IRwanda

IRWANDA ingelinye lamazwe amancane kakhulu e-Afrika. Ingelinye lamahle kakhulu futhi. Yaziwa ngokuthi iZwe Lamagquma Ayinkulungwane, isho ngezintaba, amahlathi, amachweba nezimpophoma kanye nezitshalo nezilwane ezinhlobonhlobo. Izintaba ezaziwa ngokuthi amaVirunga Mountain zisemngceleni weDemocratic Republic of the Congoa entshonalanga ne-Uganda enyakatho. IMount Karisimbi, okuyiyona ephakeme kulolu ndi, iyintaba-mlilo engavuthi ephakeme ngamamitha angu-4 480, ehlale imhlophe ngenxa yesithwathwa neqhwa. Ezansi kwezintaba kugcwele uqalo oluyizibhombolozi futhi kunehlathi, lapho izinkawu ezinombala osagolide zishwibeka khona emagatsheni ezihlahla. Kulapha futhi, kule ndawo eyenile, lapho kutholakala khona igugu elikhulu laseRwanda—igorila lasezintabeni.

Izitshalo ezingavamile nezimfunda ziyehla zize zifike ogwini lweLake Kivu naseHlathini iNyungwe. Kuleli hlathi kukhona ama-chimpanzee, izinkawu ezinombala omnyama nomhlophe nezinye izinhlobo zezilwane ezingaphezu kuka-70. Kunezinhlobo zezihlahla ezingaba ngu-270 nezinhlobo zezinyoni ezingaba ngu-300. Izimvemvane ziyabhuza nje, kanti nomaphi lapho uqalaza khona, kunezimbali ezibizwa ngokuthi ama-orchid, konke kwenza leli zwe elivikelekile libe lihle.

Phakathi eHlathini iNyungwe kunomfudlana owehlela empumalanga. Kancane kancane neminye imifula nemifudlana ithela kulo, bese wona uthela kuyiLake Victoria. Uma amanzi esuka lapho, ehla ngokushesha, afuqeke esethole amandla okuqhubeka nohambo olude ebheke enyakatho, adlule eTopiya, anqamule eSudan aze ayofika e-Egypt, afike athele kuyiMediterranean Sea. Njengoba lo mfula, iNile, usuka le emagqumeni asemahlathini ase-Afrika ephakathi, mude ngamakhilomitha acela ku-6 825, okwenza ube omunye wemifula emide kunayo yonke emhlabeni.

IZIKHATHI ZEZINXUSHUNXUSHU

Ngokudabukisayo, leli zwe elincanyana laseRwanda libe nodlame olushaqisayo. Izinkulungwane zamadoda, omame nezingane zabulawa ngesihluku phakathi nokuqothulwa kohlanga okubi kunakho konke emlandweni. Emhlabeni wonke kwakusakazwa izithombe eziveza udlame olunganqandeki, okwakwenza kuxhaphazele amathumbu kwabaningi lapho becabanga ngobulwane bomuntu komunye.—UmSh. 8:9.

Kwazihambela kanjani izinceku zikaJehova ezithembekile phakathi nalezo zikhathi ezishaqisayo naseminyakeni eyalandela? Njengoba nje nalowaya mfula obonakala ungamanzana nje angatheni obhoboka eHlathini iNyungwe unqoba zonke izithiyo, ungashi naphezu kokushisa kwelanga lase-Afrika okukhipha umkhovu etsheni, ukhula ube umfula omkhulukazi, nabantu bakaJehova eRwanda baye bakhuthazela enkonzweni yabo kuNkulunkulu. Baye bamelela ushushiso oluvuthayo nobunzima obukhulu, baba umthombo wamandla nesikhuthazo kubafowabo nodadewabo emhlabeni wonke. Lo mbiko waseRwanda uzokuthinta inhliziyo lapho ufunda izindaba ezihawulayo zothando, ukholo nobuqotho. Sithemba ukuthi le ndaba izokukhuthaza ukuba ububheke njengobuyigugu ngisho nakakhulu ubuhlobo bakho noJehova futhi ubazise ngokujule nangokwengeziwe ubuzalwane bobuKristu.

UKUKHANYA KUYALOKOZA

Umbiko wokuqala mayelana nokushunyayelwa kwezindaba ezinhle eRwanda waphuma ENcwadini Yonyaka YoFakazi BakaJehova Ka-1971 yesiNgisi. Wathi: “Ku-March walo nyaka [1970] amaphayona akhethekile amabili akwazile ukungena eRwanda aqala ukushumayela enhloko-dolobha iKigali. Athole ukuthi abantu banothando futhi bayasamukela isigijimi soMbuso, umuntu oyedwa onesithakazelo useqalile nasensimini. Aseqale izifundo eziyishumi phakathi kwabantu abayingcosana abakhuluma isiSwahili. Manje ashikashikana nokufunda isiKinyarwanda ukuze akwazi ukufakaza kubantu abaningi.”

La maphayona amabili akhethekile okukhulunywa ngawo kulo mbiko kwakungu-Oden Mwaisoba nomkakhe u-Enea baseTanzania. Ngenxa yokuthi babengakalwazi ulimi lwendawo, isiKinyarwanda, baqale bahambela abantu abakhuluma isiSwahili, abaningi babo ababedabuke eCongo noma eTanzania. Ngo-February 1971, kwakubika abamemezeli abane, kepha zazingekho izincwadi zethu ngesiKinyarwanda futhi inkinga yolimi yenza ukwanda kwangashesha.

UStanley Makumba, umbonisi wesifunda onesibindi owayekhonza eKenya, waya eRwanda okokuqala ngo-1974. Uyakhumbula: “Ayembalwa amabhasi ayesuka emngceleni we-Uganda neRwanda aye eRuhengeri, eRwanda. Ngagibela iloli eligcwele phama, ngama ngangakwazi kuthi nyaka. Umkami wahlala phambili nomshayeli. Lapho sifika lapho sasiya khona, wayengasangiboni ngoba ubuso nezinwele kwakumhlophe wu izintuli. Ngenxa yalolu hambo, lalingebuhlungu lingebuhlungu iqolo, kwadingeka ngihlale phansi lapho nginikeza izinkulumo ngesonto lomhlangano wesifunda nangawo umhlangano. Ngangingakwazi ukutshela abazalwane ukuthi ngizobahambela nini ngoba sasingazi ukuthi izinto zokuhamba sizozithola yini!”

UBUYELA EKHAYA

UGaspard Rwakabubu, ongowokuzalwa eRwanda, wayengumakhenika ezimayini zethusi eCongo. Uyalandisa: “Ngo-1974 ngaya eSikoleni Senkonzo SoMbuso eKolwezi. Omunye wabafundisi, uMichael Pottage, wathi ihhovisi legatsha eKinshasa lifuna umdala waseRwanda ongathanda ukubuyela ezweni lenkaba yakhe ayosiza ngomsebenzi wokushumayela. Ngangithanda nje ukuphindela ekhaya? Ngathi ngisazoke ngixoxe nomkami uMelanie.

“Ngaleso sikhathi ubasi wami emayini wayesanda kunginikeza isimemo sokuba ngiye eJalimane ngiyoqeqeshwa. Ngangiyisisebenzi esihle nomholo wami unyuka njalo. Noma kunjalo, akusithathanga zinsuku zingaki ukunquma. Ngatshela uMfoweth’ uPottage ukuthi siyasamukela isimemo sokubuyela eRwanda. Samxaka ubasi lesi sinqumo. Wabuza: ‘Awukwazi yini ukuba uFakazi KaJehova khona la? Kungani kumelwe ubuyele eRwanda?’ Ngisho nabanye abafowethu ababenezinhloso ezinhle bazama ukungivimba ukuba ngibuyele eRwanda. Bathi: ‘Unezingane ezine. Funda uLuka 14:28-30, uhlale phansi ucabange ngale ndaba.’ Asizange siwushintshe umqondo.

“Ubasi wami wakhokha zonke izindleko zokubuyela eRwanda ngendiza. Safika eKigali ngo-May 1975, saqasha indlu yodaka ewubhuqu phansi, eyayihluke kakhulu kule yenkampane esasinayo eyayinakho konke. Nokho, sasicabangile ngakho futhi sizimisele ukungabheki emuva.”

Njengoba amaphayona akhethekile akwamanye amazwe ayekhuluma isiSwahili, abantu abaningi bacabanga ukuthi la maphayona azofundisa sona. Kwashintsha lokho lapho kufika uGaspard nomkhaya wakhe ngoba bafundisa abantu iqiniso loMbuso ngeBhayibheli lesiKinyarwanda.

Ngaphezu kwalokho, uMfoweth’ uRwakabubu wahumushela incwajana enamakhasi angu-32 ethi “Lezi Zindaba Ezilungileyo ZoMbuso” olimini lwesiKinyarwanda. Yakhishwa ngo-1976 futhi yaba newozawoza. Abantu babeyifunda emabhasini nasemigwaqweni. Ukusetshenziswa kwegama elithi Jehova kwaholela ezingxoxweni eziningi.

ABASERWANDA BAMUKELA IQINISO

Ngaleso sikhathi, kwakunabamemezeli abangu-11 kuphela lapha, iningi labo kuyizifiki. Phakathi kwabantu bokuqala abazalelwa la abathola iqiniso kwakunoJustin Rwagatore. Waqala ukufundelwa amaphayona akhethekile aseTanzania ngesiSwahili, ngoba ayengasazi isiFulentshi noma isiKinyarwanda. Wayethanda abantu futhi wabhapathizwa ngo-1976, ehlala eSave, lapho inkosi yaseRwanda yayivumele izithunywa zevangeli ezingamaKatolika ukuba zakhe khona imishini ngo-1900. UJustin ukhumbula ukuthi abantu babenelukuluku lokwazi ukuthi iBhayibheli lifundisani ngempela. Kepha abefundisi babebazonda oFakazi BakaJehova, beyenqabela imihlambi yabo ukuba ibalalele noma yamukele izincwadi zabo.

UFerdinand Mugarura, umzalwane ophikelelayo, wayengomunye wabantu bokuqala eRwanda abamukela iqiniso. Ngo-1969, esahlala empumalanga yeCongo, wathola incwadi ethi IQiniso Eliholela Ekuphileni Okuphakade ngesiSwahili. Kamuva, lapho ethola ukuthi bakuphi oFakazi kuleyo ndawo, yena nabanye ababili babesuka ekhaya njalo ngoLwesihlanu, bahambe amakhilomitha angu-80 beya esifundweni bese beqhutshelwa isifundo, babuyele ekhaya ngoMsombuluko behamba ngezinyawo. UFerdinand wabhapathizwa ngo-1975, ngosuku olulodwa nesifundo sakhe seBhayibheli. Wamiswa njengephayona elikhethekile eRwanda ngo-1977 futhi ukhumbula ukuthi ngonyaka owandulele, umhlangano wesifunda wawusegunjini lokuphumula kwaRwakabubu, kunabantu abangu-34. Kwabhapathizwa abathathu.

IZITHUNYWA ZEVANGELI ZIYENQATSHELWA UKUNGENA

INdikimba Ebusayo, njengoba ihlale iphaphamele izidingo zensimu, yayabele izithunywa zevangeli eRwanda. Ngo-1969, kwathunyelwa lapha abafundi abane abaphothule ekilasini lama-47 le-Watchtower Bible School of Gilead.

UNicholas Fone uyakhumbula: “Ekupheleni kuka-January, uMfoweth’ uKnorr wakhipha izabelo zekilasi. Samuzwa etshela uPaul noMarilyn Evans ukuthi bazoya eRwanda. Wayesethi kimi nomkami: ‘Nizohamba nabo!’ Safa ukujabula, kwathi ngemva komhlangano sagijimela emtatsheni wezincwadi eGileyadi, sathatha ibalazwe elikhulu sabheka iRwanda. Kamuva sathola incwadi ethi abafowethu babengakwazanga ukusitholela imvume yokungena khona. Sadumala kodwa sasamukela esinye isabelo saseCongo sinoPaul noMarilyn.”

Ngo-1976, neminye imibhangqwana emibili yabelwa eRwanda ngemva kokuphothula ekilasini lama-60 eGileyadi. Yavunyelwa ukungena, yaqasha indlu, yashumayela ngesibindi, yaqala nokufunda isiKinyarwanda. Lapho ama-visa abo ephelelwa isikhathi ngemva kwezinyanga ezintathu, uMnyango Wezifiki wenqaba ukuwavuselela, ngakho bathunyelwa eBukavu, empumalanga yeCongo.

“AYESEBENZA KANZIMA”

Maphakathi nawo-1970, amaphayona akhethekile aseTanzania naseCongo aqala ukulishiya elaseRwanda ngezizathu ezihlukahlukene. Abafowethu baseRwanda bona baqala ukuphayona nokwandisa umsebenzi wokushumayela. Kwathi ngo-1978 incwadi IQiniso namapheshana amabili kwahunyushelwa olimini lwesiKinyarwanda. Ngaphezu kwalokho, kwaphuma INqabayokulinda ephuma nyanga zonke. Lezo zincwadi zaba usizo emsebenzini wokushumayela ngoMbuso. Mayelana nalezo zinsuku zokuqala, isithunywa sevangeli uManfred Tonak wathi ngamaphayona aseRwanda: “Ayesebenza kanzima futhi echitha isikhathi esiningi ensimini. Abasanda kuhlanganyela babelandela isibonelo sawo.”

UGaspard Niyongira ulandisa indlela izindaba ezinhle ezazisakazeka ngayo ngalezo zinsuku. “Ngesikhathi ngibhapathizwa ngo-1978, kwakubethusa abefundisi ukubona abaningi kangaka bengena eqinisweni. Emihlanganweni yethu emikhulu kwakufika inqwaba yabantu. Lapho siphuma siyoshumayela, sasifana nesikhonyane! Kwakuvame ukuba abamemezeli abangaba ngu-20 basuke enkabeni yedolobha laseKigali bahambe ngezinyawo beshumayela baze bayofika eKanombe, ibanga elingaba ngamakhilomitha angu-9. Ngemva kokuthiba indlala emini, babeqhubeka amakhilomitha angu-7 baye eMasaka, bese bebuyela eKigali ngebhasi kusihlwa. Amaqembu abamemezeli ayenza okufanayo kwezinye izindawo. Akumangazi-ke ukuthi ukushumayela kanje kwanikeza abantu umqondo wokuthi oFakazi BakaJehova bayizinkulungwane ngezinkulungwane. Ngenxa yalokho, saqala ukubekwa amabala, okwenza iziphathimandla zenqaba ukuba siqashelwe ngokomthetho.”

Njengoba babelishisekela iqiniso, abafowethu baseRwanda bafuna ukunambitha injabulo yokuhlangana nabafowabo bakwamanye amazwe. Ngakho ngo-December 1978, abamemezeli abangaba ngu-37 baseRwanda, kukhona nezingane, baya eNairobi, eKenya, badlula e-Uganda—ibanga elingamakhilomitha angaphezu kuka-1 200—beya eMhlanganweni Wezizwe othi “Ukholo Olunqobayo.” Kwakuwuhambo olunzima. Izinto zokuhamba zazingaqinisekile, ziphuka nokuphuka. Ngaphezu kwalokho, e-Uganda kwakunezinkinga kwezombusazwe. Lapho izihambeli zifika emngceleni waseKenya, amasosha ase-Uganda athi ziyizimpimpi, azibopha, aziyisa ekomkhulu lamasosha eKampala, e-Uganda. U-Idi Amin, owayengumongameli wase-Uganda, uyena owazipheka ngemibuzo. Wathi anganeliseka, wathi mazidedelwe. Nakuba baphuthelwa usuku lokuqala lomhlangano eNairobi, labo bazalwane bakujabulela ukubona izinkulungwane zabazalwane bakwamanye amazwe behlangene ngokuthula.

IMIZAMO YOKUTHOLA UKUQASHELWA NGOKOMTHETHO

Amaqiniso eBhayibheli nezindinganiso eziphakeme zokuziphatha zoFakazi azijabulisanga wonk’ umuntu. Abefundisi ikakhulu kwabanenga ukubona abantu abaningi bamukela iqiniso. UMfoweth’ uRwakabubu uyakhumbula: “Abaningi ababengamaKatolika, amaProthestani namaSabatha bathumela izincwadi zokwesula emasontweni abo. Omunye umzalwane wathi umphumela womsebenzi wokushumayela wawufana nomlilo othungelwe emasontweni. Ababeba khona emihlanganweni yeBandla LaseKigali banda ngokushesha badlula ku-200. Ekuqaleni abefundisi babenganakile ukuthi sikhona ngoba sasimbalwa. Kepha njengoba sasanda, abanye bathi siyingozi ezweni. Ngalesi sikhathi umbhishobhi omkhulu weSonto LamaKatolika eRwanda, uVincent Nsengiyumva, waba ilungu lekomiti yeqembu elibusayo.

“Njengoba sasanda masinyane, kwakudingeka siqashelwe ngokomthetho ukuze sikwazi ukungenisa izithunywa zevangeli, sakhe amaHholo OMbuso, sibe nanemihlangano emikhulu. Igatsha laseKenya lahlela ukuba u-Ernest Heuse waseBelgium athintane nawongqongqoshe bakahulumeni acele ukuba siqashelwe ngokomthetho, kodwa kwaba nhlanga zimuka nomoya. Kamuva, ngo-1982, ihhovisi legatsha laseKenya lasicebisa ukuba sibhalele uNgqongqoshe Wezobulungisa noWangaphakathi sicele ukuqashelwa ngokomthetho. Mina namanye amaphayona amabili akhethekile sayisayina le ncwadi. Kodwa lutho impendulo.”

Ukuphikiswa kona kwanda. U-Antoine Rugwiza, umzalwane othulayo nonesithunzi, ukhumbula ukuthi umongameli wamemezela emsakazweni ukuthi ngeke ababekezelele abantu abeya “ukholo lwabantu baseRwanda.” Bonke abantu baqonda ukuthi ukhuluma ngoFakazi BakaJehova. Akuphelanga sikhathi, abafowethu babe sebenqatshelwa ukuhlangana ndawonye. Kwezwakala amahlebezi okuthi base bezoboshwa. UMfoweth’ uRwakabubu wabizwa kabili ekomkhulu lezokuphepha eyophonswa imibuzo.

Kwathi ngo-November 1982, uKiala Mwango nomkakhe u-Elaine bathunywa besuka eNairobi beyoqondisa imihlangano yesifunda eButare, eGisenyi naseKigali. UMfoweth’ uRwakabubu wayengusihlalo kule mihlangano. Wayesanda kuqeda ukukhonza umhlangano waseKigali lapho ebizwa okwesithathu ehhovisi likamongameli. Kodwa-ke kulokhu akabange esabuya! Zingakapheli izinsuku ezine, namaphayona amabili akhethekile ayesayine leya ncwadi yesicelo sokuqashelwa ngokomthetho aboshwa. Bobathathu bagqunywa ejele lingazange lithethwe icala noma baziphendulele. Nabanye baboshwa. IHholo LoMbuso lavalwa, kwabekwa imigoqo ezicabheni. UNgqongqoshe Wezobulungisa wabhalela izifundazwe incwadi evimbela oFakazi BakaJehova.

