umama wasinakekela esizwa unina. Ngonyaka olandelayo, umama wabulawa umdlavuza. Eminyakeni eyalandela, thina zingane sahlukaniswa futhi sayiswa emakhaya ezintandane ahlukahlukene. Ikhaya lezintandane engagcina ukuhlala kulo lalingaseBudapest. Kwakungelama-Frère Maristes (Abafowabo BakaMariya), okuyihlelo lothisha lamaKatolika aseFrance. Ngangimthanda ngempela uNkulunkulu, ngakho lapho ngihlanganisa iminyaka engu-13 ubudala, ngavuma ukufundiswa ihlelo labo lenkolo.

Ukuqeqeshwa Okwengeziwe Ngokwenkolo

Ngonyaka olandelayo ngathunyelwa eGreece, lapho ngaya khona esikoleni sama-Frère Maristes esiqhutshwa ngesiFulentshi, esangiqeqeshela ubuthisha. Eminyakeni emine kamuva, ngo-1936, ngaphothula ngathola isitifiketi sokufundisa esikoleni sabaqalayo. Ngemva kokuphothula ngaba umzalwane kuleli hlelo lenkolo, ngenza isifungo esinezingxenye ezintathu, ubumpofu, ukulalela nobumsulwa. Nakuba thina bazalwane sasifaka izivatho zenkolo futhi sifundisa ikhathekizima, sasingalifundi neze iBhayibheli.

Ngalowo nyaka ngafaka isicelo sokuyofundisa eChina futhi samukelwa. Ngo-October 31, 1936, ngahamba ngomkhumbi osuka eMarseilles, eFrance. Ngo-December 3, 1936, ngatheleka eShanghai. Kusuka lapho ngahamba ngesitimela ngaya eBeijing, inhloko-dolobha, enyakatho yeChina.

Esifundeni sezintaba esiqhele ngamakhilomitha angaba ngu-25 eBeijing, ihlelo lenkolo lama-Frère Maristes lalinesikole esikhulu, izindawo zokulala nezakhiwo zepulazi. Lendawo yayingasendaweni okuphumula kuyo umbusi ngamaholide asehlobo futhi yayinengadi enhle nezihlahla zezithelo. Ngesikhathi ngilapho ngazikhandla ekufundeni ulimi lwesiShayina nolwesiNgisi. Kodwa sasingalifundi iBhayibheli.

Phakathi Nesiyaluyalu

Ekuqaleni kwawo-1930, iJapane yathatha iManchuria, eyindawo yaseChina. Ngo-July 1937, amasosha aseJapane nawaseChina alwa ngaseBeijing. AmaJapane ayenqobile amisa uhulumeni omusha wamaShayina owawukhethwe yiwo. Lokhu kwaholela ekulweni kwabashokobezi bamaShayina nalohulumeni omusha.

Njengoba isigodlo sethu sezindela ngaphandle kwaseBeijing sasibhekwa njengendawo yaseFrance, akuzange kulwiwe naso ngokuqondile. Nokho, sashaywa izimbumbulu zikambayimbayi ezinhlanhlathayo nezinhlamvu zezibhamu ezalimaza amanye amaShayina athi awabe ngaphezudlwana kuka-5000 ayekhosele kulesi sigodlo sethu sezindela. Ngaleso sikhathi, abashokobezi baseChina babebusa emaphandleni.

Ngo-September 1937 abashokobezi baseChina ababehlomile abangaba ngu-300 bahlasela izakhiwo zethu, befuna izikhali, imali nokudla. Ngangingomunye wabeLungu abayishumi abathunjwa. Ngemva kokuthunjwa izinsuku eziyisithupha, ngaba ngomunye wabathunjwa abakhululwa kuqala. Ngangigula ngenxa yokudla ukudla okonakele, ngakho ngalaliswa inyanga esibhedlela.

Ngemva kokukhishwa kwami esibhedlela, ngashintshelwa kwesinye isikole sehlelo elifanayo lenkolo, endaweni elondeke kakhudlwana eBeijing. Ngo-January 1938, ngathunyelwa ukuyofundisa eShanghai kodwa ngo-September ngabuyiselwa eBeijing ukuze ngiyofundisa khona. Nokho, ngemva kokuphela konyaka, angizange ngizivuselele izifungo zami zenkolo. Ngangiphishekele indlela yokuphila nemfundo engokwenkolo iminyaka engu-7 kodwa angikutholanga ukwaneliseka ekufuneni kwami iqiniso. Ngakho ngalishiya leli hlelo lenkolo ukuze ngiphindele ekhaya eBudapest.

