Imibuzo Evela Kubafundi
Yimuphi “umqondo” uJehova ayowufaka ezinhliziyweni zezizwe esikhathini esizayo esiseduze?
Ngokuphathelene nokuqala kosizi olukhulu, isAmbulo 17:16, 17 sithi: “Izimpondo eziyishumi ozibonile nesilo sasendle, ziyosizonda isifebe zisicekele phansi zisihambise nqunu, ziyoyidla ziyiqede inyama yaso futhi zisishise ngomlilo siphele. Ngoba uNkulunkulu ukufake ezinhliziyweni zawo ukuba afeze umqondo wakhe, yebo, ukuba afeze umqondo wawo owodwa ngokunika isilo sasendle umbuso wawo.” Esikhathini esidlule, izincwadi zethu bezithi “umqondo” uJehova ayowufaka ezinhliziyweni zezizwe ukuba zibhubhise inkolo yamanga.
Nokho, kudingeka siyilungise indlela ebesikuqonda ngayo lokhu. “Umqondo” uJehova ayowufaka ezinhliziyweni zezizwe ukuba zinike ‘isilo sasendle umbuso wazo.’ Ukuze uqonde ukuthi lokho kuyogcwaliseka kanjani, cabanga ngale mibuzo elandelayo.
Obani okukhulunywa ngabo kulesi siprofetho? “Isifebe” sibizwa nangokuthi “iBhabhiloni Elikhulu”; simelela umbuso wezwe wenkolo yamanga. ‘Isilo sasendle esinombala obomvu’ siwuphawu lwenhlangano yokuthula eyasungulwa ngo-1919 eyayibizwa ngokuthi iNhlangano Yezizwe, manje ebizwa ngokuthi iZizwe Ezihlangene. (IsAm. 17:3-5) “Izimpondo eziyishumi” zimelela bonke ohulumeni abasekela isilo sasendle.
Yibuphi ubuhlobo obukhona phakathi kwesifebe nesilo sasendle esinombala obomvu? Isifebe besilokhu ‘sihlezi phezu’ kwesilo sasendle, sisisekela futhi sizama ukusithonya, ngisho nokusilawula imbala.
Yini eyokwenzeka ngesifebe? Isilo sasendle, kanye nezimpondo eziyishumi ezisisekelayo, “ziyosizonda isifebe.” Ngenxa yenzondo abanayo ngaso, bayothatha yonke ingcebo yaso futhi babonise wonke umuntu ukuthi sibi kangakanani. Bayofeza isahlulelo sikaJehova ngokuphathelene naso, okuwukuthi, sibhujiswe ngokuphelele. (IsAm. 17:1; 18:8) Lokho kuyoba ukuphela kwezinkolo zamanga. Kodwa, ngaphambi kokuba lokho kwenzeke, uJehova uyobangela ukuba izizwe zenze into engakaze yenzeke emlandweni wokubusa kwabantu.
Yini uJehova ayobangela izizwe ukuba ziyenze? Uyofaka “umqondo wakhe” ezinhliziyweni zezimpondo eziyishumi, okuwukuba, ‘zinike isilo sasendle [esinombala obomvu] amandla azo negunya lazo’—iZizwe Ezihlangene. (IsAm. 17:13) Cabanga ngokuthi kusho ukuthini lokho. Ingabe ohulumeni babantu bayomane bazinqumele ukunika isilo sasendle amandla abo negunya labo? Cha! Lesi siprofetho sibonisa ukuthi uNkulunkulu ngokwakhe uyobathonya ukuba benze kanjalo. (IzAga 21:1; qhathanisa no-Isaya 44:28.) Ingabe lolo shintsho luyokwenzeka kancane kancane? Cha! Ngokusobala lolo kuyoba wushintsho olukhulu oluyokwenzeka ngokushesha. Isilo sasendle esiyobe sesinamandla siyobe sesikhipha isahlulelo sikaJehova ezinkolweni zamanga ngokuzibhubhisa unomphela.
Pho, yini esingayilindela? Akufanele silindele ukubona imibiko yabezindaba ethi kancane kancane ohulumeni sebeqala ukuzisekela kakhudlwana iZizwe Ezihlangene. Nakhu esingakulindela: Kungazelelwe, uJehova uyokufaka ezinhliziyweni zezizwe ukuba zinike isilo sasendle amandla azo. Lapho lokho kwenzeka, siyokwazi ukuthi usizi olukhulu seluzoqala. Okwamanje, “masihlale siphapheme futhi sihlale sisangulukile” ngoba maduzane kuzokwenzeka izinguquko kungazelelwe!—1 Thes. 5:6.