Ekugcineni, ngo-October 1983, kwaqulwa icala labazalwane abathathu ababesayine isicelo sokuqashelwa ngokomthetho. Inkantolo yababeka icala lokuwaka nokukhohlisa abantu—amacala angamanga. Akubanga nafakazi noma incwadi ewubufakazi ecaleni. Yize kunjalo, laba bazalwane abathathu bagwetshwa iminyaka emibili ejele. Lapho ababulali ababegwetshiwe benikwa ushwele futhi bededelwa emajele, laba bazalwane abathembekile ababoniswanga musa. EGisenyi, abanye oFakazi abahlanu babhadla ejele iminyaka ethi ayibe mibili bengagwetshiwe, kungekho namasamanisi avela enkantolo.

UKUPHILA KWASEJELE

Ukuphila kwasejele kwakukubi. Kwakudliwa kanye ngosuku, umdumbula nobhontshisi. Inyama yayidliwa kanye ngenyanga. Izingubo zokulala zazinezimbungulu kodwa ngenxa yokuminyana, iziboshwa eziningi zazilala phansi. Ayengatholakali njalo amanzi okugeza. Abazalwane babehlala nezigebengu eziyizidlova. Onogada basejele babenokhahlo nakuba oyedwa wabo, uJean Fataki, ayenomusa kubazalwane. Wamukela isifundo, ekugcineni waba uFakazi obhapathiziwe, futhi kusukela ngaleso sikhathi kuze kube manje uyiphayona elithembekile.

UMfoweth’ uRwakabubu uyakhumbula: “Ngesikhathi sisejele, umbhishobhi omkhulu wenza iMisa ejele. Watshela ababekhona ukuba baqaphe oFakazi BakaJehova. Esehambile, amanye amaKatolika ayelapho asibuza ukuthi kungani umbhishobhi esho kanjalo ngoba ayebona ukuthi oFakazi BakaJehova abayona ingozi.”

Phakathi naleso sikhathi kwafika uRoger noNoella Poels eKigali bevela eBelgium. URoger wayeze ngomsebenzi. Laba bazalwane abathathu babesesejele, ngakho uRoger wacela ukubonana noNgqongqoshe Wezobulungisa achaze izinkolelo zethu futhi abuze ngomoya omuhle ukuthi kungani uhulumeni engabathandi oFakazi BakaJehova. Ungqongqoshe wavele wamnqamula ulimi, wathi: “Mnu. Poels, sekwanele okushilo! Uzongena endizeni elandelayo eya eBrussels. Phum’ uphele kuleli zwe!”

Njengoba laba bazalwane abathathu bengayekethisanga futhi bengangenwanga amanzi emadolweni, kwadingeka basidonse sonke isigwebo seminyaka emibili, nakuba ngowesibili bayiswa ejele elingcono. Badedelwa ngo-November 1984.

BAPHEKWA NGOBHOJWANA

Ukuphikiswa kwaqhubeka. Umsakazo wamemezela ukuthi oFakazi BakaJehova abantu ababi abeqisayo. Ngo-March 1986, base beboshwa yonk’ indawo. Phakathi kwababoshwa kwakuno-Augustin Murayi, okwakuthe ngenxa yokungathathi hlangothi kwakhe njengomKristu, waxoshwa esikhundleni sakhe sokuba umqondisi-jikelele woMnyango Wemfundo Yabaqalayo NeyaseSekhondari. Amaphephandaba amgxeka, umsakazo wona wamhlaba wamhlikiza.

Kulo lonke izwe kwaboshwa nabanye abafowethu nodadewethu, ngisho nabakhulelwe abanezingane ezincane. Ngasekupheleni kuka-1986, bayiswa ejele laseKigali belinde ukuthethwa kwecala. Ngenxa yokuthi abafowethu babengawaculi amaculo omzabalazo, bengalifaki ibheji likamongameli, bengalithengi nekhadi leqembu lezombusazwe, abantu baphetha ngokuthi oFakazi BakaJehova balwa nohulumeni futhi bazama nokuwuketula.

UPhocas Hakizumwami uyamomotheka lapho ekhumbula lokhu: “Abazalwane basebandleni eliseNyabisindu babephakathi kwababoshwa kuqala. Njengoba thina abanye sasilindele ukuboshwa noma nini, saqaphela ukuthi insimu yethu yayisizoshintsha ibe ngaphakathi ejele. Ngakho sanquma ukwenza umkhankaso omkhulu wokushumayela ensimini engaphandle. Saya ezimakethe sahambisa omagazini nezincwadi eziningi. Sathandaza kuJehova sicela ukuba asisize sihlanganise insimu yethu singakaboshwa. Wasisiza ngoba insimu yethu sayiqeda ngo-October 1, 1985. Ngemva kwesonto elilodwa, saboshwa.”

Ngonyaka olandelayo, uPalatin Nsanzurwimo nomkakhe uFatuma, baboshwa amaphoyisa oMbuso. Ngemva kokuphekwa ngemibuzo amahora angu-8 nokupeqululwa kwendlu yabo, baboshwa nezingane zabo ezintathu. Endleleni beya ejele, umfowabo omncane kaPalatin, owayelandela ngemuva, wathatha indodana yabo eneminyaka emihlanu nendodakazi eneminyaka emine. UPalatin noFatuma baboshwa kanye nengane yabo enezinyanga ezingu-14. Kamuva uFatuma wayiswa kwelinye ijele wahlala kulo kwaze kwaphela izinyanga ezingu-9.

Ngaleso sikhathi, izingane ezine zikaJean Tshiteya zaxoshwa esikoleni. Ngemva kwesikhashana, lapho efika ekhaya, wathola ukuthi umuzi wakhe wawupequluliwe nomkakhe eboshiwe, izingane zisele zodwa endlini. Ngemva nje kwalokho, kwayena uMfoweth’ uTshiteya wavalelwa ejele laseButare, lapho kwakukhona khona umkakhe nabanye abazalwane. Kamuva, zonke iziboshwa zaseButare zayiswa ejele laseKigali. Izingane zikaMfoweth’ uTshiteya zanakekelwa abazalwane eKigali.

UMfoweth’ uTshiteya uyakhumbula: “Njengoba abafowethu nodade babefika ejele laseKigali bevela kwamanye amajele, babebingelelana ngenjabulo, bethi ‘Komera!’ okusho ukuthi ‘Qina!’ Lapho omunye wonogada ekuzwa lokhu, wathi: ‘Niyahlanya nina! Abantu bangaqina kanjani ejele?’”

Naphezu kwalokho kuboshwa, abantu abaqotho abadikibalanga futhi ushushiso lwaluye lube nemiphumela emihle. U-Odette Mukandekezi, udade onomdlandla nothanda abantu, wayephakathi kwabaningi ababoshwa ngaleso sikhathi. Uthi: “Ngesikhathi soshushiso, abafowethu babeboshwa bashaywe. Ngelinye ilanga sadlula intombazanyana egama layo nguJosephine ilusa izinkomo. YayineBhayibheli futhi ifundile kulo ukuthi amaKristu akuqala ayezondwa, eshushiswa, ebhaxabulwa futhi eboshwa. Njengoba yayazi ukuthi oFakazi bayashushiswa, yaphetha ngokuthi kumelwe ukuba bayinkolo yeqiniso, ngakho yacela ukufundelwa. Manje isibhapathiziwe.”

Ngesikhathi sokuvinjelwa, uGaspard Niyongira wayenza umsebenzi wokushayela amaloli futhi umsebenzi wakhe wawuvame ukumyisa eNairobi, eKenya. Wangena nezincwadi ngesinyenyela eRwanda ezifake ebhokisini elalakhelwe elolini. Leli bhokisi lalikwazi ukuthatha amabhokisi ayisithupha ezincwadi. UHenry Ssenyonga, wasentshonalanga ye-Uganda, naye wayeye angene nomagazini ngesithuthuthu sakhe.

Imihlangano yebandla kwakudingeka iqhutshwe ngamaqembu amancane. Uma iziphathimandla zisola ukuthi oFakazi BakaJehova banomhlangano, zazisesha. UMfoweth’ uNiyongira uyakhumbula: “Ngaxhuma ikamelo endlini yami esasizoqhubela kulo imihlangano ngomshoshaphansi. Safaka izincwadi zethu kopulasitiki, sazigqiba sase semboza ngamalahle.”

Lapho kuqala igagasi lokuboshwa kwabazalwane, uJean-Marie Mutezintare, owayesanda kubhapathizwa, wakwazi ukuya eMhlanganweni wezizwe okhethekile othi “Abagcini Bobuqotho” ngo-December 1985 eNairobi. Lapho ebuyela eRwanda, yena no-Isaie Sibomana, bathatha omagazini kubazalwane basentshonalanga ye-Uganda. Emngceleni, amaphoyisa abathola lab’ omagazini, abopha laba bazalwane aya kobaphenya ngemibuzo, abavalela esitokisini esibandayo. Bathunyelwa ejele laseKigali. Bafica abazalwane nodade abangaba ngu-140 abajabula lapho bezwa umbiko womhlangano waseNairobi. Ngokuqinisekile abakusho kwabakhuthaza abazalwane, kwabaqinisa!

Abazalwane nodade ababeboshiwe babeqhuba imihlangano bahlele nomsebenzi wokushumayela. Ngaphandle kokushumayela, babefundisa neziboshwa ukufunda nokubhala. Babefundela nabantu abathakazelayo, basize nabamemezeli abaningi ababesanda kuhlanganyela balungele ukubhapathizwa. Abanye babo babefundelwa ngesikhathi beboshwa kanti abanye babelithole ejele iqiniso.

UMBONISI WESIFUNDA UHAMBELA IJELE

Omunye wabazalwane uchaza okwakwenzeka ejele laseKigali ngo-1986: “Kwakunabazalwane abaningi. Sahlangana saxoxa ngendlela esasizosiza ngayo abazalwane ababengaboshiwe. Sanquma ukubabhalela incwadi yokubakhuthaza. Sabatshela ukuthi uma sesiyiqedile insimu yethu ejele, sizobuya. Sasishumayela embhedeni ngombhede ejele, siqhube nezifundo. Kamuva, lapho sizwa ukuthi umbonisi wesifunda wayehambela amabandla ngaphandle, nathi safuna ukuhanjelwa, ngakho sathandaza ngakho kuJehova. Ngokushesha ngemva kwalokho, uMfoweth’ uRwakabubu, owayengumbonisi wesifunda, waboshwa okwesibili. Sakubheka njengendlela yokuba akwazi ukusihambela.”

Ngesikhathi soshushiso, uyedwa vo umzalwane owaphika ukholo lwakhe. Lapho efaka ibheji lezombusazwe, iziboshwa ezingebona oFakazi zamshaya, zamkhahlela, zamthuka, zambiza ngegwala. Umkakhe owayefundelwa wambuza ukuthi kungani ephike ukholo lwakhe. Kamuva lo mlisa wabhalela amajaji, ewazisa ukuthi wayenze iphutha nokuthi usengomunye woFakazi BakaJehova. Waze wabhalela nehhovisi legatsha eKenya waxolisa. Manje ukhonza uJehova ngokwethembeka.

UKUSHUMAYELA KUYAQHUBEKA NGAPHANDLE

Ababengaboshiwe baqhubeka beshumayela ngentshiseko, benza isilinganiso samahora angu-20 ngenyanga. U-Alfred Semali, owayengomunye wababengaphandle, uyakhumbula: “Nakuba ngingazange ngiboshwe, ngangikulindele futhi ngakulungiselela. IHholo LoMbuso lalivaliwe, ngakho sasihlangana ngamaqembu amancane siqhubeke sishumayele. Ngangifaka omagazini bami emvilophini ensunjwana, ngiye edolobheni njengokungathi ngiyofuna umsebenzi, bese ngibheka amathuba okuhambisa omagazini nokuxoxa ngeBhayibheli.

“Ngo-1986 abafowethu abaningi nabantu abathakazelayo baboshwa, ngisho nalabo ababesanda kuqala ukufundelwa. Iyamangalisa indlela abafowethu nababesanda kuhlanganyela abaqina ngayo. Ngaleso sikhathi oFakazi emazweni amaningi babhalela umongameli waseRwanda bekhalazela impatho engafanele, nezindaba emsakazweni zabika ukuthi uthola amakhulu ezincwadi zonke izinsuku. Umphumela waba muhle, ngonyaka olandelayo umongameli wathi abafowethu nodade nabantu abathakazelayo abadedelwe. Angiyazi leya njabulo!” Lapho nje bededelwa, abadala bahlela ukuba kubhapathizwe abafanelekayo eKigali, baba ngu-36 ababhapathizwa, abangu-34 kubo babhalisela ukuba amaphayona asizayo ngaso leso sikhathi!

Ngesikhathi ushushiso lubhokile ngo-1986, isilinganiso sabamemezeli ababikayo sasingu-435; cishe abangu-140 kulaba bafowethu nodade babekade beboshiwe. Lab’ oFakazi baba umgogodla wenhlangano kaJehova eRwanda. Ukholo lwabo ‘lwaluvivinyiwe.’—Jak. 1:3.

Ekugcineni, ngemva kweminyaka yawo-1980 eyayinezixakaxaka, amabandla eRwanda enkathini yokuthula nokwanda. Kodwa laliwaphatheleni ikusasa? Abaningi bamukela iqiniso. Ingabe nalaba abasanda kuhlanganyela babeyozibonisa bengabafundi abakhiwe ngezinto ezingashi? (1 Kor. 3:10-15) Ukholo lwabo lwaluyokwazi yini ukumelana novivinyo olwaluseza? Kwakuzobonakala ngokuhamba kwesikhathi.

IMPI NODLAME LWEZOMBUSAZWE

Ngo-1990, kwakunabamemezeli abakhuthele ababalelwa enkulungwaneni eRwanda. Kepha isimo kwezombusazwe sasicikiza, kwathi ngo-October, amabutho eRwandan Patriotic Front (RPF) agasela engxenyeni engasenyakatho yeRwanda evela e-Uganda engumakhelwane.

UFerdinand Mugarura, umzalwane onesibindi owayeboshelwe ukholo lwakhe kabili, wayehlala eRuhengeri ngesikhathi kuqala lokhu. Uthi: “Inzondo nokuqhosha ngobuzwe kwakubhebhetheka. OFakazi BakaJehova bona abathathanga hlangothi futhi bangabandlululana ngokobuzwe. Ngenxa yalokho, kwadingeka abanye babaleke emizini yabo, abanye balahlekelwa imisebenzi.”

Omunye udade onguthisha nomfelokazi onezingane ezintathu, wenqaba ukunikelela amasosha. Ngenxa yalokhu, uthisha-nhloko wamceba kubaphathi bamasosha, wayesevalelwa ejele okwesibili ngoba wayeboshiwe nangawo-1980. Lapho amabutho ahlaselayo efika edolobheni ayeboshwe kulo, ijele lagqekezwa, zonke iziboshwa zabaleka. Kunokuba lo dade abaleke nezinye iziboshwa, wahlala ejele. Lapho amabutho ahlaselayo ehoxa, waphinde waboshwa wayiswa ejele elikhulu eKigali. Elapho, wathandaza ecela ukwazi usuku lweSikhumbuzo ngoba wayengafuni simphuthele. Wamangala lapho kamuva ededelwa ngalo kanye usuku lweSikhumbuzo! Ngenxa yokungathathi hlangothi, walahlekelwa umuzi nomsebenzi, kodwa waba iphayona elishisekayo.

Ngenxa yokungenela kwamanye amazwe, ukuhlasela kwamabutho ayevela e-Uganda kwama kancane. Ngo-1991, kwathathwa izinyathelo zokwenza kube namaqembu amaningi ezombusazwe kuleli zwe. Kwakhiwa amaqembu amaningi amakhulu namaningana amancane, okwatshala umoya wokuziqhayisa ngesifunda somuntu nobuzwe bakhe. Amanye amaqembu ayenemigomo ekahle, kodwa amanye eyizishoshovu nontamo-lukhuni. Kwakuqala ukuba ukungathathi hlangothi koFakazi BakaJehova kwamukeleke. Ngenxa yokungathathi hlangothi ezimpini zezombusazwe nezezizwe, uhulumeni nabantu abavamile ababange besababheka njengezitha oFakazi.

Ngo-September 1991, ithimba labazalwane bakwamanye amazwe elaliphelezelwa abazalwane ababili baseRwanda—uGaspard Rwakabubu noTharcisse Seminega—lavakashela ongqongqoshe bakahulumeni abaqavile eKigali. Baxoxa noNgqongqoshe Wezobulungisa omusha, owabalalela ngozwela. Bambonga ngezinyathelo ezinhle ayesezithathile, bamkhuthaza nokuba abanike inkululeko ephelele engokwenkolo.

Ngo-January 1992, ngaphambi kokuba siqashelwe ngokomthetho, abafowethu baba nomhlangano wesigodi eKigali. UGodfrey noJennie Bint bayakhumbula: “Sasikhonza e-Uganda ngaleso sikhathi futhi samangala lapho sithola incwadi evela ehhovisi legatsha eKenya, isicela ukuba siye eRwanda amasonto amathathu siyosiza ngamalungiselelo omhlangano nangokuqopha amadrama. Abafowethu babephana ngendlela emangalisayo, njalo ngosuku sasimenywa umkhaya ohlukile ukuba sidle nawo. Kwakuqashwe inkundla yebhola lezinyawo futhi safika zibuya ngempela kwenziwa amalungiselelo. Abafowethu base behlelile ukuthi idrama izoqoshwa kanjani futhi kwahamba kahle naphezu kwemishini eyayingenele. Yize abafowethu abaningi basenyakatho yezwe bengayitholanga imvume yokuhamba nomngcele waseBurundi nase-Uganda uvaliwe, kwakukhona abangu-2 079 ngeSonto, kwabhapathizwa abangu-75.”

UKUQASHELWA NGOMTHETHO EKUGCINENI!

Ngemva kwezinyangana, ngo-April 13, 1992, umsebenzi woFakazi BakaJehova wagcina ubhaliswe ngokomthetho eRwanda—ngokokuqala ngqa. Wawusuphelile umshikashika wokumemezela izindaba ezinhle ngaphansi kokuvinjelwa, ukuhlukunyezwa nokugqunywa ejele. Abafowethu base bengabheka phambili enkathini entsha yokwanda ngokomoya.

INdikimba Ebusayo ayichithanga sikhathi yabela izithunywa zevangeli lapha. UHenk van Bussel, owayekhonza eCentral African Republic naseChad, noGodfrey noJennie Bint, ababekhonza eZaire (manje okuyiDemocratic Republic of the Congo) nase-Uganda, babeyizithunywa zevangeli zokuqala ezathola ama-visa okuba izakhamuzi. Kwamiswa iKomiti Yezwe eyayizoqondisa umsebenzi wokushumayela.

UMfoweth’ uBint uxoxa okwenzeka lapho befika okokuqala noHenk van Bussel: “Sathola umuzi okahle owawuzoba ikhaya lezithunywa zevangeli eduze kweHholo LoMbuso. Ngokushesha yithi labaya sesifunda isiKinyarwanda, sathola ukuthi sinzima impela njengoba namaphayona akhethekile okuqala ayesithole sinjalo ngo-1970. Enye yezincwadi zokusifunda yayinaleli cebiso: ‘Izinhlamvu CW uma zindawonye zibizwa ngokuthi TCHKW!’ Sikhumbula nokuthi udade owayesifundisa wathi, ‘Anisoze nambiza kahle u-“shy” egameni elithi “isi nshya” [umhlaba omusha] uma ningamomotheki!’”