Ngaleso sikhathi iMpi Yezwe II yayisinuka emakhaleni. Abaphathi bami baseFrance bangikhuthaza ukuba ngigibele i-Trans-Siberian Railroad, eyayinqamula ezingxenyeni ezithile zaseSoviet Union. Kwakuphakathi nalolu hambo lapho ngatheleka khona eMoscow ngo-August 27, 1939, futhi ngabona izindonga zaseKremlin zihlotshiswe ngamafulege amaNazi.

Izwe Lisempini

Ngafika ekhaya eBudapest ngo-August 31, 1939. Ngakusasa iJalimane yahlasela iPoland, kwaba ukuqala kweMpi Yezwe II. Kamuva, iJalimane yephula isivumelwano sayo sokungalwi neSoviet Union, futhi ngo-June 22, 1941, amabutho kaHitler ahlasela iSoviet Union. Angena agamanxa ayofika ezindaweni ezisemaphethelweni edolobha laseMoscow kodwa ahluleka ukuphanga leli dolobha.

Umbusi waseHungary wasayina isivumelwano sokuthula neJalimane, futhi amabutho aseJalimane anikezwa imvume yokunqamula eHungary. Ngashada ngo-1942, futhi ngo-1943, ngabuthelwa eButhweni Lezempi LaseHungary. Ngo-March 1944, iJalimane yahlasela iHungary ngoba uHitler wayenganelisekile ngendlela iHungary eyayisekela ngayo umzamo wakhe wempi. Indodana yethu yazalwa ngalowo nyaka. Ukuze bagweme ukuthelwa ngethala lezikhali eBudapest, umkami nendodana bathuthela emaphandleni bayohlala nabasekhweni lami.

Igagasi lempi lashintsha, futhi iButho Lezempi laseSoviet ladlulela eBudapest, lafika ngo-December 24, 1944. Ngathunjwa abaseRussia futhi ngaba isiboshwa sempi. Izinkulungwane zethu thina ziboshwa zaphoqelelwa ukuba zihambe ngezinyawo ibanga elingamakhilomitha angaba ngu-160 siya eBaja, eHungary. Lapho, sahlohlwa emakalishini ezinkomo sathuthelwa eTimisoara futhi safakwa ekamu elikhulu. Okungenani kwafa iziboshwa ezingu-20 000 kwezingu-45 000 ekuqaleni kuka-1945 phakathi nomqedazwe we-typhoid fever.

Ngo-August, abangu-25 000 abasinda ekamu bayiswa oLwandle Olumnyama. Lapho, abangaba ngu-20 000 badingiselwa eSoviet Union. Nokho, abanye abangaba ngu-5000, ababegula, kuhlanganise nami, babuyiselwa eHungary base bekhululwa. Zaphela kanjalo-ke izinyanga ezinzima ezingu-8 zokuthunjwa. Emasontweni ambalwa kamuva, ngahlangana futhi nomkami nendodana yami, sabe sesiphindela emuva sayohlala eBudapest.

Ngemva kwalempi, abantu abaningi baqhubeka behlupheka. Ukudla kwakuyingcosana, futhi amandla emali ayephansi kakhulu. Okwakuthengwa yi-pengö eyodwa yaseHungary ngo-1938 kwase kudinga ama-pengö ayitshe lemali (1000 000 000 000 000 000 000 000 000 000) ngo-1946! Ngokuhamba kwesikhathi, ukuphila kwaba ngcono lapho ngithola umsebenzi wasehhovisi kwaloliwe.

Ukuthola Iqiniso

Ngo-1955 omunye woFakazi BakaJehova owayehlala endaweni esihlala kuyo eBudapest waqala ukukhuluma ngeBhayibheli nomkami, u-Anna. Ngaba nesithakazelo lapho u-Anna engitshela ukuthi iBhayibheli alifundisi ukuthi isihogo siyindawo yokuhlushwa. (UmShumayeli 9:5, 10; IzEnzo 2:31) NjengomKatolika, ngangingakaze ngilifunde iBhayibheli, ngisho nalapho ngiqeqeshwa ngokukhethekile ezikoleni zesonto. Ngamane ngazamukela izimfundiso zamaKatolika ezingezona ezingokomBhalo, njengesihogo somlilo. Ngaqala ukuwathanda amaqiniso eBhayibheli, ikakhulukazi lawo akhuluma ngoMbuso kaNkulunkulu nendlela oyofeza ngayo injongo kaNkulunkulu yokwenza umhlaba ube ipharadesi. (Mathewu 6:9, 10; Luka 23:42, 43; IsAmbulo 21:3, 4) Ngajabula ngendlela engangingakaze ngijabule ngayo ngaphambili.

