Siza Abanye Bazi UJehova

1. Uzizwa kanjani lapho ubona ofunda naye iBhayibheli ethuthuka?

UZIZWA kanjani lapho ofunda naye iBhayibheli eza emhlanganweni webandla okokuqala, eqala ukuphendula emhlanganweni webandla, exoxela abanye ngokholo lwakhe futhi ngokuhamba kwesikhathi enquma ukuzinikezela kuJehova uNkulunkulu? Akungabazeki ukuthi ujabula kakhulu! Yiqiniso ukuthi nguJehova osiza esifunda naye iBhayibheli athuthuke ngokomoya. Sidumisa uJehova lapho sibona indlela asiza ngayo umuntu akhule ngokomoya.—1 Kor. 3:​5-9; 3 Joh. 3, 4.

2. Iyini intando kaJehova ngalabo abafundelwa iBhayibheli? (1 Thimothewu 2:​3, 4)

² Intando kaNkulunkulu ukuba “zonke izinhlobo zabantu zisindiswe futhi zithole ulwazi olunembile lweqiniso.” (Funda eyoku-1 Thimothewu 2:​3, 4.) UJehova ufuna abantu benze konke abangakwenza ukuze bamazi, bazi nezinjongo zakhe. (Jer. 9:24) Lokho kusho ukuthi kudingeka bathole ulwazi olunembile. Igama lolimi lokuqala elihunyushwe ngokuthi “ulwazi olunembile” alisho ukumane ufunde amaqiniso, kodwa lisho ukuba nolwazi “olwenza umuntu ashintshe indlela aphila ngayo,” njengoba kusho enye incwadi echaza iBhayibheli. Lapho umuntu ofunda naye iBhayibheli eqala ukwazi uJehova, lolo lwazi luthonya indlela aphila ngayo. Lumvulela ithuba lokuthola “ukuphila okuphakade.”—Joh. 17:3.

3. Sizoxoxa ngani kulesi sihloko?

³ UJehova usinike ilungelo lokusiza abanye bamazi. Kulesi sihloko, sizoxoxa ngale mibuzo elandelayo: Kungani abantu esifunda nabo iBhayibheli kudingeka bamazi kahle uJehova? Singabafundisa kanjani ukuthi unjani uJehova? Singabasiza kanjani ukuba basebenzise ulwazi abanalo ngoJehova ekuphileni kwabo?

SIZA OFUNDA NAYE IBHAYIBHELI AMAZI KAHLE UJEHOVA

4. NgokukaMarku 12:​30, iyini injongo yethu eyinhloko lapho siqhuba isifundo seBhayibheli?

⁴ UJesu wathi umyalo omkhulu kunayo yonke ukuthanda uJehova ngayo yonke inhliziyo yethu nangawo wonke umphefumulo wethu, ngayo yonke ingqondo yethu nangawo wonke amandla ethu. (Funda uMarku 12:30.) Esifunda naye iBhayibheli kumele amazi uJehova ukuze amthande. Asifuni azinikezele kithi, ezimfundisweni ezithile noma enhlanganweni, kodwa sifuna azinikezele kuJehova. Ngakho lapho siqhuba isifundo seBhayibheli, injongo yethu eyinhloko ukusiza esifunda naye azi uJehova futhi amthande.

5. Yini ofunda naye iBhayibheli ayoyenza ngenxa yokuthi uyamthanda uJehova?

⁵ Kukhona ukuhlobana okukhona phakathi kothando nokulalela. Lapho ofunda naye iBhayibheli esemazi futhi emthanda uJehova, uyofuna ukumlalalela. UJesu wathi: “Ukuze izwe lazi ukuthi ngiyamthanda uBaba, ngenza njengoba nje uBaba engiyalile.” (Joh. 14:31) Ngendlela efanayo, uthando ngoJehova—ukwedlula noma yini enye—luyokwenza ofunda naye iBhayibheli amlalele futhi ahlale eqotho kuye.—1 Joh. 5:3.

6. Ukwazi uJehova kuyomsiza kanjani ofunda naye iBhayibheli lapho enza izinqumo? Nikeza isibonelo.

⁶ Labo esifunda nabo iBhayibheli asebemazi kahle uJehova cishe bayokwenza izinqumo ezihlakaniphile. Ngokwesibonelo: Umshayeli webhanoyi akafundi ukushayela ibhanoyi ngokumane afunde imithetho yokushayela ibhanoyi noma ngokubhala izivivinyo. Kumele alishayele ibhanoyi izikhathi eziningana. Ngokuhamba kwesikhathi, uyafunda ukuthi kufanele alishayele kanjani ezimweni zezulu ezihlukahlukene nokuthi izinqumo zakhe ziyithinta kanjani indlela elihamba ngayo. Ngendlela efanayo, esifunda naye iBhayibheli ngeke agcine ngokwazi uJehova ngokufunda ngaye kuphela, kodwa uyomazi nangokubuka indlela izinto ezimhambela kahle ngayo lapho enza izinqumo ezihambisana nezimiso zeBhayibheli. Njengoba eqhubeka emazi kangcono uJehova ebona nendlela uBaba wakhe osezulwini amsiza ngayo, uyofunda ukwenza izinqumo ezihlakaniphile noma ngabe ubhekene naziphi izimo.