Kamuva ngalowo nyaka, kwaba nenani elisha eliphakeme labamemezeli abangu-1 665, ngo-January 1993 kwaba nomunye umhlangano wesigodi eKigali. Kwaba khona abangu-4 498, kwabhapathizwa abangu-182. UKiala Mwango uyena owayeyisivakashi esivela egatsheni laseKenya. Akekho owayazi ukuthi esiqeshini sendawo engaphesheya komgwaqo uma usenkundleni yomhlangano kwakuyokwakhiwa ihhovisi legatsha ngo-2006.

Naphezu kokunye ukuhlasela kwebutho elivela enyakatho, alinciphanga ijubane lomsebenzi wokushumayela. Ngo-1993 kwase kusele amakhilomitha ambalwa ukuba ibutho elihlaselayo lifike eKigali. Imingcele yase-Uganda yayilokhu ivaliwe futhi budebuduze nenhloko-dolobha kwakuzwakala ukuqhuma kwezikhali. Abantu abangaba yisigidi babebalekile enyakatho yezwe. Kubona kwakunabafowethu nodade abangu-381, abanakekelwa abazalwane baseKigali nangakhona. Nokho, e-Arusha, eTanzania, kwenziwa isivumelwano sokubeka phansi izikhali, kwamiswa nendawo ezoba samngcele, nohulumeni wavuma ukubambisana namabutho ahlaselayo namaqembu ezombusazwe amaningana amakhulu namancane.

UMHLANGANO WOSUKU OLUKHETHEKE NGEMPELA!

Kwakuhlelwe ukuba umhlangano wosuku olukhethekile ube ngalowo nyaka eKigali Regional Stadium. Kodwa abaphathi bale nkundla babeqashisele neqembu lebhola—kwakuzoba nomdlalo webhola ngo-3:00 ntambama. Abafowethu baya esimisweni sasekuseni, kodwa singakaqali esantambama, kwafika abalandeli bebhola—amaphoyisa ahluleka ukubavimba bangangeni. Umphathi wenkundla wathi umdlalo uyoze uphele ngo-6:00 kusihlwa. Ngakho abafowethu bagoduka babuya ngo-6:00 bezoqedela isimiso.

Kwasikhathaza lokhu ngoba kwakunomthetho wewashi. Izimoto zazingavunyelwe ukuhamba ngemva kuka-6:00 kusihlwa nabantu babengavunyelwe ukuba ngaphandle ngemva kuka-9:00 ebusuku. Kodwa cishe ngo-7:00 kusihlwa, umsakazo wamemezela ukuthi sase sinwetshiwe isikhathi saya ku-11:00 ebusuku. Ngaphezu kwalokho, ugesi wawubuye uzihambele. Njengoba abaphathi benkundla babengayihloniphanga imithetho yokuqashisa inkundla, umphathi-dolobha waseKigali wahlela ukuba kube nogesi enkundleni. Waze wahlela nezinto zokuhamba zamahhala ezasetshenziswa abafowethu ngemva kwesimiso. Ngakho abafowethu bakwazi ukuwuqhuba wonke umhlangano. Cabanga ukumangala kwabo lapho bephuma enkundleni bethola inqwaba yamabhasi ibalindile!

UGünter Reschke ukhumbula ukuthi wavakashela eRwanda ekupheleni kuka-September 1993. Uyakhumbula: “Igatsha laseKenya langithuma eKigali ukuba ngiyofundisa eSikoleni Senkonzo SoMbuso noMfoweth’ uRwakabubu. Babengu-63 kuphela abadala eRwanda ngaleso sikhathi nakuba abamemezeli base bande bafika ku-1 881. Isimo sase sishubile, sezwa ngabasiki bebunda ukuthi ibambene enyakatho. Akekho owayelindele izikhathi zosizi ezaziseza, kodwa lesi sikole saba ukudla okufike ngesikhathi. Saqinisa ukholo lwabadala, sabahlomisa njengabelusi, okuyinto eyayidingeka kakhulu njengoba amafu amnyama empi ayehlangana.”

KUHLELWA UKUBA KUBE NEHHOVISI

Ekupheleni kuka-March 1994, uLeonard Ellis nomkakhe uNancy bafika lapha bevela eNairobi beze emihlanganweni ekhethekile futhi bezosiza ehhovisi labahumushi. Igatsha laseNairobi lalituse ukuba ikhaya lezithunywa zevangeli nehhovisi labahumushi eRwanda kuhlangane. NgoMsombuluko ngo-April 4, eSifundweni Se-Nqabayokulinda kwaba khona iqembu labahumushi elase landile, iKomiti Yezwe, izithunywa zevangeli noMfoweth’ u-Ellis nomkakhe. Kwakuyisikhathi esijabulisayo—isiqalo sokwanda okwengeziwe.

Sebewuqedile umsebenzi wabo, uMfoweth’ u-Ellis nomkakhe bahamba ngendiza eyaba eyokugcina ukuphuma eKigali kwaze kwaba ngemva kwezinyanga eziningi. Ngakusasa ntambama, uMfoweth’ uRwakabubu washayela ucingo ekhaya lezithunywa zevangeli ethi ihhovisi lamanxusa aseRussia liyiyekile indawo esasifisa ukwakha kuyo ihhovisi lezwe. Manje yayisinganikezwa oFakazi BakaJehova, ngakho kwakufanele sibe nomhlangano ngale ndaba ngakusasa ekuseni, ngoLwesine April 7. Awuzange ube khona lowo mhlangano.

UKUQOTHULWA KOHLANGA KUYAQALA!

NgoLwesithathu kusihlwa ngo-April 6, kwadutshulwa indiza eduze kwaseKigali, yaphahlazeka yalanguka amalangabi. Yayithwele umongameli waseRwanda nowaseBurundi. Bonke bafela lapho. Bambalwa abantu abezwa ngalokho ngalobo busuku; umsakazo awuzange uyibike le ndaba.

Izithunywa zevangeli ezintathu—abakwaBint noHenk—abasoze bazilibala izinsuku ezalandela. UMfoweth’ uBint uyachaza: “Ekuseni ngovivi ngo-April 7, savuswa ubuqhuqhuqhu bezibhamu namabhomu esandla. Asixwayanga ngoba vele isimo sezombusazwe sasishube kabi kabi kulezo zinyanga. Kodwa sathi sisadla ekuseni, kwangena ucingo. U-Emmanuel Ngirente, owayesehhovisi labahumushi, wasitshela ukuthi emsakazweni kwakumenyezelwe ukushona kwalab’ omongameli ababili. UMnyango Wezokuvikela waxwayisa bonke abantu ngokuthi bangaphumi ezindlini.

“Cishe ngo-9 ekuseni sezwa abaphangi bephahlaza umuzi kamakhelwane. Bantshontsha imoto yakhona babulala nenkosikazi.

“Masishane nje amasosha nabaphangi base bethelekile emzini wethu, bashaya isango, bashaya nensimbi esesangweni. Asizange sithi vu, sangaphumela naphandle. Ngasizathu simbe abazamanga ukubhodloza isango kodwa badlulela endlini elandelayo. Yonk’ indawo zaziqhuma ziqhumile izibhamu neziqhumane; yayingekho indlela yokuhamba. Izibhamu zaziqhuma la eduze, ngakho saya ephaseji phakathi nendlu ukuze sivikeleke ezinhlamvwini ezindizayo. Sabona ukuthi lesi simo sasingezuphela maduzane, ngakho sanquma ukonga ukudla ngokupheka kanye ngosuku, sidle ndawonye. Ngakusasa, lapho siqeda nje ukudla emini sisalalele izindaba emsakazweni, sezwa uHenk ememeza, ‘Nampa beqa ucingo lwethu!’

“Sasingekho isikhathi sokucabanga. Sangena endlini yokugezela sahluthulela umnyango. Sathandaza, sicela ukuba uJehova asisize sikhuthazelele noma yini ezokwenzeka. Singakaqedi ukuthandaza, sezwa iviyo lezidlamlilo nabaphangi bephihliza amafasitela nezicabha bengena. Ngesikhashana nje base bephakathi, bememeza begumbuqela ifenisha. Kwakungabaphangi abangaba ngu-40—amadoda, omama nezingane—kanye nezidlamlilo. Sabezwa bedubulana njengoba bebanga izinto abazitholayo.

“Ngemva kwesikhathi esabonakala siside—empeleni okwakuyimizuzu engu-40 kanje—bazama ukuvula umnyango wegumbi lokugezela. Ngenxa yokuthi wawuhluthulelwe, baqala ukuwubhodloza. Sabona ukuthi selisishonele, kufanele siphume. Babebaba há ngenxa yezidakamizwa. Basho ukusiqeda ngocelemba nemimese. UJennie wayekhala ememeza uJehova. Omunye umlisa washwiba ucelemba wakhe, wagadla kuHenk esijungujungwini ngempama kacelemba. UHenk wawela kubhavu. Ngabanika imali engingazi nokuthi ngayithola kanjani. Bayibanga.

“Hawu, nakhu sesibona insizwa ethile isigqolozele. Nakuba sasingayazi, yona yayisazi, mhlawumbe yayisibone sishumayela. Yasibamba yasidudulela phakathi endlini yokugezela yathi asivale umnyango. Yathi izosivikela.

“Umsindo wabaphangi waqhubeka imizuzu engaba ngu-30 noma ngaphezulu, kwase kuthi cwaka. Leya nsizwa yabuye yabuya izositshela ukuba siphume. Yathi asihambe masinyane futhi yasiphelezela. Asizange sibambe siyeka sithatha okuthile. Sashaqeka lapho sibona izidumbu zomakhelwane ababebulewe. AbaQaphi BakaMongameli ababili basiphelezela saya emzini oseduze wesikhulu samasosha. Sabe sesisiphelezela sasiyisa eMille Collines Hotel, lapho abaningi babebalekele khona. Ekugcineni, ngo-April 11 sayiswa eKenya, ngemva kwamahora amaningi okukhathazeka, siphuma ngezamawuba ngezimoto zamasosha sisuka edolobheni siya ngemuva kwesikhumulo sezindiza. Safika eBethel yaseNairobi izinwele zimadlodlombiya, singcolile. UHenk, esasihlukene naye ngesikhathi sibaleka, wafika ngemva kwamahora ambalwa. Umkhaya waseBethel wasibonisa uthando olukhulu futhi wasisekela.”

BASINDISWA UMTHANDAZO WENTOMBAZANYANA

Ngosuku olwalandela ukuphahlazeka kwendiza eyabulala umongameli waseRwanda nowaseBurundi, amasosha ayisithupha aya emzini kaMfoweth’ uRwakabubu. Ayeyizigoloza ezimehlo bomvu, enuka phu utshwala, uwabona nje ukuthi adakwe imilaliso. Athi afuna izikhali. UMfoweth’ uRwakabubu wawatshela ukuthi yena nomkhaya wakhe bangoFakazi BakaJehova, abanazikhali.

La masosha ayazi ukuthi njengoba oFakazi BakaJehova bengathathi hlangothi, babenqabile ukuxhasa uhulumeni nokunikelela amasosha. Athukuthela aveva. UGaspard noMelanie Rwakabubu abawona amaTutsi, kodwa izidlamlilo ze-Interahamwe ezingamaHutu zazingabulali amaTutsi wodwa kodwa namaHutu ayengachemile namanye amaHutu, ikakhulukazi uma esolwa ngokuthi azwelana namaTutsi noma ibutho elalihlasela.

Amasosha abhambabula uGaspard noMelanie ngemishiza, ayesebafaka ekamelweni nezingane zabo ezinhlanu. Endlula umbhede, amboza lo mkhaya ngamashidi. Amanye ayephethe iziqhumane, kusobala ukuthi ahloseni. UGaspard wathi: “Sicela ukuthandaza.”

Elinye isosha lenqaba ngokukhulu ukwedelela. Ngemva kokufakana imilomo, amasosha abavumela ukuba bathandaze nokho engathandisisi. Athi: “Kulungile, ningathandaza imizuzu emibili.”

Bathandaza buthule, kodwa uDeborah Rwakabubu, owayeneminyaka eyisithupha, wathandaza waphimisela: “Jehova, bafuna ukusibulala, sizophindela kanjani kubantu engibashumayeze noPapa ngabahambisela omagazini abahlanu? Balindele ukuba sibuye, futhi kufanele bafunde iqiniso. Ngiyakuthembisa, uma singasinda, ngizoba ummemezeli, ngibhapathizwe, ngibe iphayona! Sisindise bandla Jehova!”

Lapho amasosha ezwa lokhu, amangala. Ekugcineni, elinye lawo lathi: “Ngenxa yomthandazo wale ntombazanyana, ngeke sinibulale. Uma amanye amasosha efika la, niwatshele ukuthi besesikhona.”b

KUBA KUBI IMPELA

Impi yaya ishuba njengoba ibutho elihlaselayo (iRwandan Patriotic Front) lisondela enhloko-dolobha iKigali. Lokhu kwagqugquzela izidlamlilo ze-Interahamwe ukuba zibulale abantu abaningi.

Amasosha nezidlamlilo ze-Interahamwe ezihlomile kanye nezakhamuzi bavimba imigwaqo kulo lonke idolobha nakuzo zonke izimpambana-ndlela. Wonke amadoda akhishwa ngenkani ukuba ayovimba imigwaqo ne-Interahamwe, ubusuku nemini. Injongo yalokhu kwakuwukuthola amaTutsi abulawe.

Njengoba abantu babebulawa ezweni lonke, abantu baseRwanda abangamakhulu ezinkulungwane bashiya imizi yabo. Iningi labo, kuhlanganise noFakazi BakaJehova, bakhosela eCongo naseTanzania.

BABHEKENE NEMPI NOKUFA

Abafowethu nodadewethu basixoxela ngokwabehlela njengoba bebona ukuthi selibashonele. Khumbula ukuthi oFakazi BakaJehova eRwanda babevivinyiwe ngawo-1980, uvivinyo olunzima olwaluqinise futhi lwacwenga ukholo nesibindi sabo. Ukholo lwabo lwabenza bangaba “ingxenye yezwe” ngokwenqaba ukuvota, ukugada umphakathi nokungena kwezombusazwe. (Joh. 15:19) Isibindi sabo sabasiza bakwazi ukubhekana nemiphumela yokwenqaba kwabo—ukweyiswa, ukuboshwa, ukushushiswa nokufa. Lezo zimfanelo ezivivinyiwe kanye nothando lwabo ngoNkulunkulu nomakhelwane, zenza oFakazi BakaJehova bangagcina nje ngokungahlanganyeli ekubulaleni abantu kodwa futhi bafaka ukuphila kwabo engozini ukuze bavikelane.

Ziningi izigameko ezingafakwanga lapha. Iningi labafowethu lithanda ukuzilibala lezo zigigaba ngoba abafuni kuphindisela. Sethemba ukuthi indaba yokholo lwabo izosithinta sonke ukuba silubonise ngokugcwele uthando oluwuphawu lwabafundi beqiniso bakaJesu Kristu.—Joh. 13:34, 35.

INDABA KAJEAN NOCHANTAL

UJean de Dieu (John) Mugabo, umzalwane ohlale eneme nokhathalelayo waqala ukufundelwa oFakazi BakaJehova ngo-1982. Ngaphambi kokuba abhapathizwe ngo-1984, wayeseboshwe kathathu ngoba engomunye woFakazi BakaJehova. Umkakhe, uChantal, naye wabhapathizwa ngo-1984, ngo-1987 bashada. Lapho kuqala impi yokuqothulwa kohlanga, babenezingane ezintathu zamantombazane. Ezimbili ezindala zazihlala nogogo nomkhulu kwenye indawo, bona behlala nosana olunezinyanga eziyisithupha.

Ngosuku okwaqala ngalo ukuqothulwa kohlanga, ngo-April 7, 1994, amasosha ne-Interahamwe aqala ukuhlasela imizi yabo bonke abangamaTutsi. UJohn waboshwa washaywa nangezagila; kodwa wakwazi ukuphunyuka, yena kanye nomunye umzalwane babalekela eHholo LoMbuso eliseduze. Phakathi naleso sikhathi, engazi ukuthi kwenzekeni kumyeni wakhe, kwavele kwaduma upotiyane kuChantal wazama ukubaleka nosana lwabo aye lapho kwakuhlala khona ezinye izingane zabo ezimbili.

UJohn ulandisa lokho okwenzeka kuye: “IHholo LoMbuso lalikade liyibhikawozi futhi lalisenoshemula omkhulu. Sacasha kulo isonto elilodwa, udade ongumHutu esilethela ukudla uma kuphephile. Kamuva, kwadingeka sicashe ophahleni, phakathi kukathayela nesilingi, sithoswe ilanga emini. Njengoba sasisafuna indawo engcono yokucasha, saqhephula amatshe okwakwakhiwe ngawo ushemula, sangena phakathi kuwo, sacasha khona siqosheme isikhathi esingaphezu kwenyanga.

“Eduze kwalapho, umgwaqo wawuvinjiwe, futhi izidlamlilo ze-Interahamwe zazivame ukungena eHholo LoMbuso zixoxe noma zikhosele khona uma lina. Sasizizwa lapho zikhuluma. Lowaya dade waqhubeka esilethela ukudla noma nini lapho ekwazile. Ngezinye izikhathi, ngangicabanga ukuthi ngeke ngisakwazi ukubekezela, kodwa sasilokhu sikuthandazela. Ekugcineni, ngo-May 16, lo dade wafika ezositshela ukuthi iRwandan Patriotic Front isithathe izintambo kuleyo ngxenye yedolobha ngakho singaphuma endaweni esasicashe kuyo.”

Kwakwenzekeni kumkaJohn, uChantal? Uthi: “Ngakwazi ukubaleka nengane ngo-April 8. Ngahlangana nodade ababili, u-Immaculée, owayenekhadi elibonisa ukuthi ungumHutu noSuzanne, umTutsi. Sasifuna ukuya eBugesera, idolobha eliqhele ngamakhilomitha angaba ngu-50, lapho abazali bami babehlala khona nezingane zami ezimbili. Nokho, sezwa ukuthi imigwaqo yokuphuma edolobheni ivinjiwe, ngakho sakhetha ukuya elokishini eliseduze ngasemngceleni weKigali, lapho u-Immaculée ayenesihlobo esigama laso nguGahizi, naso esasinguFakazi KaJehova. UGahizi, ongumHutu, wasamukela, futhi naphezu kokwesatshiswa omakhelwane, wenza konke ayengakwenza ukuze asisize. Lapho amasosha kahulumeni ne-Interahamwe ethola ukuthi uGahizi uvikele amaTutsi, amdubula.

“Ngemva kokubulala uGahizi, amasosha asithatha asiyisa emfuleni eyosibulala. Sasithukile, sibona ukuthi siyafa namhlanje. Khona manjalo, kwaba nempikiswano evuthayo phakathi kwamasosha, elinye lawo lathi: ‘Ningababulali lab’ omama. Sizoba namabhadi. Asibulaleni amadoda kuphela.’ Ngakho omunye wabafowethu owayekade esilandela, u-André Twahirwa, owayesanda nje kubhapathizwa ngesonto elalandulele, wahamba nathi saya kwakhe nakuba omakhelwane babengafuni. Ngakusasa wasiphelezela saphindela eKigali, lapho ayenethemba lokuthi uzositholela khona indawo ephephile. Wasisiza sadlula ezindaweni eziningana eziyingozi kakhulu okwakuvinjwe kuzo. U-Immaculée wayephethe umntanami ukuze kuthi lapho sivinjwa, ingane ingabulawa. Mina noSuzanne sawadabula amakhadi ethu ukuze kungaziwa ukuthi singabaluphi uhlanga.