Ngaleso sikhathi, oFakazi BakaJehova eHungary babefunwa phansi naphezulu futhi beboshwa ngoba babefundisa amaqiniso ngoMbuso kaNkulunkulu ngesibindi. Ngazifunda zonke izincwadi zoFakazi engangizithola ngesiHungary futhi ngakwazi ukuthola izincwadi zabo zesiNgisi nezesiFulentshi ezazingahunyushiwe ngesiHungary. Yeka indlela engangibonga ngayo ngokuthi ngangiye ngafunda lezi ezinye izilimi!

Ngo-October 1956, abaseHungary bavukela umbuso wamaKhomanisi owawumiswe abaseRussia. Impi yayishubile eBudapest. Iziboshwa eziningi zakhululwa, kuhlanganise noFakazi BakaJehova. Phakathi nalesi sikhathi mina nomkami sabhapathizwa sibonakalisa ukuzinikezela kwethu kuJehova uNkulunkulu. Esontweni elilodwa kamuva, amabutho aseRussia akunqanda lokhu kuvukela. OFakazi ababekhululiwe babuyiselwa ejele.

Ilungelo Eliyigugu

Njengoba oFakazi abaningi ababephathiswe umsebenzi wokushumayela babeboshiwe, umfowethu othile ongumKristu wangibuza ukuthi ngingazihumusha yini izincwadi zethu ezithile zeBhayibheli. Ngaqale nganikezwa izincwadi eziyimfihlo ezivela eSwitzerland ezaziqukethe izihloko ze-Nqabayokulinda ezibhalwe ngomshini zesiFulentshi. Ngangizihumushela kuyisiHungary, bese amakhophi ezihloko ezihunyushiwe enikezwa amabandla.

Lapho inceku yegatsha laseHungary, uJános Konrád, ikhululwa ngo-1959 ngemva kokuboshwa iminyaka engu-12 ngenxa yokungathathi-hlangothi kobuKristu, ngamiswa njengomhumushi. Khona-ke ngathola ukwaziswa okwakungesiNgisi okwakudingeka ngikuhumushe. Ngokuvamile kwakulethwa owesifazane othile engangingamazi. Ngakho, uma ngangingabanjwa bese ngihlukunyezwa, ngangingeke ngilisho igama lakhe.

Ngemva kokuhumusha INqabayokulinda, uMfoweth’uKonrád wayeyihlola ukuthi inembile yini. Khona-ke odade babebhala izihloko ezihunyushiwe ngomshini ephepheni eliwulwelwesi, besebenzisa i-carbon paper ukuze benze amakhophi angu-12. Ngakho, ngezinye izikhathi, wonke umuntu owayeba khona eSifundweni Se-Nqabayokulinda wayeba neyakhe ikhophi yesifundo ebhalwe ngomshini. Ngemva kwalokho, babedlulisela amakhophi abo kwelinye iqembu lesifundo. Nokho, ngokuvamile sasikwazi ukukhiqiza ikhophi eyodwa ye-Nqabayokulinda siyinike iqembu lesifundo ngalinye. Khona-ke bonke abakhona kwakudingeka balalelisise futhi bathathe amaphuzu ukuze bazuze ngokugcwele engxoxweni yeBhayibheli.

Kusukela esikhathini engaqala ngaso ukuhumusha ngo-1956 kuze kube ngo-1978, INqabayokulinda yayikhishwa ngolimi lwesiHungary ibhalwe ngomshini kuphela. Kusukela ngo-1978 kuya ku-1990, kwakutholakala amakhophi e-Nqabayokulinda ayenziwe nge-mimeograph. Futhi yeka isibusiso okuye kwaba yiso kusukela ngo-January 1990 ukuba nabo bobabili omagazini INqabayokulinda ne-Phaphama! benyatheliswa ngolimi lwesiHungary ngombala omuhle ophelele!