7. Ukwazi uJehova kwamsiza kanjani uJosefa ukuba enze isinqumo esihle?

⁷ Ukwazi uJehova kwamsiza uJosefa ngesikhathi umkaPotifari ezama ukulala naye. Kusukela esengumfana, akungabazeki ukuthi uJosefa wafunda ngendaba ka-Adamu no-Eva, neka-Abrahama noSara. (Gen. 2:24; 20:​3, 6) Ngokufunda izindaba zalabo bantu, uJosefa wakwazi ukubona indlela uJehova abheka ngayo umshado nocansi. UJosefa wamazi kahle uJehova kangangokuba wenqaba ukulala nomkaPotifari, wathi kuye: “Ngingabenza kanjani lobu bubi obukhulu kangaka ngone kuNkulunkulu?” (Gen. 39:​7-9) Wayazi ukuthi yini enhle nembi emehlweni kaJehova. Wayeqonda ukuthi yini eyayiyomzwisa ubuhlungu uNkulunkulu. Ngenxa yalokho, uJosefa wenza isinqumo esihle. Uma sisiza esifunda nabo iBhayibheli ukuba bamazi kahle uJehova futhi bafunde ukuthi unjani, nabo bayokwenza izinqumo ezimjabulisayo.

MFUNDISE UKUTHI UNJANI UJEHOVA

8. Ungayisebenzisa kanjani incwadi ethi Phila Kuze Kube Phakade! ukuze usize ofunda naye azi uJehova?

⁸ Ungamfundisa kanjani-ke ofunda naye iBhayibheli ukuthi unjani uJehova? UJehova wasiza uJobe ukuba afunde okwengeziwe ngaye ngokumbuza imibuzo engaphezu kwengu-50! (Jobe 38:1–41:34) Nathi singabuza imibuzo. Imibuzo esencwadini ethi Phila Kuze Kube Phakade! ihloselwe ukusiza umfundi aqhubeke efunda ngobuntu bukaJehova. (Bheka ibhokisi elithi “Imibuzo Esisiza Lapho Sifundisa.”) Ngakho, sebenzisa le mibuzo ukuze usize ofunda naye iBhayibheli azi uJehova.

9-10. (a) Yini eyosiza esifunda nabo bafunde okwengeziwe ngoJehova njengoba befunda iBhayibheli? (Jakobe 5:11) (b) Nikeza isibonelo sendlela indaba eseBhayibhelini engakuveza ngayo lokho okujabulisa uJehova noma okungamjabulisi.

⁹ Lapho siqala ukufunda iBhayibheli nabantu, sibakhuthaza ukuba baqale ukufunda iBhayibheli nsuku zonke.a Singabasiza kanjani bafunde okwengeziwe ngoJehova njengoba belifunda? Singasikisela ukuthi njalo lapho befunda iBhayibheli bacabange ngokuthi kungani uJehova afaka lawo mavesi abawafundayo eZwini lakhe nangokuthi yiziphi izimfanelo azivezayo ngaye. Phawula ukuthi umfundi uJakobe wakwenza kanjani lokho lapho ekhuluma ngendaba kaJobe. UJakobe akakhulumanga nje kuphela ngemfanelo kaJobe—ukukhuthazela—kodwa wakhuluma nangezimfanelo zikaJehova—uthando nesihe saKhe.—Funda uJakobe 5:11.

¹⁰ Sifuna esifunda nabo iBhayibheli baqonde indlela indaba ngayinye eseBhayibhelini ekuveza ngayo lokho okujabulisa uJehova noma lokho okungamjabulisi. Ngokwesibonelo, ake sithi esifunda naye iBhayibheli usebenzisa ishadi elithi “Qala Manje Ukufunda IBhayibheli” elisencwadini ethi Phila Kuze Kube Phakade! bese esitshela ukuthi ukhethe ukufunda indaba kaDaniyeli esemgodini wamabhubesi. Singase simkhuthaze ukuba azindle ngemibuzo enjengokuthi: ‘Kungani uJehova amsindisa uDaniyeli? Le ndaba ingitshelani ngalokho okujabulisa uJehova?’ (Dan. 6:​10, 22) Angazibuza nokuthi: ‘Yini eyenzeka kula madoda amangalela uDaniyeli? Lokhu kungitshelani ngalokho okudumaza uJehova?’ (Dan. 6:​4, 5, 24) Ekugcineni, angacabanga nangezinye izimfanelo zikaJehova ezivezwe kule ndaba.—Dan. 6:​26, 27.