“Kwenye indawo okwakuvinjwe kuyo, i-Interahamwe yashaya u-Immaculée yathi, ‘Kungani uhamba nalawa maTutsi?’ Babengafuni ukusivumela sidlule sinoSuzanne. Ngakho u-Immaculée no-André baya emzini kaMfoweth’ uRwakabubu. U-André nabanye abazalwane ababili, uSimon noMathias, bazibeka engozini enkulu basisiza sadlula endaweni yokugcina okwakuvinjwe kuyo, mina bangiyisa kwaMfoweth’ uRwakabubu, uSuzanne waya kwesinye sezihlobo zakhe.

“Nokho, kwakuyingozi kakhulu ngami ukuba ngihlale kwaMfoweth’ uRwakabubu, ngakho nakuba kwakubucayi, abafowethu bakwazi ukungiyisa eHholo LoMbuso okwakucashe kulo abanye oFakazi. Ngaleso sikhathi, kwase kunabazalwane abayishumi abangamaTutsi nabanye ababebalekele khona. U-Immaculée wayethembeke kangangokuba wenqaba ukungishiya. Wathi, ‘Uma bekubulala mina ngisinde, ngizoyivikela ingane yakho.’”c

Phakathi naleso sikhathi, umzalwane wakuleyo ndawo, uVédaste Bimenyimana, owayeshade nomTutsi, wayesanda kuyisa umkhaya wakhe endaweni ephephile. Wabuya ezosiza labo ababesele eHholo LoMbuso ukuba bathole indawo ephephile. Bonke basinda.

Ngemva kwale mpi, uJohn noChantal bezwa ukuthi abazali babo namadodakazi abo, eneminyaka emibili nenemihlanu, ayehlala nogogo nomkhulu, babebulewe, kanye nezihlobo zabo ezingaba yikhulu. Bazizwa kanjani ngalesi senzakalo esishaqisayo? “Angibazi ubuhlungu obunjeya,” kuvuma uChantal. “Ingqondo yavele yajama ngenxa yomunyu. Sasingakaze sicabange ukuthi siyoke silahlekelwe abantu abaningi kangaka esibathandayo ngokufa. Samane sashiyela kuJehova, sinethemba lokuthi siyophinde sibabone abantabethu ovukweni.”

BACASHA IZINSUKU EZINGU-75!

UTharcisse Seminega wabhapathizwa eCongo ngo-1983. Phakathi nempi, wayehlala eButare, eRwanda, eqhelelene neKigali ngamakhilomitha angaba ngu-120. Wathi, “Ngemva kokuphahlazeka kwendiza kamongameli eKigali, sezwa ukuthi kukhishwe umyalo wokuba kubulawe wonke amaTutsi. Abazalwane ababili bazama ukusisiza ukuba sibalekele eBurundi, kodwa yonke imigwaqo yayigadwe izishoshovu ze-Interahamwe.

“Sasivaleleke emzini wethu, singazi ukuthi sizoyaphi. Kwakunamasosha amane ayewugadile, elinye licuphe inganono ebangeni elingamamitha angaba ngu-180. Ngathandaza kuJehova ngokusuka enhliziyweni ngathi, ‘Jehova, akukho esingakwenza. Nguwe kuphela ongasisindisa!’ Lapho sekuzohlwa, kwafika umzalwane egijima emzini wethu, ecabanga ukuthi sesifile. Amasosha amvumela ukuba angene athi ukuhlalahlala. Kwathi gidi lapho esifica sisaphila futhi ngandlela-thile wakwazi ukuthatha izingane zethu ezimbili waya nazo kwakhe. Wabe esebikela abanye abazalwane ababili, uJustin Rwagatore noJoseph Nduwayezu, ukuthi umkhaya wami ucashile nokuthi sidinga usizo lwabo. Bafika ebusuku ngalo lelo langa; nakuba kwakunzima futhi kuyingozi, bahamba nathi saya emzini kaJustin.

“Asihlalanga isikhathi eside emzini kaJustin ngoba ngosuku olulandelayo, abantu base bazi ukuthi sicashe khona. Ngalo lelo langa, umlisa ogama lakhe linguVincent weza ezosixwayisa ngokuthi i-Interahamwe ilungela ukusihlasela isibulale. Lo mlisa wayeke wafundelwa uJustin, kodwa akazange alamukele iqiniso. Wathi asiqale sicashe esinindolweni eduze komuzi kaJustin. Ebusuku wabuya ezosilanda, wasiyisa kwakhe. Wasicashisa eqhugwaneni elalihlala izimbuzi. Lalakhiwe ngodaka, liwubhuqu phansi, lifulelwe ngotshani, lingenamafasitela.

“Sahlala izinsuku eziningi kulelo qhugwane, elalakhiwe eduze kwempambana-mgwaqo budebuduze nemakethe ephithizela kunawo wonke kuleyo ndawo. Sasizwa abantu abadlulayo bexoxa ngababekwenze phakathi nosuku, okwakuhlanganisa nezindaba ezihlasimulisayo zabantu abababulele nalokho ababesahlela ukukwenza. Sasifile uvalo, futhi saqhubeka sithandazela ukuba sisinde.

“UVincent wenza konke ayengakwenza ukuze asinakekele. Sahlala lapho inyanga eyodwa, kwathi ngasekupheleni kuka-May, kwaba ingozi kakhulu ngenxa yokufika kwezishoshovu ze-Interahamwe ezazibaleka zisuka eKigali. Abazalwane banquma ukusiyisa emzini womfowethu owayenekamelwana ngaphansi komuzi wakhe. Kakade wayesecashise abazalwane abathathu kulo. Ukuze sifike emzini wakhe, sabeka ukuphila kwethu engozini, sahamba amahora amane nesigamu ngezinyawo ebusuku. Laliyidliva ngalobo busuku, okwaba isibusiso ngoba ababulali abazange basibone.

“Leli kamelo esasizocasha kulo laliwumgodi ojule ngemitha nesigamu, linomnyango oyipulangwe. Ukuze singene emgodini, kwakufanele sehle ngesitebhisi, bese siqoshama sigaqe ngamadolo entunjeni size siyofika egunjini elingaba amamitha-skwele amabili. Kwakunuka isikhutha, futhi ukuphela kokukhanya esasikuthola kwakungena ngofa olwalusodongeni. Mina, umkami, uChantal nezingane zethu ezinhlanu sasihlala lapho nabanye abantu abathathu. Sonke siyishumi sahlala amasonto ayisithupha kulo mgodi ocinene. Sasingeke sikhanyise ikhandlela ngoba kwakungase kubonakale ukuthi kunabantu. Nokho, phakathi nabo bonke lobo bunzima nokuhlupheka, uJehova wasisekela. Abafowethu babeka ukuphila kwabo engozini besilethela ukudla, imithi namazwi akhuthazayo. Ngezinye izikhathi sasikwazi ukukhanyisa ikhandlela elilodwa phakathi nosuku ukuze sifunde iBhayibheli, INqabayokulinda noma umbhalo wosuku.

“Okungapheli kuyahlola,” kuqhubeka uTharcisse. “Le mpi yona yaphela ngo-July 5, 1994. UVincent wasitshela ukuthi iButare isibuswa ibutho elalihlasela. Lapho siphuma emgodini esasikuwo, abanye abantu babengaboni ukuthi singabaseRwanda ngoba isikhumba sethu sasishintshe saba mhlophe ngoba singakutholi ukukhanya kwelanga. Ngaphezu kwalokho, sasingasakwazi ukukhulumela phezulu okwesikhathi esithile; sasihleba. Kwasithatha amasonto ukuba siphindele esimweni esikahle.

“Zonke lezi zenzakalo zaba nethonya elikhulu kumkami, okwase kudlule iminyaka eyishumi enqaba ukufunda iBhayibheli noFakazi BakaJehova. Nokho, manje waqala ukufundelwa. Lapho abantu bembuza ukuthi ufundelani, waphendula: ‘Ngithintwe uthando abafowethu abasibonisa lona nokuzidela kwabo ukuze basisindise. Ngezwa nesandla esinamandla sikaJehova owasisindisa ezikhalini zababulali.’ Wazinikezela kuJehova futhi wabhapathizwa emhlanganweni wokuqala owaba khona ngemva kwempi.

“Sizizwa sibakweleta bonke abafowethu nodade ababa nendima ekusindeni kwethu ngezenzo zabo nangemithandazo esuka enhliziyweni. Siluzwile uthando lwabo olujulile noluqotho, olungazange luvinjwe ukubandlululana ngobuzwe.”

UKUSIZA UMSIZI

UJustin Rwagatore, omunye wabafowethu abasiza ekusindiseni umkhaya kaMfoweth’ uSeminega, kamuva naye wadinga usizo. Ngo-1986 wayeboshelwe ukwenqaba ukusekela inhlangano yezombusazwe eyayibusa. Eminyakeni ethile ngemva kokuvikela umkhaya kaMfoweth’ uSeminega, uJustin nabanye abazalwane baphinde baboshelwa ukungathathi hlangothi. UMfoweth’ uSeminega wayengomunye wabazalwane abaya eziphathimandleni beyocacisa ukuma koFakazi BakaJehova mayelana nokuhileleka kwezombusazwe. Wachazela iziphathimandla ukuthi uJustin wayesize umkhaya wakhe wasinda. Ngenxa yalokho, bonke abafowethu ababesejele badedelwa.

Isibonelo sabafowethu phakathi nokuqothulwa kohlanga sashukumisela abanye ukuba bamukele iqiniso. USuzanne Lizinde, umKatolika oneminyaka engaba ngu-65, wabona isonto lakhe lisekela ukuqothulwa kohlanga. Ukuziphatha koFakazi BakaJehova endaweni ahlala kuyo phakathi nokuqothulwa kohlanga nothando ababenalo lwamenza wathuthuka ngokushesha. USuzanne wabhapathizwa ngo-January 1998 futhi akakaze aphuthe emhlanganweni webandla, ngisho noma kwakudingeka ahambe amakhilomitha amahlanu emagqumeni ukuze abe khona. Usize nomkhaya wakhe ukuba ufunde iqiniso. Namuhla omunye wamadodana akhe ungumdala futhi omunye wabazukulu bakhe uyinceku ekhonzayo.

KUBALEKA AMAKHULU EZINKULUNGWANE

Ngemva kokusuka eRwanda aye eKenya ngo-April 1994, uHenk van Bussel, isithunywa sevangeli esasabelwe eRwanda ngo-1992, wayelokhu eya eGoma, empumalanga yeCongo, eyosiza ngomsebenzi wokunakekela ababaleki baseRwanda. ECongo, abafowethu babehambahamba emngceleni bephakamise izincwadi zeBhayibheli, becula izingoma zoMbuso ngomlomo noma ngamakhwelo ukuze oFakazi abasuka eRwanda babone ukuthi bangabafowabo.

Abantu babenovalo yonk’ indawo. Njengoba kwakusenempi phakathi kwamabutho kahulumeni neRwandan Patriotic Front, amakhulu ezinkulungwane zabantu abalekela eCongo naseTanzania. Abafowethu ababalekela eGoma bahlangana eHholo LoMbuso. Kamuva, kwamiswa ikamu lababaleki ngaphandle nje kwedolobha, elalizohlala abantu abangaphezu kuka-2 000—oFakazi BakaJehova, izingane zabo nabantu abathakazelayo kuphela. Abafowethu bamisa amakamu anjalo nakwezinye izindawo zempumalanga yeCongo.

Nakuba iningi labantu ababebaleka kwakungamaHutu ayesaba ukubulawa, abafowethu ababaleka ndawonye kwakungamaHutu namaTutsi. Kwakuyingozi kakhulu ngamaTutsi ukuba aye eGoma ngoba ayesabulawa. Ngesinye isikhathi, imali eyayikhokhwa ukuze kukhishwe abafowethu abangamaTutsi kuleli zwe kwakungamaRandi angu-690 emunye.

Lapho sebeseCongo, abafowethu babefuna ukuhlala ndawonye. Babengafuni nakuyibona i-Interahamwe, eyayiphethe emakamu ayemiswe iZizwe Ezihlangene. Ngaphezu kwalokho, iningi lababaleki abangebona oFakazi lalisekela inhlangano eyayiketulwa. Lalingabathandi oFakazi BakaJehova, ikakhulu i-Interahamwe, ngoba babengazange bathathe uhlangothi. Abafowethu babefuna ukuzihlalela bodwa ukuze bakwazi nokuvikela abafowabo abangamaTutsi.

Njengoba labo ababaleka eRwanda babeshiye izinto zabo, babedinga usizo. Lolo sizo baluthola koFakazi BakaJehova baseBelgium, eCongo, eFrance, eKenya naseSwitzerland, banikezwa imali, imithi, ukudla nezingubo zokugqoka, kwafika odokotela nabahlengikazi. Elinye lamaqembu afika kuqala leza namatende amaningi amancane ayethunyelwe igatsha laseFrance. Kamuva, igatsha laseBelgium lathumela amatende amakhulu ayengahlala imikhaya. Kwathunyelwa imibhede ephathekayo nefuthwayo. Igatsha laseKenya lathumela izimpahla zokugqoka ezingaphezu kwamathani amabili nezingubo ezingaphezu kuka-2 000.

UKUBHEDUKA KWESIFO SOHUDO

Ngemva kokubaleka eRwanda, oFakazi nabathakazelayo abangaphezu kwenkulungwane bahlala eHholo LoMbuso LaseGoma nasendaweni eseceleni kwalo. Ngokudabukisayo, ngenxa yobuningi bababaleki, kwaqubuka isifo sohudo eGoma. Igatsha laseCongo (eKinshasa) lathumela masinyane imithi ukuze kunqandwe lolu bhadane, uMfoweth’ uVan Bussel wasuka ngendiza eNairobi waya eGoma namabhokisi angu-60 emithi. IHholo LoMbuso lasetshenziswa njengesibhedlela okwesikhashana futhi kwenziwa nomzamo wokuhlukanisa iziguli kwabanye. ULoic Domalain nomunye umzalwane, bobabili abangodokotela, kanye no-Aimable Habimana waseRwanda osebenza kwezokwelapha esibhedlela, bazinikela ngokungazigodli. UMfoweth’ uHamel waseFrance nabanye abafowethu nodade abaningi abanolwazi kwezokwelapha abeza bezosiza ekunakekeleni abagulayo baba usizo olukhulu phakathi nalobu bunzima.

Naphezu kwemizamo emikhulu yokunqanda lesi sifo, abafowethu abangaphezu kuka-150 nabantu abathakazelayo sabangena, sabulala abangaba ngu-40 singakanqandeki. Kamuva, kwaqashwa indawo enkulu eyayizoba ikamu lababaleki abangoFakazi BakaJehova. Kwamiswa amatende amaningi amancane, kwamiswa nelikhulu elalivela eKenya elaba isibhedlela. Izisebenzi zezempilo zaseMelika ezafika zahlabeka umxhwele lapho zibona ukuhlanzeka nokuhleleka kwaleli kamu.

Ngasekuqaleni kuka-August 1994, ikomiti eyayisiza eGoma yayinakekela ababaleki abangu-2 274—oFakazi, abantwana nabantu abathakazelayo. Ngesikhathi esifanayo, kwakunabanye ababaleki abaningi abangabafowethu eBukavu nase-Uvira, empumalanga yeCongo, naseBurundi. Abanye abangu-230 babesekamu lababaleki eTanzania.

Lapho abafowethu basehhovisi labahumushi eKigali bephoqeleka ukuba babalekele eGoma, baqasha indlu ukuze baqhubeke behumusha. Bakwazi ukuqhubeka nomsebenzi ngoba babethathe i-computer nomshini ophehla ugesi phakathi nempi bakususa eKigali bakuyisa eGoma.

EGoma lwalungekho ucingo neposi. Nokho, ngosizo loFakazi ababesebenza esikhumulweni sezindiza, abafowethu bathumelelana umsebenzi wabahumushi namanye amaposi ngendiza eyayisuka eGoma iye eNairobi masonto onke. Abafowethu basegatsheni laseKenya nabo babelithumela kanjalo iposi eGoma.

U-Emmanuel Ngirente nabanye abahumushi ababili baqhubeka behumusha ngokusemandleni abo, nakuba izimo zazinzima. Ezinye izihloko ze-Nqabayokulinda abazange bazihumushe ngenxa yempi, kodwa kamuva zahunyushwa zanyatheliswa ezincwajaneni ezikhethekile, zafundwa eSifundweni Sencwadi Sebandla.

UKUPHILA EMAKAMU ABABALEKI

Ngesikhathi kusenababaleki abasuka eKigali, uFrancine, owayebalekele eGoma ngemva kokubulawa komyeni wakhe u-Ananie, wayiswa kwelinye lamakamu ayemiswe oFakazi. Uchaza ukuphila kwakulelo kamu: “Abafowethu nodade bababelwa ukulungisa ukudla usuku ngalunye. Sasidla ukudla okulula ekuseni okwakuhlanganisa amabele noma incumbe. Sasilungiselela nokudla kwasemini. Uma siqeda ukusebenza, sasikhululekile ukuya enkonzweni yasensimini. Sasishumayela ikakhulu kumalungu emikhaya esasihlala nawo ekamu ayengebona oFakazi nakulabo abahlala ngaphandle kwekamu. Nokho, ngemva kwesikhathi esithile, amasosha e-Interahamwe ayekwamanye amakamu athukuthela lapho ebona oFakazi besemakamu ayehlukanisiwe nabanye ababaleki, futhi isimo saba bucayi.”

Ngawo-November 1994, kwacaca ukuthi kwase kuphephile ukuba abafowethu baphindele eRwanda. Empeleni, kwakuwukuhlakanipha ukuphindela khona ngoba amakamu alabo abangebona oFakazi eCongo ayengalondekile. Kodwa uhambo lwaluyoba nzima. I-Interahamwe yayifuna ukuphinde ihlangane ihlasele iRwanda, futhi umbono wayo wawungukuthi noma ubani ohambayo eCongo aphindele eRwanda uyimbuka.

Abafowethu batshela uhulumeni eRwanda ukuthi oFakazi BakaJehova, ababengazange bathathe hlangothi empini futhi bengahlanganyelanga ekuqothulweni kwamaTutsi, bafuna ukuphindela ezweni labo. Uhulumeni watshela abafowethu ukuthi abakhulume ne-United Nations High Commission for Refugees (i-UNHCR) eyayinezimoto ezazingabathuthela khona. Kepha ngenxa yokuthi izishoshovu zazingafuni baphindele eRwanda, kwadingeka abafowethu bavele nesu.

Bamemezela ukuthi kuzoba nomhlangano wosuku olukhethekile eGoma, kwenziwa nezingqwembe zomhlangano. OFakazi babe sebetshelwa ngasese ukuthi kuhlelwa ukuba baphindele eRwanda. Ukuze bangasolisi, bayalwa ukuba bashiye zonke izinto zabo emakamu bahambe nje namaBhayibheli abo namaculo njengokungathi baya emhlanganweni.