Ngaphansi kombuso wamaKhomanisi, wonke umuntu kwakudingeka asebenze. Ngakho iminyaka engu-22, kuze kube yilapho ngithatha umhlalaphansi ngo-1978, ngangihumusha lapho ngingayile emsebenzini wokuziphilisa. Ngokuvamile kwakuba sekuseni kusempondozankomo nasebusuku kwesikabhadakazi. Ngemva kokuba ngithathe umhlalaphansi, ngakhonza isikhathi esigcwele njengomhumushi. Ngaleso sikhathi, umhumushi ngamunye wayesebenzela ekhaya, futhi ngenxa yokuvinjelwa, kwakunzima ukuba sithintane. Ngo-1964 amaphoyisa ahlasela ngasikhathi sinye amakhaya abahumushi futhi athatha izinto esasizisebenzisa. Eminyakeni eminingi ngemva kwalokho, sasivakashelwa amaphoyisa njalo.

Izibusiso Ezimangalisayo

Ngo-1969 samukelwa isicelo sami sencwadi yokungena kwelinye izwe, ngakho mina noJános Konrád sakwazi ukusuka eHungary siye eParis eMhlanganweni Wezizwe “Wokuthula Emhlabeni” WoFakazi BakaJehova owawulapho. Yeka isibusiso okwakuyiso ukuhlangana noFakazi bakwamanye amazwe nokuchitha izinsuku ezithile ehhovisi legatsha loFakazi BakaJehova eBern, eSwitzerland! Ngawo-1970 oFakazi abaningi baseHungary bakwazi ukuya emihlanganweni eyayise-Austria naseSwitzerland.

Ngemva kokuvinjelwa uhulumeni iminyaka eminingi, ngo-1986 saba nomhlangano wokuqala ngqá owawugunyazwe uhulumeni, eKamaraerdő Youth Park, eBudapest. Abangaphezu kuka-4000 ababekhona bakhala izinyembezi ngenxa yenjabulo njengoba babebingelela abafowabo nodadewabo futhi befunda uqwembe olulotshwe ukuthi bamukelekile emhlanganweni wethu olwalungaphezu kwesango laleli paki.

Ekugcineni, ngo-June 27, 1989, uhulumeni wabaqaphela ngokomthetho oFakazi BakaJehova. Bajabula abafowethu nodadewethu lapho bezwa lezi zindaba zimenyezelwa kuyithelevishini nasemsakazweni eHungary. Ngalowo nyaka saba nomhlangano wethu wesigodi wokuqala ngqá ngaphandle kokuphazamiseka kusukela umsebenzi wethu wavinjelwa cishe eminyakeni engu-40 edlule. Kwakunabangaphezu kuka-10 000 kulomhlangano eBudapest, futhi ezinye izinkulungwane zazikweminye imihlangano emine kulelizwe. Yeka ukuthi ngajabula kanjani ukubona uthunjana wakwethu, uLászló, nomkakhe bebhapathizwa eBudapest!

Khona-ke, ngo-July ngo-1991, saba nesibusiso esingaphezu kwalokho esasikucabanga—umhlangano eNépstadion enkulu yaseBudapest, owawunezihambeli ezingaphezu kuka-40 000. Lapho, ngaba nelungelo lokuhumusha izinkulumo zamalungu asendlunkulu yaseBrooklyn.

Namuhla, mina no-Anna, kanye nabafowethu nodadewethu abangaphezu kuka-40, sisebenza ehhovisi legatsha elihle loFakazi BakaJehova elisemaphethelweni edolobha laseBudapest. Lapha, ngikhonza eMnyangweni Wokuhumusha, kanye neqembu elihle lentsha, futhi u-Anna wenza imisebenzi yasendlini kulesi sakhiwo.

Naphezu kwemizamo yethu yokufundisa indodana yethu iqiniso leBhayibheli, lapho ikhula, ayizange ilamukele. Nokho, manje seyinesithakazelo kulo, futhi siyethemba ukuthi ngokuhamba kwesikhathi iyomkhonza uJehova.

Mina nomkami sibonga kakhulu ngokuthi siye salithola iqiniso ngoNkulunkulu wethu onothando, uJehova, futhi siye sakwazi ukumkhonza iminyaka engaphezu kwengu-40 manje.—Njengoba ilandiswa u-Endre Szanyi.

[Isithombe ekhasini 21]

Nginomkami