11. Singamsiza kanjani esifunda naye iBhayibheli abheke isifundo sakhe seBhayibheli njengesipho esivela kuJehova?

¹¹ Siyajabula lapho esifunda naye iBhayibheli ezibona izinzuzo azitholayo ngokutadisha iBhayibheli. Kodwa, kufanele simsize abone ukuthi uMthombo walezo zinzuzo uJehova, uMfundisi Omkhulu. (Isaya 30:​20, 21) Esifunda naye angase asibonge ngalokho esimfundisa kona mhlawumbe aze asincome ngendlela esifundisa ngayo. Nakuba kungekubi ukusincoma kwakhe ngokusuka enhliziyweni, kufanele sizame ukuluyisa kuJehova lolo dumo nokubonga.

MSIZE UKUBA AKUSEBENZISE LOKHO AKUFUNDAYO

12-13. Ukwazi uJehova kungamsiza kanjani esifunda naye lapho efunda indaba eseBhayibhelini akuthola kunzima ukuyiqonda? (Bheka nesithombe.)

¹² Ukuze sizuze ngokugcwele olwazini olunembile, kumele sikusebenzise ngokugcwele lokho esikwaziyo. Ngakho ungamsiza kanjani ofunda naye iBhayibheli asebenzise lokho akufundayo? Okokuqala, mfundise ukuba akhumbule lokho asekwazi ngoJehova lapho efunda indaba eseBhayibhelini akuthola kunzima ukuyiqonda. Ngokwesibonelo, lapho efunda ngezahlulelo zikaJehova, angase azibuze ukuthi kungani uJehova ababulala abanye abantu kodwa wangababulala abanye. Ungamsiza kanjani ofunda naye iBhayibheli acabange ngale ndaba ngendlela efanele?

¹³ Ungakhuthaza ofunda naye iBhayibheli ukuba acabange ngalokho asekufundile ngoJehova. Kuyigugu kangakanani ukuphila kuJehova? (2 Pet. 3:9) Kungakanani akwenzile ukuze asisindise—ngisho noma siyizoni? (Efe. 2:​4, 5) Ingabe uJehova ujezisa abantu okungafanele bajeziswe? Ngakolunye uhlangothi, ukhona yini umuntu amvumelayo ukuba angajeziswa okumele ngabe uyajeziswa? (Eks. 34:6, 7) Ngezinye izikhathi, indaba eseBhayibhelini ayiyivezi imininingwane ezosenza siyiqonde indlela uJehova anqume ngayo. Kodwa, asiyidingi leyo mininingwane. Siyamazi uNkulunkulu wethu futhi siyaqiniseka ukuthi uhlale enza okulungile.

14. Ungamsiza kanjani ofunda naye iBhayibheli uma ekuthola kunzima ukuzwana nothile osebandleni?

¹⁴ Cabanga ngendlela yesibili esifunda naye iBhayibheli angakusebenzisa ngayo lokho akufundayo ngoJehova. Ake sithi ofunda naye iBhayibheli useyaya emihlanganweni yebandla, kodwa ukuthola kunzima ukuzwana nomuntu othile osebandleni. Mhlawumbe ukhutshwe yilowo mmemezeli. Mkhuthaze ukuba acabange ngokuthi uJehova ubabheka kanjani abafowethu nodadewethu. Yikuphi ukuzidela uJehova akwenzile ukuze ababonise ukuthi uyabathanda? (Joh. 3:16) Bubaluleke kangakanani kuye ubunye bethu njengamaKristu? (IHu. 133:1) Uzizwa kanjani lapho senza konke esingakwenza ukuze buhlale bukhona lobo bunye? (2 Kor. 13:11) Siza ofunda naye abone indlela uJehova ayojabula ngayo lapho sigxila ezimfanelweni ezinhle zabanye kunokugxila emaphutheni abo.

15-16. (a) Esifunda naye iBhayibheli angamlingisa kanjani uJesu lapho kudingeka enze isinqumo esibalulekile? (Johane 8:29) (b) UMarianne wamsiza kanjani lowo ayefunda naye iBhayibheli ukuba enze isinqumo esihle? (Bheka nesithombe.)