UFrancine ukhumbula ukuthi bahamba isikhathi eside baze bafika emalolini ayezobayisa emngceleni. Lapho sebeseRwanda, i-UNHCR yahlela ukubathatha emngceleni ibayise eKigali nasezindaweni abahlala kuzo. Ngakho iningi labafowethu nemikhaya yabo nabathakazelayo laphindela eRwanda ngo-December 1994. Iphephandaba laseBelgium i-Le Soir langomhla ka-3 December, 1994, labika: “Ababaleki baseRwanda abangu-1 500 banqume ukuhamba eZaire [eCongo] ngoba bezizwa bengalondekile. BangoFakazi BakaJehova ababemise ikamu labo ngenhla kwekamu laseKatale. Bashushiswa uhulumeni wangaphambili ngoba babenqaba ukuphatha izikhali nokuhlanganyela ekubhikisheni.”

Lapho befika eRwanda, uFrancine wakwazi ukuya emhlanganweni wesigodi eNairobi. Njengoba ayesethole induduzo ngemva kokushonelwa umyeni wakhe futhi esekhuthazwe abafowethu nodade, uFrancine wabuyela ehhovisi labahumushi elase limiswe kabusha eKigali. Kamuva washada no-Emmanuel Ngirente futhi bayaqhubeka bekhonza ehhovisi legatsha.

UFrancine wakwazi kanjani ukubhekana nobuhlungu ngesikhathi sempi? Wathi: “Ngaleso sikhathi yinye kuphela into esasizitshele yona—kumelwe sikhuthazele kuze kube sekugcineni. Sanquma ukungagxili ezintweni ezimbi ezazenzeka. Ngikhumbula ngithola induduzo kuHabakuki 3:17-19 okhuluma ngokuthola injabulo lapho usebunzimeni. Abafowethu nodade bangikhuthaza ngempela. Abanye bangibhalela izincwadi. Lokhu kwangisiza ngalondoloza isimo sengqondo esiqondile ngokomoya. Ngakhumbula ukuthi uSathane unamaqhinga amaningi. Uma sigxila ohlotsheni olulodwa lwezinkinga, singase sinqotshwe olunye. Uma singaqaphile, singahlaseleka ngandlela-thile.”

UKUPHINDELA ERWANDA

UMfoweth’ uVan Bussel wabasiza kakhulu abazalwane ababebuya. Uyachaza: “Kwamiswa isimiso sokusiza abafowethu ukuba basimame ngokomnotho ngemva kwempi, kuhlanganise nalabo abasala eRwanda balahlekelwa cishe yikho konke ababenakho. Abazalwane abamisiwe bavakashela wonke amabandla beyohlola izidingo zawo. Imikhaya nabantu ngabanye banikezwa amaphasela ezinto abazidingayo. Abafowethu babeqonda ukuthi ngemva kwezinyanga ezintathu kuzodingeka bazitholele indlela yokuziphilisa.”

Zazinakekelwa nezidingo ezingokomoya zabafowethu. Iqembu labahumushi laphindela lapho lalikhona ekuqaleni eKigali. UMfoweth’ uVan Bussel ukhumbula ukuthi leyo ndlu eyayikade iyihhovisi yayinezimbobo zezinhlamvu, kodwa eziningi zezincwadi edepho zazisekhona. Kwaphela izinyanga belokhu bethola izinhlamvu emabhokisini ezincwadi. Omunye wabahumushi waze wathola ngisho nebhomu engadini! Ngonyaka olandelayo, cishe ngo-October 1995, iqembu labahumushi lathuthela kwesinye isakhiwo esikhudlwana okusebenzeka kangcono kuso. Lesi sakhiwo esasiqashiwe sasetshenziswa njengehhovisi nendawo yokuhlala kwaze kwakhiwa ihhovisi legatsha elisha ngo-2006.

“KWAKUSENGATHI ISIKHATHI SOVUKO!”

Ngawo-December 1994, iningi labafowethu lase lisukile eCongo ukuze libe khona emhlanganweni wesigodi owawunesihloko esifanelekayo esithi “Ukwesaba UNkulunkulu.” Wawuzoba segcekeni lelinye lamaHholo OMbuso eKigali. Kweza abafowethu abavela eFrance, eKenya nase-Uganda. NgoLwesihlanu ekuseni kwakugcwele abafowethu ehholo. Omunye udade uyakhumbula: “Kwakuthinta inhliziyo ukubona abafowethu nodade bangana, kwehla izinyembezi emehlweni abo. Babebonana okokuqala kusukela ekuqaleni kwempi. Babehlangana nabangane ababecabanga ukuthi bafile!” Omunye wathi, “Kwakusengathi isikhathi sovuko!”

UGünter Reschke wayephakathi kwezihambeli zaseKenya. Wathi: “Yeka injabulo esasinayo ngokuphinde sihlangane ngemva kobunzima, sibone ababesindile! Nokho, kwakunenkinga. Iziphathimandla zazingathandi kube nesixuku sabantu abahlangene kanje. Emini yantambama kwafika amasosha athi ngenxa yokwesabela ukulondeka, awusezukuba khona umhlangano. Kwadingeka sihambe ngaso leso sikhathi. Sathi ukuhlala sakhuthaza abafowethu kodwa ekugcineni kwakufanele siphindele eNairobi, sidangele ngoba abafowethu bengakwazanga ukuthola isimiso somhlangano. Nakuba lokho kwakudumaza, saba nomuzwa wokuthi sikwenze konke ebesingakwenza ukuze sikhuthaze abafowethu ngasese ukuba baqine okholweni, futhi sahamba siqiniseka ngokuthi bazimisele ukwenza kanjalo.”

Njengoba manje kwakunesilinganiso esithile sokuthula ezweni, abantu abaningi abadabuka eRwanda ababehlala kwamanye amazwe baphindela khona. Kwafika nabanye ababezalelwe kwamanye amazwe ngemva kokuba abazali babo bebaleke kuwo phakathi nezinxushunxushu zobuzwe nezombusazwe ngasekupheleni kwawo-1950 nawo-1960. Phakathi kwabo kwakunabantu ababeye bafundelwa kwamanye amazwe. Ngokwesibonelo, uJames Munyaburanga nomkhaya wakhe bamukela ukukhulekela okuhlanzekile beseCentral African Republic. Ngenxa yokuthi uhulumeni omusha eRwanda wawufuna ukuqasha ababaleki ababuyayo, uMfoweth’ uMunyaburanga waqashwa. Nokho, ngemva kokuphindela eRwanda, wabhekana nokuphikiswa nokuklolodelwa izihlobo nezinye izisebenzi ngoba ekhethe ukuphila ngezimiso zobuKristu. Ekugcineni, wacela ukuthatha umhlalaphansi, waba iphayona elivamile. Manje ungummeleli wezomthetho wenhlangano.

UNgirabakunzi Mashariki wathola iqiniso empumalanga yeCongo. Wathi: “Ngenxa yokuthi ngingumTutsi, ngakhuthazelela ubandlululo iminyaka eminingi. Lapho ngihlangana noFakazi BakaJehova, kwaba sengathi ngikwelinye izwe! Kwakuyisimangaliso ukuhlangana nabantu abahluzekile abaphila ngokuvumelana nalokho abakufundisayo. Lolu thando lwabonakala ngisho nakakhulu phakathi nempi yokuqothulwa kwamaTutsi ngo-1994. Abafowethu basicashisa nomkhaya wami, basivikela. Ngo-1998 ngamenyelwa eBethel lapho ngikhonza khona manje nomkami, u-Emerance. Ngililindele ngokulangazela izwe elisha, lapho konke ukucwasa nobandlululo kuyophela futhi umhlaba uyogcwala abantu ababiza igama likaJehova abahlala ndawonye ngobunye.”

UMSEBENZI UYAQALA FUTHI

Ngo-March 1994, ngaphambi nje kwempi, kwakunabamemezeli abangu-2 500 eRwanda. Ngawo-May 1995, kwafinyelelwa inani elisha labamemezeli abangu-2 807 naphezu kokuba abaningi babebulewe ekuqothulweni kohlanga. Abantu abaqotho bathutheleka enhlanganweni kaJehova. Ngokwesibonelo, omunye udade oyiphayona elikhethekile wayeqhuba izifundo zeBhayibheli ezingaphezu kuka-22, ezinye wazilindisa, ezobuye aziqhube! Umbonisi wesifunda wachaza, “Impi yasiza abantu babona ukuthi ukuphishekela izinto ezibonakalayo kuyize.”

Ngo-January 1996 abafowethu baba noMhlangano Wesigodi ‘Wabadumisi Abajabulayo.’ Kwaba umhlangano omnandi! Njengoba owangonyaka owawandulele wawuhoxisiwe, lona kwaba umhlangano wokuqala ngemva kwempi. Omunye owayekhona wathi, “Abafowethu babangana, bechiphiza izinyembezi futhi kwakuhlaba umxhwele ukubona abazalwane abangamaHutu namaTutsi begonana.” Ababekhona babengu-4 424, kwabhapathizwa abangu-285. UMfoweth’ uReschke uyakhumbula: “Kwakuthinta inhliziyo ukuzwa abayobhapathizwa bephendula ngo-‘Yego!’ (yebo) ozwakalayo emibuzweni emibili yobhapathizo. Bashaya ujenga enkundleni sebeyobhapathizwa, bemanzi nté ngoba laliyithela. Babengenandaba nalokho. Babethi, ‘Ingani sisazongena emanzini vele!’”

UHenk van Bussel waphindela eRwanda; uGünter Reschke, owayezosiza ekuqaleni kabusha umsebenzi, wabelwa ukuba akhonze khona ngokuqhubekayo. Kungakabiphi, uGodfrey noJennie Bint nabo baphindela eRwanda.

INDODANA YABO YALAHLEKA YATHOLAKALA!

Eminyakeni yangemva kwempi, imikhaya eyayihlukene yayihlangana futhi. Ngokwesibonelo, ngo-1994, lapho impi phakathi kwamaqembu amabili ishuba eKigali, bonke abantu babaleka ngasikhathi sinye, futhi phakathi nesidididi esaba khona, u-Oreste Murinda walahlekelana nomkakhe wabaleka nendodana yabo eyayineminyaka emibili nesigamu waya eGitarama. Lapho u-Oreste ephuma eyofuna ukudla, kwaphinde kwalwiwa, walahlekelwa indodana yakhe kuleso siphithiphithi.

Ngemva kwempi, u-Oreste nomkakhe baphinde bahlangana, kodwa babengakayitholi ingane yabo. Baphetha ngokuthi ibulewe. Nokho, ngemva kweminyaka engaphezu kwemibili, umlisa wasemaphandleni, owayengeyena uFakazi, wathuthela eKigali eze ngomsebenzi. Wahlangana nabafowethu, phakathi nengxoxo wabatshela ukuthi umkhaya owawungomakhelwane bakhe eGisenyi wawufelwe izingane empini kodwa wathola intandane wayikhulisa. Le ntandane yayilikhumbula igama likayise futhi yasho ukuthi abazali bayo bangoFakazi BakaJehova. Abafowethu babelazi lelo gama, bathintana nabazali bengane ababe sebebonisa lo mlisa izithombe zendodana yabo. Kwakuyiyo ngempela! U-Oreste waya koyilanda ngaso leso sikhathi, baphinde bamthola umfana wabo ngemva kweminyaka emibili nesigamu! Manje usengummemezeli obhapathiziwe.

Kuyaphawuleka ukuthi abafowethu bazinakekela zonke izingane ezashonelwa abazali abangoFakazi. Azikho ezayiswa emakhaya ezintandane. Ngezinye izikhathi abazalwane babenakekela izingane eziyizintandane zomakhelwane noma zezihlobo. Omunye umbhangqwana owawunezingane eziyishumi wawunakekela izintandane eziyishumi.

KUPHINDE KUBA NEZINXUSHUNXUSHU ENYAKATHO

Ngasekupheleni kuka-1996, impi yombango eCongo yakwenza kwaba nzima kakhulu ukuwagcina elondekile amakamu ababaleki, ayesenababaleki baseRwanda abangaphezu kwesigidi. Ngo-November, ababaleki baphoqeleka ukuba baphindele eRwanda noma babalekele emahlathini aseCongo. Iningi labuya, kuhlanganise nabafowethu ababengazange babuye ngo-December 1994. Azilibaleki izindimbane zabantu, abasha nabadala, ezazihamba emigwaqweni eKigali zigqoke izingubo ezigcwele izintuli, zithwele imithwalo emakhanda. Bonke labo babaleki kwadingeka baphindele lapho bedabuka khona, baphinde babhaliswe. Abezokuphepha babegade yonk’ indawo.

Ngeshwa, ziningi izigelekeqe ezabuya nababaleki, kuhlanganise nezinye izidlamlilo ze-Interahamwe, ezazama ukuqhubeka nomsebenzi wazo enyakatho yezwe. Ngenxa yalokho, kwathunyelwa ibutho amasosha khona ukuze ayogada. Abafowethu abaningi babehlala lapho futhi kwakuyinselele enkulu ngabo ukungathathi hlangothi. Abamemezeli abangaphezu kwekhulu balahlekelwa ukuphila kwabo phakathi kuka-1997 no-1998, ikakhulu ngenxa yokulondoloza ngobuqotho ukungathathi hlangothi kobuKristu. Ngezinye izikhathi, kwakuyingozi kakhulu ngababonisi besifunda ukuba bahambele amabandla.

UMBHANGQWANA ONESIBINDI

UThéobald Munyampundu nomkakhe uBerancille, wayengomunye wababonisi besifunda abambalwa abahambela amabandla asezindaweni ezingaphephile. Kwakungekusha kubo ukuhlala endaweni eyingozi. UThéobald wabhapathizwa ngo-1984, ngemva kweminyaka emibili wagqunywa ejele nabafowethu nodade abaningi, wabhaxabulwa kabuhlungu. Yena nomkakhe babebeke ukuphila kwabo engozini ngokufihla abanye phakathi nokuqothulwa kwamaTutsi. Ngemva kokusindisa umfana onina wayebulewe empini, bawelela eTanzania. Ngesikhathi belapho, uThéobald wavakashela amakamu amabili eBenaco naseKaragwe ukuze akhuthaze abafowethu, nakuba ukuhamba emakamu kwakuyingozi kakhulu ngoba kwakunabaphangi.

Lapho sebephindele eRwanda, uThéobald nomkakhe baphinde babeka ukuphila kwabo engozini ukuze bavakashele oFakazi esifundazweni esasineziyaluyalu sasenyakatho-ntshonalanga yezwe. “Ngezinye izikhathi amabandla esasiwavakashela ayekude,” kusho uThéobald. “Ngenxa yokuthi kwakungalondekile, sasingakwazi ukulala khona. Ngikhumbula ukuthi ngesinye isikhathi kwakudingeka ukuba zonke izinsuku sihambe amahora amane siya noma sibuya ekuhambeleni abafowethu ngezikhathi zezimvula, bese sibuyela ekhaya kusihlwa.”

UThéobald wachaza omunye umfowethu ahlangana naye lapho evakashele iqembu elingalodwa kuleyo ndawo: “UJean-Pierre uyimpumputhe, kodwa ngamangala lapho ngimbona eyonikeza inkulumo yokufundwa kweBhayibheli eSikoleni Senkonzo Esingokwasezulwini futhi ewusho ngekhanda umBhalo ayewabelwe ngaphandle kokwenza iphutha, ehlonipha nazo zonke izimpawu zenkulumo! Wayecele omunye umzalwane owayengumfundi omuhle ukuba amfundele kusengaphambili ukuze awubambe ngekhanda. Ukuzimisela kwakhe kwangikhuthaza ngempela.”

Lapho ecabanga ngokuphila kwakhe okunenjongo nokwakulengela egodini ngezinye izikhathi, uThéobald uthi: “Phakathi nazo zonke lezo zikhathi ezibucayi, sabeka ithemba lethu kuJehova futhi sicabanga njalo ngamazwi akweyamaHebheru 13:6: ‘UJehova ungumsizi wami; ngeke ngesabe. Umuntu angangenzani?’” Ngemva kokukhonza ngokwethembeka esifundeni nasesigodini, yena nomkakhe baqhubeka bekhonza njengamaphayona akhethekile naphezu kwezinkinga zempilo.

UKWAKHIWA KWEHHOLO LOMHLANGANO

Njengoba inani loFakazi lalikhula, kwakuba nzima nakakhulu ukuthola izindawo ezifanelekayo zemihlangano emikhulu eKigali. Ngokwesibonelo, ipayipi lamanzi elaqhuma lakhipha indle ejele eliseduze laphazamisa uMhlangano Wesigodi ‘Wezithunywa Zokuthula KukaNkulunkulu’ owawusenkundleni ethile ngo-December 1996. Abafowethu bakhalaza ngephunga, abazali besabela impilo yezingane zabo. Ngenxa yalezi zimo ezimbi, iKomiti Yezwe yanquma ngazwilinye ukuthi lo mhlangano wesigodi wawuyoba owokugcina ngcí abayoke babe nawo kule nkundla. Kodwa yayizoqhutshelwaphi imihlangano?

UMnyango Wezindawo Zokuhlala wanikeza elinye lamabandla aseKigali indawo elalizokwakha kuyo ihholo loMbuso. Yayinkulu kunalokho okwakudingeka, futhi ukube abafowethu bathumela amapulani eHholo LoMbuso kuphela, cishe abomnyango odabula amazwe babezoyinikeza omunye umuntu indawo esele. Ngakho bethembele kuJehova, bathumela amapulani eHholo LoMbuso neHholo LoMhlangano elingadle ngabukhazikhazi, befuna nokwakha elinye iHholo LoMbuso kamuva. Iziphathimandla zawamukela lawo mapulani.

Abafowethu bayilungisa indawo bafaka nothango. Izisebenzi zokuzithandela eziningi zasusa ukhula, zagenca nezihlahlana futhi zemba imigodi ejulile yezindlu zangasese. Manje base benendawo enhle eyehlelayo, okuyindawo enhle yokuqhubela imihlangano.

Ezinyangeni ezalandela, abafowethu baba nemihlangano emibili emikhulu nokhethekile kule ndawo, kodwa iziphepho ezinamandla nemvula kwaphoqa ababekhona ukuba babalekele koseyili nasezambuleleni. Ngenxa yalokho, kwacelwa eNdikimbeni Ebusayo ukuba kwakhiwe iHholo LoMhlangano elivulekile emaceleni elingadle ngabukhazikhazi.

Ngo-March 1998, iNdikimba Ebusayo yanikeza imvume yokuba kwakhiwe iHholo LoMhlangano. Amalungiselelo aqalwa masinyane. Phakathi nesikhathi sokwakha, imikhaya yayisebenza ndawonye, imba imigodi okwakuzofakwa kuyo izinsika. Bonke basebenza ndawonye ngobunye. Ngo-March 6, 1999, uJean-Jules Guilloud wasegatsheni laseSwitzerland wanikeza inkulumo yokunikezela lesi sakhiwo esihle esisha.

Ngawo-1999, kwaphinde kwaba nokulondeka kulo lonke izwe. Ngo-February, umbhangqwana omusha oyizithunywa zevangeli, uRalph noJennifer Jones, wabelwa ukuba uyokhonza ehhovisi laseRwanda futhi amalungu omkhaya waseBethel aba ngu-21.

