Ingabe Imali Iyimpande Yakho Konke Okubi?

Impendulo yeBhayibheli

Cha. IBhayibheli alisitsheli ukuthi imali yimbi, futhi alisho ukuthi imali iyimbangela yazo zonke izinto ezimbi. Amazwi avamile athi “imali impande yakho konke okubi” ayingcaphuno yeBhayibheli engaphelele nedukisayo. Empeleni iBhayibheli lithi “ukuthanda imali kuyimpande yakho konke okubi.”a—1 Thimothewu 6:10, IBhayibheli Elingcwele.

Lithini iBhayibheli ngemali?

IBhayibheli liyavuma ukuthi imali, uma isetshenziswa kahle, ingaba usizo, ibe ngisho “nayisivikelo.” (UmShumayeli 7:12) Ngaphezu kwalokho, iBhayibheli liyabancoma abapha abanye izinto, okungase kuhlanganise nemali.—IzAga 11:25.

Ngesikhathi esifanayo, iBhayibheli liyasixwayisa ngokwenza imali ibe yinto ehamba ephambili ekuphileni. Lithi: “Ekuphileni kwenu ningayithandi imali ngokweqile, naneliswe izinto ezikhona.” (Hebheru 13:5) Isifundo esisitholayo ukuthi kufanele sigcine imali isendaweni yayo futhi singagijimisi ingcebo. Kunalokho, kufanele sizimisele ukwaneliswa izinto esizidingayo ngempela, njengokudla, izingubo zokugqoka, nendawo yokuhlala.—1 Thimothewu 6:8.

**Kungani iBhayibheli lisixwayisa ngokuthanda imali?**

Abantu abahahayo ngeke bakuthole ukuphila okuphakade. (Efesu 5:5) Esinye isizathu salokho ukuthi ukuhaha kuwuhlobo oluthile lokukhonza izithombe noma ukukhulekela kwamanga. (Kolose 3:5) Esinye siwukuthi, lapho bezama ukuthola lokho abakufisayo, abantu abahahayo ababe besaba nandaba nokuziphatha ngendlela efanele. IzAga 28:20 zithi, “ojaha ukuceba ngeke ahlale emsulwa.” Abantu abanjalo bangaze ngisho balingeke ukuba benze ubugebengu, njengokufuna imvalamlomo, ukukhwabanisa, inkohlakalo, ukuthumba noma ukubulala.

Ngisho noma uthando lwemali lungasiholeli ekuziphatheni okubi kanjalo, kungaba neminye imiphumela engemihle. IBhayibheli lithi “labo abazimisele ngokuceba bawela esilingweni nasogibeni nasezifisweni eziningi ezingenangqondo nezilimazayo.”—1 Thimothewu 6:9.

Singazuza kanjani eselulekweni seBhayibheli ngemali?

Uma singazibekeli eceleni izimiso zokuziphatha nobuhlobo bethu noNkulunkulu ngenxa yemali, siyozihlonipha sithole nomusa kaNkulunkulu nokusekelwa nguye. Kulabo abazama ngobuqotho ukumjabulisa, uNkulunkulu uyathembisa: “Angisoze ngakushiya futhi angisoze ngakulahla.” (Hebheru 13:5, 6) Uphinde asiqinisekise ukuthi “umuntu othembekile uyothola izibusiso eziningi.”—IzAga 28:20.

Amavesi EBhayibheli Akhuluma Ngemali.

UmShumayeli 7:12: “Imali iyisivikelo.”

Incazelo: Lapho isetshenziswa ngokuhlakanipha, imali ingaba usizo ngoba inezela isilinganiso esithile sokuvikeleka.

Luka 12:15: “Ngoba ngisho nalapho umuntu enokuningi, ukuphila kwakhe akuveli ezintweni anazo.”

Incazelo: Imali ayikhona konke ekuphileni, futhi ngeke ibe nandima ekusindisweni kwethu.

1 Thimothewu 6:10: “Uthando lwemali luyimpande yazo zonke izinhlobo zezinto ezilimazayo, futhi ngokuzama ukufinyelela lolu thando abanye baye baduka okholweni futhi bazigwaza yonke indawo ngeminjunju eminingi.”

Incazelo: Imali yona ngokwayo ayiyimbi. Kodwa abantu abathanda imali—abayenza ibe yinto ehamba phambili ekuphileni—bazilethela izinkinga, njengokubhidlika kwemindeni nempilo engeyinhle ngenxa yokusebenza ngokweqile.

Hebheru 13:5: “Ekuphileni kwenu ningayithandi imali ngokweqile, naneliswe izinto ezikhona.”

Incazelo: Esikhundleni sokugijimisa ingcebo ngawo wonke amandla ethu, sihlakaniphile uma saneliswa yilokho esikudinga ngempela.

Mathewu 19:24: “Kulula ukuba ikamela lichushe embotsheni yenaliti kunokuba isicebi singene eMbusweni kaNkulunkulu.”

Incazelo: UJesu wayesanda kumema insizwa ecebile ukuba imlandele. Le nsizwa yenqaba ngoba yayinamathele kakhulu ezintweni zayo. Ngakho uJesu wayenikeza isixwayiso. Umuntu obeka ingcebo ngaphambi kukaNkulunkulu uzibeka engozini yokulahlekelwa ukuphila okuphakade.

a Leli vesi liye labekwa nangale ndlela: “Uthando lwemali luyimpande yazo zonke izinto ezilimazayo.”