¹⁵ Okokugcina, ungasiza ofunda naye iBhayibheli asebenzise lokho akwaziyo ngoJehova ukuze enze izinqumo ezinhle. Ungase uqale ngokumbonisa isifundo 35 encwadini ethi Phila Kuze Kube Phakade!, esinesihloko esithi “Indlela Yokwenza Izinqumo Ezinhle.” Kodwa kuthiwani uma ofunda naye esakuthola kunzima ukwenza isinqumo ngisho noma esethandazile futhi wenza ucwaningo? Kungase kumkhungathekise ukuthi leso sihloko sinezimiso zeBhayibheli eziningi, angaqiniseki ukuthi yiziphi ezisebenzayo esimweni abhekene naso. Ungasikisela ukuba acabange ngesibonelo sikaJesu. Wayezenza kanjani uJesu izinqumo? Wathi: “Ngaso sonke isikhathi ngenza izinto ezimjabulisayo [uBaba wami].” (Funda uJohane 8:29.) Khuthaza ofunda naye ukuba azibuze, ‘Ngokwalokho engikutholile lapho ngenza ucwaningo nalokho engikufundile ngoJehova, yisiphi isinqumo esiyomjabulisa?’ Noma yisiphi isinqumo esijabulisa uJehova siyisinqumo esihle.

¹⁶ Owesifazane waseChile owayefundelwa iBhayibheli kwakudingeka enze isinqumo esibalulekile. Umndeni wakubo wawumcindezela ukuba amukele umsebenzi owawuzomholela imali eningi owawuzomenza angabi khona njalo emihlanganweni yebandla. UMarianne, owayefunda naye iBhayibheli, uthi: “Ngamnxusa ukuba acabange ngokuthi isinqumo sakhe sasiyomenza azizwe kanjani uJehova. Sasiyomjabulisa yini noma sasiyomdumaza? Ngamkhuthaza nokuba athandaze kuJehova amtshele ngokuqondile ngesimo abhekene naso bese ebheka ukuthi uzomphendula kanjani. Wawenqaba lowo msebenzi futhi ngokushesha wathola omunye umsebenzi owawumenza akwazi ukuya kuyo yonke imihlangano yebandla.” Phawula ukuthi kunokuba amtshele ukuthi enzeni, uMarianne wamsiza ukuba azindle ngalokho ayesekwazi kakade ngoJehova. Ngenxa yalokho, lokho okwenzeka akugcinanga nje ngokuqinisa ubuhlobo balowo owayefundelwa noMarianne, kodwa kwaqinisa nobuhlobo bakhe noJehova. UMarianne uthi ngalo ayefunda naye: “Wafunda ukuthi uJehova uyasikhathalela uma ukumkhonza kuza kuqala kithi.”

IZIBUSISO EZITHOLWA YILABO ABAMAZI KAHLE UJEHOVA

17. Ngaphandle kokufundisa esifunda nabo iBhayibheli amaqiniso aseBhayibhelini, yini enye esifuna bayenze?

¹⁷ Ziningi izimfundiso ezibalulekile ezifundwa yilabo esifunda nabo iBhayibheli. Bafunda izimfundiso zeBhayibheli eziyisisekelo—ezihlanganisa isimo sabafile, isihlengo nalokho okuyokwenziwa uMbuso kaNkulunkulu. Bafunda nangendlela inhlangano ehlelwe ngayo—njengokuthi kwenzekani emihlanganweni yethu, bafunde ngelungiselelo labadala nangendima yeNdikimba Ebusayo. Noma kunjalo, asifuni esifunda nabo bagcine ngokufunda la maqiniso nje kuphela. Sifuna bamazi kahle uJehova.

18. Yiziphi izibusiso ezitholwa yilabo abazi uJehova?

¹⁸ Kuyilungelo ngempela kithi ukufundisa abanye ukuba bazi uJehova! Ngisho namanje, labo abazi uJehova nabamkhonzayo bathola isibusiso sokujabulela ukuphila okujabulisayo namuhla. (IHu. 25:​12-15) Esikhathini esizayo, bonke labo ‘abathola ulwazi ngoNkulunkulu weqiniso,’ uJehova, bayophila phakade futhi bajabule. (1 Joh. 5:20) Kodwa akupheleli lapho. IBhayibheli lisitshela ukuthi labo abenza konke abangakwenza ukuze bamazi uJehova futhi bamthande ‘baziwa nguye.’ (1 Kor. 8:3) Ngempela, uNkulunkulu uMninimandla Onke uyasibona futhi usibheka njengabangani bakhe. Sithola umvuzo omkhulu ngempela ngokwazi owukuphela kukaNkulunkulu weqiniso!