Abafowethu ababili baseRwanda babephothule eSikoleni Sokuqeqeshela Inkonzo (manje esibizwa ngokuthi iSikole SeBhayibheli Sabazalwane Abangashadile) eKinshasa, eCongo, eqhele ngamakhilomitha angaba ngu-1 600. Nokho, njengoba kwase kunempi eCongo, kwaba nzima kakhulu ngabantu baseRwanda ukuba baye eKinshasa. Ngenxa yalokhu, iNdikimba Ebusayo yagunyaza ukuba kuqhutshwe iSikole Sokuqeqeshela Inkonzo eKigali. Ikilasi lokuqala labangu-28 baseBurundi, eCongo naseRwanda lathweswa iziqu ngo-December 2000.

Ngo-May 2000, iRwanda yaba igatsha, futhi masinyane ngemva kwalokho abafowethu bathola indawo ekahle yokwakha ihhovisi legatsha elalizonakekela umsebenzi owawanda ngokushesha. Bathenga indawo engamahekthare amabili ngo-April 2001. Abafowethu abaningi eKigali bayawukhumbula umsebenzi okhandlayo owenziwa lapho kususwa ihlathi elalikuleyo ndawo okwase kuyiminyaka ingahlali muntu.

KUQHUMA INTABAMLILO EMPUMALANGA YECONGO

Ngo-January 17, 2002, intabamlilo iNyiragongo, eqhele ngamakhilomitha angaba ngu-16 ukusuka eGoma empumalanga yeCongo, yaqhuma futhi iningi labantu bakuleyo ndawo kwadingeka libaleke. Abamemezeli abaningi kwabangu-1 600 babaleka nezingane zabo nabantu abathakazelayo bawela umngcele baya eGisenyi, eRwanda, uma befika khona bayiswa emaHholo OMbuso aseduze.

Ngosuku olulandelayo abafowethu basehhovisi legatsha laseRwanda balayisha izinto eziyizidingo, ezihlanganisa ukudla, izingubo nemithi elolini elingamathani amathathu. Zathunyelwa ngokushesha emaHholo OMbuso ayisithupha asendaweni eseduze komngcele waseCongo.

Ngenxa yezizathu zokulondeka, uhulumeni waseRwanda wawesaba ukuvumela abantu abaningi kangaka baseCongo ukuba bahlale emaHholo OMbuso, wathi abayiswe emakamu ababaleki. Abazalwane beKomiti Yegatsha YaseRwanda bahlangana eGoma namalungu amabili eKomiti Yegatsha YaseCongo nabadala ababili basemabandleni aseGoma ukuze banqume ukuthi bazokwenzenjani. Abafowethu baseCongo bema kwelokuthi abafuni abafowabo baye emakamu ababaleki aseRwanda. Bathi, “Ngo-1994 sanakekela abafowethu baseRwanda abangaphezu kuka-2 000 nemikhaya yabo nabantu abathakazelayo, ngakho kunokuba sivumele abafowethu bayiswe emakamu, mabaphindele eGoma, thina sizobanakekela njengoba sabanakekela nabaseRwanda.”

Okwenziwa abafowethu baseCongo kwakubonisa uthando lokwamukela izihambi ngokuphinde bamukele abafowabo futhi babahlalise emakhaya abazalwane kunokuba babayeke bahlale emakamu aphethwe izinhlangano zezwe. Ngakho abafowethu nemikhaya yabo baphindela eGoma, bahlala khona. Ngemva kwalokho, kwathunyelwa ezinye izinto eziyizidingo, njengoseyili, zivela eBelgium, eFrance naseSwitzerland ukuze zibe usizo ngaleso sikhathi. Abazalwane bahlala eGoma kwaze kwaba yilapho sebakhelwe imizi emisha.

IZENZAKALO EZIYINGQOPHA-MLANDO

IHhovisi Lesifunda Lokudweba Amapulani laseNingizimu Afrika ladweba amapulani egatsha elisha, kwaqashwa inkampane eyayizokwakha. Izisebenzi zokuzithandela zakwamanye amazwe zasiza ekwakheni futhi oFakazi abaningi basendaweni basiza engadini nakweminye imisebenzi yokuqedela. Naphezu kwezingqinamba nezinselele ezithile, umkhaya waseBethel wathuthela egatsheni elihle elisha ngo-March 2006. Kamuva ngalowo nyaka, uGuy Pierce weNdikimba Ebusayo weza nomkakhe esimisweni esikhethekile sokulinikezela ngo-December 2, 2006. Kwakukhona abafowethu nodade abangu-553 nezihambeli ezingu-112 zasemazweni angu-15.

UJim noRachel Holmes baseCanada babesebenza esakhiweni. Bayalwazi uLimi Lwezandla LwaseMelika futhi bathi bangafundisa noma imaphi amalungu aseBethel angathanda ukulufunda ngemva kweSifundo Se-Nqabayokulinda esiqhutshwa khona ngoMsombuluko. Bayisithupha ababenesithakazelo futhi bathuthuka kangangokuba ngokushesha kwaqalwa iqembu lolimi lwezandla.

Ngo-June 2007, uKevin Rupp owathweswa iziqu eSikoleni Sokuqeqeshela Inkonzo eSwitzerland, waya eRwanda njengesithunywa sevangeli eyosiza ensimini yolimi lwezandla. Ngokushesha ngemva kwalokho, kwafika umbhangqwana waseCanada oyizithunywa zevangeli olwaziyo ulimi lwezandla. Ngo-July 2008, abafowethu bamisa ibandla lolimi lwezandla futhi masinyane kwaba namanye amaqembu.

Yeka indlela abafowethu abajabula ngayo lapho bezwa isaziso emhlanganweni wesigodi ngo-2007 sokuthi INguqulo Yezwe Elisha YemiBhalo YamaKristu YesiGreki isiyatholakala ngesiKinyarwanda! I-United Bible Societies yayikhiphe iBhayibheli eliphelele ngesiKinyarwanda ngo-1956. Nakuba le nguqulo yayenziwe ngomzamo oqotho wokuba iBhayibheli litholakale ngolimi olukhulunywayo, ize isebenzise ngisho negama elithi YEHOVA (Jehova) izikhathi ezingu-7 emiBhalweni YesiHebheru, INguqulo Yezwe Elisha yona itholakala kalula kunoma ubani, ikakhulu labo abazihluphekelayo. Ngenxa yemizamo yenkuthalo yabahumushi noMnyango We-Translation Services eNew York, le nguqulo entsha inembile futhi ifundeka kalula. Akuve kujabulisa ukubona iningi lezingane eHholo LoMbuso liphethe amakhophi emiBhalo YesiGreki futhi liphakamisa izandla ukuze lifunde umBhalo lapho kudingeka phakathi nemihlangano!

IZINSELELE ZOKUNGATHATHI HLANGOTHI

Nakuba bathola inkululeko engokwenkolo selokhu baqashelwa ngokomthetho ngo-1992, abafowethu baye babhekana nezinkinga ngenxa yokungathathi hlangothi kwabo kobuKristu. Phakathi neminyaka engu-15 edlule, abaningi baye baboshwa ngoba bengawenzi umsebenzi wamasosha wokugada ebusuku. Nokho, ngemva kokuba abafowethu sebexoxe nongqongqoshe bakahulumeni, iziphathimandla zabavumela ukuba benze omunye umsebenzi.

Eminyakeni yamuva, othisha abangu-215 balahlekelwe imisebenzi ngenxa yokwenqaba ukuya emihlanganweni yezombusazwe. Ngemva kwalokho, izingane zesikole ezingu-118 zaxoshwa ezikoleni ngoba zenqaba ukucula iculo lesizwe. Abameleli begatsha baya eziphathimandleni beyochaza ukuma kwethu kokungathathi hlangothi, ngemva kwezinyanga eziningi iningi lezingane lavunyelwa ukuba liphindele esikoleni. Bebhekisela emlandweni womsebenzi wethu eRwanda, abafowethu baveze ukuthi ngo-1986, oFakazi BakaJehova bafakwa ejele ngoba bengathathi hlangothi, kanti ngo-1994, ukungathathi hlangothi kwabo yikona okwakubenze bangahlanganyela empini yokuqothulwa kohlanga.—Joh. 17:16.

OFakazi BakaJehova balalela imithetho yohulumeni futhi abathathi hlangothi kungakhathaliseki ukuthi kubusa muphi uhulumeni. Ngokwesibonelo, ngo-1986, uFrancois-Xavier Hakizimana waboshwa izinyanga ezingu-18 ngoba engathathi hlangothi. Lapho sekubusa omunye uhulumeni ngemva kwempi, waphinde waboshwa ngo-1997 nango-1998 ngenxa yesizathu esifanayo. Izibonelo ezinjengalesi zibonisa ukuthi ukungathathi hlangothi koFakazi BakaJehova akushintshi futhi akuyi ngokuthi kubusa muphi uhulumeni. Ukungathathi hlangothi kobuKristu kusekelwe ngokuqinile ezimisweni ezisemiBhalweni.

Ngaphandle kwalezi zinselele eziqhubekayo, abafowethu banenkululeko yokuqhuba imihlangano masonto onke nemihlangano emikhulu futhi bavunyelwe ukushumayela nokuqhuba imihlangano emajele amaningi, lapho abaningi baye bamukela khona iqiniso. Ngaphezu kwalokho, ngonyaka wenkonzo ka-2009, amacala ayisithupha asenkantolo avuna abantu bakaJehova eRwanda.

IKUSASA LIQHAKAZILE

Singabe siwukha phezulu umlando waseRwanda uma singakhulumanga ngesimiso esiphumelela ngendlela emangalisayo sokwakhiwa kwamaHholo OMbuso. Selokhu leli lungiselelo elisha lokwakha amaHholo OMbuso emazweni antulayo laqala ngo-1999, izisebenzi zokuzithandela sezakhe amaHholo OMbuso angaba ngu-290 akahle.

Ngenxa yokusekela ngobuningi kwabamemezeli basemabandleni, abafowethu bawaqeda ngezinyanga ezintathu amaningi awo. Njengoba kwakhiwa amaHholo OMbuso ngokushesha kulo lonke izwe, ababukele bayamangala, kuvuleke amathuba okuba abantu bakaJehova banikeze ubufakazi. Ngaphandle kweHholo LoMhlangano laseKigali, abafowethu bakhe amaHholo OMhlangano ayishumi amancane nangamemezi avulekile emaceleni ukuze abamemezeli bangahambi amabanga amade ezintabeni lapho beya emihlanganweni. Ngaphezu kwalokho, abafowethu baye bakha amaHholo OMbuso amane anwebekayo ukuze kuqhutshelwe nemihlangano emikhulu kuwo.

Ezinyangeni zokuqala ezimbalwa zonyaka, wonke amabandla ahlanganyela ngentshiseko ekusebenzeni insimu engabelwe noma engasetshenzwa njalo. Ngezinye izikhathi abamemezeli bakhipha imali bahambe amabanga amade ukuze bahlanganise le nsimu. Ezindaweni eziqhele kakhulu kuthunyelwa amaphayona akhethekile esikhashana ayoshumayela kuzo izinyanga ezintathu. Ngenxa yalokho, ukwakheka kwamaqembu amasha kubeke isisekelo sokuba kumiswe amabandla. Ngokwesibonelo, emkhankasweni ka-January kuya ku-March 2010, kwaqalwa izifundo zeBhayibheli eziningi kwamiswa namaqembu amasha angu-9. Ngaphezu kwalokho, phakathi naleso sikhathi, amaphayona akhethekile esikhashana angu-30 aqala amaqembu amasha angu-15.

ESINYE ISENZAKALO ESIYINGQOPHA-MLANDO ERWANDA

EMhlanganweni Wesigodi ka-2009 othi “Hlalani Nilindile!” abafowethu eRwanda bajabula kakhulu lapho kukhululwa iculo elisha nalapho bezwa ezinye zezingoma ezintsha ngesiKinyarwanda. Leli culo lahunyushwa ngokushesha ngesiKinyarwanda futhi amabandla awathola ngesikhathi amaculo ukuze aqale ukucula izingoma ezintsha emihlanganweni kanyekanye nabanye abazalwane emhlabeni wonke ngo-January 2010.

Kuyaqondakala ukuthi ngemva kokukhululwa kwe-Nguqulo Yezwe Elisha YemiBhalo YamaKristu YesiGreki ngesiKinyarwanda ngo-2007, wonk’ umuntu wayezibuza ukuthi iBhayibheli eliphelele lizotholakala nini ngesiKinyarwanda. Njengoba kwakusondela imihlangano yesigodi ka-2010, kwamenyezelwa ukuthi uGuy Pierce, ilungu leNdikimba Ebusayo, uzobe evakashele eRwanda ngesikhathi somhlangano waseKigali ngo-August. Lo mhlangano wawuzoba senkundleni yezemidlalo engaphesheya komgwaqo uma usuka egatsheni. Kwakunesasasa, futhi yeka intokozo ababa nayo lapho uMfoweth’ uPierce ememezela ukukhululwa kwe-Nguqulo Yezwe Elisha YemiBhalo Engcwele ephelele ngesiKinyarwanda! Umuntu ngamunye kwabangu-7 149 ababekhona ngoLwesihlanu ekuseni wathola ikhophi yakhe yeBhayibheli elisha. NgeSonto, kwafika abafowethu bakwezinye izindawo zaseRwanda, inani lakhuphuka laba ngu-11 355. Phakathi nomhlangano, amasosha ayemasha ngaphandle acela amakhophi eBhayibheli elisha, anikezwa angu-180. Umphathi-dolobha waseKigali, isikhulu samaphoyisa nezikhulu zoMnyango Wezemidlalo nabo bajabula ngokuthola amakhophi abo.

Umsebenzi wokushumayela izindaba ezinhle eRwanda waqalwa abamemezeli abathathu ngo-1970. Manje kunabamemezeli abangu-20 000 kuleli zwe. Baqhuba izifundo zeBhayibheli ezingaba ngu-50 000 inyanga ngayinye. Ngo-April 2011, kwaba khona bangu-87 010 eSikhumbuzweni. Abafowethu baseRwanda baziwa ngentshiseko. Njengoba amaphesenti angu-25 abamemezeli esenkonzweni yesikhathi esigcwele kanti abanye benza isilinganiso samahora angu-20 ngenyanga, abafowethu bamatasa basebenza ‘neNkosi yokuvuna’ kule nsimu ethelayo futhi abazimisele ukunciphisa intshiseko yabo. Njengoba uJehova eqhubeka ewubusisa lo msebenzi, sikulindele ngokulangazela ukubona ukuthi bangakanani abantu abasazogobhozela entabeni kaJehova yokukhulekela kweqiniso kuleli Zwe Lamagquma Ayinkulungwane.—Math. 9:38; Mika 4:1, 2.

[Umbhalo waphansi]

[Amazwi acashunwe esihlokweni ekhasini 178]

Watshela ababekhona ukuba baqaphe oFakazi BakaJehova

[Amazwi acashunwe esihlokweni ekhasini 181]

Babebingelelana ngokuthi, ‘Komera!’ okusho ukuthi ‘Qina!’

[Amazwi acashunwe esihlokweni ekhasini 218]

“Jehova, akukho esingakwenza. Nguwe kuphela ongasisindisa!”

[Ibhokisi/Isithombe ekhasini 166]

Ake Sithi Qaphu Qaphu NgeRwanda

Izwe

IRwanda yinde ngamakhilomitha angu-177 nje kuphela ukusuka enyakatho uya eningizimu, abe ngu-233 ukusuka empumalanga uya entshonalanga. Abantu bakhona balinganiselwa ku-11 000 000 futhi yilona zwe elinesiminyaminya sabantu e-Afrika. Inhloko-dolobha iKigali.

Abantu

Abantu bakhona bangamaHutu, amaTutsi, amaTwa, abase-Asia nabaseYurophu. Abangaphezu kwesigamu bangamaRoma Katolika, abangaphezu koyedwa kwabane bangamaProthestani, kuhlanganise nabaningi abangamaSabatha. Abanye bangamaSulumane, abanye basonta emasontweni amaningi endabuko.

Ulimi

Izilimi ezisemthethweni isiKinyarwanda, isiNgisi nesiFulentshi. IsiSwahili siwulimi okuhwebelwana ngalo namazwe angomakhelwane.

Indlela yokuziphilisa

Abantu abaningi bangabalimi. Njengoba umhlabathi ungavundile, abaningi batshalela imikhaya yabo kuphela. Kutshalwa itiye nekhofi nama-pyrethrum—izitshalo ezakha izibulala-zinambuzane—konke okuyizinto eziyinhloko ezithunyelwa kwamanye amazwe.

Ukudla

Ukudla okuvamile amazambane, ubhanana nobhontshisi.

Isimo sezulu

Nakuba iRwanda iseduze kwenkaba-zwe, ayishisi kangako. Ezindaweni ezinkangala, izinga lokushisa lingu-21 degrees Celcius, imvula ibe ngamasentimitha angu-114 ngonyaka.

[Ibhokisi/Isithombe ekhasini 185]

“UJehova Uzosijaha!”

U-EMMANUEL NGIRENTE

UNYAKA AZALWA NGAWO 1955

ABHAPATHIZWA NGAWO 1982

UMLANDO WAKHE OMFUSHANE Ilungu leKomiti Yegatsha YaseRwanda nombonisi woMnyango Wabahumushi.

◼ NGO-1989 ngangiphayona empumalanga yeRwanda. Ekupheleni kwalowo nyaka ngabelwa ehhovisi labahumushi. Ngenxa yokuthi ngangingenalo ulwazi lokuhumusha, ngamangala futhi ngaba nomuzwa wokuthi ngizohluleka. Ngaqala ngokuhumusha izincwadi ezintathu. Saqasha indlu sathola nezichazamazwi. Kwakuye kwenzeke ngisebenze ubusuku bonke, ngidamane ngiphuza ikhofi ukuze ngingalali.

Lapho ibutho lihlasela ngo-October 1990, abantu abathile babesola ukuthi oFakazi BakaJehova bahlangene namabutho ahlaselayo. Amaphoyisa aqala ukusesha. Njengoba ngangisebenzela ekhaya, kwaba sengathi ngingumahlalela, afuna ukwazi ukuthi ngenzani. Ngelinye ilanga afika ezosesha engashongo. Ngangikade ngihumusha ubusuku bonke, kwathi ngehora lesihlanu ekuseni ngazama ukulala. Dukuduku, kwafika ucingo luthi angiphume ngiyosiza emsebenzini owawenzelwa umphakathi.

Ngesikhathi ngisaphumile, iziphathimandla zapequlula umuzi wami. Lapho ngibuya, omakhelwane bangitshela ukuthi bekufike iphoyisa nekhansela endlini yami bachitha ihora befunda umsebenzi engangiwuhumushile owawukhuluma ngoJehova. Ekugcineni, bathi: “Asihambe kule ndlu, ngaphandle kwalokho uJehova uzosijaha!”

[Ibhokisi/Isithombe ekhasini 194]

Kwafa Isigidi Sabantu Ngezinsuku Eziyikhulu

“Ukuqothulwa kohlanga kwango-1994 eRwanda kuyisibonelo esicace bha sokuqothulwa kohlanga emlandweni wanamuhla. Kusukela ekuqaleni kuka-April 1994 kuze kube maphakathi no-July 1994, isizwe esikhulu samaHutu sasezweni elincane elise-Afrika Ephakathi saqotha imbokodo nesisekelo esizweni esincane samaTutsi. Ngenxa yokuthi uhulumeni wamaHutu ongontamo-lukhuni wawesaba ukuphucwa umbuso ngoba kwase kunenhlangano yentando yeningi nempi yombango, wahlela ukuba kubulawe bonke labo eyayibabheka njengosongo ekubuseni kwawo—amaHutu aphansi namaTutsi. Lokhu kuqothulwa kohlanga kwaphela lapho ibutho lamaTutsi elingamavukela-mbuso lithatha izintambo futhi lidingisa lo mbuso owawubulele abantu. Ngezinsuku eziyikhulu nje, abantu abangangesigidi bafa ekuqothulweni kohlanga nasempini—okwenza ukucekwa kwabantu eRwanda kwaba okunesihluku kunakho konke emlandweni.”—I-Encyclopedia of Genocide and Crimes Against Humanity.

OFakazi BakaJehova abangaba ngu-400 babulawa kulokho kuqothulwa kohlanga, kuhlanganise namaHutu abulawelwa ukuvikela abazalwane nodade abangamaTutsi. Abekho oFakazi abafa bebulawa abanye.

[Isithombe]

Ababaleki babaleka eRwanda

[Ibhokisi/Isithombe ekhasini 197]

“Izindawo Zokubulalela Abantu”

“Abantu abahlela ukuqothulwa kohlanga bayenga amashumi ezinkulungwane zamaTutsi ukuba aye emasontweni bethi bazowavikela; izidlamlilo namasosha angamaHutu abe esebaceka bonke ababephephele lapho, bedubula, bejikijela amabhomu kubantu ababesemasontweni nasezikoleni, abasindile babaqedele ngocelemba, ngezincijo nangemimese. . . . Kepha amasonto awagcinanga nje ngokuvuma ukuba izakhiwo zawo zibe izindawo zokubulalela abantu. Kwezinye izindawo, abefundisi, othisha bekhathekhizimu nezinye izisebenzi zasemasontweni bonke basebenzisa ulwazi lwabo lwabantu bendawo ukuze bathungathe amaTutsi futhi bawabulale. Kwezinye izimo, izisebenzi zasemasontweni zazibabulala nokubabulala abantu.”—I-Christianity and Genocide in Rwanda.

“Isikhalo esikhulu ngeSonto [LamaKatolika] ukuthi layeka ukusekela isigaba esiphakeme samaTutsi, lasekela ukwakhiwa kweqembu elivukelayo lamaHutu, ngaleyo ndlela lisiza uHabyarimana ukuba aphathe kule ndawo enamaHutu amaningi. Ngokuqondene nokuqothulwa kohlanga, izingqapheli ziphinde zithole iSonto linecala lokudala inzondo, ukufuya abaphehli bodweshu, nokwehluleka ukuvikela abantu ababephephela ezakhiweni zalo. Kunalabo futhi abakholelwa ukuthi, njengoba iSonto lingumholi ongokomoya wabantu abaningi eRwanda, linecala ngokungathathi izinyathelo zokunqanda ukubulawa kwabantu.”—I-Encyclopedia of Genocide and Crimes Against Humanity.

[Ibhokisi/Izithombe emakhasini 201-203]

“Singambulala Kanjani Umuntu Oncengelwa Abantu Bonke?”

UJEAN-MARIE MUTEZINTARE

UNYAKA AZALWA NGAWO 1959

ABHAPATHIZWA NGAWO 1985

UMLANDO WAKHE OMFUSHANE Ungumakhi, uthembekile, uhlale emomotheka futhi waboshwa izinyanga ezingu-8 ngo-1986 esanda kubhapathizwa. Washada noJeanne ngo-1993, manje ungusihlalo weKomiti YeHholo LoMhlangano LaseKigali.

◼ NGO-APRIL 7, mina nomkami uJeanne nendodakazi yethu enenyanga, uJemima, savuswa ukuqhuma kwezibhamu. Saqale sacabanga ukuthi kumane kuyizinxushunxushu zezombusazwe nje, kodwa sasheshe sathola ukuthi izidlamlilo ze-Interahamwe zase ziqale ukubulala amaTutsi. Ngoba singamaTutsi, asizange siphumele ngaphandle. Sathandaza kuJehova sicela asisize sibone okumelwe sikwenze. Abazalwane abathathu abanesibindi abangamaHutu—u-Athanase, uCharles no-Emmanuel—bafaka ukuphila kwabo engozini basilethela ukudla.

Kwaphela inyanga mina nomkami sicashe emizini yabazalwane abahlukahlukene. Lapho sekufike emvuthwandaba ukuzingelwa kwamaTutsi, izidlamlilo zafika nemimese, imikhonto nocelemba lapho ngangicashe khona. Ngazibona, ngabaleka ngashiya isithunzi ngiyocasha ehlathini, kodwa zangithola. Sengikakwe amadoda ahlomile, ngawancenga ngawatshela ukuthi nginguFakazi KaJehova, kodwa athi: “Uyimbuka wena!” Angikhahlela ngawela phansi, ayesengishaya ngamawisa nangezidunu zezibhamu. Kwase kuthe mbo abantu. Kubo, kwakunomlisa engangimshumayezile. Wamemeza ngesibindi: “Mxoleleni!” Kwabe sekufika umzalwane ongumHutu, uCharles. Lapho umkaCharles nezingane bengibona ngilele phansi ngopha, bakhala. Ababulali baphela amandla, bangidedela, bathi: “Singambulala kanjani umuntu oncengelwa abantu bonke?” UCharles wangiyisa kwakhe wangigeza amanxeba. Izidlamlilo zasidonsa ngendlebe zathi ngabaleka nje, zizobulala uCharles.

Kwenzeka lokhu nje ngangihlukene noJeanne nomntwana. Lapho kuhlaselwa, naye wayeshayiwe futhi wasinda ngokulambisa bethi bayambulala. Kamuva, wezwa amahebezi okuthi ngibulewe. Baze bamcela nokuba eze namashidi azosonga isidumbu sami.

Sesisemzini ka-Athanase, mina noJeanne sakhala izinyembezi zenjabulo lapho sesindawonye. Kodwa sasilindele ukubulawa ngakusasa. Nangalolo suku amaphaphu ayephezulu, siphithene amakhanda, siphuma singena sihambe sicasha. Ngiyakhumbula ngicela usizo kuJehova: “Izolo usivikele. Sicela usivikele nanamuhla. Sifuna ukukhulisa umntwana wethu futhi siqhubeke sikukhonza!” Sekuzohlwa, abafowethu abathathu abangamaHutu bazifaka engozini enkulu ngokusihola singamaTutsi angaba ngu-30 basidlulisa ezindaweni ezazivinjiwe, sadlula ngokuphepha. Kulelo qembu, abayisithupha bamukela iqiniso.

Kamuva sezwa ukuthi uCharles neqembu lakhe baqhubeka besiza abantu kodwa izidlamlilo ze-Interahamwe zathukuthela lapho zithola ukuthi laba bazalwane babesize amaTutsi amaningi ukuba abaleke. Zababamba oCharles nommemezeli ongumHutu, uLeonard. UmkaCharles wazizwa zithi: “Kumelwe nife ngoba nisize amaTutsi abaleka.” Zase zibajuqa njalo. Lokhu kusikhumbuza amazwi kaJesu: “Akekho onothando olukhulu kunalolu, ukuba umuntu anikele umphefumulo wakhe ngenxa yabangane bakhe.”—Joh. 15:13.

Ngaphambi kwempi, ngesikhathi mina noJeanne senza amalungiselelo omshado, sanquma ukuthi oyedwa wethu kufanele aphayone. Kodwa ngemva kwempi, ngenxa yokuthi izihlobo zethu eziningi zazibulewe, sathatha izintandane eziyisithupha, nakuba ngaleso sikhathi sasinezethu izingane ezimbili. Noma kunjalo, uJeanne wakwazi ukuphayona ngemva kwempi futhi useneminyaka engu-12 ephayona. Izintandane eziyisithupha esazithatha—ezibazali bazo babengebona oFakazi BakaJehova—zonke sezibhapathiziwe. Abafana abathathu sebeyizinceku ezikhonzayo, kanti intombazane eyodwa ikhonza eBethel nomyeni wayo. Manje sesinezingane ezine okungezethu futhi amadodakazi amabili amadala abhapathiziwe.

[Isithombe]

UMfowethu noDade Mutezintare nezingane zabo ezimbili kwezinhlanu nezintandane ezinhlanu

[Ibhokisi/Isithombe emakhasini 204, 205]

“Iqiniso Lasenza Sangantengantenga”

UValerie Musabyimana no-Angeline Musabwe abandawonye. Bakhulela esontweni lamaKatolika futhi uyise wayengusihlalo welinye lamakomiti esonto. UValerie wafundela ukuba indelakazi iminyaka emine. Kepha ngenxa yokudunyazwa ukuziphatha kompristi, wayeka ukufunda ngo-1974. Kamuva wafundelwa, wabhapathizwa, waqala ukuphayona ngo-1979. Udadewabo u-Angeline naye wafundelwa wayesebhapathizwa. Njengoba bekhonza ndawonye njengamaphayona akhethekile, basize abaningi ukuba bathole iqiniso.

U-Angeline noValerie babehlala eKigali ngesikhathi sokuqothulwa kohlanga, bafihla abantu abangu-9 emzini wabo, kukhona nomama ababili abakhulelwe, omunye wabo umyeni wakhe wayesanda kubulawa. Ngemva kwesikhathi, wabeletha. Ngenxa yokuthi kwakuyingozi kakhulu ukuphuma endlini, odade bambelethisa. Lapho omakhelwane bekuzwa lokhu, babalethela ukudla namanzi.

Lapho abe-Interahamwe bezwa ukuthi u-Angeline noValerie babefihle amaTutsi, bafika bathi: “Sizobulala oFakazi BakaJehova abangamaTutsi.” Kodwa njengoba indlu ababeqashe kuyo lab’ odade kwakungeyesosha, ababulali besaba ukungena.d Basinda kanjalo ababesendlini.

Lapho impi isibambene impela nezibhamu ziqhuma ngapha nangapha, kwadingeka u-Angeline noValerie bahambe kuleyo ndawo. Babaleka nabanye oFakazi baya eGoma, lapho abafowethu baseCongo babamukela khona ngezandla ezifudumele. Baqhubeka beshumayela beqhuba nezifundo eziningi.

Bakwazi kanjani ukuqhubeka bephila ngemva kwesigemegeme sokuqothulwa kwabantu? UValerie usho ngokudabuka: “Ngalahlekelwa izingane zami eziningi ezingokomoya, kuhlanganise no-Eugène Ntabana nomkhaya wakhe. Iqiniso lasenza sangantengantenga. Siyazi ukuthi uJehova uzobahlulela abenzi bokubi.”

[Umbhalo waphansi]

[Ibhokisi/Isithombe emakhasini 206, 207]

Babekulungele Ukusifela

U-ALFRED SEMALI

UNYAKA AZALWA NGAWO 1964

ABHAPATHIZWA NGAWO 1981

UMLANDO WAKHE OMFUSHANE Wayehlala edolobheni laseKigali nomkakhe uGeorgette. Ungubaba nomyeni onothando futhi manje uyilungu leKomiti Ebonisana Nezibhedlela eKigali.

◼ NGEMVA kokuqala kokuqothulwa kwabantu, u-Athanase, umzalwane ongumHutu owayehlala ngakwami, wayaleza esixwayisa: “Kubulawa wonke amaTutsi, bazonibulala nani.” Wathi asiye kwakhe. Ngaphambi kwempi, wayegubhe ikolosana elijule ngamamitha amathathu nesigamu, okuyilapho acela ukusithukusa khona. Yimina engehla kuqala ngesitebhisi ayesenzile. Wahlela ukuba sehliselwe ukudla nawomatilasi. Abantu babebulawa yonke indawo.

Nakuba omakhelwane babesola ukuthi sibhace emzini ka-Athanase futhi bathi bazowushisa, yena nomkhaya wakhe baqhubeka besifihlile. Kusobala ukuthi babekulungele ukusifela.

Ngemva kwezinsuku ezintathu, yabambana ngezihluthu endaweni yakithi, ngakho umkhaya ka-Athanase wacasha nathi emgodini, sagcina sesingu-16. Kwakumnyama bhuqe ngoba kwakungeke kulunge sikhanyise. Usuku ngalunye sasikhangezana isipuni esisodwa selayisi eliluhlaza elalicwiliswe embhubhudlweni. Ngemva kwezinsuku eziyishumi, nalokho kudla kwaphela. Ngosuku lwe-13 sase silambe sifa! Sasizokwenzenjani? Uma uphezulu esitebhisini, kwakubonakala kancane ngaphandle, sabona ukuthi isimo sase sishintshile. Sabona amasosha egqoke enye iyunifomu. Njengoba umkhaya ka-Athanase wawungivikele, ngaba nomuzwa wokuthi kwase kuyithuba lokuba ngizidele nami. Ngakhuphukela ngaphandle nomfana ka-Athanase siyofuna ukudla. Sonke saqale sathandaza.

Ngemva kwesigamu sehora, sabuya nezindaba ezithi indawo yakithi yayisiphethwe iRwandan Patriotic Front. Amanye amasosha asiphelezela. Ngawatshengisa lapho sasicashe khona. Ayengakholwa kwaze kwaba yilapho bonke abafowethu nodade bephuma emgodini. UGeorgette uthi akasoze awulibala lowo mzuzu: “Saphuma singcolile; sasicashe kulowo mgodi cishe amasonto amathathu singagezi nezingubo zingahlanzwa.”

Kwawamangaza amasosha ukuthi amaHutu namaTutsi ayendawonye kulowo mgodi. Ngachaza: “SingoFakazi BakaJehova futhi asibandlululani.” Abamba ongezansi, athi: “Banikeni ukudla noshukela laba bantu basemgodini!” Abe esesiyisa endlini okwakuhlaliswe kuyo isikhashana abantu abangaba yikhulu. Ngemva kwalokho, udade othile wathi sonke esingu-16 asihlale nomkhaya wakhe.

Siyabonga ngokuthi sasinda. Kepha umfowethu nodadewethu nemikhaya yabo—bonke abangoFakazi BakaJehova—babulawa, njengoba kwaba njalo nangabanye abaningi. Siyabuzwa ubuhlungu bokushonelwa kodwa siyazi nokuthi “isikhathi nesenzakalo esingalindelekile [kusehlela sonke].” UGeorgette uyichaza kanje indlela esizizwa ngayo: “Salahlekelwa abafowethu nodadewethu abaningi, kanti abanye basinda ngokulambisa. Nokho, saqinisa ubuhlobo bethu noJehova ngomkhuleko, sabona nokuthi isandla sakhe sinamandla. Wasiduduza ngokusinikeza usizo ngesikhathi esifanele ngenhlangano yakhe, futhi simbonga kakhulu. UJehova wasibusisa ngokucebile.”—UmSh. 9:11.

[Ibhokisi/Izithombe emakhasini 208, 209]

UJehova Wasisiza Ngalezo Zikhathi Zosizi

U-ALBERT BAHATI

UNYAKA AZALWA NGAWO 1958

ABHAPATHIZWA NGAWO 1980

UMLANDO WAKHE OMFUSHANE Ungumdala, ushadile, unezingane ezintathu. Umkakhe nenkosazana yakwakhe bangamaphayona avamile. Indodana yakhe iyinceku ekhonzayo. Ngesikhathi u-Albert, umzalwane othulayo ongumHutu, eqala ukuya ezifundweni ngo-1977, kwakunabamemezeli ababalelwa ku-70 kuphela kuleli zwe. Ngo-1988 wavalelwa ejele, washaywa. Lapho enqaba ukufaka ibheji leqembu lezombusazwe, umakhelwane wakhe owayeyisosha wafaka isipeletu saleli bheji esikhunjeni salo mzalwane wayesethi: “Usulifakile-ke ibheji!”

◼ NGEMVA kokufa komongameli, abanye abazalwane, izihlobo nomakhelwane babalekela emzini wami. Ngangikhathazekile kodwa ngodade ababili abangamaTutsi, uGoretti noSuzanne, ababengenathi. Nakuba isimo sasimanzonzo, ngaphuma ngayobabheka. Abantu babebaleka, ngambona uGoretti nezingane zakhe, ngabathatha ngabayisa kwami ngoba ngangazi ukuthi indlela ivaliwe lapho babeya ngakhona, futhi ngabe babulawa.

Ngemva kwezinsukwana, uSuzanne nabanye abahlanu bafika emzini wami. Sase singaphezu kuka-20 endlini, sonke silengela egodini.

Izidlamlilo ze-Interahamwe zafika okungenani kathathu endlini. Zabona umkami uVestine efasiteleni, zambiza zathi akaphumele phandle. UngumTutsi. Ngama phakathi kwababulali nomkami ngathi: “Uma nimbulala, bulalani mina kuqala!” Ngemva kokuhlanganisa amakhanda, zathi akaphindele endlini. Omunye wazo wathi: “Angifuni ukubulala umfazi; ngifuna ukubulala indoda.” Zabe seziba nomlamu wami shaqa. Njengoba zimkhiphela ngaphandle, ngangena phakathi kwazo naye ngancenga: “Anisacabangi nanoNkulunkulu nje bafowethu!”

“Angisebenzeli uNkulunkulu mina,” kubhavumula omunye wazo, engidukluza ngendololwane. Nokho, wathamba, wathi: “Hambani la!” Wasinda kanjalo umlamu wami.

Ngemva cishe kwenyanga, kwafika abafowethu ababili befuna ukudla. Nganginobhontshisi ngakho ngabacaphunela, kepha lapho ngibaphelezela ukuze ngibatshengise indlela ephephile, ngezwa kuqhuma isibhamu, ngaquleka. Inhlamvu eyayinhlanhlatha yayingishaye esweni. Umakhelwane wangisiza ngafika esibhedlela, kodwa iso lalingasaboni. Okubi nakakhulu, angikwazanga ukuphindela ekhaya. Kwenzeka lokhu nje impi iyashuba, kwaba yingozi kakhulu ukuba ababesendlini baqhubeke behlezi khona, ngakho babalekela emizini yabanye abazalwane, abafaka ukuphila kwabo engozini ngokubavikela kwaze kwaba u-June 1994. Angikwazanga ukuhlangana nomkami nomkhaya wami kwaze kwaba u-October. Ngiyambonga uJehova ngokungisiza mina nomkhaya wami phakathi nalezo zikhathi zosizi.

[Isithombe]

U-Albert Bahati nomkhaya wakhe nabanye abacashisa

[Ibhokisi/Isithombe emakhasini 210-212]

“Nansi Indlela”

UGASPARD NIYONGIRA

UNYAKA AZALWA NGAWO 1954

ABHAPATHIZWA NGAWO 1978

UMLANDO WAKHE OMFUSHANE Walilwela ngesibindi iqiniso, uhlale ezihlekela futhi unesimo sengqondo esihle. Ushadile, unamadodakazi amathathu, uyilungu leKomiti Yegatsha YaseRwanda.

◼ NGEMVA kokuba abantu beqale ukudubula ekuseni ngo-April 7, ngabona izindlu ezingu-15 zamaTutsi zisha. Ezimbili zazo kwakungezabafowethu. Ingabe kwakuzolandela eyethu? Ngavele ngadunyelwa ikhanda uma ngicabanga ngokwakungase kwehlele umkami ongumTutsi nabantabami ababili.

Ngangingazi ukuthi kufanele senzeni. Abantu babedidekile futhi bethukile, kukhona namahlebezi nemibiko engamanga. Ngacabanga ukuthi kuzoba ngcono umkami nabantwana baye emzini womzalwane oseduze, mina ngibalandele kamuva. Lapho ngiya kulowo muzi, ngathola ukuthi izimo zazimphoqe ukuba abalekele esikoleni. Ngaleyo ntambama kwafika umakhelwane wathi: “Kuzoqothwa imbokodo nesisekelo kuwo wonke amaTutsi acashe esikoleni!” Khona manjalo ngagijimela esikoleni, ngathola umkami nabantwana, ngase ngiqoqa abanye abantu abangaba ngu-20—kukhona nabafowethu nodade—ngathi abaphindele emizini yabo. Sisathi siyahamba nje, nali iviyo lezidlamlilo likhipha abantu edolobheni libayisa lapho lafike labulala khona amaTutsi angaphezu kuka-2 000.

Kwenzeka lokho nje, umkamakhelwane wayebelethele esikoleni. Lapho i-Interahamwe ijikijela isiqhumane esikoleni, umyeni wakhe wayesebalekile nosana. Kuleso sidididi, inkosikazi yabalekela kwenye indawo. Nakuba umyeni ayengumTutsi, wakwazi ukudlula lapho kwakuvinjwe khona ngoba wayegone ingane, wabalekela emzini wethu. Wangicela ukuba ngizame ukutholela umntwana ubisi. Ngathi ngithi gaga, ngazithela eviyweni lezidlamlilo zivale umgqwaqo. Zacabanga ukuthi ngizwelana namaTutsi ngoba nakhu ngiyofunela ingane yomTutsi ubisi, lase lithi: “Asimbulale!” Isosha langishaya ngesidunu sesibhamu, ngaquleka, ngopha emakhaleni nasebusweni. Acabanga ukuthi ngifile, ayesengihudulela emzini oseduze.

Umakhelwane wangibona, wayesethi: “Kumelwe uhambe ngoba bazobuya bazokuqedela.” Wangisiza wangigodukisa.

Nakuba lesi sehlakalo sasibuhlungu, sangivikela. Ngenxa yokuthi ngangaziwa ukuthi ngingumshayeli, ngakusasa kwafika amadoda amahlanu ezongiphoqa ukuba ngishayelele isikhulu samasosha. Lapho ebona ukuthi ngilimele, awazange aphoqe isimo, engangiphoqanga nokuba ngigade ne-Interahamwe.

Kwabe sekulandela izinsuku zokwesaba, ukungaqiniseki nendlala. Phakathi naleso sikhathi, umama ongumTutsi nezinganyana zakhe ezimbili bangena kwami begijima. Samfihla ekhabetheni ekhishini, izingane zakhe sazivalela ekamelweni kanye nezami. Lapho iRwandan Patriotic Front (RPF), ibutho elalihlasela, iqhubeka ihlasela, kwezwakala namahlebezi okuthi i-Interahamwe yayisiqale ukubhuqa wonke amaHutu ayeganwe amaTutsi, umkhaya wethu walungela ukubaleka futhi. Kodwa iRPF yayisiyidlile indawo esasihlala kuyo, ngakho amaTutsi ayesephephile. Yimina-ke manje engase ngilengela egodini.

Ngahamba nomakhelwane bami saya lapho amasosha eRPF ayevimbe khona umgwaqo. Lapho engibona njengoba ngingimHutu, ngibhandishwe nekhanda, acabanga ukuthi ngingomunye wezidlamlilo. Asimemeza: “Phakathi kwenu lapho kunababulali nabaphangi, kepha nithi nifuna usizo! Obani kini abacashise amaTutsi noma bawavikela?” Ngawatshengisa umama nezingane engangizifihlile. Abuyisela izingane eceleni, azibuza: “Ubani lo baba obhandishe ikhanda?” Zathi: “Akayena owe-Interahamwe; unguFakazi KaJehova.” Ngangimsindisile lo mama ongumTutsi nezingane zakhe, manje bona base besindisa mina!

Esegculisekile, amasosha asiyisa ekamu eliqhele eKigali ngamakhilomitha angaba ngu-20, lapho kwakuqoqene khona abasindile abangaba ngu-16 000. Satholana nabafowethu nodade abacela ku-60 basemabandleni angu-14. Sahlela imihlangano; kwafika abangu-96 kowokuqala! Kepha kwakuyisikhathi esibuhlungu kakhulu ngoba sasizwa ngabafowethu ababulewe nodade abadlwenguliwe. Kwakuyimina ngedwa umdala futhi abafowethu nodade abaningi babedinga induduzo nosizo lwemiBhalo. Ngangilalela izigigaba ezibuhlungu ezazibehlele bese ngibaqinisekisa ngokuthi uJehova uyabathanda, uyabuqonda nobuhlungu ababuzwayo.

Ekugcineni, ngo-July 10, ngemva kwamasonto amaningi siphila ngokwesaba, sakwazi ukuphindela emakhaya. Ngikhumbula ukuthi ngaleso sikhathi sokwesaba nokuba sengozini, ngangivame ukucabanga ngale ngoma ethi “Nansi Indlela.” Amazwi aleyo ngoma angikhuthaza kakhulu: “Asiphambukeli kwenye indlela. ‘Ma sihamba kuyo siyothuthuka.”

[Ibhokisi/Izithombe emakhasini 223, 224]

Ngezwa Umuntu Engibiza

UHENK VAN BUSSEL

UNYAKA AZALWA NGAWO 1957

ABHAPATHIZWA NGAWO 1976

UMLANDO WAKHE OMFUSHANE Wakhonza eBethel yaseNetherlands ngaphambi kokuba aye eGileyadi ngo-1984. Wabelwa eCentral African Republic, eChad, wabe eseya eRwanda ngo-September 1992. Manje ukhonza nomkakhe, uBerthe, ehhovisi legatsha laseRwanda.

◼ IBANDLA lokuqala engabelwa kulo eRwanda kwakuyiKigali Sud. Lalinezingane eziningi. Abafowethu nodade babenothando futhi benomoya wokwamukela izihambi. Ngo-1992 ayengemaningi amabandla kuleli, abamemezeli bengaphezudlwana nje kuka-1 500. Iziphathimandla zazingasethembi, futhi amaphoyisa ayevame ukusiphazamisa lapho sishumayela esifuna amaphepha kamazisi.

Lapho kuqala ukuqothulwa kohlanga, ngaphoqeleka ukuba ngihambe kuleli zwe. Kodwa ngokushesha ngemva kwalokho, ngacelwa ukuba ngisize ababaleki empumalanga yeCongo. Ngasuka eNairobi ngalibhekisa eGoma, idolobha eliseduze komngcele waseRwanda. Ngangiqala ukuya khona futhi ngingazi muntu ngaphandle komdala oyedwa, ngingazi nokuthi ngizomthola kanjani. Nokho, lapho ngifika ngacela usizo kumshayeli wetekisi. Wabuza abanye abashayeli, kwathi ingakapheli nemizuzu engu-30 ngase ngiwutholile umuzi walo mdala. Abazalwane ababili beKomiti Yezwe eRwanda bakwazi ukuza eGoma, ngabanikeza imali engangiyinikwe ihhovisi legatsha laseKenya ukuze bayosiza abafowethu eRwanda.

Lapho ngiya eGoma okwesibili ngisuka eNairobi, ngikhumbula ngiya emngceleni waseRwanda ngezinyawo. Nakuba kwakuyibanga elifushane, kwangithatha isikhathi ngoba ngangihamba ngiphambana nequlu lababaleki abavela eRwanda.

Khona manjalo, ngezwa umuntu engibiza: “Ndugu (mfowethu) Henk! Ndugu Henk!” Lapho ngiqalaza, ngathola ukuthi u-Alphonsine. Kwakuyintombazane eneminyaka engu-14 yasebandleni engangikulo eKigali, futhi wayeselahlekelene nonina. Sanamathelana kuleso sixuku, ngamthatha ngamyisa eHholo LoMbuso abafowethu nodade ababehlangana kulo. Umkhaya othile waseCongo wamnakekela, ngemva kwalokho wanakekelwa udade wasebandleni lakubo. Kamuva u-Alphonsine waphinde wahlangana nonina eKigali.

[Isithombe]

UHenk nomkakhe uBerthe

[Ibhokisi/Isithombe emakhasini 235, 236]

UJehova Wenze Izinto Ezimangalisayo!

UGÜNTER RESCHKE

UNYAKA AZALWA NGAWO 1937

ABHAPATHIZWA NGAWO 1953

UMLANDO WAKHE OMFUSHANE Waqala ukuphayona ngo-1958 futhi waba sekilasini lama-43 laseGileyadi. Kusukela ngo-1967 uye wakhonza eGabon, eCentral African Republic naseKenya futhi uhambele amazwe amaningana engumjikelezi. Manje uyilungu leKomiti Yegatsha YaseRwanda.

◼ NGO-1980 ngangiqala ukuya eRwanda. Ngathunyelwa khona njengombonisi wesigodi ngisuka eKenya. Ngaleso sikhathi ayengu-7 kuphela amabandla kuleli zwe, abamemezeli bengu-127. Ngangingomunye wabaqondisi ababili bekilasi lokuqala leSikole Senkonzo Samaphayona elaba khona. Amaphayona amaningi kwangu-22 ayekulelo kilasi asesenkonzweni yesikhathi esigcwele. Ngaphindela eKenya ngikhumbula intshiseko yabafowethu enkonzweni nendlela ababelazisa ngayo iqiniso.

Ngo-1996, ngathola incwadi yasegatsheni laseKenya ngicelwa ukuba ngithuthele eRwanda. Kwase kuyiminyaka engu-18 ngihlala eKenya futhi ngangikuthanda. Lapho sifika eRwanda kwakuseneziyaluyalu. Ebusuku sasivame ukuzwa umsindo wezibhamu. Kodwa ngokushesha ngaqala ukusijabulela isabelo sami, ikakhulu lapho ngibona isibusiso sikaJehova emsebenzini kule ndawo.

Izakhiwo zomhlangano zazisesimweni esingesihle. Kodwa abafowethu abazange bakhononde, babevame ukuhlala phansi noma ematsheni. Idamu labazobhapathizwa laliwumgodi omkhulu ombozwe ngoseyili. Imihlangano enjalo isaba khona ezindaweni eziningi ezimaphakathi nezwe, kodwa ngokuhamba kwesikhathi, kwakhiwa amahholo avulekile emaceleni angadle ngabukhazikhazi namaHholo OMbuso ambalwa anwebekayo.

Abafowethu babememezela izindaba ezinhle ngentshiseko. Amabandla aseKigali ayeyiqala ekuseni kakhulu imihlangano yawo ngezimpelasonto. Ngemva kwalokho abamemezeli babeya ensimini bashumayele kuze kuhlwe.

Njalo ngangibekela eceleni isikhathi sokuba nezingane emabandleni, abamemezeli bakusasa ababengase baphathiswe imithwalo yemfanelo eyengeziwe. Akuve kukuhle ukubona ukuthi abaningi baqhubeka ngokungesabi, bebonisa ukuthi, nakuba besebancane, babenobuhlobo bomuntu siqu noJehova!

Ngokwesibonelo, eningizimu, uLuc oneminyaka engu-11 wacelwa ukuba acule ingoma yesizwe ekilasini. Ngenhlonipho wacela ukucula enye yezingoma zoMbuso. Uthisha wavuma futhi bonke bashaya ihlombe lapho eqeda ukucula. Kona nje ukuthi wayengazi amanothi kuphela kodwa ewazi namagama kubonisa indlela ayekujabulela ngayo ukudumisa uMdali wakhe. Lokhu okuhlangenwe nakho nokunye kwangikhuthaza. Ngahlangana nodade owayeke waboshelwa ukushumayela izindaba ezinhle eminyakeni ethile ngaphambili. Ngesikhathi esejele wazala ingane yomfana wayibiza ngokuthi “uShikama Hodari” (okusho “ukuhlala ugxilile” ngesiSwahili). UShikama uye waphila ngokuvumelana negama lakhe. Muva nje uye eSikoleni SeBhayibheli Sabazalwane Abangashadile futhi ukhonza njengenceku ekhonzayo nanjengephayona elikhethekile.

Phakathi neminyaka eminingi yobunzima obukhulu abafowethu eRwanda abadlula kuyo—kuhlanganise nokuvinjelwa, impi yombango nokuqothulwa kohlanga—kwakungithinta njalo ukushiseka nokwethembeka kwabo enkonzweni, futhi kuyilungelo elikhulu ukukhonza nabo. Ngangisibona njalo isibusiso nesivikelo sikaJehova futhi wayengisekela, lokho kwangisondeza nakakhulu kuye. Ngempela, uJehova wenze izinto ezimangalisayo!—IHu. 136:4.

[Ishadi/Izithombe emakhasini 254, 255]

ISHADI LEZENZAKALO EZIPHAWULEKAYO—ERwanda

1970

1970 Umbiko wokuqala wabamemezeli.

1975 Umkhaya wokuqala usuka eCongo uphindela eRwanda.

1976 Kunyatheliswa incwajana ethi “Lezi Zindaba Ezilungileyo ZoMbuso” ngesiKinyarwanda.

1978 Kunyatheliswa INqabayokulinda ephuma kanye ngenyanga ngesiKinyarwanda.

1980

1982 Umsebenzi uyavinjelwa; abafowethu abaqondisayo bayaboshwa.

1986 Kuboshwa ingxenye yesithathu yabamemezeli.

1990

1990 Kugqashuka impi enyakatho yezwe.

1992 Kuba nomhlangano wesigodi wokuqala wezwe lonke.

Umsebenzi uyabhaliswa.

Kufika izithunywa zevangeli.

1994 Kuqothulwa amaTutsi.

1996 Izithunywa zevangeli ziyabuya.

Kumiswa uMnyango Wenkonzo.

1998 INqabayokulinda yesiKinyarwanda iphuma kanyekanye neyesiNgisi.

1999 Kunikezelwa iHholo LoMhlangano laseKigali elivulekile emaceleni.

2000

2000 Kumiswa ihhovisi legatsha.

UMnyango Wokwakhiwa KwamaHholo OMbuso uqala ukusebenza.

2001 Kutholakala indawo yegatsha elisha.

2006 Kunikezelwa izakhiwo zegatsha elisha.

2007 Kukhululwa INguqulo Yezwe Elisha YemiBhalo YamaKristu YesiGreki ngesiKinyarwanda.

2010

2010 Kukhululwa INguqulo Yezwe Elisha YemiBhalo Engcwele ephelele ngesiKinyarwanda.

[Igrafu/Isithombe ekhasini 234]

(Ukuze ubone ukuthi indaba ihlelwe kanjani, bheka encwadini)

Ingqikithi Yabamemezeli

Ingqikithi Yamaphayona

20 000

15 000

10 000

5 000

1985 1990 1995 2000 2005 2010

[Amabalazwe ekhasini 167]

(Ukuze ubone ukuthi indaba ihlelwe kanjani, bheka encwadini)

UGANDA

DEMOCRATIC REPUBLIC OF CONGO

Nyiragongo Volcano

Goma

BURUNDI

TANZANIA

RWANDA

KIGALI

VIRUNGA MTS.

Karisimbi Volcano

Ruhengeri (manje iMusanze)

Gisenyi (manje iRubavu)

Lake Kivu

Bukavu

Kanombe

Masaka

Gitarama (manje iMuhanga)

Bugesera

Nyabisindu (manje iNyanza)

Save

Butare (manje iHuye)

Equator

[Isithombe emakhasini 164, 165]

Bayadoba eLake Kivu

[Izithombe ekhasini 169]

U-Oden no-Enea Mwaisoba

[Isithombe ekhasini 170]

UGaspard Rwakabubu nendodakazi yakhe uDeborah nomkakhe uMelanie

[Isithombe ekhasini 171]

Incwajana ethi “Lezi Zindaba Ezilungileyo ZoMbuso” ngesiKinyarwanda

[Isithombe ekhasini 172]

UJustin Rwagatore

[Isithombe ekhasini 172]

UFerdinand Mugarura

[Isithombe ekhasini 173]

Abathathu ababhapathizwa ngo-1976: ULeopold Harerimana, uPierre Twagirayezu no-Emmanuel Bazatsinda

[Isithombe ekhasini 174]

Izincwadi zesiKinyarwanda

[Isithombe ekhasini 179]

UPhocas Hakizumwami

[Isithombe ekhasini 180]

UPalatin Nsanzurwimo nomkakhe (kwesokudla) nezingane

[Isithombe ekhasini 181]

U-Odette Mukandekezi

[Isithombe ekhasini 182]

UHenry Ssenyonga nesithuthuthu sakhe

[Isithombe ekhasini 188]

Isitifiketi sokubhaliswa ngo-April 13, 1992

[Isithombe ekhasini 190]

Abafowethu basusa isiteji ukuze kube nomdlalo webhola

[Isithombe ekhasini 192]

ULeonard noNancy Ellis (phakathi nendawo) nomkhaya wakwaRwakabubu nowakwaSombe

[Isithombe ekhasini 193]

Izinsalela zendiza eyaphahlazeka eduze kwaseKigali

[Izithombe ekhasini 199]

Amazwi asesontweni lamaKatolika eKibuye (manje iKarongi) athi: “Sasintula ubuzalwane”

[Isithombe ekhasini 214]

Kwesobunxele kuya kwesokudla: (emuva) u-André Twahirwa, uJean de Dieu, u-Immaculée, uChantal (nengane), uSuzanne; (phambili) izingane zakwaMugabo: uJean-Luc no-Agapé

[Isithombe ekhasini 216]

UVédaste Bimenyimana uqhuba isifundo seBhayibheli

[Isithombe ekhasini 217]

UTharcisse Seminega nomkakhe uChantal

[Isithombe ekhasini 218]

UTharcisse noJustin eceleni kweqhugwane uTharcisse nomkhaya wakhe ababecashe kulo inyanga yonke

[Izithombe ekhasini 226]

Phezulu: Ikamu lababaleki loFakazi baseRwanda; ngezansi: ikamu lababaleki loFakazi nabanye

EGoma, eCongo

EBenaco, eTanzania

[Izithombe ekhasini 229]

IHholo LoMbuso lalisetshenziswa njengesibhedlela

[Isithombe ekhasini 238]

U-Oreste nomkhaya wakhe, ngo-1996

[Isithombe ekhasini 240]

UThéobald noBerancille Munyampundu

[Izithombe ekhasini 241]

Abafowethu nodade abangamaTutsi namaHutu basusa ukhula endaweni yeHholo LoMhlangano elisha

[Isithombe ekhasini 242]

IHholo LoMhlangano elivulekile emaceleni eKigali, ngo-2006

[Isithombe ekhasini 243]

ISikole Sokuqeqeshela Inkonzo eKigali, ngo-2008

[Isithombe ekhasini 246]

Abakhuluma ulimi lwezandla emhlanganweni okhethekile eGisenyi, ngo-2011

[Isithombe ekhasini 248]

UFrancois-Xavier Hakizimana

[Izithombe emakhasini 252, 253]

Abafowethu nodade basebenza ngobunye ‘neNkosi yokuvuna’ kule nsimu ethelayo futhi abazimisele ukunciphisa intshiseko yabo